Hidaare
Qeeraa, Hidaare 1
Guutta naati nena sabbanaadan oottadasa.—Mat. 21:16.
Intte yelidaageeta gidikko, intte naati bantta layttawu haniyaagaadan bantta qofaa yootanawu giigettanaadan maaddite. Issi issitoo so asaa metuwaa woy kandduwaabaa xeelliyaagan gita allaallee gubaaꞌiyan xannaꞌettana danddayees; shin intte naꞌi qofaa yootana danddayiyo issi woy naaꞌꞌu menttoti deꞌana danddayoosona. Qassi intte naati kushiyaa denttido wode ubban oyshettennan aggana danddayiyo gaasuwaa akeekanaadan eta maaddite. Yaatiyoogee, harata oychchiyo wode eti yiillotennaadan oottana danddayees. (1 Xim. 6:18) Nuuni ubbay Yihoowa bonchchissiyaanne nu mala Kiristtaaneta minttettiya qofaa yootanawu giigettana danddayoos. (Lee. 25:11) Nuuni issi issitoo nu deꞌuwan hanidabaa qanttan yootana danddayikkonne, nubaa darobaa haasayennaadan naagettana koshshees. (Lee. 27:2; 2 Qor. 10:18) Nuuni Yihoowa, A Qaalaanne A asaa xeelliyaagan haasayanawu baaxetana koshshees.—Ajj. 4:11. w23.04 24-25 ¶17-18
Woggaa, Hidaare 2
Nuuni harati xiskkiyoogaadan xiskkanau bessenna. Nuuni beegottanaunne woga de7anau bessees.—1 Tas. 5:6.
Nuuni giigi uttanaadaaninne akeekanchcha gidanaadan siiqoy keehi koshshiyaaba. (Maa. 22:37-39) Nuuni sabbakiyoogee metuwaa gattana danddayikkokka, Xoossaa siiqiyoogee aggennan sabbakanaadan nuna maaddees. (2 Xim. 1:7, 8) Nuuni Yihoowa ammanennaageetakka siiqiyo gishshawu asawu silkkiyaaninne dabddaabbiyan markkattiyoogaa gujjin, aggennan sabbakoos. Sinttappe asay laamettidi suurebaa oottanaagaa nuuni hidootoos. (Hiz. 18:27, 28) Nuuni nu ishanttanne michchonttakka siiqoos. ‘Issoy issuwaa minttettiyoogaaninne maaddiyoogan’ hegaa mala siiquwaa bessoos. (1 Tas. 5:11) Hashetidi olettiya wotaaddaratuugaadan nuuni issoy issuwaa minttettana koshshees. Nuuni nu ishanttanne michchontta eriiddi mule qohokko, woy iitaa gishshaa iitaa zaarokko. (1 Tas. 5:13, 15) Gubaaꞌiyan aawatettay deꞌiyo ishantta bonchchiyoogankka nuuni eta siiqiyoogaa bessoos.—1 Tas. 5:12. w23.06 10 ¶6; 11 ¶10-11
Saynno, Hidaare 3
[Yihooway] yootidi, ba yootidoogaa oottennee?—Qoo. 23:19.
Nuuni nu ammanuwaa minttana danddayiyo issi ogee, wozuwaabaa loytti qoppiyoogaa. Wozoy Xoossay gelido qaalay polettanaagaa nuuni ammanettanaadan oottees. Wozoy nuussi koshshido gaasuwaanne hegawu Yihooway oottidobata loytti qoppiyo wode, ooratta alamiyan nuuni merinawu deꞌanaagaa Xoossay gelido qaalay polettanaagaa ammanettana danddayoos. Nuuni hegaadan giyoy aybissee? Wozuwaara gayttidaagan Yihooway oottidobay aybee? Yihooway banaara daro wodiyawu takkida, I keehi siiqiyo A bayra naꞌay saluwaappe yiidi saꞌan wottiyoobi baynna asa gididi yelettanaadan oottiis. Yesuusi saꞌan deꞌiyo wode daro metota gencciis. Hegaappe simmin, I keehi waayettidi hayqqiis. Yihooway alꞌꞌo waagaa qanxxiis. Nuuni guutta wode xallawu loꞌꞌo deꞌuwaa deꞌanaadan, nu siiqo Xoossay ba naꞌay tuggatidi hayqqanaadan mule oottenna. (Yoh. 3:16; 1 PHe. 1:18, 19) Yihooway nuna maaddanawu ba alꞌꞌo naꞌaa immiyoogan, nuuni ooratta alamiyan merinawu deꞌanaagaa ammanettanaadan oottiis. w23.04 27 ¶8-9
Masqqaynno, Hidaare 4
Haiquwau, ne boshati awaanee? —Hoo. 13:14.
Hayqqidaageeta denttanawu Yihoowayyo koshshay deꞌii? Deꞌiyoogee aynne sirissenna. Geeshsha Maxaafaa xaafida daro asati dendduwaa hidootaabaa xaafanaadan I oottiis. (Isi. 26:19; Ajj. 20:11-13) Qassi Yihooway ba gelido qaalaa ubbatoo polees. (Yaas. 23:14) Yihooway hayqqidaageeta denttanawu yeemuwan naagees. Iyyoobi giidobaa qoppa. I hayqqikkokka Yihooway A zaarettidi beꞌanawu laamotiyoogaa ammanettiis. (Iyy. 14:14, 15) Yihooway awu goynniiddi hayqqida ubbaa beꞌanawu laamotees. Eti payyanne ufayttiyaageeta gidanaadan I eta denttanawu yeemottees. Yihoowaabaa tamaarennan hayqqida daro biiloone asaa shin? Nu siiqo Xoossay etakka denttanawu koyees. (Oos. 24:15) Eti ba dabbo gidanaadaaninne saꞌan merinawu deꞌanaadan koyees.—Yoh. 3:16. w23.04 9 ¶5-6
Oruwa, Hidaare 5
Xoossay nuussi wolqqaa immana.—Maz. 108:13, NW.
