Tumuppe Kiristtoosa Kaalliyaageeta Gidiyoogaa Qonccissite

“Lo77⁠o mitta ubbai lo77⁠o aife aifees; shin iita mitti iita aife aifees.”—MAATIYOOSA 7:17.

1, 2. Ha wurssetta wodiyan tumuppe Kiristtoosa kaalliyaageeti worddotuppe dummatiyoogee waanidi qonccidee?

YESUUSI wordduwan bana kaallays giyaageeti tumuppe bana kaalliyaageetuppe bantta ayfiyo ayfiyan, giishin bantta tamaarissiyoobaaninne oottiyooban dummati erettiyoogaa yootiis. (Maatiyoosa 7:15-17, 20) Asay ba qofaaninne ba wozanan deꞌiyaabaa oottiyoogee attenna. (Maatiyoosa 15:18, 19) Worddobaa tamaariyaageeti “iita aife” ayfoosona; ayyaanaaban tumaa tamaariyaageeti “lo77⁠o aife” ayfoosona.

² He naaꞌꞌu qommo ayfeti ha wurssetta wodiyan qonccidi erettidosona. (Daaneela 12:3, 10 nabbaba.) Worddo Kiristtaanetuyyo Xoossaa xeelliyaagan bala xeelay deꞌees; qassi eti darotoo Xoossau aqida giyoy wozanappe gidenna. SHin ayyaanaabaa loytti akeekiyaageeti “ayyaanaaninne tumatettan” Xoossau goynnoosona. (Yohaannisa 4:24; 2 Ximootiyoosa 3:1-5) Eti Kiristtoosaagaa mala eeshshaa bessanau baaxetoosona. Nubaashin woygana danddayettii? Tumu Kiristtaaneta erissiya kaallidi deꞌiya ichashubata beꞌiyoode: ‘Taani oottiyoobaynne tamaarissiyoobay Xoossaa Qaalaara ubbaban moggii? Ta hanotay tumaa eranau koyiyaageeti an omoodettanaadan oottii?’ yaagada nena oycha.

Xoossaa Qaalaadan Deꞌite

3. Yihoowa ufayssiyaabay aybee? Hegee tumu Kiristtaanetussi woygiyoogee?

³ Yesuusi: “Saluwan de7⁠iya ta Aawai giidoogaa oottiya urai saluwaa gelanaappe attin, ‘Ta Godau, ta Godau’ giya ubbai gelenna” yaagiis. (Maatiyoosa 7:21) Yihoowa ufayssiyay issi uri bana Kiristtaane giyoogaa gidennan, issi Kiristtaaniyaappe koyettiyaabaa oottiyoogaa. Hegee Kiristtoosa tumuppe kaalliyaageeti miishshaa, oosuwaa, wodiyaa aattiyoobaa, alamiyaa meezetanne baalata, qassi aqo deꞌuwaanne hara asaara deꞌiya gaytotettaa xeelliyo ogiyaa gujjin, eta kumetta deꞌuwaara gayttidaba. Gidikkokka, worddo Kiristtaaneti ha wurssetta gallassatun darida, Xoossay ixxiyo alamiyaa qofaanne deꞌo ogiyaa kaalloosona.—Mazamure 92:7.

4, 5. Milkkiyaasa 3:18n deꞌiya Yihoowa qaalaa nu deꞌuwan waatidi oosuwan peeshshana danddayiyoo?

⁴ Hegaara moggiya ogiyan hananabaa yootiya Milkkiyaasi: “Intte zaarettidikka xilluwaappenne nagaranchchaappe gidduwan de7⁠iya zawaanne Xoossaassi azazettiyaageetuppenne azazettennaageetuppe gidduwan de7⁠iya zawaa be7ana” yaagidi xaafiis. (Milkkiyaasa 3:18) Ha qaalatun wotta dentta qoppiyo wode: ‘Taani alamiyaa asaa maleeyye etappe dummatiyaanaa? Tanaara tamaariyaageeta woykko oottiyaageeta malatanau ubbatoo koyiyaanaayye, Geeshsha Maxaafaa baaso siraataadan deꞌiyaanaa, woy koshshiyo wode ubba hegau exatiyaanaa?’ yaagada nena oycha. (1 PHeexiroosa 3:16 nabbaba.) Nu huuphiyaa xillo gaanau koyennaagee qoncce; shin Yihoowa siiqennaageetuppenne ayyo oottennaageetuppe nuuni dummatiyoogee qonccana koshshees.

