Bala Timirttiyaa 3: Loꞌꞌo Asa Ubbay Saluwaa Bees

Ha bala timirttiyau denddoy aybee? Yesuusi kiittidoogeeti hayqqi simmin, naaꞌꞌantto xeetu laytta M.L. doomettan, Woosa Keettaa Aawati keehippe erettidosona. Niwu Katolik Inssaykilopidee (2003), Vooliyum 6n, sinttaa 687n: “Hayquwaappe simmin bollaappe shaahettida shemppoy koshshiyaagaadan geeyosaara saluwaa biidi ufayttees giyo timirttee ubbasan aakkiis” yaagidi, eta timirttiyaa qonccissees.

Geeshsha Maxaafay woygii? “Ashkketi anjjettidaageeta; aissi giikko, eti sa7aa laattana.”—Maatiyoosa 5:5.

Yesuusi ba erissiyo ashkkaratuyyo saluwan “sohuwaa giigissanau” qaalaa gelidaba gidikkonne, xillo asay ubbay saluwaa baanaagaa yootibeenna. (Yohaannisa 3:13; 14:2, 3) I Xoossaa “shenee saluwan hanidoogaadan, sa7ankka hano” giidi woossibeenneeyye? (Maatiyoosa 6:9, 10) Amaridaageeti Kiristtoosaara saluwan haariyo, daroti qassi saꞌan merinau deꞌiyo naaꞌꞌu hidootay xillotuyyo deꞌees.—Ajjuutaa 5:10.

Takkidi, beni woosa keettay saꞌan oottanaadan imettida oosuwaara gayttidaagan ba xeelaa laamiis. Hegee ay kaalettidee? Ze Niwu Inssaykilopidiya Biritanikay: “Woosa keettay hidootan naagiyo Xoossaa Kawotettaa sohuwaa ekki ekki biis” yaagees. Yesuusi bana kaalliyaageeta “sa7aabaa gidekketa” giido qoncce azazuwaa aggidi, woosa keettay polotikan geliyoogan ba wolqqaa minttiyoogaa doommiis. (Yohaannisa 15:19; 17:14-16; 18:36) Rooma Kawuwaa Qosxxenxxinoosi wolqqanttin, woosa keettay Xoossaa oonatettaa gujjin, ba ammanuwaappe amaridaagaa aggiis.

Kaallidi deꞌiya Geeshsha Maxaafaa xiqiseta beꞌa: Mazamure 37:10, 11, 29; Yohaannisa 17:3; 2 Ximootiyoosa 2:11, 12

TUMAA:

Daro asay saluwan gidennan saꞌan merinau deꞌana

[Sinttaa 6n deꞌiya Misilee Ekettidosaa]

Art Resource, NY