Neeni ne hidootaa waata minttana danddayay? Leemisuwawu, neeni saꞌan merinawu deꞌanawu hidootiyaba gidikko, Geeshsha Maxaafay gannatiyabaa yootiyobaa nabbaba, qassi hegaa wotta dentta qoppa. (Isi. 25:8; 32:16-18) Ooratta alamiyan deꞌoy ay mala gidanaakko wotta dentta qoppa. Neeni yan deꞌiyabadan qoppa. Nuuni ooratta alamiyan demmanabaa ubbatoo qoppikko, nu metoy ‘haꞌꞌissawu waayettiyo guutta waaye’ gidana. (2 Qor. 4:17) Yihooway neessi immido hidootay neeni minnanaadan oottana. Wolqqaa demmanawu neessi koshshiyabaa I giigissiis. Yaatiyo gishshawu issi aawatettaa polanawu, metuwa genccanawu, woy ubbatoo ufayttanawu neessi maadoy koshshiyo wode, Yihoowa woossanne buzo xannaꞌa. Kiristtaane ishanttinne michchontti immiyo maaduwa ekka. Ubbatoo wodiya bazzada ne hidootaabaa qoppa. Yaatiyo wode neeni “ubbaban ufaissan genccanaadaaninne danddayanaadan, Xoossai ba bonchchuwaa gitaadan immiyo wolqqa ubban [minnana].”—Qol. 1:11. w23.10 17 ¶19-20
Hamuusa, Hidaare 6
Ubbaban galatite.—1 Tas. 5:18.
Nuuni woosan Yihoowa galatanaadan oottiya daro gaasoy deꞌees. Nuussi deꞌiya loꞌꞌoba ubbawu Yihoowa galatana danddayoos; ayssi giikko loꞌꞌo imota ubbaa immiday A. (Yaaq. 1:17) Leemisuwawu, loꞌꞌiya saꞌaa gishshawunne I medhdhido maalaalissiyaabaa gishshawu A galatana danddayoos. Nu deꞌuwaa, nu soo asaa, nu laggetanne nu hidootaa gishshawukka A galatana danddayoos. Qassi Yihooway nuuni A dabbo gidanaadan oottido gishshawu A galatoos. Nuuni Yihoowa galatiyaageeta gidana koshshiyo gaasota qoppanawu loytti baaxetiyoogee koshshana danddayees. Ha wodiyan daro asay galatenna. Asay baassi deꞌiyaabawu galatiyoogaa aggidi, deꞌanaadan koyiyoobaa darotoo qoppees. Nuuni hegaadan qoppiyoogaa doommikko, nu woossiyoobay oysha xalla gidana danddayees. Hegaappe naagettanawu, Yihooway nuussi oottiyo ubbabaa gishshawu A ubba wode galatana koshshees.—Luq. 6:45. w23.05 4 ¶8-9
Arbba, Hidaare 7
Aibiininne sirennan ammanuwan Xoossaa woosso.—Yaaq. 1:6.
Yihooway nuna siiqiya Aawa gidiyo gishshawu nu waayettanaadan koyenna. (Isi. 63:9) Gidikkonne, shaafaa woy lacuwa mala gidida metoy nuna gakkennaadan teqqenna. (Isi. 43:2) Shin nuuni hegeetu “gidduwaara pinniyo wode” nuna maaddanawu qaalaa geliis. Qassi metoy nuna merinawu qohanaadan paqqadenna. Yihooway nuuni genccanaadan maaddiya ba geeshsha ayyaanaakka immees. (Luq. 11:13; 2 Qor. 4:7) Hegaa gishshawu, nuuni genccanawunne ammanettidi deꞌanawu koshshiyabaa I nuussi ubbatoo immanaagaa ammanettana danddayoos. Yihooway nuuni an ammanettanaadan koyees. (Ibr. 11:6) Nuna gakkida metuwan nuuni issi issitoo unꞌꞌettennan aggokko. Yihooway nuna maaddaneeshsha giidi qoppana danddayoos. Shin Xoossay immiyo wolqqan nuuni ‘miixaa xeeraara guppi aadhdhana’ danddayiyogaa Geeshsha Maxaafay yootees. (Maz. 18:29) Yaatikko hegaadan qoppiyogaa aggidi, Yihooway nu woosaa siyanaagaa ammanettidi woossana koshshees.—Yaaq. 1:6, 7. w23.11 22 ¶8-9
Qeeraa, Hidaare 8
[Siiquwa lacoy] Xoossaa tamaa lacuwaa mala. Haattaa daroi siiquwaa tamaa toissanau danddayenna; di7oikka meeccidi efaanau danddayenna.—Sii. 8:6, 7.
