Tamme

Iyyoobi Yihoowaara mintti dabbotiis. A keettaa asay daronne ufayttees, qassi I keehi dure. (Iyy. 1:1-5) SHin issi wonttan Iyyoobawu deꞌiya ubbabay xayiis. Koyro, A mehee xayiis. (Iyy. 1:13-17) Kaallidi, I siiqiyo naati ubbay hayqqidosona. Iyyoobinne A machchiyaa bantta tammu naati ubbay hayqqidoogaa siyido wode ay keena dagammidaakko, azzanidaakkonne unꞌꞌettidaakko qoppa. Iyyoobi kayyottidi ba maayuwaa pooshshidoogeenne biittan gufannidoogee garamissiyaaba gidenna! (Iyy. 1:18-20) Hegaappe simmin, Seexaanay Iyyoobi sahettanaadaaninne bonchchettennaadan oottiis. (Iyy. 2:6-8) Hegaappe kase, asay Iyyooba keehi bonchchees. Asay zoriyaa oychchanawu akko yees. (Iyy. 31:18) Haꞌꞌi eti akko yookkona. A ishantti, A dabboti, ubba qassi A ashkkaratikka A ixxidosona!—Iyy. 19:13, 14, 16. w22.06 21 ¶5-6

Nuuni ubbaykka xammaqetti simmidi, kiitettida PHawuloosi Efisoonan deꞌiya Kiristtaanetussi zorido zoriyaa oosuwan peeshshana koshshees. “Gastta” Kiristtaane gidanaadan I eta minttettiis. (Efi. 4:13) Hegee eti ubbatoo ayyaanaaban diccana koshshees giyoogaa. Neeni kasekka Yihoowa loytta siiqaasa. SHin neeni Yihoowa siiqiyo siiqoy kaseegaappe aaruwan diccanaadan oottana danddayaasa. Waatada? Kiitettida PHawuloosi Piliphphisiyuusa 1:9n issi ogiyaa yootiis. Piliphphisiyuusan deꞌiya Kiristtaanetu siiqoy “gujji gujji diccanaadan” PHawuloosi woossiis. Yaatiyo gishshawu, nuuni Yihoowa siiqiyo siiqoy diccanaadan oottana danddayoos. Waatidi? ‘Tumu eratettaanne akeekaa’ demmiyoogan yaatana danddayoos. Nuuni Yihoowa loytti eriyo wode kaseegaappe aaruwan A siiqoos; qassi A eeshshaanne issibaa I oottiyo ogiyaa nashshoos. Nuuni kaseegaappe aaruwan Yihoowa ufayssanawu koyoos; qassi A mule azzanttanawu koyokko. I nuuni ay oottanaadan koyiyaakko, qassi hegaa waati oottana danddayiyaakko akeekanawu nuussi danddayettida ubbabaa oottoos. w22.08 2-3 ¶3-4

Ajjuutaa maxaafan xaafettidabay ubba asaassa gidennan, nuussa; ayssi giikko, nuuni Xoossaassi oottoos. Nuuni Xoossaa asa gidiyo gishshawu, ha maalaalissiya maxaafan deꞌiya hiraagati polettanaadan oottiyoogaa eriyoogan nu garamettana koshshenna. Layttan cimida kiitettida Yohaannisi he hiraagati polettana wodiyaa yootiis. I hagaadan giidi yootiis: ‘Godaa gallassan taani geeshsha ayyaanan ohettaas.’ (Ajj. 1:10) Yohaannisi 96 M.Ln, he qofaa xaafido wode, ‘Godaa gallasay’ biron gakkiichchibeenna. (Maa. 25:14, 19; Luq. 19:12) Gidoppe attin, Geeshsha Maxaafaa hiraagaa maaran, he gallassay Yesuusi 1914n saluwan Kawo gidido wode doommiis. He layttaappe doommidi, Ajjuutaa maxaafan deꞌiya hiraagati Xoossaa asaara gayttidaagan polettiyoogaa doommidosona. Ee, ha wodiyan nuuni “Godaa gallassan” deꞌoos!—Ajj. 1:3. w22.05 2 ¶2-3

Doꞌaynne wordduwaa hananabaa yootiyaagee naaꞌꞌaykka dinniyaara eexxiya tama abban paxa yegettidosona. Hegaa gishshawu, Xoossaa morkke gidida he kawotettati ha wodiyan haariiddi deꞌikkonne, eti merinawu xayana. Hegee nuna waati maaddii? Nuuni Kiristtaane gidiyo gishshawu, Xoossawunne A Kawotettawu ammanettana koshshees. (Yoh. 18:36) Nuuni alamiyaa polotikaaban oossinne exatennan deꞌana bessees. SHin kawotettati nuuni haasayiyoobaaninne oottiyooban banttana maaddanaadan koyiyo gishshawu, oossinne exatennan deꞌiyoogee nuussi keehi metiyaaba gidana danddayees. He kawotettaa maaddanawu eti giyoobaa ubbaa oottiyaageetun doꞌaa malaatay wodhdhees. (Ajj. 13:16, 17) Gidoppe attin, he malaatay wodhdhiyo ooninne Yihoowan sabettenna, qassi merinaa deꞌuwaa demmenna. (Ajj. 14:9, 10; 20:4) Hegaa gishshawu, he kawotettati banttana maaddanaadan nuna iisettikkokka, nuuni oossinne exatennan deꞌiyoogee keehi koshshiyaaba. w22.05 10-11 ¶12-13