⁵ Ne eeshshan laamettana koshshiyoogaa neeni akeekikko, he allaalliyaa xeelliyaagan aybissi woossikkii; qassi ubbatoo Geeshsha Maxaafaa xannaꞌiyoogan, woossiyoogaaninne gubaaꞌiyaa shiiqotun beettiyoogan ayyaanaaban minttettuwaa aybissi demmikkii? Xoossaa Qaalaa neeni kaseegaappe aaruwan oosuwan peeshshiyo wode, kaseegaappe aaruwan ‘loꞌꞌo ayfiyaa’ ayfana; hegee “menttershshai [Xoossaa] sunttaayyo immiyo galataa” gujjees.—Ibraawe 13:15.

Xoossaa Kawotettaabaa Sabbakite

6, 7. Kawotettaa kiitaara gayttidaagan tumu Kiristtaanetunne worddo Kiristtaanetu giddon ayba dummatettay deꞌii?

⁶ Yesuusi: “Taani hara kataman de7⁠iya asaukka Xoossaa kawotettaa wonggeliyaa mishiraachchuwaa yootanau bessees” yaagiis. (Luqaasa 4:43) Yesuusi Xoossaa Kawotettaa ba haggaazuwau waanna huuphe yoho oottidoy aybissee? I he Kawotettaa Kawo gidiyoogaadan, ayyaanan yelettida, hayquwaappe denddida ba ishanttuura gididi, asaa naatu waayiyau pultto gidida nagaraanne Dabloosa xayssanaagaa erees. (Roome 5:12; Ajjuutaa 20:10) Yaatiyo gishshau, bana kaalliyaageeti ha siraataa wurssettay gakkanaashin he Kawotettaabaa sabbakanaadan azaziis. (Maatiyoosa 24:14) Wordduwan Kiristtoosa kaalloos giyaageeti he oosuwaa oottokkona; eti ubba oottanaukka danddayokkona. Aybissi? Guuxxiis giishin hegau heezzu gaasoy deꞌees: Koyroy, eti erennabaa sabbakana danddayokkona. Naaꞌꞌanttoy, etappe daroti Kawotettaa kiitaa haratuyyo yootiyo wode, eta bolli gakkana danddayiya qilliicciyaanne yedetaa danddayanau ashkkenne xala gidokkona. (Maatiyoosa 24:9; 1 PHeexiroosa 2:23) Heezzanttoy qassi, worddo Kiristtaanetussi Xoossaa ayyaanay baawa.—Yohaannisa 14:16, 17.

⁷ Hara baggaara, tumuppe Kiristtoosa kaalliyaageeti Xoossaa Kawotettaanne i polanabaa eroosona. Hegaa bollikka, eti Yihoowa ayyaanaa maaduwan Kawotettaabaa saꞌa yuushuwan sabbakiyoogan, bantta deꞌuwan he Kawotettaa kaseyoosona. (Zakkaariyaasa 4:6) Neeni he oosuwaa ubba wode oottay? Neeni haggaazuwaa kaseegaappe aaruwan muruta ogiyan oottiyoogan woykko daro wodiyaa an aattiyoogan gidana danddayees, Kawotettaabaa sabbakiyaagaa gidiyoogan dichaa bessanau baaxetay? Issoti issoti haggaazuwan Geeshsha Maxaafaa loyttidi goꞌettiyoogan, bantta haggaazuwaa kaseegaappe murutissanau baaxetoosona. Geeshsha Maxaafaappe yootiyoogaa meeze oottida, kiitettida PHauloosi: “Xoossaa qaalai paxa de7⁠eesinne oottees” yaagidi xaafiis.—Ibraawe 4:12; Oosuwaa 17:2, 3.

8, 9. (a) Nu haggaazuwan Geeshsha Maxaafaa goꞌettiyoogee maaddiyoogaa bessiya temokroti awugeetee? (b) Nuuni Xoossaa Qaalaa loyttidi goꞌettiyaageeta gidana danddayiyoy ayba ogiyaanee?