Hagee tumu siiquwaa loytti qonccissees! Ha qofay aqo oyqqidaageeta minttettees: Intte issoy issuwaara tumuppe siiqettana danddayeeta. Aqo laggeti bantta deꞌo laytta ubban issoy issuwaara siiqettanawu baaxetana koshshees. Leemisuwawu, issi uri taman mittaa aggennan wottikko, tamay toꞌennan aggana danddayees. Issi uri taman mittaa wottana xayikko, tamay toꞌana. Hegaadankka, issi azinaynne machchiyaa bantta dabbotaa minttikko eta siiqoy minnidi deꞌana danddayees. Aqo laggeti miishshaa metuwaa, sahuwaa woy naata dichchiyoogaara gayttida metuwaa gencciyo wode, eta siiqoy irxxiiddi deꞌiyaabadan issi issitoo qoppana danddayoosona. Hegaa gishshawu, ‘Yihoowa tamaa lacoy’ aggennan eexxanaadan azinaynne machchiyaa Yihoowaara dabbotido dabbotaa minttanawu baaxetana koshshees. w23.05 20-21 ¶1-3
Woggaa, Hidaare 9
Ainne yayyoppa!—Dane. 10:19.
Nuuni xala gidanawu ay oottana koshshii? Yelidaageeti nuuni xala gidanaadan nuussi mintti yootana danddayoosona; shin eti xala gidikkokka nuuni xala gidanaadan oottana danddayokkona. Xala gidanawu baaxetiyoogee ooratta hiillaa tamaariyoogaa mala. Neeni he hiillaa loytta erana danddayiyo issi ogee asttamaaree oottiyoobaa loytta xeellada aagaadan oottiyoogaa. Hegaadankka, harati ha eeshshaa waati bessiyaakko loytti xeellidi etaagaadan oottiyoogan xala gidana danddayoos. Daaneelaagaadan Xoossaa Qaalaa loytti erana koshshees. Yihoowaara darotoo haasayiyoogaaninne nuna qofissiya ubbabaa awu yootiyoogan nuuni aara dabbotaa minttana koshshees. Qassi Yihooway nuna ubbatoo maaddanaagaa eridi nuuni an ammanettana koshshees. Yaatikko nu ammanoy paacettiyo wode nuuni xala gidana. Xala asaa harati darotoo bonchchoosona. Amarida asay Yihoowabaa eranaadankka eti maaddana danddayoosona. Ee, nuuni xala gidanawu koshshiyo loꞌꞌo gaasoy deꞌees. w23.08 2 ¶2; 4 ¶8-9
Saynno, Hidaare 10
Ubbabaakka paaccite.—1 Tas. 5:21.
“Paaccite” geetettidi birshshettida Giriiketto qaalay darotoo asay worqqaanne biraa mala biratati geeshshakkonne shaakki eranawu oottiyoobaa qonccissees. Hegaa gishshawu, nuuni siyiyoobay woy beꞌiyoobay tumakkonne eranawu paaccana koshshees. Gita waayee mati mati biyo wode hegee nuna keehi maaddana. Harati yootiyo ubbabaa ammaniyoogaappe nuuni nabbabiyoobaa woy siyiyoobaa Geeshsha Maxaafaynne Yihoowa dirijjitee yootiyoobaara geeddarssanawu akeekan qoppoos. Yaatikko dayddanttati yootiyo wordduwan cimettokko. (Lee. 14:15; 1 Xim. 4:1) Yihoowa asay gita waayiyaappe attanaagaa nuuni eroos. Wontto nuuni issoy issoy waananaakko erokko. (Yaaq. 4:14) Nuuni ammanetti deꞌikko, gita waayiyaa wode paxa deꞌin woy hegaappe kase hayqqinkka merinaa deꞌuwaa demmana. Nuuni ubbay ufayssiya nu hidootaa qoppiyaageetanne Yihoowa gallassawu ubbatoo giigi uttidaageeta gidoos! w23.06 13 ¶15-16
Masqqaynno, Hidaare 11
Ba xuuraa . . . ba ashkkaratussi kasetidi [qonccissiis].—Amo. 3:7.
Geeshsha Maxaafay yootiyo issi issi hiraagati waani polettanaakko nuuni erokko. (Dane. 12:8, 9) SHin issi hiraagay waani polettanaakko nuuni loytti erenna gishsha xallawu hegee polettenna giyoogaa gidenna. Yihooway kase oottidoogaadan, nuuni erana koshshiyaabaa bessiya wodiyan nu akeekanaadan maaddanaagaa ammanettana danddayoos. “Ubbabai saro; aibikka hanenna” yaagiya awaajjoy awaajettana. (1 Tas. 5:3) Hegaappe simmin, ha alamiyaa kawotettati worddo haymaanootiyaa xayssana. (Ajj. 17:16, 17) Yaatidi eti Xoossaa asaa qohanawu denddana. (Hiz. 38:18, 19) Hegaappe guyyiyan, wurssetta olaa gidida Armmageedooni doommana. (Ajj. 16:14, 16) Ha ubbabay hananaagaa nuuni ammanettana danddayoos. He wode gakkanaashin, Geeshsha Maxaafaa hiraagaa loytti akeekiyoogaaninne yaatanaadan harata maaddiyoogan saluwan deꞌiya nu siiqo Aawaa ubbatoo galatiyaageeta gidoos. w23.08 13 ¶19-20
Oruwa, Hidaare 12
Siiqoi Xoossaappe yiyo gishshau, ane issoi issuwaara siiqettoos.—1 Yoh. 4:7.
