Naase

Abrahaami guuttaba milatiyaabankka Yihoowayyo azazettiyoogaa meeze oottido gishshawu, Xoossaara deꞌiya dabbotaa minttidi deꞌiis. I Yihoowaara ubbabaa yayyennan haasayees; bana metida oyshaakka zaaridi maaddana mala a oychiis. Leemisuwawu, Xoossay Sadoomanne Gamoora katamata xayssana haniyoogaa Abrahaami erido wode, xillota nagaranchatuura issippe xayssennaadan hirggiis. He wode Sadooman deꞌiya ba ishaa naꞌaa Looxessinne a soo asaassi Abrahaami hirggennan aggenna. Abrahaami ba huuphiyaa kawushshidinne Xoossan ammanettidi ‘ha saꞌaa ubbaa pirddiyaagaa’ ba oychana koyidobaa oychiis. Yihooway maariyaagaa gidiyoogaa, asa ubbaa wozanaa beꞌiyaagaanne asaa bolli pirddiyo wode xillota ashshanaagaa Abrahaama danddayan tamaarissiis. (Doo. 18:22-33) Abrahaami erido ubbabaynne i deꞌuwan beꞌidobay Yihoowaara deꞌiya dabbotaa minttanaadan a maaddidoogee qoncce. w16.02 1:11, 12

Ammanettiya asaa nuuni nashshoos. SHin Yonaataani Xoossaayyo ammanettidoogaa qoppennan, Daawitayyo ammanettidoogaa xalla nashshiyaaba gidikko, gitabaa akeekennan aggana danddayoos. Yonaataani Daawita ba baarigaaradan gidennan, dabbodan xeellidoy aybissee? Xoossaayyo ammanettiyoogaa Yonaataani xoqqu ootti xeellees. I Yihoowayyo ammanettiyoogee Daawitayyookka ammanettanaadan oottiis. Eti naaꞌꞌaykka maacettido maacha naagidi deꞌidosona. Nuuni Kiristtaaneti harati ammanettiyoogaa nashshiyoogaa xalla gidennan, nuunikka nu soo asawu, laggetuyyoonne nu mala Kiristtaanetuyyo ammanettoos. (1 Tas. 2:10, 11) SHin ooppekka aaruwan nuuni Yihoowassi ammanettana bessees. Nuussi deꞌuwaa immiday a! (Ajj. 4:11) Nuuni ayyo ammanettiyoogee tumu ufayssaanne woppaa demissees. Nuuni Xoossaayyo ammanettikko, metoy gakkikkokka a baxuuxi oyqqoos. w16.01 3:6, 7

Wozannaama yelagay ba ammanuwaappe yeeqenna. I Kawotettaa Addaraashan Xoossaa dabbo milatidi tamaare keettan alamiyaa dabbo milatissiyaabaa oottenna. Ammanuwaa paacciyaabay gakkiyo wodekka minni eqqees. (Efi. 4:14, 15) Bali baynna asi baawa. Yelagatikka gasttatikka issi issitoo nagaraa oottoosona. (Era. 7:20) Gidoppe attin, neeni xammaqettanawu qoppiyo wode, Yihooway kessido maaraa loytta kaallanawu ay keena murttidaakko akeekan qoriyoogee loꞌꞌo. ‘Taani kase oottidobay Xoossay kessido maaraa ay keenaa kaalliyoogaa bessii?’ gaada nena oycha. Mata wode ne ammanuwaa paacciyaabay gakkin neeni oottidobaa qoppa. Neeni iitaa kehaa shaakkiya akeekancha asa gidiyoogaa bessadii? Seexaanaa alamiyaa bagga gidida uri Daaneela xeellidoogaadan nena xoqqu oottidi xeellikko shin? Yihooway koyiyoobay neeni paacettiyoobaara maayettenna wodekka, ‘Xoossay koyiyoobay aybakko akeekana’ danddayay?—Efi. 5:17. w16.03 1:7-9

Nuuni Geeshsha Maxaafay ‘wurssetta gallassaa’ giyo wodiyan deꞌoos; qassi hanno gakkanawu hani erenna gita waayee hananawu matiis. (2 Xim. 3:1) Hegaa bollikka, Seexaanaynne dayddanttati saluwaappe duge saꞌaa olettido gishshawu, asay iita waayiyaa waayettiiddi deꞌees. (Ajj. 12:9, 12) Nuuni awudeegaappenne daro asawunne daro qaalan kumetta saꞌan mishiraachuwaa yootiyo gita oosuwaa oottanaadan sunttettida! Nuuni Xoossaa anjjuwaa ubbatoo demmanawu, Kiristtaane gubaaꞌiyaa baggaara imettiya kaaletuwaa mintti kaallana bessees. Ha wodiyan azazettiyoogee Seexaanaa iita alamiyaa muleera xayssiya ‘iita waayiyaa’ wode imettiya kaaletuwaa kaallanawu maaddees. (Maa. 24:21) Hegaappe simmin, ooratta alamiyan deꞌanawu ooratta kaaletoy nuussi imettana. w16.03 4:16, 18