Neeni halchchana danddayiyo issi halchchoy maaddiya hiillaa tamaariyoogaa. Nuuni qara gidanawu baaxetikko, Yihoowa haggaazuwan kaseegaappe aaruwan oottana danddayoos. Beeteele keettata, Gita SHiiquwaa Addaraashatanne SHiiquwaa Addaraashata keexxanawu keehi daro oosanchchati koshshiyoogaa qoppa. He oosanchchatuppe daroti meezee deꞌiyo ishanttuuranne michchonttuura oottiyoogan hiillata tamaaridosona. Ha wodiyan, ishanttikka michchonttikka, Gita SHiiquwaa Addaraashatanne SHiiquwaa Addaraashata bottokoniyoogan maaddanawu koshshiya hiillata tamaaroosona. Hagaaninne hara ogetun, ‘merinaa Kawoy’ Xoossaa Yihoowaynne “kawotu Kawoi” Yesuus Kiristtoosi gooba oosanchchata goꞌettidi maalaalissiyaabata oottoosona. (1 Xim. 1:17; 6:15) Nuuni nuna gidennan, Yihoowa bonchchissanawu minni oottanawunne nu hiillaa goꞌettanawu koyoos.—Yoh. 8:54. w22.04 24 ¶7; 25 ¶11

Solomoni keehi dure gidiyo gishshawu loꞌꞌiyaanne injje keettan deꞌiis. (1 Kaw. 10:7, 14, 15) SHin, Yesuusawu guutta aqoy deꞌikkonne, awu keetti baawa. (Maa. 8:20) Gidoppe attin, ha naaꞌꞌu asatikka Xoossaa Yihoowappe aadhdhida eratettaa demmido gishshawu, aquwaa bessiyaagaadan xeellidosona. Solomoni, nuuyyo miishshay deꞌikko, nuussi koshshiyaabaanne nuuni koyiyo amaridabaa demmana danddayiyoogaa yootiis. SHin, Solomoni dure gidikkonne, miishshaappe aadhdhiyaabay deꞌiyoogaa akeekiis. Leemisuwawu, I hagaadan giis: “Lo77o sunttai daro duretettaappe aadhdhees.” (Lee. 22:1) Miishshaa siiqiya asay bawu deꞌiyaaban darotoo ufayttennaagaakka Solomoni akeekiis. (Era. 5:10, 12) Qassi nuussi deꞌiya miishshay ay keena gidikkokka eesuwan xayana danddayiyo gishshawu, miishshay keehi koshshiyaaba giidi nuuni qoppana koshshennaagaa I yootiis.—Lee. 23:4, 5. w22.05 21 ¶4-5

Nuuni ha wodiyan demmido anjjota wotti dentti qoppikko, Yihoowaara dabbotido dabbotaa minttana danddayoos. Qassi, Yihooway nuussi immanawu qaalaa gelido loꞌꞌobata qoppiyo wode, nuuni awu merinawu haggaazana hidootay qoncci beettees. Ha ubbabay nuuni ha wodiyan Yihoowawu ufayssan haggaazanaadan maaddana. Yihooway ha alamiyaa xayssiyo wode, nuna maaddanawu ‘denddana.’ “Xillo pirddiya Xoossaa” Yihooway Seexaanaa alamiyaa xayssanawu qoppido wodiyaappe issi gallassaynne aadhdhanaadan mule paqqadennaagaa ammanettoos. (Isi. 25:9) Nuuni attiyo he gallassay yaanaashin, Yihoowa danddayan naagoos. He gallassay gakkanaashin nuuni woosaa maataa nashshanawu, Xoossaa Qaalaa xannaꞌanawunne appe tamaaridobaa oosuwan peeshshanawu, qassi nuuni demmido anjjota wotti dentti qoppanawu murttida. Yaatikko, Yihooway nuuni awu goynniyo wode ufayssan genccanaadan maaddana. w22.11 13 ¶18-19

Geeshsha Maxaafay Ximootiyoosa xinqqatiyaabaa yootana xayikkonne, A aayyiyaa Euniiqa he gallassi ufayttidoogaa qoppana danddayoos. (Lee. 23:25) Euniiqa metiyaabay deꞌishinkka, Ximootiyoosi Yihoowanne A Naꞌaa Yesuus Kiristtoosa siiqanaadan tamaarissaasu. Ximootiyoosa yelidaageetu haymaanootee issi mala gidenna. A aaway Giriike asa, qassi A aayyiyaanne aayee aayyiyaa Ayhuda. (Oos. 16:1) Euniiqanne Loyda Kiristtaane gidiyo wode Ximootiyoosi yelaga gidennan waayi aggana. SHin A aaway Kiristtaane gidibeenna. Ximootiyoosi kaallanawu doorana haymaanootee awugee? Ha wodiyan deꞌiya Kiristtaane aayoti bantta soo asaa siiqoosona. Aybippenne aaruwan, aayoti bantta naati Yihoowaara mintti dabbotanaadan maaddanawu koyoosona. Qassi nu Xoossay eti baaxetiyo baaxiyaa xoqqu ootti xeellees. (Lee. 1:8, 9) Daro aayoti bantta naata tumaa tamaarissiyo wode Yihooway aayota maaddiis. w22.04 16 ¶1-3