Kiitettida Phawuloosi ammanuwa, hidootaanne siiquwa qonccissido wode, ha eeshshatuppe “aadhdhiyaagee siiquwaa” gidiyogaa yootiis. (1 Qor. 13:13) Phawuloosi hegaadan giidoy aybissee? Nuuni hidootiyobay polettiyo gishshawu, ooratta alamiya xeelliyagan Yihooway qaalaa gelidoban ammaniyogee sinttappe koshshenna. Shin nuuni Yihoowanne asaa ubbatoo siiqana koshshees. Qassi nuuni eta siiqiyo siiqoy merinawu dicci dicci baana. Qassi nu ishantta siiqiyo wode tumu Kiristtaaneta gidiyogaa bessoos. Yesuusi ba kiittidoogeetussi hagaadan giis: “Intte issoi issuwaara siiqettikko, ta erissiyo ashkkarata gidiyoogaa asai ubbai erana.” (Yoh. 13:35) Qassi, nuuni issoy issuwara siiqettiyogee issippetettan deꞌanaadan maaddees. Phawuloosi, siiqoy “ubbabaa issippe shiishshi” qachchiyogaa yootiis. (Qol. 3:14) Kiitettida Yohaannisi ba ishanttussinne michchonttussi hagaadan giidi xaafiis: “Xoossaa siiqiya urai ba ishaakka siiqanau bessees.” (1 Yoh. 4:21) Nuuni issoy issuwara siiqettiyo wode Xoossaa siiqiyogaa bessoos. w23.11 8 ¶1, 3
Hamuusa, Hidaare 13
Tooho ubbaa diggoos.—Ibr. 12:1, NW.
Geeshsha Maxaafay nuuni Kiristtaaneti deꞌiyo deꞌuwaa wottaara geeddarssees. He wottaa woxxidi wurssiyaageeti merinaa deꞌuwaa demmoosona. (2 Xim. 4:7, 8) Nuuni wottaa wurssanawu keehi matido gishshawu, aggennan woxxanawu nuussi danddayettida ubbabaa oottana koshshees. Kiitettida PHawuloosi nuuni he wottaa xoonanaadan aybi maaddanaakko odiis. Nuuni nu ‘tooho ubbaa diggidi nu sinttan deꞌiya wottaa genccidi woxxanaadan’ I yootiis. PHawuloosi yootidoy issi Kiristtaane ayba toohuwaanne tookkana koshshenna gaanaassee? CHii. Nuuni tookkana bessenna tooho ubbaa diggana koshshiyoogaa yootanaassa. Hegaa mala toohoy nuuni loytti woxxennaadaaninne xalalanaadan oottana danddayees. Nuuni aggennan woxxanawu hegaa mala bessenna toohuwaa tookkidaakkonne eesuwaara shaakki eridi, he toohuwaa wottana koshshees. SHin nuuni yaatiyo wode tookkana koshshiyo toohuwaa aggiiganawu koyokko. He toohota tookkana xayikko, aggennan woxxana danddayokko.—2 Xim. 2:5. w23.08 26 ¶1-2
Arbba, Hidaare 14
Intteyyo bolla baggaa loittoppite.—1 PHe. 3:3.
Nuuni hanotaadan haniyoogee haratu qofaa bonchchanaadan nuna maaddees. Leemisuwawu, nu michchonttuppe amaridaageeti tisttettiyoogaa dosoosona, shin harati dosokkona. Amarida Kiristtaaneti ushshaa darissennan uyoosona, shin harati mule uyennan agganawu kuuyidosona. Ubba Kiristtaanetikka payya gididi deꞌanawu koyoosona, shin akkamettiyo ogiyaara gayttidaagan dooriyoobay dumma dumma. Nuuni ubbatoo likke gididabadan qoppikko, qassi nu oottiyoobaa nu ishanttinne michchontti kaallanaadan ammanttanawu baaxetikko, harati xubettanaadaaninne shaahotettay merettanaadan oottana danddayoos. (1 Qor. 8:9; 10:23, 24) Leemisuwawu, Yihooway nuuni ay maayana koshshiyaakko yootana xayikkokka, nu kaalliyo maarata immiis. Nuuni Xoossaa bonchchissiya ogiyan, bessiyaagaadan qoppiyoogan, “kiphataaninne” akeekan maayana koshshees. (1 Xim. 2:9, 10) Hegaa gishshawu, asay nubaa xalla qoppanaadan oottiya ogiyan maayanawu koyokko. Geeshsha Maxaafay yootiyo maarati maayiyoobaanne huuphiyaa oyqqiyo ogiyaa xeelliyaagan cimati bantta higgiyaa kessiyoogaappe naagettanaadankka maaddoosona. w23.07 23-24 ¶13-14
Qeeraa, Hidaare 15
Ane loittidi, taani odiyoogaa ezggite; lo77obaa miite; qassi modhdhuwan intte asatettaa ufaissite.—Isi. 55:2.
Nuuni ufayssiya hidootaa demmanaadan Yihooway koshshiyabaa oottiis. ‘Eeyya maccaasee’ shoobiyaa ekkiyaageeti pokkoban ufayttanawu baaxetoosona. Eti oottiyoobay hayquwaa kaalettees. (Lee. 9:13, 17, 18) ‘Tumu aadhdhida eratettaa’ qonccissiya maccaasee shoobiyaa ekkiyaageetussi keehi dumma hidootay deꞌees! (Lee. 9:1) Nuuni Yihooway dosiyoobaa dosoos, qassi I ixxiyoobaa ixxoos. (Maz. 97:10) ‘Tumu aadhdhida eratettaa’ tamaaranaadan harata shoobbiyoogan nuuni ufayttoos. Nuunikka “katamaassi xoqqa sohuwan eqqidi, ‘Inttenoo, eri paccidoogeetoo hagaa gelite!’ [yaagiya]” ashkkaratu mala. Nuuninne shoobiyaa ekkiyaageeti demmiyo goꞌꞌay haꞌꞌissa xallawu deꞌiyaaba gidenna. Hegee merinawu demmiyooba; nuuni ‘akeeka ogiyan hemettiyoogee’ merinawu ‘deꞌanaadan’ oottees.—Lee. 9:3, 4, 6. w23.06 24 ¶17-18
Woggaa, Hidaare 16
Wolqqaama asa gidiyoogaappe, hanqqettanau eesotenna asa gidiyoogee lo77o; daro katamata olidi oiqqiyoogaappe, asi ba huuphiyaa haariyoogee aadhdhees.—Lee. 16:32.