Koyro xeetu layttaa M.L. wurssettaa heeran, kiitettida Yohaannisi malkkataa punniya laappun kiitanchata ajjuutan beꞌiis. Ichashantta kiitanchay ba malkkataa punniyo wode, issi “xoolinttee” saluwaappe duge saꞌaa kunddiyoogaa Yohaannisi beꞌiis. He “xoolinttee” qulppiyaa kushiyan oyqqiis; he qulppiyan ciimma ollaa dooyiis. Yaatin cuway tullu giidi kiyiis; qassi he cuwaa giddoppe wude boolee kiyiis. Booliyan leemisettidaageeti kattaa qohiyoogaappe, “Xoossaa maatafai som77uwan bainna asa xalaalaa” qohoosona. (Ajj. 9:1-4) Booliyaa wudee ay keena qohiyaakko Yohaannisi eriyoogee qoncce. Muuse wode, booliyaa boshay Gibxxe biittaa qohiis. (Kes. 10:12-15) Yohaannisi beꞌido, leemiso gidida boolee Yihoowa wolqqaama pirddaa awaajjiya tiyettida Kiristtaaneta loytti qonccissees. Gannate gidana saꞌaa laattana miilooniyan qoodettiya asay ha wodiyan etaara oottees. Nuuni issippetettan sabbakiyoogee daroti Seexaanaa haaruwaappe laꞌa kiyidi, worddo haymaanootiyaa agganaadan maaddiis. w16.03 3:3

Issi kaymibeena isha qofaa tumay ay keena laammiyaakko akeekana koshshees. Hegaa akeekanawu, i ba huuphiyaa Yihoowawu geppidoogee ba deꞌuwan kuuyidoban waati maaddidaakko oychana danddayaasa. He oyshay nuuni Yihoowayyo kumetta wozanappe waatidi haggaazana danddayiyaakko intte haasayanaadan maaddana danddayees. (Mar. 12:29, 30) He ishaara issippe woossananne loohanawu awu koshshiya geeshsha ayyaanaa Yihooway immanaadan oychana danddayaasa. Cimay ayyo woossiyoogaa ishay siyiyoogee, i loyttidi oottanaadan denttettana danddayees! Loohissiyoogaa doommiyo wode, tamaaree eeno giyoogee, ammanettiyoogeenne ba huuphiyaa kawushshiyoogee koshshiyoogaa akeekanaadan maaddana danddayiya amarida Geeshsha Maxaafaa qofaa issi cimay aara tobbana danddayees. (1 Kaw. 19:19-21; Nah. 7:2; 13:13; Oos. 18:24-26) Biittawu araddissiyaabay koshshiyoogaadan he eeshshati tamaariyawu keehi koshshoosona. He eeshshati i ayyaanaaban eesuwan diccanaadan maaddoosona; qaasi Xoossaa Qaalan deꞌiya ‘maalaalissiya tumatettaa’ akeekana mala ‘a ayfee pogettanaadan’ maaddana. w15 4/15 2:3, 4

Yihoowaara ubbatto haasayissiyoogee akko shiiqanawu keehi koshshiyaabaa. Yihoowaara waata haasayana danddayay? A ubbatto woossiyoogan Yihoowa haasayissaasa. (Maz. 142:2) Neeni ubbatto a Qaalaa nabbabiyoonne wotta denttada qoppiyoo wode, Yihooway nena haasayissanaadan paqqadaasa. (Isi. 30:20, 21) Neeni geeshshada yootiyoogan woossiyo wode, Yihoowa zaaroy xuura gidikkonne, hegaa loyttada akeekaasa. Yihooway ne woosaa zaariyo wode, i neessi keehi qoncci beettees. Hegaa bollikka, neeni nena wozanappe qofissidabaa Yihoowayyo yootiyo wode, i neekko keehi shiiqees. Nuuni merinawu Yihoowaara dabbotaa mintti mintti baana danddayoos. Nuuni Xoossay nuukko shiiqanaadan koyikko, akko shiiqana bessees. Hegaa gishshawu, Geeshsha Maxaafaa caddi oyqqi xannaꞌiyoogaaninne aggennan woossiyoogan ubbatoo Xoossaara haasayiyaageeta gidoos. Yaatikko, Yihoowaara dabbotaa ubbatoo mintti mintti biyoogan paaciyaa eqettana danddayoos. w15 4/15 3:3, 14, 16

Ha xiqise Seexaanay meqettaa iita gidiyoogaa loytti qonccissees! Seexaanay kumetta saꞌaa haarikkonne, hegee ayyo gidenna. Seexaanay namisettidi maanawu koyiya gaammuwaa mala. Seexaanay Yihoowa asaa mittanawu keehi koyees. Koyro xeetu layttaappe doommidi hanno gakkanawu Yesuusa kaalliyaageetu bolli i ehiido wolqqaama yedetay ayyo meqetti baynnaagaa bessees. Namisettida gaammoy shankkatiyo aybissinne qarettenna. I woranaappe kase qarettenna; qassi wori simmidikka zilꞌꞌettenna. Hegaadan, Seexaanay mittanawu koyiyoobawu aynne qarettenna. Leemisuwawu, Israaꞌeelati shori baynnaba oottido, yaaretidonne hegaa mala nagaraa oottido wode, Seexaanaa Dabloosi zuggidi eta aapputoo wochidaakko qoppa. Zimiri shori baynnabaa oottidoogeenne Gehaazi yaaretidoogee kaalettido azzanttiyaabaa neeni nabbabiyo wode, gudiya gaammoy xoonido gishshawu hombbocidoogaa akeekana danddayaasa.—Qoo. 25:6-8, 14, 15; 2 Kaw. 5:20-27. w15 5/15 1:8, 9