Mata wode Yihooway ba ‘qofaa’ kawotettati polanaadan eta wozanan wottana. Hegee ay kaalettanee? He kawotettati hegeekka, ‘tammu kawotettay’ worddo haymaanoote dirijjiteta qohananne eta xayssana. (Ajj. 17:1, 2, 12, 16) Gita Baabiloona mata wode xayanaagaa nuuni aybin eriyoo? He oyshaa zaaranawu, beni Baabiloone katamay amarida hanotan gita Efiraaxiisa SHaafan naagetti uttidoogaa hassayiyoogee maaddees. Ajjuutaa maxaafay Gita Baabilooniyyo exatiya miilooniyan qoodettiya asata, qohuwaappe naagiya ‘haattatuura’ geeddarssees. (Ajj. 17:15) Qassi he maxaafay haattati ‘melanaagaa’ yootees; hegee, worddo haymaanoote ubbaa xaaxa waaxiyaariyyo exatiyaagetu qooday keehi guuxxanaagaa bessiyaaba. (Ajj. 16:12) Ha hiraagay haꞌꞌi polettiiddi deꞌees; ayssi giikko, daro asay haymaanootiyaa aggiis, qassi ba metuwawu maaduwaa harasaappe demmanawu baaxetees. w22.07 5-6 ¶14-15

Nuuni atto giyo wode, Yihoowa maarotaa gishshawu A galatoos. Yesuusi issi leemisuwan, daro acuwaa qanxxana danddayenna ba ashkkaratuppe issuwaa maarida godaara Yihoowa geeddarssiis. SHin, he ashkkaray keehi guutta miishshaa baappe talꞌꞌida ashkkaraa maaribeenna. (Maa. 18:23-35) Yesuusi nuna tamaarissidobay aybee? Yihooway nuussi bessido gita maarotawu nuuni A wozanappe nashshikko, nu haratuyyo atto gaana. (Maz. 103:9) Issi Wochchiyo Keelay daro layttaappe kase hegaabaa hagaadan giis: “Nuuni haratuyyo darotoo atto giikkokka, Xoossay Kiristtoosa yarshshuwaa baggaara nuussi ubbawu atto giidoogaa keena nuuni hara asawu mule atto gookko.” Nuuni haratuyyo atto giikko, Yihooway nuuyyo atto gaana. Maariyaageeta Yihooway maarees. (Maa. 5:7) Yesuusi ba erissiyo ashkkarati waati woossanaakko tamaarissido wode hegaa geeshshi yootiis.—Maa. 6:14, 15. w22.06 10 ¶8-9

Yesuusi saꞌan deꞌiyo wode ba Aawaa eeshshaa wottiyoobi baynna ogiyan bessiis. (Yoh. 14:9) Yaatiyo gishshawu, nuuni Yesuusabaa tamaariyoogan Xoossaa Yihoowa eroosinne siiqoos. Hegaa bollikka, Yesuusa timirtteenne I ha wodiyan Kiristtaane gubaaꞌiyaa kaalettiyoogee nuna keehi maaddees. Nuuni Yihoowa ufayssiya ogiyan waani deꞌana danddayiyaakkokka I nuna tamaarissiis. Qassi Yesuusi hayqqido gishshawu nuuni ubbay goꞌettida. Yesuusi hayqqi simmin, Yihooway A denttidi, ‘nagara ubbaappe nuna ashshiya’ wottiyoobi baynna ba Naꞌaa yarshshuwaa ekkiis. (1 Yoh. 1:7) I haꞌꞌi hayqqenna wolqqaama Kawo gididi haariiddi deꞌees. Matan, Yesuusi shooshshaa huuphiya qoxxana. (Doo. 3:15) Seexaanay muleera xayiyo wode Xoossaa asay keehi ufayttana. Nu Xoossay ammanettiyaagaa gidiyo gishshawu, he wode gakkanaassi hidootaa qanxxokko. Yihooway ‘saꞌaa kawotetta ubbawu’ keehi daro anjjuwaa immana. w22.07 18 ¶13; 19 ¶19