Nenaara oottiyaagee woy nenaara tamaariyaagee ne ammanuwaabaa oychchiyo wode ne waanuutii? Neeni yayyay? Nuuppe daroti yayyoos. SHin hegaa mala oyshay he uri qoppiyoobaa woy ammaniyoobaa akeekanaadan nuna maaddana danddayees, qassi hegee metootennan nuuni mishiraachchuwaa awu yootanaadan oottees. Gidikkonne, issi uri nunaara maayettenna gishshawu woy nunaara palamettanawu koyiyo gishshawu issi issitoo oychchana danddayees. Nuuni hegan maalaalettana koshshenna. Ayssi giikko, amarida asay nu ammaniyoobaa xeelliyaagan balabaa siyiis. (Oos. 28:22) Qassi nuuni deꞌiyo ‘wurssetta gallassatun’ issi issitoo daroti ‘sigettokkona,’ ubba qassi ‘kehokkona.’ (2 Xim. 3:1, 3) Neeni hagaadan qoppana danddayaasa, ‘Ta ammaniyoobaa xeelliyaagan issi uri tanaara palamettanawu koyiyaaba milatikko taani kehanne hiillanchcha waana gidana danddayiyaanaa?’ Ashkketettay nena maaddana. Ashkke asi harati A yiilloyiyaabaa oottiyo wode, woy I woygi zaaranaakko erenna wode ubbatoo woppu gees. w23.09 14 ¶1-2
Saynno, Hidaare 17
Neeni eta biitta ubbaa bollan sunttana.—Maz. 45:16.
Yihoowa dirijjitee qohiyabaappe nuna naagiya zoriya nuussi immiyo wodeti deꞌoosona. Leemisuwawu, miishshaa siiquwappenne Xoossaa Higgiya kanttanaadan oottiyabaappe naagettanaadan nuuyyo zoree imettees. He allaalletun Yihoowa kaaletuwa kaalliyogee nuussi anjjuwa demissees. (Isi. 48:17, 18; 1 Xim. 6:9, 10) Gita waayiya wodenne Shaꞌu Layttaa Haaruwa wode Yihooway kaaletuwa immanawu asan goꞌettiyogaa aggennaagee qoncce. Nuuni ubbatoo he kaaletuwa kaallanee? Haꞌꞌi Yihoowa kaaletuwa kaallikko yaatiyogee metenna. Yaaniyo gishshawu, nuna heemmanaadan sunttettida attumaageeti immiyo kaaletuwa gujjin, Yihoowa kaaletuwa ubbatoo kaalliyageeta gidoos. (Isi. 32:1, 2; Ibr. 13:17) Nuna Kaalettiya Yihoowa, ammanettidi kaallana danddayoos; ayssi giikko, aara dabbotido dabbotaa moorana danddayiya aybippenne I nuna naagees; qassi ooratta alamiyan demmana merinaa deꞌuwawu kaalettees. w24.02 25 ¶17-18
Masqqaynno, Hidaare 18
Xoossaa aaro kehatettan intte attideta.—Efi. 2:5.
Kiitettida PHawuloosi Yihoowawu haggaaziyoogan ufayttikkonne hegee ubbatoo metennaba gidenna. PHawuloosi darotoo adussa ogiyaa manddariis; qassi he wode manddariyoogee metiyaaba. PHawuloosi manddariyo wode issi issitoo ‘kixa haattaynne panggati daafirggidi ashshidosona.’ A morkketi A shocido wodetikka deꞌoosona. (2 Qor. 11:23-27) Qassi Kiristtaane ishantti PHawuloosi eta maaddanawu wozanappe oottidobaa darotoo nashshibookkona. (2 Qor. 10:10; Pili. 4:15) Yihoowawu aggennan haggaazanaadan PHawuloosa maaddidabay aybee? PHawuloosi Geeshsha Maxaafaappenne ba deꞌuwan gakkidabaappe Yihoowa eeshshaabaa darobaa tamaariis. PHawuloosi Xoossaa Yihooway A siiqiyoogaa mintti ammaniis. (Roo. 8:38, 39; Efi. 2:4, 5) Qassi I Yihoowa keehi siiqees. PHawuloosi ‘ammaniyaageeta maaddiyoogan’ Yihoowa siiqiyoogaa bessiis.—Ibr. 6:10. w23.07 9 ¶5-6
Oruwa, Hidaare 19
Asay ubbay ayssiya asatuyyo haaretto.—Roo. 13:1.