Nuuni waatidi Seexaanaara olettananne a xoonana danddayiyoo? Yesuusi ba erissiyo ashkkaratussi, “Danddayan intte intte shemppuwaa ashshana” yaagiis. (Luq. 21:19) Ooninne nuna qohanawu oottiyo ubbabay gamꞌꞌenna. Nuuni moorana xayikko, Xoossaara nu alꞌꞌo dabbotaa oonikka moorana danddayenna. (Roo. 8:38, 39) Yihooway hayquwaappe eta denttiyo gishshawu, Seexaanay Yihoowa ashkkarata worikkokka xooniis giyoogaa gidenna! (Yoh. 5:28, 29) Hara baggaara, Seexaanay hidootan naagiyoobi baawa. Xoossaappe haakkida a alamee xayi simmin, Seexaanay ciimma ollan yeggin 1,000 layttaa takkana. (Ajj. 20:1-3) Yesuusa SHaꞌu Layttaa Haaruwaa wurssettan, Seexaanay wottiyoobi baynna asaa wurssettan balettanawu guutta wodiyawu “qashuwaappe birshshettana.” Hegaappe simmin, Dabloosi xayana. (Ajj. 20:7-10) Dabloosayyo hidooti xayikkonne, neeyyo deꞌees! Ammanuwan minnada, Seexaanaa eqetta. (1 PHe. 5:9) Seexaanaara olettananne a xoonana danddayaasa! w15 5/15 2:1, 18

Cincca asi issibaa qoppiyoogee tamaa mala gidana danddayiyoogaa akeekees. Tamay maara goꞌettikko, qumaa kattiyo wodiyaagaadan nuna maaddana danddayees. SHin tamaa teqqana xayikko, keettaa xuuggananne son deꞌiyaageeta worana danddayees. Hegaadan, nuuni Yihoowappe tamaariyoobaa qoppiyoogee maaddees. SHin, shori baynnabaa qoppiyoogee nuna qohana danddayees. Leemisuwawu, nuuni ubbatoo iitabaa qoppikko, hegaa amottidi nagaraa oottana danddayoos. SHori baynnabaa qoppiyoogee ayyaanaaban hayqqanaadan oottana danddayees! (Yaaq. 1:14, 15) Nuuni shori baynnabaa qoppennaadan Yesuusi zoriis. I, “Maccaaro xeellidi amottiya ubbai, ba wozana giddon he wode iira shaaramuxiis” yaagiis.—Maa. 5:28. w15 5/15 4:11, 12, 14

Yesuusi sabbakiyo wode, maalaalissiya darobaa oottiis. He maalaalissiyaabay i ubba asawu keehi qoppiyoogaa bessiyaaba. Issi wode Yesuusi keehi azzanttiyaabaa beꞌiis. (Mar. 1:39, 40) A sinttan deꞌiya bitaniyaa inchirichaa giyo keehi yashshiya harggee oyqqiis. Haakimee Luqaasi, ‘Inchirichay a bolla ubban kumiis’ giidi, bitaniyaa harggee ay keena goobidaakko qonccissiis. (Luq. 5:12) He bitanee Yesuusa “be7idi, a sinttan gulbbatidi, ‘Godau, neeni koyikko, tana pattanau danddayaasa’ yaagidi woossiis.” Yesuusawu a pattiyo wolqqay deꞌiyoogaa he bitanee siribeenna; shin Yesuusi a pattanawu koyiyaakkonne i eranawu koyiis. Bitanee wozanappe oychidobaa Yesuusi woygidi zaaranee? Yesuusi ba kushiyaa yeddidi, a bochchidi, “Taani koyais; paxa!” yaagidi, qarettiyoogaa bessiya qaalan mintti yootiis. Hegaappe simmin, “inchchirichchai bitaniyaa yeddi aggiis.” (Luq. 5:13) Ee Yesuusi asaa keehi siiqiyoogaa bessiis.—Luq. 5: 17. w15 6/15 2:3-5

Ayyaanaaban kaymida Kiristtaanee kehatettan maaddanaadan xalan yootiyoogee, nuuni iitabaa amottennaadan oottana danddayees. (Ibr. 3:12, 13) Nuuni azalla gididobaa ayyaanaaban kaymida Kiristtaaniyawu yootiyoogee akeekibeennabaa akeekanaadan maaddana danddayees. Hegee nuuni Yihoowa siiquwan deꞌanawu giigissana koshshiyaabaa giigissanaadan maaddana danddayees. Gubaaꞌiyaa cimati nuna maaddana danddayoosona. SHori baynnabaa amottanaadan oottiyaabay pornograafiyaa beꞌiyoogaa gidikko, maaduwaa oychiyoogee keehi koshshiyaaba. Maaduwaa oychanawu keehi takkikko, shori baynnabaa amottiyo “amoi shahaaridi, nagaraa yelees”; hegee qassi harata qoheessinne Yihoowa sunttay borettanaadan oottees. Yihoowa ashkkaratuppe daroti a ufayssanawunne Kiristtaane gubaaꞌiyan deꞌanawu amottiyo gishshawu, maaduwaa eeno giidi ekkidosona.—Yaaq. 1:15; Maz. 141:5; Ibr. 12:5, 6. w15 6/15 3:15-17