Nuuni halchchuwaa halchchiyo wode hanotaadan laammiyaageeta gidana koshshees. Aybissi? Nu hanotay laamettiyo wode nuuni nu halchchidobaa ubbaa polana danddayenna gishshataassa. Leemisuwawu, kiitettida PHawuloosi Tasalonqqe kataman ooratta gubaaꞌee eqqanaadan maaddiis. SHin, eqettiyaageeti PHawuloosa he katamaappe wolqqan kessidosona. (Oos. 17:1-5, 10) PHawuloosi yan takkiyaakko, ba ishantti qohettanaadan oottana danddayees. SHin, PHawuloosi eta maaddanawu baaxetiyoogaa aggibeenna. I laamettida hanotaa meezetiis. Mati Kiristtaane gididaageetu ammanuwaa minttanaadan Ximootiyoosa kiittiis. (1 Tas. 3:1, 2) Tasalonqqen deꞌiya Kiristtaaneti keehi ufayttidoogee qoncce. Tasalonqqen PHawuloosa gakkidabaappe nuuni tamaarana danddayoos. Nuuni issibaa halchchana danddayoos, shin nu hanotay laamettiyoogee nu halchchidobaa polennaadan diggana danddayees. (Era. 9:11) Ne hanotaykka hegaa mala gidikko, neeni polana danddayiyo hara halchchuwaa halchchanawu eeno ga. w22.04 25-26 ¶14-15

Hidootay deꞌanaadan oottiyoogan Yihooway nuna minttettees. Nuna metoy gakkiyo wode minttettana danddayiya amarida Geeshsha Maxaafaa xiqiseta qoppa. Yihooway wolqqaama metuwaa gujjin, aybikka “[A] siiquwaappe nuna shaakkanau danddayennaagaa” Geeshsha Maxaafaa baggaara nuussi yootees. (Roo. 8:38, 39) I woosan ‘bana xeesiya ubbawu matan deꞌiyoogaakka’ yootiis. (Maz. 145:18) Nuuni an ammanettikko, ay metuwaakka genccana danddayoos, qassi waayee deꞌishinkka ufayttana danddayiyoogaa Yihooway nuussi yootiis. (1 Qor. 10:13; Yaaq. 1:2) Yihooway nuussi immana merinaa deꞌuwaa woytuwaara geeddarssiyo wode, nuna gakkiya metoy haꞌꞌissawunne guutta wodiyawu gidiyoogaakka Xoossaa Qaalay nuna hassayissees. (2 Qor. 4:16-18) Yihooway nu meto ubbawu gaaso gidida Seexaanaa Dabloosanne A mala iitata xayssanaagaa yootiyoogan nuussi ammanttiya hidootaa immiis. (Maz. 37:10) Sinttappe nena gakkana metuwaa genccanawu maaddiya minttettiya amarida Geeshsha Maxaafaa xiqiseta hassayadii? w22.08 11 ¶11

Neeni Yihooway kessido xillotettaa maaraadan ubba galla deꞌana danddayiyaanaashsha gaada hirgga eray? Nu xillotettay “abbaa beetaadan hanana” danddayiyoogaa Yihooway yootiis. (Isi. 48:18) Neeni gita abbaa doonan eqqada beetay aggennan shocettiyoogaa beꞌaydda deꞌiyaabadan qoppa. He woppu giida sohuwan, he beetay issi galla coꞌꞌu gaana danddayees gaada hirggay? CHii! Mule coꞌꞌu geennaagaa eraasa. Ne xillotettay abbaa beetaa mala gidana danddayees! Waanidi? Neeni issibaa kuuyana koshshikko, Yihooway neeni oottanaadan koyiyoobaa kasetada qoppa. Yaatada, hegaa ootta. Neeni kuuyiyoobay keehi deexxiyaaba gidana danddayikkonne ne siiqo Aaway neeni ubba galla likke gididabaa oottanaadan neessi wolqqaa immanawunne nena maaddanawu ubbatoo ne matan deꞌees.—Isi. 40:29-31. w22.08 30 ¶15-17

Seexaanay 1,000 layttaa wurssettan qashuwaappe birshshettana. He wode I wottiyoobi baynna asaa cimmanawu malana. He paaciyaa wode saꞌan deꞌiya wottiyoobi baynna asa ubbay Xoossaa sunttaaranne A haaruwaara gayttidaagan eti Yihoowawu exatanaakko agganaakko qoncciyan bessana danddayoosona. (Ajj. 20:8-10) He wode eti dooriyoobay eta sunttay deꞌo maxaafan xayenna hanotan xaafettanaadan woy xaafettennaadan oottana. Amarida asay Addaameegaadaaninne Hewaaniigaadan Yihoowa haaruwawu azazettennan ixxana. Eta bolli gakkanabay aybee? Ajjuutaa 20:15y hagaadan gees: “De7o maxaafan ba sunttai xaafettibeenna asi ooninne tama abban yegettiis.” Ee, ha makkalanchchati muleera xayana. SHin wottiyoobi baynna asatuppe daroti he wurssetta paaciyaappe aadhdhana. w22.09 23-24 ¶15-16