Geeshsha Maxaafay asaa kawotettata ‘deriya heemmiyageeta’ yaagees. Kawotettati deꞌiyogee loꞌꞌo gidiyogaa daro asay maayettees; qassi kawotettati kessiyo higgetuppe amaridaageeta eti azazettana danddayoosona. Shin eti dosenna woy likke gidenna giidi qoppiyo higgetussi waayi azazettana. Asaa kawotettay tuggaa ehiyogaa, Seexaanaa haaruwan deꞌiyogaanne mata wode xayanaagaa Geeshsha Maxaafay yootees. (Maz. 110:5, 6; Era. 8:9; Luq. 4:5, 6) Qassikka Geeshsha Maxaafay “ha77i de7iya heemmiyaageeta ixxiya ooninne Xoossaa azazuwaa ixxees” yaagees. Amarida hanotan nuuni deriya haariyageetussi azazettiyogee maaray mankkay deꞌanaadan guutta wodiyawu Yihooway giigissidoba. Hegaa gishshawu nuuni giiraa, bonchchuwanne azazettiyogaa gujjin, “ubbau bessiyaagaa” immana koshshees. (Roo. 13:1-7) Higgiyawu azazettiyogee loꞌꞌo gidennabadan, likke gidennabadan woy nuna daro miishshaa kesissiyabadan xeellana danddayoos. Shin nuuni deriya haariyageetussi azazettanaadan nuussi yootiday Yihoowa gidiyo gishshawu, A higgiya nu kanttanaadan eti oychchenna wode ubban nuuni etawu azazettana bessees.—Oos. 5:29. w23.10 8 ¶9-10
Hamuusa, Hidaare 20
[Yihoowa] Ayyaanai a bolli wolqqappe wodhdhiis.—Daan. 15:14.
Samssooni yelettido wode Pilisxxeemati Israaꞌeelata haaroosonanne huqqunnoosona. (Daan. 13:1) Pilisxxeemati meqettaa iita gidiyo gishshawu Israaꞌeelati keehi waayettidosona. Yihooway ‘Israaꞌeelata Pilisxxeema asaa kushiyaappe ashshanawu’ Samssoona dooriis. (Daan. 13:5) Ha metiya aawatettaa polanawu Samssooni Yihoowan ammanettana koshshiis. Issi wode, Pilisxxeema olanchchati Leeha giyo kataman deꞌiya Samssoona oyqqanawu yiidosona; he katamay Yihudaa biittan deꞌennan aggenna. Yihudaa asati keehi yayyido gishshawu Samssoona morkketuyyo aatti immanawu kuuyidosona. Samssoona asati, naaꞌꞌu ooratta wodoruwan A qachchidi Pilisxxeematukko efiidosona. (Daan. 15:9-13) SHin, Samssooni ‘Yihoowa ayyaanay A bolli wolqqappe wodhdhin’ wodoruwaa duuterettiis. Yaatidi I “mata wode haiqqida issi hariyaa gappataa demmi ekkidi” 1,000 Pilisxxeema asaa woriis!—Daan. 15:14-16. w23.09 2 ¶3-4
Arbba, Hidaare 21
Xoossai hegaa nu Godaa Kiristtoos Yesuusa baggaara i polido ba merinaa qofaadan oottiis.—Efi. 3:11.
Yihooway ba “merinaa qofaa” woy halchchuwa Geeshsha Maxaafan loddan loddan qonccissidoogee ufayssiyaba. Yihooway ba halchchuwa polanawu dumma dumma ogiya doorana danddayees, qassi I ‘ba halchchuwawu ubbabaa oottido gishshawu’ awudenne hegaa polees. (Lee. 16:4) Hegaa gishshawu Yihooway oottiyobay merinawu deꞌees. Yihoowa halchchoy aybee, qassi hegaa polanawu I laammidobay aybee? Xoossay ba halchchuwa Addaamessinne Hewaanissi yootiis. Eti ‘yelettanaadan, corattanaadan, ha saꞌaa kumanaadaaninne haaranaadan, qassi saꞌan paxa deꞌiya mereta ubbaa haaranaadan’ halchchiis. (Doo. 1:28) Addaamenne Hewaana Yihoowa bolli makkalidi asay nagaranchcha gidanaadan oottidoogee Yihooway ba halchchuwa polennaadan diggibeenna. I ba halchchuwa poliyo ogiya laammiis. Daro takkennan, I saluwan Kawotettaa essiis, he kawotettay I asawunne saꞌawu halchchido koyro halchchuwa polana.—Maa. 25:34. w23.10 20 ¶6-7
Qeeraa, Hidaare 22
[Yihooway] tana maaddennaakko, taani eesuwan duufuwan gelada sirphphi gaana shin.—Maz. 94:17.
Nuuni ammanettidi deꞌanaadan Yihooway nuna maaddees. Nuuni nu shugo miyyiyaa xoonanawu baaxetiyoogee issi issitoo metiyaaba gidana danddayees. Issi issitoo, nu shugo miyyee kiitettida Pheexiroosaagaappe aaruwan deexxiyaaba milatana danddayees. Shin nuuni hidootaa qanxxennaadan Yihooway nuussi wolqqaa immana danddayees. (Maz. 94:18, 19) Leemisuwawu, issi ishay tumaa eranaappe kase daro layttawu mattuman ba mala asaara mattumaa gayttees. I shori baynnabaa oottiyoogaa muleera aggiis. Gidikkonne, I issi issitoo iitabaa amottiyoogaa agganawu baaxetees. I aggennan baaxetanaadan aybi maaddidee? I hagaadan giis: “Yihooway tawu wolqqaa immees.” I gujjidikka hagaadan giis: “Yihoowa ayyaanay maaddin . . . , I koyiyoogaadan nuuni [ubbatoo] deꞌana danddayiyoogaa taani tamaaraas . . . Yihooway tana goꞌettiis, qassi taani balabaa oottikkokka I ubbatoo tawu wolqqaa immees.” w23.09 23 ¶12
Woggaa, Hidaare 23
Neeni ashkke gidikkonne [Yihoowassi] yayyikko, duretettaa, bonchchuwaanne de7uwaa demmana.—Lee. 22:4.
