Deꞌoy Waani Doommidee?

“De7uwaa pulttoi Xoossaa achchan de7ees.” (Mazamure 36:9) Hegaa neeni ammanay? Issi issi asay deꞌuwaa medhdhida uri baawa giidi qoppees. Hegee tuma gidikko, nuuni deꞌanaadan oottidabay qoppennan hanidaba. SHin deꞌoy Xoossaa Yihoowi medhdhidoba gidikko, deꞌuwawu halchchettidabi deꞌiyoogee qoncce.a Deꞌoy waanidi doommidaakko Geeshsha Maxaafay yootiyoobaanne hegee tuma gidiyoogaa ammanana bessiyoy aybissakko beꞌa.

1. Saꞌaynne xoolintteti awappe beettidonaa?

Geeshsha Maxaafay hagaadan gees: “Xoossai salotanne sa7aa koiro medhdhiis.” (Doomettaabaa 1:1) Saluwawunne Saꞌawu doomettay deꞌiyoogaa saynisiyaa eranchchati daroti maayoosona. Xoossay hegaa waatidi medhdhidee? I galakiseta, xoolinttettanne saꞌaa gujjin, ubbabaa ‘ba ayyaanan’ woy ba wolqqan medhdhiis.—Doomettaabaa 1:2.

2. Xoossay saꞌaa medhdhidoy aybissee?

Yihoowi “asi de7anaadaanappe attin, biittaa coo medhdhibeenna.” (Isiyaasa 45:18) I saꞌaa deꞌanawu keehi giiganne asay merinawu deꞌanaassi koshshiya ubbabay deꞌiyo soho oottidi medhdhiis. (Isiyaasa 40:28; 42:5 nabbaba.) Saynisiyaa eranchchati saꞌay hara pilaaneetetuppe keehi dumma gidiyoogaa yootoosona. Eti asassi paxa deꞌanawu koshshiya ubbabay deꞌiyo hara pilaaneete demmibookkona.

3. Asay mehiyaappenne doꞌaappe dummatiyoy aybiinee?

Yihoowi saꞌaa medhdhi simmidi, mittaa maataanne mehiyaa doꞌaa medhdhiis. Hegaappe simmin, “Xoossai asaa ba leemisuwan medhdhiis.” (Doomettaabaa 1:27 nabbaba.) Asaa dumma oottiyaabay aybee? Nuuni Xoossaa leemisuwan merettido gishshawu, aagaadan siiqananne suure pirddaa pirddana danddayoos. I nuuni dumma dumma qaalaa tamaaranaadan, loꞌꞌiyaabaa nashshanaadaaninne muuzunqqan ufayttanaadan oottidi medhdhiis. Qassi nuuni nuna Medhdhidaagawu goynnana danddayiyo gishshawukka mehiyaappenne doꞌaappe dummatoos.

LOYTTA AKEEKA

Deꞌoy keehi loꞌꞌidi giigidoogawunne merettidabatubaa Geeshsha Maxaafay yootiyoobay tuma gidiyoogawu naqaashaa beꞌa. Asaa eeshshatuppe awugeeti nuna Xoossaabaa tamaarissiyaakko akeeka.

4. Deꞌoy keehi loꞌꞌidi giigiis

Asay merettidabaa milatissidi keehi loytti giigissidoban saba ubbaa bawu ekkees. Yaatin koyro keehi loytti giigissidoban sabettana bessiyay oonee? BIIDUWAA beꞌite; yaatidi kaallidi deꞌiya oyshaa tobbite.

BIIDUWAA: Xoossan Ammaniyoogaa (2:43)

• Loytti giigissiya asay merettidabaa malatissidobay aybee?

Keetta ubbaa keehi loytti giigissidi keexxida asi deꞌees. SHin meretan deꞌiyaabata keehi loytti giigissidi medhdhiday oonee? Ibraawe 3:4 nabbabite; yaatidi ha oyshata tobbite:

• Keehi loytti giigissido meretatuppe nena maalaaliyay awugee?