Koyro xeetu laytta gubaaꞌiyan deꞌida issoti issoti Kiristtaane gidida Ayhuda gidennaageeti qaxxarettana koshshiyoogaa yootidosona. Eti hegaadan giidoy harati banttana borennaadan naagettanawu qoppido gishshawu gidennan aggenna. (Gal. 6:12) Kiitettida PHawuloosi he qofan maayettibeenna, shin harati A qofaa kaallanaadan iisettiyoogaappe bana ziqqi oottidi Yerusalaamen deꞌiya kiitettidaaageetuppenne cimatuppe zoriyaa oychchiis. (Oos. 15:2) PHawuloosi hegaadan oottidoogee gubaaꞌiyan deꞌiya Kiristtaaneti ufayssaaninne sarotettan deꞌanaadan maaddiis. (Oos. 15:30, 31) Ooshshay merettiyo wode, Yihooway gubaaꞌiyaa maaddanaadan sunttidoogeetuppe kaaletuwaa demmanawu koyiyoogan sarotettay deꞌanaadan oottoos. Darotoo Geeshsha Maxaafaa qofay deꞌiyo kaaletuwaa nu xuufetuppe woy Yihoowa dirijjitee giigissido harabatuppe demmana danddayoos. Harati nu qofaa kaallanaadan oottiyoogaappe he kaaletota nuuni loytti kaalliyo wode gubaaꞌiyan issippetettay deꞌanaadan oottoos. w22.08 22 ¶8-9

Issi issitoo, nuuppe daroti nu laggiyawu xuuraa yootana koshshiyo wodee deꞌees. Hegee issi issitoo wayssiyaaba gidana danddayees. Nuussi siyettiya ubbabaa issi urawu yootiyoogee metiyaaba gidana danddayees; qassi nu laggee nu xuuraa hara urawu yootidoogaa nuuni guyyeppe erikko keehi azzanana. SHin nu xuuraa naagiya uraa nuuni keehippe nashshoos. Xuuraa naagiya cimati bantta ishanttuyyo ‘carkkuwaappe geemmiyoonne gotiyaappe baqatiyo soho.’ (Isi. 32:2) Cimati xuuraa naagiyoogaa nuuni ammanettiyo gishshawu etawu aybakka yootana danddayoos. Eti hara asawu yootana bessennabaa nuussi yootanaadan nuuni eta iisettana koshshenna. Cimatu machchoti harata xeelliyaagan xuurabaa bantta azinati yootanaadan oychchenna gishshawu eta bonchchoos. Gubaaꞌe cimaa machchiyaa ba ishanttunne michchenttu xuuraa haratuyyo yootennaagee keehi ufayssiyaaba. w22.09 11 ¶10-11

Yaana ‘gita waayiya’ wode Yihooway ammanettida ba ashkkarata ashshanaagaa nuuni ammanettana danddayoos. (Maa. 24:21; Dane. 12:1) Maagooga Googa geetettida issippe denddiya kawotettati, kumetta saꞌan deꞌiya ammanettidi Yihoowawu oottiyaageeta qohanawu denddiyo wode Yihooway hegaa oottana. Qassi, 193 Kawotettatu Issippetettaa yameti issippe shiiqiyaakkokka, Ubbaappe Xoqqiya Xoossaaranne saluwaa olanchchatuura olettanawu danddayokkona! Yihooway hagaadan giis: “Taani ta gitatettaanne ta geeshshatettaa bessana. Qassi daro kawotettata taani tanatettaa erissana. Taani GODAA gidiyoogaa eti hegan erana.” (Hiz. 38:14-16, 23) Googi Xoossaa asaa qohanawu denddiyoogee, “sa7aa kawota ubbaa” Yihooway xayssiyo Armmageedoona olay denddanaadan oottana. (Ajj. 16:14, 16; 19:19-21) SHin “suure asatinne boree bainna asati biittan gam77idi de7ana.”—Lee. 2:21. w22.10 16-17 ¶16-17

Nuuni asaa wozanan deꞌiyaabaa erana danddayokko; shin “GODAI koiro denddo qofaa yiggi xeellees.” (Lee. 16:2) Diccido hanotaynne wogay ayba gidikkonne, Yihooway ubba asaa siiqees. Qassi nuuni “[nu] uluwaa aassi dooyidi” bessanaadan Yihooway minttetees. (2 Qor. 6:13) Nuuni nu ishanttanne michchontta siiqanawu koyoosippe attin, eta bolli pirddanawu koyokko. Hegaa giyoogee Yihoowa Markka gidennaageetu bollikka nuuni pirddana koshshenna giyoogaa. Nu mala Kiristtaane gidenna issi dabbuwaa, “He bitanee mule tumaa siyenna” gaada pirdda eray? Hegee otorettiyoogaanne haratuppe aadhdhays giidi qoppiyoogaa bessees. SHin Yihooway “ubbasan asai ubbai nagaraappe simmana” mala koyees. (Oos. 17:30) Haratuppe banttana xillo giidi qoppiyaageeta Yihooway nagaranchchadan xeelliyoogaa ubbatoo hassaya. Nuuni Yihooway kessido xillotettaa maaraa siiqiyoogee ufayttiyaageetanne harata minttettiyaageeta gidanaadan maaddana mala amottoos. Hegee harati nunakka Xoossaakka loytti siiqanaadan maaddana. w22.08 31 ¶20-22