Yelaga ishanttoo, kayma Kiristtaane gidanawu intte baaxetana koshshees. Inttessi loꞌꞌo leemiso gidiya asata dooriyageeta, adussi qoppiyageeta, ammanettiyageeta, maaddiya hiillaa tamaariyageetanne sinttappe demmana aawatettawu giigettiyageeta gidana koshshees. Intte oottana koshshiya darobaa qoppiyo wode unꞌꞌettana danddayeeta. Shin hegaa oottana danddayeeta. Yihooway inttena maaddanawu loytti koyiyogaa hassayite. (Isi. 41:10, 13) Galchchan deꞌiya intte ishanttinne michchonttikka inttena maaddana. Intte Yihooway koyiyogaa mala asa gidikko, woppu giidi ufayttidi deꞌana. Yelaga ishanttoo, nuuni inttena shiiqoos! Intte kayma Kiristtaane gidanawu baaxetiyo wode, Yihooway inttena darissidi anjjanaadan amottoos. w23.12 29 ¶19-20
Saynno, Hidaare 24
Moorida urau atto [ga]. —Lee. 19:11.
Ishanttuuranne michchonttuura issippe kaaꞌaydda deꞌiyabadan qoppa. Neeni ufayssiya wodiya aattada pootuwa denttadasa. Qassi koyro pootoy darin loꞌꞌenna gishshawu hara naaꞌꞌu pootota denttadasa. Haꞌꞌi neeyyo heezzu pootoy deꞌees. Shin hegeetuppe issuwan issi ishay noocu geennaagaa akeekadasa. Yaatiyo gishshawu hegaa xayssaasa; ayssi giikko hara naaꞌꞌu poototun he ishaa gujjin, ubbaykka noocu goosona. Nuuni nu ishanttuuranne michchonttuura aattido daro wodeta hassayoos. Shin he wodetuppe issuwan issi ishay woy michchiya qohiyabaa haasayennan woy oottennan aggokkona. Nuuni hegaa waatana koshshii? Nuuni he poototuppe issuwa xayssiyogaadan hegaa doganawu baaxetana koshshees. (Efi. 4:32) Nuuni nu mala Kiristtaaniyara aattido daro wodeta hassayidi he uri mooridobaa dogana danddayoos. Hegaa mala wodeta nuuni ubbatoo hassayanawunne xoqqu ootti xeellanawu koyoos. w23.11 12-13 ¶16-17
Masqqaynno, Hidaare 25
Maccaasaikka bessiya maayuwaa . . . maayona. Xoossau yayyais giya maccaasau bessiyoogaadan [banttana alleeqissona].—1 Xim. 2:9, 10.
Ha sohuwan goꞌettido Giriiketto qaalay issi maccaasiya ubbatoo giigabaa maayana koshshiyogaanne A maayiyobaa xeelliyagan harati qoppiyobaa bonchchana koshshiyogaa bessees. Kayma gidida nu michchontti kiphatan maayiyo gishshawu, nu eta keehi nashshoos! Kayma michchontti ubbay bessana koshshiyo hara eeshshay akeekaa. Akeekay aybee? Hegee likkenne likke gidennabaa shaakki eranawunne likkebaa oottanawu maaddiyaba. Abigaalibaa ane beꞌoos. I azinay A so asay ubbay qohettanaadan oottiya iitabaa kuuyiis. Abigaala sohuwara issibaa oottaasu. A akeekanchcha gididoogee daro asaa ashshiis. (1 Sam. 25:14-23, 32-35) Nuuni awude haasayanaakko woy coꞌꞌu gaanaakko eranaadankka akeekay nuna maaddees. Qassi nuuni haratuura haasayiyo wode, nu erana koshshennabaa oychchennaadan woy eta yeellayennaadan akeekay nuna maaddees.—1 Tas. 4:11. w23.12 20 ¶8-9
Oruwa, Hidaare 26
Nuuni Xoossaa bonchchuwa demmanawu naagiyo gishshawu, haꞌꞌi ufayttana koshshees.—Roo. 5:2.
Kiitettida Phawuloosi ha qofaa Roomen deꞌiya galchchawu xaafiis. Yan deꞌiya ishanttinne michchontti Yihoowabaanne Yesuusabaa tamaaridi ammanidosona, yaatidi Kiristtaane gididosona. Hegaa gishshawu, Xoossay eta “ammanuwan [xillo]” yaagiisinne geeshsha ayyaanan tiyiis. (Roo. 5:1) Eti ufayssiya hidootaa yeemuwan naagananne hegaa demmanaagaa ammanettana danddayoosona. Guyyeppe, Phawuloosi Efisoonan deꞌiya tiyettida Kiristtaanetussi Xoossay immido hidootaabaa xaafiis. Eti, ‘I ba asawu immana anjjuwa’ ekkana. (Efi. 1:18) Qassi, Qolasiyasan deꞌiya Kiristtaaneti bantta woytuwa awan demmanaakko Phawuloosi yootiis. I hegaa, “saluwan giigidi naagiya, Xoossai sinttappe [immanaba]” giidi yootiis. (Qol. 1:4, 5) Tiyettida Kiristtaanetu hidootay hayquwappe denddidi saluwan merinawu deꞌiyogaa; eti yan Kiristtoosaara haarana.—1 Tas. 4:13-17; Ajj. 20:6. w23.12 9 ¶4-5
Hamuusa, Hidaare 27
Asa eratettaa ubbaappe aadhdhiya Xoossaa sarotettai intte wozanaanne intte qofaa . . . naagana.—Pili. 4:7.