Gita Baabiloonin leemisettida haymaanooteti xayiyo wode, kase he haymaanootetu yame gidida ubbay hayqqanee? CHii hayqqokkona. Haymaanootiyaa kaalettiyaageetuppe amaridaageetikka bantta haymaanootiyaa aggidi, mule he worddo haymaanootiyaa yame gidi erokko geennan waayi aggana. (Zak. 13:5, 6) Xoossaa asay he wode waananee? Yesuusi, “Xoossai he gallassatu qoodaa guuttiyoi bainnaakko, asa gididai ooninne attenna; shin i ba doorido asatu gishshau, he gallassatu qoodaa guuttana” yaagiis. (Maa. 24:22) Waayee 66 M.Ln ‘guutta’ wodiyan attiis. Hegee Xoossay “doorido” tiyettida Kiristtaaneti katamaappenne hegaa heeraappe baqatanaadan maaddiis. Hegaadankka, Xoossay “doorido asatu gishshau,” iita waayiyawu koyro shaahoy ‘guutta’ wodiyan wurana. ‘Tammu kaciyan’ leemisettida kawotettati ba asaa xayssanaadan Xoossay paqqadenna. (Ajj. 17:16) Guuttaa peeqaa demmiyo wodee deꞌana. w15 7/15 2:5, 6

Nuuni doorana danddayoos. Nuuni ubbay paaciyaa eqettanawu woy eqettennan agganawu kuuyana danddayoos. (Maa. 6:13; Yaaq. 1:13-15) Yesuusi bana gakkida ubba paaciyawu haniya xiqisiyaa Xoossaa Qaalaappe yootidi, sohuwaara Seexaanaa eqettiis. Yaatiyoogan, Yesuusi Xoossaa haaruwawu exatiis. SHin Seexaanay hidootaa qanxxibeenna. I Yesuusa paaccanawu injjetiya wodiyaa demmana gakkanaassi naagiis. (Luq. 4:13) Yesuusi i ammanettennaadan oottanawu Seexaanay paaccido paace ubbaa muletoo eqettiis. SHin, Seexaanay nena gujjin, Yesuusa kaalliyaageeta paaccanawu malees. Yihoowa haaruwaara gayttidaagan denddida oyshawu haꞌꞌikka zaaro koshshees. Hegaa gishshawu, Yihooway Seexaanay nuna paaccanaadan paqqadiis. Xoossay nuna paaccenna. SHin, i nunan ammanetteesinne nuna maaddanawu koyees. Gidikkokka, Yihooway nuuni koyidobaa dooriyo maataa bonchiyo gishshawu, paaciyan gelennaadan nuna teqqenna. Nuuni ayyaanaaban beegottidi deꞌananne mintti woossana koshshees. w15 6/15 5:13, 14

Kiristtaaneti oossinne exatennan agganawu bantta qofaanne bantta kahaa loohissana bessees (Roo. 14:19) Leemisuwawu, beni Yugozilaaviyan deꞌiya Miryetibaa akeeka. A naatettaappe doommada Serbbiyaa biittaa asaa ixxawusu. Yihooway asa asappe shaakkennaagaanne hara zariyaa ixxanaadan denttettiyay Seexaanaa gidiyoogaa era simmada, a ba zariyan ceeqettiyoogaa agganawu baaxetaasu. SHin a deꞌiyoosan issi zaree hara zariyaara olettido wode, Miryeta aggido ixuwaa doommada Serbbiyaa biittaa asawu sabbakanawu metootaasu. SHin hegaa mala iita qofay a aynne oottennan bawu xayana danddayennaagaa akeekaasu. A he paaciyaa xoonana mala Yihooway maaddanaadan woossaasu. A, “Taani minnada haggaaziyoogee keehi maaddiyoogaa akeekaas. Haggaazuwan taani Yihoowagaadan asaa siiqanawu maliyo gishshawu, ta qoppiyo iita qofay xayidoogaa beꞌaas” yaagaasu. w15 7/15 3:11-13

Yihudaa Kawuwaa Yoosaafixaa akeeka. Issi wode, Israaꞌeela Kawoy Akaabi olettiyo wode, Yoosaafixi ayyo exatanawu maayettiyoogan iitabaa oottiis. Wordduwaa hananabaa yootiya 400 asati iita kawoy Akaabi xoonanaagaa yootikkonne, i xoonettiyoogee attennaagaa Yihooway kiittin hananabaa yootiya Mikaayi yootiis. Olan Akaabi hayqqiis; qassi Yoosaafixi hayqqiichi attiis. I Yerusalaame simmin, Akaabaara exatido gishshawu awu seeray imettiis. Gidikkokka, hananabaa yootiya Hanaana naꞌay Yeehu Yoosaafixi ‘oottido loꞌꞌobay’ deꞌiyoogaa yootiis.” (2 Odi. 18:4, 5, 18-22, 33, 34; 19:1-3) Ee, Yoosaafixi eeyyabaa oottiis; shin kase i oottido loꞌꞌobaa Yihooway beꞌiis.(2 Odi. 17:3-10) Geeshsha Maxaafan deꞌiya ha qofay, nuuni nagarancha gidikkokka kumetta wozanaappe Yihoowa ufayssanawu koyikko, i aggennan nuna siiqiyoogaa hassayissees. w15 8/15 1:8, 9