Nuuni haggaaziyo wode, asay nuna eqettanaagaa eroos. Sinttappe eti nuna kaseegaappe aaruwan eqettana danddayoosona. (Dane. 11:44; 2 Xim. 3:12; Ajj. 16:21) SHin, nuussi koshshiya maaduwaa Yihooway immanaagaa ammanettana danddayoos. Aybissi? Yihooway ba ashkkaratussi immido oosoy ay keena deexxiyaaba gidikkonne, eti hegaa polanaadan I ubbatoo eta maaddiis. Baabiloonen omooddettidi deꞌiya Ayhudatussi sabbakida, hananabaa yootiya Hizqqeela gakkidabaa beꞌa. Hizqqeeli ay mala asatussi sabbakana koshshidee? Eti ‘wozana muume,’ “morgge zozza,” qassi “makkalanchcha” gidiyoogaa Yihooway yootiis. Eti agunttaadaaninne masimasuwaadan keehi qohiyaageeta. Yihooway Hizqqeelawu, “yayyoppa” giidi darotoo yootidoy hegaassa! (Hiz. 2:3-6) Hizqqeeli sabbakiyo oosuwaa poliis; ayssi giikko, (1) Yihooway A kiittiis, (2) Xoossaa ayyaanay awu koshshiya wolqqaa immiis, qassi (3) Xoossaa qaalay A ammanuwaa minttiis. w22.11 2 ¶1-2

Asappe attin, saꞌan merettida paxa deꞌiyaabati ubbay wurssettan hayqqanaadan oottidi Yihooway medhdhiis. I asawu mule hayqqennan deꞌiyo dumma hidootaa immiis. Nuuni merinawu deꞌanawu keehi koyanaadan oottidi Yihooway medhdhiis. Xoossay ‘asaa wozanan merinatettaa wottidoogaa’ Geeshsha Maxaafay yootees. (Era. 3:11) Nuuni hayquwaa nu morkkedan xeelliyo issi gaasoy hegaa. (1 Qor. 15:26) Nuuni sahettikko coo uttidi hayquwaa naagiyoo? CHii naagokko. Darotoo aakime soo boosinne issi issitoo he harggiyawu haniya xaliyaa ekkoos. Hayquwaappe attanawu nuussi danddayettida ubbabaa oottoos. Qassi yelaga gidin cima gidin, nuuni siiqiyo issi uri hayqqiyo wode daro wodiyawu azzanoos. (Yoh. 11:32, 33) Nuuni ubbatoo tamaaranawunne merinawu deꞌanawu keehi koyoos; ayssi giikko, nuna Medhdhida siiqiyaagee nuuni hegaadan hananaadan oottidi medhdhiis. I nuuni merinawu deꞌanaadan oottanaagee qoncce. w22.12 3 ¶5; 4 ¶7

Nu mala Kiristtaanetuppe daroti sahettana, yayyana, woy boorasana danddayoosona. Ne ishanttuuranne michchonttuura dumma dumma ogiyan gayttanawu baaxeta. Nu mala Kiristtaanetuura deꞌiyo wodekka koronaa harggee nuuni etakko keehi matattennaadan oottana danddayees. Hegaa mala wodiyan kiitettida Yohaannisaagaadan neeyyookka siyettana danddayees. I ba laggiyaa Gaayoosaara gayttanawu koyiis. (3 Yoh. 13, 14) Gidikkonne, Yohaannisi amarida wodiyawu Gaayoosaara gayttana danddayennaagaa eriis. Hegaa gishshawu, Yohaannisi oottana danddayiyoobaa oottiis; I Gaayoosawu dabddaabbiyaa xaafiis. Neeni ne ishanttuuranne michchonttuura ubbatoo gayttada eta oychchana danddayennaba gidikko, hara ogiyan etaara gayttanawu baaxeta. Neeni ubbatoo hegaadan oottikko, darin boorasakka, qassi kaseegaappe aaruwan woppu gaana. Neeni unꞌꞌettikko, cimatuura gayttada eti nena siiquwan minttettiyoogan goꞌetta.—Isi. 32:1, 2. w22.12 17-18 ¶6-7

Amarida wodiyawu Yooseefa gedeti biratan qashettidoogaanne A qooriyan biratay aadhdhidoogaa Geeshsha Maxaafay yootees. (Maz. 105:17, 18) Yooseefa hanotay iiti iiti biis. I ba godawu ammanettida ashkkara gidiyoogee attin qashuwaasa gidiis. Neeni mintta woossikkonne, ne hanotay yaa iiti iiti bin unꞌꞌetta eray? Hegaadan hanana danddayees. Seexaanay haariyo ha alamiyan nuna metoy gakkennaadan Yihooway teqqenna. (1 Yoh. 5:19) Neeni haꞌꞌikka hagaa ammanettana danddayaasa: Nena gakkiiddi deꞌiya metuwaa Yihooway loytti erees; qassi I neeyyo qoppees. (Maa. 10:29-31; 1 PHe. 5:6, 7) Hegaa bollikka I hagaadan giidi qaalaa geliis: “Taani nena mulekka yeggikke woikko aggikke.” (Ibr. 13:5) Neessi hidootay baynnaba milatiyo wodekka neeni genccanaadan Yihooway maaddana danddayees. w23.01 16 ¶7-8