“Naagana” geetettida qaalay Geeshsha Maxaafay koyro xaafettido doonan olanchchatuura gayttidaagan goꞌettiyo qaala. Qassi hegee katamaa qohuwappe naagiya wotaaddaratakka qonccissees. Naagiyageeti deꞌiyo kataman deꞌiya asati banttana wotaaddarati naagiyogaa eriyo gishshawu woppu goosonanne aynne hirggokkona. Hegaadankka, Xoossaa sarotettay nu wozanaanne qofaa naagiyo wode, qohoy nuna gakkennaagaa eriyo gishshawu woppu goos. (Maz. 4:8) Haanniigaadan, nu metoy sohuwara giigana xayikkonne, nuuni woppu gaana danddayoos. (1 Sam. 1:16-18) Qassi nuuni woppu giyo wode suurebaa qoppanawunne loꞌꞌobaa kuuyanawu darotoo metootokko. Nuuni ay oottana danddayiyoo? Metoy nena gakkiyo wode ashshanaadan naagiyagaa xeesa. Waatada? Xoossaa sarotettaa demmana gakkanaashin woossa. (Luq. 11:9; 1 Tas. 5:17) Nena metoy gakkikko ubba wode woossa, yaatikko Yihoowa sarotettay ne wozanaanne qofaa naagiyogaa neeni akeekana.—Roo. 12:12. w24.01 21 ¶5-6
Arbba, Hidaare 28
Saluwan deꞌiya nu Aawawu, asa ubbay ne sunttaa geeshsha oottidi xeello.—Mat. 6:9.
Yesuusi ba Aawaa sunttaa geeshshanawu dumma dumma waayiya, cashshanne A xeelliyagan odettida wordduwa ubbaa gencciis. Yesuusi ubbaban ba Aawawu azazettidoogaa eriyo gishshawu, A yeellayiyabi baawa. (Ibr. 12:2) He iita wodiyan A qohiiddi deꞌiyay Seexaanaa gidiyogaakka I erees. (Luq. 22:2-4; 23:33, 34) Seexaanay Yesuusi ammanettidi deꞌennaadan oottanawu qoppidoogee qoncce; gidikkonne Yesuusi ammanettidi deꞌiis! Seexaanay worddanchcha gidiyogaanne keehi metiya hanotay deꞌishinkka, Yihoowawu ammanettidi oottiyageeti deꞌiyogaa Yesuusi qonccissiis! Haariiddi deꞌiya ne Kawuwa ufayssanawu koyay? Yaatikko, maalaalissiya nu Xoossaa eeshshata harati eranaadan maaddiyogan ubbatoo Yihoowa sunttaa sabba. Neeni yaatiyo wode Yesuusa leemisuwa kaallaasa. (1 PHe. 2:21) Yesuusaagaadan neeni Yihoowa ufayssaasa; qassi A morkkee Seexaanay worddanchcha gidiyogaa bessaasa! w24.02 11-12 ¶11-13
Qeeraa, Hidaare 29
I taassi kehido kehatettaa gishshaa taani [Yihoowassi] ai qanxxanau danddayiyaanaa?—Maz. 116:12.
Aadhdhida ichchashu layttaa giddon, issi miilooneppe dariya asay haattan muukettidi Yihoowa Markka gidiis. Neeni nena Yihoowawu sheedhdhiyo wode, Yesuus Kiristtoosa kaalliyagaa gidanawunne ne deꞌuwan aybippenne aaruwan Xoossaa sheniya oottanawu dooradasa. Bana Yihoowawu sheedhdhida Kiristtaanee ay oottana koshshii? Yesuusi hagaadan giis: “Ooninne tana kaallana koyikko, bana yeggi bayo.” (Mat. 16:24) “Bana yeggi bayo” geetetti birshshettida Giriiketto qaalay “bawu deꞌoppo” geetettidikka birshshettana danddayees. Neeni nena Yihoowawu sheedhdhida ashkkara gidiyo gishshawu Yihoowa ufayssenna aybanne oottana koshshenna. (2 Qor. 5:14, 15) Hegaa giyogee ‘asatettaa ooso’ gidida pokkiya tuna nagaraappe haakkana koshshees giyogaa. (Gal. 5:19-21; 1 Qor. 6:18) Neeni he higgeta azazettiyogee metiyabee? Neeni Yihoowa siiqiyabanne A higgeta azazettiyogee neeyyo loꞌꞌo gidiyogaa ammanettiyaba gidikko yaatiyogee metiyaba gidenna.—Maz. 119:97; Isi. 48:17, 18. w24.03 2 ¶1; 3 ¶4
Woggaa, Hidaare 30
Taani nenan ufayttays.—Luq. 3:22.
Yihooway bana ufayssiyageetussi ba geeshsha ayyaanaa immees. (Mat. 12:18) Nuna hagaadan oychchana danddayoos: ‘Taani Xoossaa ayyaanaa ayfiya macarata ta deꞌuwan bessiyanaa?’ Neeni Yihoowa erabeenna wodiyagaappe aaruwan haꞌꞌi danddayanchchee? Neeni Xoossaa ayyaanaa ayfiya macarata loytta bessiyo wode Yihooway nenan ufayttiyogaa loytta ammanettana danddayaasa! Yihooway bana ufayssiyageetussi wozuwa waagaa qanxxees. (1 Xim. 2:5, 6) Nuuni wozuwan ammanidi haattan muukettidaageeta gidikkokka, Yihooway nunan ufayttennabadan qoppikko shin? Nuuni ubbatoo nu qofan gidennan, Yihoowan ammanettana koshshiyogaa hassaya. I wozuwan ammaniyageeta xillo asadan xeellees; qassi eta anjjanawu qaalaa geliis.—Maz. 5:12 Roo. 3:26. w24.03 30 ¶15; 31 ¶17