Xoossay ehaana ooratta alamiyan deꞌanawu ha wodiyan waanidi giigettana danddayiyoo? Hara biitti biidi deꞌanawu halchida giidi qoppoos. Yaa biidi deꞌanawu waanidi giigettana danddayiyoo? Yan asay haasayiyo qaalaa tamaariyoogaa doommana danddayoos. Eta wogaabaa tamaariyoogeekka maaddiyaaba. Eta qumaappe amaridaagaa mi beꞌana danddayoos. Amarida ogiyan, he biittan deꞌiyaabadan deꞌiyoogaa doommana danddayoos. Nuuni yaa biidi hegaadan deꞌanawu koyoos. Hegaadankka, danddayettida keenan ooratta alamiyan deꞌanawu qoppiyoogaadan ha wodiyan deꞌiyoogan, he wodiyawu giigettana danddayoos. Issi issi asay ba koyidoogaadan deꞌiyoogaa keehi xoqqu ootti xeellana danddayees; shin hegee ay kaalettidee? Xoossaa zoriyaa siyennan ixxiyoogee waayiyaa, metuwaanne daafabaa kaalettiis. (Erm. 10:23) Asay ubbay siiquwan haariya Yihoowawu haarettana wodiyaa keehi yeemottidi naagoos! w15 8/15 3:4, 5

Ekkanawu woy gelanawu koyiya Kiristtaaneti laggetettaa xeelliyaagan naagettiyoogee keehi koshshiyaaba. Xoossawu haggaaziya, ekkana woy gelana koyiyaageeti ‘Godaa ammaniya ura,’ hegeekka bana Yihoowawu geppidi ayyo goynniyaanne Geeshsha Maxaafaa maaraadan deꞌiya xammaqettida ura xallaa ekkanaadan woy gelanaadan Geeshsha Maxaafay zorees. (1 Qor. 7:39) Kiristtaaneti bantta mala Kiristtaaniyaa aqo lagge oottidi dooriyoogan, Yihoowawu aqidanne ammanettidi deꞌanaadan banttana maaddiya laggiyaa demmoosona. Yihooway ba ashkkaratussi aybi loꞌꞌokko erees; qassi aqo deꞌuwaa xeelliyaagan i yootiyoobay ubbatoo issi mala. Muuse baggara Israaꞌeelata i azazido, akeekanawu metenna azazuwaa hassaya. Eta yuushuwan deꞌiya, Yihoowawu goynnenna asaa xeelliyaagan Israaꞌeelata hagaadan giis: “Intte etaara ekettoppitenne gelettoppite. Intte macca naata eta attuma naatuyyo immoppite. . . . Aissi giikko, eti intte naata tana kaalliyoosaappe hara eeqatuyyo goinnanaadan, wora zaarana.”—Zaa. 7:3, 4. w15 8/15 4:12, 13

Nu kahaa waati loohissana danddayiyoo? Nuuni Geeshsha Maxaafaa ubbatoo xannaꞌana, nabbabidoogaa wotti dentti qoppananne tamaaridobaa oosuwan peeshshanaadan Yihooway maaddana mala woossana koshshees. Yaatiyoogee tuma gididabaanne higgiyaa eriyoogaa xalla gidennaagee qoncce. Nuuni Geeshsha Maxaafaa xannaꞌiyo wode Yihoowa, a eeshshaa, i dosiyoobaanne ixxiyoobaa loddan loddan loytti akeekoos. Hegee nu kahay Xoossaa Yihoowa ogiyaara maayettanaadan oottees. Yaatiyo wode, nu wozanay nuuni a keehi milatanawu koyanaadan denttettees. SHin Nu mala Kiristtaanee akeekan kuuyido issibaa nuuni akeekana xayikko, a bolli pirddanawu eesotana koshshenna; woy a qofaa laamissanawu baaxetana koshshenna. A kahay loytti loohana bessiya “shugo” gidana danddayees; woy issi issiban keehi pirddiyaagaa gidana danddayees.—1 Qor. 8:11, 12. w15 9/15 2:4, 8, 10

Xoossay medhido ubbabaappe saꞌay dumma. Yihooway nuussi deꞌuwawu koshshiya ubbabaa immiyoogaa xalla gidennan, ufayttidi deꞌana danddayiyo loꞌꞌiya, injjetiyaanne hirggennan deꞌiyo soho oottidi saꞌaa medhiis! (Isi. 45:18) Hegee Yihooway nuna ay keena siiqiyaakko bessiyaaba. (Iyy. 38:4, 7; Maz. 8:3-5) Yihooway nuuni deꞌanaadan loꞌꞌo sohuwaa medhikkokka, ufayssan woppu giidi deꞌanawu ashuwawu koshshiyaabaa xallay nuussi gidennaagaa erees. Issi naꞌay ba aawaynne aayyiyaa bana siiqiyoogaa beꞌiyo wode, tumuppe woppu giidi deꞌees. Yihooway ba siiquwaanne qaretaa asay akeekanaadaaninne a milatanaadan, ayyaanaabaa koshshay deꞌanaadan oottidi eta ba leemisuwan medhiis. (Doo. 1:27) Hegaa bollikka, Yesuusi, “Bantta ayyaanan hiyyeesa gididoogaa eriyaageeti anjjettidaageeta” yaagiis. (Maa. 5:3) Yihooway siiqiya Aawaa gidiyo gishshawu, asatettaabankka ayyaanaabankka “ubbabaa palahissidi nuuyyo [immees].”—1 Xim. 6:17; Maz. 145:16. w15 9/15 4:6, 7