• Saluwaa, saꞌaanne eta giddon deꞌiya ubbabaa keehi loytti giigissiday deꞌees giidi ammaniyoogee bessiyaabee? Aybissi?

Hagaa eray?

Ha allaalliyaabaa qonccissanawu xaafettidabatanne biidota jw.org saytiyan “Hagaa Giigissiday Deꞌii?” giyaagaaninne “Deꞌuwaa Doomettaaban Dumma Dumma Qofaa” giyaagan beꞌana danddayaasa.”

“Keetta ubbaa keexxidaagee issi asa; shin ubbabaa keexxidaagee Xoossaa”

5. Geeshsha Maxaafay meretaabaa yootiyoobay tuma gidiyoogaa ammaniyo loꞌꞌo gaasoti deꞌoosona

BIIDUWAA: Saloy Saꞌay Merettidee?—Giyaagaappe Ekettidaagaa (3:51)

• Geeshsha Maxaafay saꞌaynne A bolli deꞌiya deꞌoy 24-saate saate gidida usuppun gallassatun merettiis gii?

• Geeshsha Maxaafay meretaabaa yootiyoobay ammanana bessiyaaba gaada qoppay? Aybissi?

Doomettaabaa 1:1 nabbabite; yaatidi ha oyshaa tobbite:

• Saynisiyaa eranchchati saluwawunne saꞌawu doomettay deꞌiyoogaa yootoosona. Neeni Geeshsha Maxaafaappe haꞌꞌi nabbabidobaara hegaa waata geeddarssutee?

Issi issi asay Xoossay guutta seeliyaa medhdhin hegee loddan loddan laamettideeshsha giidi qoppees. Doomettaabaa 1:21, 25, 27 nabbabite; yaatidi ha oyshata tobbite:

• Geeshsha Maxaafay Xoossay guutta seeliyaa medhdhidi hegee loddan loddan laamettidi mehe, doꞌanne asa gidanaadan oottiis giidi tamaarissii? Woy qassi I paxa deꞌiya ubbabaa A “qommuwan qommuwan” medhdhidee?b

6. Xoossay medhdhido meretatu giddon asay dumma

Nuuni Yihoowi medhdhido mehetuppenne doꞌatuppe dummatoos. Doomettaabaa 1:26 nabbabite; yaatidi ha oyshaa tobbite:

• Nuuni Xoossaa leemisuwan merettida; hegaa gishshawu, nuuni siiqiyoogeenne qarettiyoogee Xoossaa eeshshaabaa ay qonccissii?

AY AKEEKADII?

Yihoowi saluwaa, saꞌaanne deꞌuwan deꞌiya ubbabaa medhdhiis.

Zaaretuwaa

• Geeshsha Maxaafay saluwaanne saꞌaa doomettaabaa ay tamaarissii?

• Xoossay guutta seeliyaa medhdhidi hegee loddan loddan laamettidi deꞌuwan deꞌiya dumma dummabaa gidanaadan oottideeyye, I eta ubbaa medhdhidee?

• Asay dumma gididoy aybiinee?

PILGGA

Medhdhidaagee deꞌiyoogaa bessiya amarida meretata akeeka.

“Meretaappe Ay Tamaariyoo?” (Beegottite! huuphe yohuwaa)

Issi aaway meretaabaa Geeshsha Maxaafay yootiyoobaa ba guutta naꞌawu waati qonccissana danddayiyaakko akeeka.

‘Yihoowi Ubbabaa Medhdhiis’ (2:37)

Lodda laameenne Geeshsha Maxaafay naaꞌꞌaykka likke gidana danddayiyaakkonne akeeka.

“Xoossay Deꞌuwan Deꞌiyaabati Lodda Laamiyan Merettanaadan Oottidee?” (Nu websaytiyan deꞌiyaaba)

Beni wode meqettatinne saynisee pilggidi demmidobay deꞌoy merettidoogaa bessiyaakkonne woy coo qaadadan yiidoogaa bessiyaakko akeeka.

Deꞌuwaa Doomettaa—Oychchana Koshshiyo Ichchashu Oyshata (brooshuriyaa)