Nuuni nagaraa oottiyo wode Xoossay nuna mule aggennaagaa Geeshsha Maxaafay yootees. Israaꞌeelati Yihoowa bolli darotoo nagaraa oottikkonne, eti bantta nagaraappe wozanappe simmido wode Xoossay etawu atto giis. Koyro xeetu layttan deꞌida Kiristtaanetikka Xoossay eta keehi siiqiyoogaa eridosona. Wolqqaama nagaraa oottidi ba nagaraappe simmida bitaniyawu ‘atto gaanawunne A minttettanawu’ bessiyoogaa kiitettida PHawuloosi ayyaanay kaalettin ba mala Kiristtaanetussi yootiis. (2 Qor. 2:6, 7; 1 Qor. 5:1-5) Yihooway bawu goynniyaageeti nagaraa oottido gishsha xallawu eta ixxibeennaagee ufayssiyaaba! Ubba I eta siiquwan maaddiis, zoriisinne zaarettidi ba dabbo gidanaadan oottiis. Ha wodiyan bantta nagaraappe simmiya ubbawu hegaadan oottanawu I qaalaa geliis. (Yaaq. 4:8-10) Geeshsha Maxaafay Xoossaa aadhdhida eratettaa, A suure pirddaanne siiquwaa qonccissees. Yihooway nuuni abaa eranaadan koyiyoogaa ha maxaafay bessees. Nuuni A dabbo gidanaadan I koyees. w23.02 7 ¶16-17

Haꞌꞌi alamiyaa hanotay Geeshsha Maxaafaa hiraagati polettanaadan oottiiddi deꞌiyo gishshawu, nuuni ufayttanaadan oottiya daro gaasoy deꞌees. Leemisuwawu, alamiyaa wurssettay matidoogaa nuuni eranaadan maaddiya hanana issi issibata Yesuusi yootiis. (Maa. 24:3-14) Nuuni ammanuwan minnidi deꞌanawu hiraagati polettiyoogaa wudidi kaallanaadan kiitettida PHeexiroosi nuna minttettiis. (2 PHe. 1:20, 21) Nuuni Geeshsha Maxaafaa hiraagaa pilggana koshshiyo gaasuwaa qoppanaadan I koyiis. Nuuni ‘Yihoowa gallassaa’ matayidi xeellanaadan I yootiis. (2 PHe. 3:11-13) Aybissi? Nuuni Yihooway Armmageedoona ehaana ‘gallassaanne saatiyaa’ eranawu koyiyo gishshataassa gidennan, attida wodiyaa ‘geeshshanne Xoossaa milatiyoogan’ goꞌettanawu koyiyo gishshataassa. (Maa. 24:36; Luq. 12:40) Nuuni Yihoowa wozanappe siiqiyo gishshawu, ubbatoo loꞌꞌo eeshshaa bessanawunne awu loytti haggaazanawu baaxetana koyoos giyoogaa. Ubba wode nuuni hegaabaa qoppanawu naagettidi deꞌana koshshees. w23.02 16 ¶4, 6

‘Hara dorssati’ Gannatiyan deꞌanawu oottana koshshiyaabati deꞌoosona. Nuuni Yesuusi nuussi oottidobaa nashshiyoogaa bessana koshshees. Leemisuwawu, ayyaanan tiyettida ishatuura hashetiyoogan, Yesuusa siiqiyoogaa nuuni bessoos. Yesuusi, hara dorssati ba ishantta kaafiyoogaa denddo oottidi etawu pirddanaagaa yootiis. (Maa. 25:31-40) Sabbakiyoogaaninne erissiyo ashkkara oottiyo oosuwaa minnidi oottiyoogan kaafana danddayoos. (Maa. 28:18-20) Gannatiyaa gelanaadan Yihooway koyiyo asa gidanawu, nuuni yaa gelana gakkanaashin naagana koshshenna. Nuuni haꞌꞌi haasayiyoobaaninne oottiyooban ammanettidaageeta gidanawu baaxetananne sima deꞌuwaa deꞌiyaageeta gidana koshshees. Qassi nuuni Yihoowawu, nu aqo laggiyawunne nu mala Kiristtaanetussi ammanettiyaageeta gidana danddayoos. Nuuni ha iita alamiyan deꞌiiddi Yihoowawu azazettikko, Gannatiyan awu azazettiyoogee metenna. Ooratta alamiyan nuuni goꞌettana hiillatinne eeshshati nuussi deꞌanaadankka baaxetana danddayoos. w22.12 11-12 ¶14-16