Mazamuraawee, “Taani Xoossan ufaissaa wottana. Aissi giikko, taani ha77ikka tana ashshiyaagaanne ta Xoossaa galatana. Ta wozanai azzaniis; hegaa gishshau, taani . . . nena hassayais” yaagidi, Yihoowa wozanappe siiqiyoogaanne an ammanettiyoogaa bessiis. (Maz. 42:5, 6) Saluwan deꞌiya nu Aawaa hegaadan siiqaynne an ammanettay? Neeni ee gaada he oyshaa zaaranawu qoppikkokka, Geeshsha Maxaafay, “Ne polo wozanan GODAA ammanetta; ne akeekan zemppoppa. Neeni oottiyo ooso ubban a sinttaya; i nena likke ogiyaa kaalettana” yaagidi yootiyoogaadan, an kaseegaappe aaruwan ammanettana danddayaasa.” (Lee. 3:5, 6) Yihooway nuna koyro siiqidi nuuni a waati siiqanaakko bessiis. (1 Yoh. 4:19) Ubbaappe aadhiya a leemisuwaa ubba wode qoppoos. Qassi ‘nu kumetta wozanaappe, nu kumetta shemppuwaappe, nu kumetta qofaappe, nu kumetta wolqqaappe’ Yihoowa siiqiyoogaa kaseegaappe aaruwan bessoos—Mar. 12:30. w15 9/15 5:17-19

Haggaaziyoogee haratu ammanuwaa minttiyoogaa xalla gidennan, nu ammanoykka minnanaadan oottees. Beni Kiristtaanetuugaadan, nuunikka nu kumetta wozanaappe Yihoowan ammaniyoogaanne ayba hanotankka xalan yootiyoogaa tamaaroos. (Oos. 4:17-20; 13:46) Nu deꞌuwan Yihooway nuna waati maaddiyaakko, qassi nu woosaa i waati zaariyaakko akeekiyo wode, nu ammanoy minnees. Kaaleeba deꞌoynne Yaasu deꞌoy hegaa bessees. Eti Hidootaa Biittaa wochiyo wode, Yihoowan ammaniyoogaa bessidosona. Gidoppe attin, hegaappe simmin eti bantta deꞌo ubban Yihooway banttana waati kaalettidaakko beꞌido wode, eta ammanoy yaa minniis. Yaasu Israaꞌeelatussi, “GODAI intte Xoossai intteyyo immana giido lo77o ubbaappe . . . issibinne attennan, ubbai polettiis” yaagidi ammanettidi yootiis. I guyyeppe gujjidi, “Hegaa gishshau ha77ikka GODAAYYO yayyite; tumu wozanaappe ammanettidi ayyo goinnite.” (Yaas. 23:14; 24:14) Yihoowa kehatettaa beꞌiyo wode, nuunikka hegaadan ammanana danddayoos.—Maz. 34:8. w15 10/15 2:10, 11

Dere haasayaa wodenne gita shiiquwaa wode issi issitoo masttooshaa xaafay? Neeni Xoossaa Qaalaappenne a dirijjitiyaappe tamaaridobaa qoppiyo wode he masttooshaa zaarettada xeelliyoogee wotta dentta qoppanawu keehi maaddees. Hegaa bollikka, aginan aginan kiyiya Wochiyo Keelaaninne Beegottite! maxeetetun, qassi gita shiiquwan kiyiya xuufetun deꞌiya ooratta qofaa nabbabananne mintti qoppana danddayoos. Neeni Laytta Maxaafaa nabbabiyo wode, hanida issibaa nabbabada takki giyoogee neeni nabbabidobaa wotta dentta qoppananne hegaa ne wozanan wottanawu maaddana danddayees. Maaddiya qofaa malaatana woy miyyiyan deꞌiya sohuwan masttooshaa xaafana danddayaasa; hegee neeni zaarettada oychanawu, gubaaꞌiyan deꞌiyaageeta heemmanawu woy dere haasayawu giigettiyo wode maaddana danddayees. Ubbaappe aaruwan, Geeshsha Maxaafaa qofay deꞌiyo xuufeta nabbabiyoode takki gaada wotta dentta qoppiyo wode, nabbabiyoobaa akeekananne loꞌꞌobaa tamaariyo gishshawu Yihoowa woosan galatana danddayaasa. w15 10/15 4:9, 10