⁸ Issi ishay sooppe soo haggaaziyo wode, Kaatolike haymaanootiyaa kaalliya issi bitaniyau Daaneela 2:44 nabbabidi, Xoossaa Kawotettay tumu sarotettaanne woppatettaa waatidi ehiyaakko qonccissiis. He bitanee: “Neeni coo yootiyoogaappe Geeshsha Maxaafaa dooyada nabbabido gishshau keehippe galatays” yaagiis. Issi ishay Giriike Orttodookise haymaanootiyaa kaalliya maccaaseeyyo issi xiqisiyaa nabbabido wode, iyyo koshshay deꞌiyoogaa bessiya amarida oyshaa oychaasu. Ha hanotankka he ishaynne a maccaasiyaa Geeshsha Maxaafaappe i oyshaa zaaridosona. Guyyeppe, he maccaasiyaa: “Taani inttenaara haasayanau koyidoy aybissakko ereetii? Intte Geeshsha Maxaafaa oyqqidi ta soo yiideta; qassi appe kessidi nabbabideta” yaagaasu.

⁹ Nu xuufee keehippe goꞌꞌiyaaba gidiyoogee qoncce; qassi haggaazuwan a asau immana koshshees. Gidikkokka, nuuni goꞌettiyo waannabay Geeshsha Maxaafaa. Neeni haggaazuwan Geeshsha Maxaafaa ubbatoo goꞌettiyoogaa meeze oottana xayikko, hegaadan oottanau aybissi halchikkii? Xoossaa Kawotettay aybakko, qassi ne heeran deꞌiya asaa qofissiya issi issi metota he Kawotettay waatidi xayssanaakko yootiya waanna xiqiseta doorana danddayaasa. Yaatada sooppe soo haggaaziyo wode he xiqiseta nabbabanau giigetta.

Xoossaa Sunttaa Ufayssan Goꞌettite

10, 11. Xoossaa sunttaa goꞌettiyoogaara gayttidaagan Yesuusanne a kaalloos giya darotu giddon ayba dummatettay deꞌii?

¹⁰ Yihooway, “Taani Xoossaa gidiyoogau taayyo intte markkata” yaagiis. (Isiyaasa 43:12) Yihoowassi waanna markkaa, Yesuus Kiristtoosi Xoossaa sunttaa goꞌettiyoogaanne erissiyoogaa maatadan xeelliis. (Kessaabaa 3:15; Yohaannisa 17:26; Ibraawe 2:12 nabbaba.) Yesuusi ba Aawaa sunttaa erissido gishshau, ‘Ammanettida Markkaa’ geetettiis.—Ajjuutaa 1:5; Maatiyoosa 6:9.

¹¹ Hegaappe dumma hanotan, wordduwan Xoossaanne a Naꞌaa kalꞌꞌatoos giyaageeti, Xoossaa sunttaa bessiyaagaadan bonchibookkona; ubba bantta Geeshsha Maxaafaa birshshettatuppe he sunttaa kessidosona. Goynuwaa wode, “oyddu Ibraysxxe pitaleta malaatiya, YHWH giyaagan xaafettiya Xoossaa sunttaa goꞌettennaadan woykko xeesennaadan” Kaatolike qeesetuyyo mata wode imettida kaaletoy hegaa mala xeelay deꞌiyoogaa bessees.a Hegee keehippe iita qofa!

12. Yihoowa ashkkarati 1931n Yihoowa sunttaa keehippe goꞌettiyoogan erettidoy ayba ogiyaanee?

¹² Tumu Kiristtaaneti Kiristtoosanne appe kase deꞌida ‘shaara keena markkatu’ leemisuwaa kaalliyoogan, Xoossaa sunttaa ufayssan goꞌettoosona. (Ibraawe 12:1) Xoossaa ashkkarati 1931n Yihoowa Markkata giya sunttan xeesettiyoogan, Yihoowa sunttaa keehippe goꞌettiyoogan erettidosona. (Isiyaasa 43:10-12 nabbaba.) Yaatiyo gishshau, Kiristtoosa tumuppe kaalliyaageeti keehi dumma hanotan, “[Xoossaa sunttau] haniya asaa” gididosona.—Oosuwaa 15:14, 17.