Nu Kawoy Yesuusi haariyoogan ooppenne aadhdhiyaagaa gidiyo gishshawu, nuuni A siiqoos. Yihooway ba Naꞌaa loohissiisinne haaranaadan sunttiis. (Isi. 50:4, 5) Yesuusikka ba goꞌꞌaa aggibayidi bessido siiquwaa qoppa. (Yoh. 13:1) Yesuusi ne Kawo gidiyo gishshawu neeni A wozanappe siiqiyoogee awu bessiyaaba. Yesuusi tumuppe bana siiqiyaageeta ba laggeta giidi xeesiis; qassi eti awu azazettiyoogan A siiqiyoogaa bessoosona. (Yoh. 14:15; 15:14, 15) Yihoowa Naꞌawu lagge gidiyoogee nuussi gita maata! Yesuusi ashkke gidiyoogaanne wottiyoobi baynna hanotan ba Aawaa milatiyoogaa eradasa. I namisettidaageeta mizidoogaa, unꞌꞌettidaageeta minttettidoogaa, ubba qassi sahettidaageeta pattidoogaa tamaaradasa. (Maa. 14:14-21) I ha wodiyan gubaaꞌiyaa waati kaalettiyaakko beꞌadasa. (Maa. 23:10, NW) Qassi I Xoossaa Kawotettaa Kawo gidiyoogaadan mata wode hegaappe aadhdhiyaabaa oottanaagaa eradasa. Neeni A siiqiyoogaa waata bessana danddayay? A leemisuwaa kaalliyoogaana. Neeni A leemisuwaa kaallanawu oottana danddayiyo koyrobay nena Yihoowawu sheedhdhiyoogaanne xammaqettiyoogaa. w23.03 4 ¶8, 10

Yihooway saluwan, saꞌaaninne abban deꞌiya ubbabata medhdhiis; qassi he ubbabati nuna abaa tamaarissoosona. (Maz. 104:24, 25) Xoossay nuna medhdhido hanotaa ane qoppa. Loꞌꞌiya meretata beꞌidi ufayttanaadan oottidi nuna medhdhiis. Qassi, ichchashu bessi bollata, hegeetikka, beꞌiyoogaa, siyiyoogaa, bochchiyoogaa, laacciyoogaanne singgiyoogaa goꞌettidi I medhdhido dumma dummabatun nuuni ufayttanaadan oottidi nuna medhdhiis. Nuuni meretaa akeekan xeellana koshshiyo hara gaasuwaa Geeshsha Maxaafay yootees. Geeshsha Maxaafay Yihoowa eeshshatubaa nuna tamaarissees. (Roo. 1:20) Leemisuwawu, Yihooway medhdhidobata beꞌa; I eta loꞌꞌiya hanotan waati giigissidaakko akeeka. Hegeeti Xoossay aadhdhida eranchcha gidiyoogaa nuna tamaarissoosona. Qassi nuuni miyo dumma dumma qumatubaa qoppa. Hegee I asaa ay keenaa siiqiyaakko bessiyaaba. Yihooway medhdhidobatuppe A eeshshaabaa nuuni akeekiyo wode, kaseppe aaruwan A eroos; qassi hegee nuuni akko shiiqanaadan oottees. w23.03 16 ¶4-5

Ha alamiyaa hanotay kaseegaappe iiti iiti biyo wode nuuni Xoossaa Qaalan ammanettiyoogee paacettana danddayees. Asay nuuni Geeshsha Maxaafaa tumaa woy ha wodiyan Yihooway ba asaa kaalettanawu ammanettida wozannaama ashkkaraa sunttidoogaa siranaadan oottanawu malana danddayees. SHin, Yihoowa Qaalay ubbatoo tuma gidiyoogaa nuuni mintti ammanikko, hegaa mala ammanuwaa paaciyaa eqettana danddayoos. Nuuni “wurssettaa gakkanau [Yihoowa] awaajjuwaadan oottanau” murttida. (Maz. 119:112) Nuuni harata tumaa tamaarissanawunne eti Geeshsha Maxaafaa zoriyaa bantta deꞌuwan oosuwan peeshshanaadan minttettanawu ‘yeellatokko.’ (Maz. 119:46) Qassi, nuuni yedetaa gujjin wolqqaama metuwaakka ‘ufayssaaninne danddayan’ genccoos. (Qol. 1:11; Maz. 119:143, 157) Tumay nuuni woppu gaanaadaaninne ammanettanaadan maaddees; qassi nuuni waani deꞌanaakko loytti tamaarissees. Hegaa bollikka, nuuni sinttappe Xoossaa Kawotettaa haaruwan loꞌꞌo deꞌuwaa deꞌanaagaa yootees. w23.01 7 ¶16-17

Yesuusi hayqqanaappe kase qammi, bana kaalliyaageetussi adussidi woossiis; I, “xalahiyaappe eta naagana mala” ba Aawaa oychchiis. (Yoh. 17:15) Yesuusi eta keehi siiqees! I matan keehi waayettanaagaa erikkonne, kiitettidaageetu hanotay A keehi qofissiis. Yesuusa leemisuwaa kaalliyoogan, nuunikka nuussi koshshiyaaba xallaa qoppana bessenna. Nu ishanttuyyoonne michchonttuyyo ubba galla woossoos. Yaatiyoogan, issoy issuwaara siiqettanaadan Yesuusi yootidobawu azazettoosinne nu mala Kiristtaaneta keehippe siiqiyoogaa Yihoowa bessoos. Nu ishanttussinne michchonttussi woossiyoogee coo wode wurssiyooba gidenna. “Xillo asa woosai wolqqaama oosuwaa [oottiyoogaa]” Xoossaa Qaalay yootees. (Yaaq. 5:16) Nu mala Kiristtaaneti daro metuwaa gencciiddi deꞌiyo gishshawu, nuuni etawu woossana koshshees. w22.07 23-24 ¶13-15