Kiristtaaneti bantta naꞌay xammaqettiyoogaa beꞌiyo wode keehi ufayttoosona. Layttay 14 gidanaappe kase xammaqettida oyddu naatu aayyiyaa Berenisa hagaadan gaasu: “Hegee nuna keehi ufayssiis. Nu naati Yihoowawu haggaazanawu koyido gishshawu, a keehi galatida.” A gujjada, “SHin nu naati gitatiyo wode eta daro metoy gakkanaagaakka erida” yaagaasu.” Naatu dichaabaa xannaꞌiya issi eranchay aawaynne aayyiyaa bantta yelaga naatussi akeekay pacciis giidi qoppana koshshennaagaa yootiis. Ubba qassi, yelaga naati gooba gidiyoogaa, wozanappe qoppiyoogaanne laggetuura wodiyaa aattanawu koyiyoogaa i yootiis. Intte naati yelagatettan Yihoowayyo mata dabbo gidana, haggaazanawu halchidi hegaa polanawu baaxetana, qassi wozanappe qoppidi bantta huuphiyaa Yihoowawu geppananne hegaadan deꞌana danddayoosona. Yelagatettay etawukka Yesuusaagaadan ayyaanaaban diccanawu maaddiya wode gidana danddayees. w15 11/15 2:1, 2

Xoossay essido Mase Kawotettaykka i asaa siiqiyoogaa bessiyaaba. Asaa siiqiyaanne haarana danddayiya ba Naꞌawu Yihooway he Kawotettaa immiis. (Lee. 8:31) Yesuusaara saluwan issippe haarana 144,000ti hayquwaappe denddiyo wode, kase asa gididi deꞌido deꞌuwaa hassayoosona. (Ajj. 14:1) Yesuusi tamaarissido waannabay Xoossaa Kawotettaabaa, qassi i ba erissiyo ashkkarati he Kawotettaabaanne Kawotettay ehiyo anjjuwaabaa woossanaadan tamaarissiis. Yesuusi 1914n qonccido wode saluwan Xoossaa Kawotettay eqqidoogaa Geeshsha Maxaafaa hiraagay bessees. He wodeppe doommidi, Kawoy Yesuusi saluwan banaara haaranaageetuppe attidaageetanne ha alamee xayiyo wode attidi ooratta alamiyaa gelana ‘zaway baynna daro asaa’ shiishshiiddi deꞌees.—Ajj. 7:9, 13, 14. w15 11/15 3:16, 18

Kiitettida Yohaannisi Xoossaara koyro deꞌidaagee ‘Qaalaa’ gidiyoogaanne i ‘Xoossay medhidobawu koyro’ gidiyoogaa yootiis. (Yoh. 1:1; Ajj. 3:14) Xoossaa Yihooway ba qoppiyoobaanne bawu siyettiyaabaa ha bayra Naꞌaara haasayees. (Yoh. 1:14, 17; Qol. 1:15) Kiitettida PHawuloosi asaa qaalaappe keehi aadhiya, saluwan haasayiyo ‘kiitanchatu qaalaabaa’ yootiis. (1 Qor. 13:1) Yihooway biilooniyan qoodettiya asaabaanne kiitanchatubaa ubbabaa erees. Keehi cora asay daro qaalan issi kutti akko woossana danddayees. I he woosata ezggiyoogaa xalla gidennan, ezggiiddi kiitanchatuurakka haasayeesinne etawu kaaletuwaa immees. Yaatanawu, a qofaynne i haasayiyo qaalay asaagaappe keehi aadhana bessiyoogee qoncce. (Isi. 55:8, 9) Yihooway asaara haasayiyo wode, asay i yootiyoobaa akeekana mala ba qofaa geliya ogiyan odees. w15 12/15 1:1, 2

Daro biittan Geeshsha Maxaafay keehi alꞌꞌo, qassi ubbasan demmana danddayettenna; hegaa gishshawu, Geeshsha Maxaafaa demmiyoogee gita anjjo. Ruwanddappe kiittido irpporttee hagaadan gees: “Daro layttawu, ishantti xannaꞌissiyo asatuppe darotussi Geeshsha Maxaafay baynna gishshawu, he asati ayyaanaaban minnibookkona. Bantta biittan deꞌiya woosa keettay attamissidoogaa shammanawu gidiya miishshay etawu baawa. Qassi issi issi xiqisetu qofaa eti darotoo loytti akeekennaagee ayyaanaaban eesuwan diccennaadan oottiis.” Eti Ooratta Alamiyaa Birshshettaa bantta qaalan demmiyo wode hanotay laamettees. Ruwanddan oyddu yelaga naati deꞌiyo so asay hagaadan giis: “Yihoowaynne ammanettida wozannaama ashkkaray Geeshsha Maxaafaa nuussi immido gishshawu, keehi galatoos. Nuuni keehi hiyyeesa gidiyo gishshawu, nu so asawu ubbawu Geeshsha Maxaafaa shammanawu miishshi nuussi baawa. SHin, haꞌꞌi nuussi ubbawu Geeshsha Maxaafay deꞌees. Nuuni Yihoowa galatiyoogaa bessanawu, so asay issippe Geeshsha Maxaafaa galla galla nabbaboos.” w15 12/15 2:15, 16

Daawiti aynne oottana danddayenna hanotan harggi uttidaashin Abeseloomi a kawotaa araatan uttanawu malido wode, i hegaa xaafennan waayi aggana. Daawiti maarotaa demmidaba gidikkokka, i Berssaabiira oottido nagaraanne hegee kaalettiyoobaa dogibeenna. (2 Sam. 12:7-14) Gidikkokka, i sahettidi hiittan deꞌishin Xoossay a maaddanaagaa Daawiti eriis. Daawiti Xoossay maalaalissiyaabaa oottidi bana pattanaadan woossibeenna. Xiqisiyaa yuushuwan deꞌiya qofay, Yihooway hiyyeesaassi qoppiya ura maaddiyoogaadan bana maaddanaadan Daawiti oychidoogaa bessees. ‘Sahettidi hiittan deꞌishin’ a maaddiyoogee hegaappe issuwaa. (Maz. 41:3) Daawiti ba nagaray atto geetettido gishshawu, Xoossay bana minttettanaadaaninne maaddanaadan, qassi ba bollay merettido hanotay geella paxanaadan bana maaddana mala Xoossaa woossana danddayees. (Maz. 103:3) Nuunikka hegaadan oottana danddayoos. w15 12/15 4:8, 9

Xoossay hegaadan doorido uri ayyaanan tiyettidoogawu hara asa markkatettaa koshshenna. Hegaara gayttidaagan hanidabaa hara asi etawu qonccissana bessenna. Yihooway eti bantta qofaaninne wozanan hegaa ammanettanaadan oottees. Kiitettida Yohaannisi ayyaanan tiyettida Kiristtaaneta, “Kiristtoosi intte bolli Geeshsha Ayyaanaa gussiis; qassi intte ubbai tumaa ereeta” yaagiis. I gujjidikka, “Kiristtoosi intte bolli ba Geeshsha Ayyaanaa gussiis. Geeshsha Ayyaanai inttenan de7iyo gishshau, ooninne inttena tamaarissana koshshenna; aissi giikko, a Geeshsha Ayyaanai inttena ubbabaa tamaarissees. I tamaarissidoogaadan Kiristtoosan de7ite” yaagiis. (1 Yoh. 2:20, 27) Etayyookka haratuugaadan ayyaanaaban kaaletoy koshshees. SHin ayyaanan tiyettidoogaa hara asi etawu yootana koshshenna. Yihooway aybippenne aadhiya ba wolqqaa, geeshsha ayyaanan eti hegaa eranaadan oottees. w16.01 3:9, 10

Nuuni nuuyyo deꞌiyaabay gidana gaanaadan oottiyaabay Yihoowan ammanettiyoogaa. Hegee nuuni aquwaa bessiyaagaadan xeellanaadan oottees. (1 Xim. 6:6-8) Hegee nuussi Yihoowaaranne nu ishanttuura deꞌiya dabbotay miishshan shamettana danddayiya aybippenne aadhiyaaba gidiyoogaa akeekanaadan maaddees. Deꞌiyaabi tawu gidana giya uri harata amassalenna, eta bolli zuuzummenna woy eta borenna; qassi ishanttu siiqoy moorettanaadan oottiya, harata qanaatiyoogaappenne yaaretiyoogaappe haakkees. Ubba, deꞌiyaabay tawu gidana giyoogee haratuyyo kehanaadan oottees. (1 Xim. 6:17-19) Qassi Yihoowan ammanettiyoogee, nuna ay metoy gakkikkokka xalanaadan maaddees. (Ibr. 13:6) Qassi hegaa mala xalatettay nuuni loꞌꞌobaa qoppanaadan maaddees; qassi nu mala Kiristtaaneta minttettanawunne maaddanawu denttettees. (1 Tas. 5:14, 15) Gita waayiyaa wode alamiyan deꞌiya asay haniyoobaa xayikkokka, nuuni nu atotettay matattidoogaa eriyo gishshawu, ‘xoqqu giidi pude xeellana.’—Luq. 21:25-28. w16.01 1:16, 17

Kase Godaa Kahuwaa bonchiyo wode oyttaa miyaanne woyniyaa uyiya asaa qooday guuxxi guuxxidi bees. SHin mata wodeppe haa simmin, eta qooday layttan layttan gujji gujji bees. Hegaabay nuna qofissana bessii? Bessenna. Hegee nuna qofissana bessennay aybissakko ane beꞌoos. Yihoowappe attin, Godaa Kahuwaa bonchiyo wode asaa qoodiyaageeti ayyaanan tiyettiday oonakkonne erokkona. Oyttaa miyaanne woyniyaa uyiya asaa qoodan ayyaanan tiyettidabadan qoppidi miyaanne uyiya asatikka deꞌoosona. Issi wode oyttaa miyaanne woyniyaa uyiya asati guyyeppe aggidosona. Harati unꞌꞌettiyoogaappe woy sahettiyoogaappe denddidaagan saluwan Kiristtoosaara haarana gi qoppidi hegaadan oottennan aggokkona. Hegaa gishshawu, oyttaa miyaanne woyniyaa uyiya asatu qooday ha saꞌan attida, ayyaanan tiyettida asatu qoodaa bali baynnan bessiyaaba gidenna. Gita waaye doommiyo wode etappe ha saꞌan attiyaageetu qooda Geeshsha Maxaafay yootenna. w16.01 4:12-14