13. Nuuni Xoossay immido nu sunttaadan waanidi deꞌana danddayiyoo?

¹³ Xoossaa sunttan xeegettiyaageetuppe koyettiyaabaa poliyoogaa nuuni waatidi bessana danddayiyoo? Koyruwan, nuuni ammanettidi Xoossaabaa markkattana bessees. PHauloosi, “Xoossaa maxaafai, ‘Godaa sunttaa xeesiya ooninne attana’ yaagees. Yaatin, eti a ammanibeennaageeta gidikko, waatidi a xeesanau danddayiyoonaa? Qassi qaalaa siyibeennaageeti waani ammananau danddayiyoonaa? Qaalaa yootiyaabi xayikko, eti waani siyanau danddayiyoonaa? Qassi qaalaa yootiyaageeti kiitettennan aggikko, kiitai waanidi odettanau danddayii?” yaagidi xaafiis. (Roome 10:13-15) Qassi, siiqo Xoossaa eeshshaa iita gidida Dabloosa eeshsha milatissiya, nuna Medhidaagaa sunttaa mooriya, siꞌooliyaa tamaa mala worddo haymaanootiyaa timirttee worddo gidiyoogaa nuuni hiillan qonccissana koshshees.—Ermmaasa 7:31; 1 Yohaannisa 4:8; Marqqoosa 9:17-27⁠ra gatta xeella.

14. Xoossaa sunttaa erido wode issotu issotuyyo aybi siyettidee?

¹⁴ Saluwan deꞌiya ne Aawaa sunttaa ufayssan goꞌettay? He geeshsha sunttaa eranaadan harata maadday? Paransaaye biittan Paarise kataman deꞌiya issi maccaasiyaa, Yihoowa Markkati Xoossaa sunttaa eriyoogaa siyaasu; yaatiyo gishshau, he maccaasiyaa ba Geeshsha Maxaafaappe he sunttaa bana bessanaadan hegaappe simmin banaara gayttida issi Yihoowa Markkiyo oychaasu. A Mazamure 83:18 nabbabido wode keehippe maalaalettaasu. A Geeshsha Maxaafaa xannaꞌiyoogaa doommaasu; qassi haꞌꞌi hara biittan haggaazaydda deꞌiya ammanettida micho. Awusttiraaliyaa biittan deꞌiya, Kaatolike haymaanootiyaa kaalliya issi maccaasiyaa Geeshsha Maxaafan Xoossaa sunttaa koyro beꞌido wode ufayssan afuxxaasu. Daro wodiyau, kumetta wode aqinye gidada haggaazaydda deꞌausu. Mata wode, Jamayka biittan Yihoowa Markkati issi maccaasiyo i Geeshsha Maxaafaappe Xoossaa sunttaa bessido wode, akka ufayssan afuxxaasu. Yaatiyo gishshau, Yesuusa leemisuwaa kaalliyoogan Xoossaa sunttaa goꞌettanaunne he alꞌꞌo sunttaa ubbau qonccissanau ufaytta.

“Ha Sa7aa . . . Siiqoppite”

15, 16. Tumu Kiristtaaneti ha alamiyaa aybidan xeelliyoonaa? Nuna woygiya oyshata oychana koshshii?

¹⁵ “Ha sa7aa woi sa7an de7⁠iya aibanne siiqoppite. Intte ha sa7aa siiqikko, Xoossaa siiqoi inttenan baawa.” (1 Yohaannisa 2:15) Alameenne a ayyaanay Yihoowaaranne a geeshsha ayyaanaara eqettoosona. Yaatiyo gishshau, tumuppe Kiristtoosa kaalliyaageeti ha alamiyaa bagga gidennaadan naagettiyoogaappe aadhiyaabaa oottoosona. Erissiyo ashkkaraa Yaaqoobi xaafidoogaadan, “ha sa7aara dabbotiyoogee Xoossaayyo ixo” gidiyoogaa eti eriyo gishshau, alamiyaa ixxoosona.—Yaaqooba 4:4.

¹⁶ Paacee darido alamiyan Yaaqooba zoriyaa oosuwan peeshshiyoogee metana danddayees. (2 Ximootiyoosa 4:10) Hegaa gishshau, Yesuusi: “Neeni xalahiyaappe eta naagana mala woossiyoogaappe attin, sa7aappe kessana mala woossikke. Taani sa7aassa gidennaagaadan, etikka sa7aassa gidokkona” yaagidi, bana kaalliyaageetu gishshaa woossiis. (Yohaannisa 17:15, 16) Hagaadan nena oycha: ‘Ha alamiyaa bagga gidennaadan baaxetiyaanaa? Geeshsha Maxaafaara moggenna woykko doomettay eeqa goynuwaara gayttidaba gidana xayikkonne, alamiyaa ayyaanaa qonccissiya baalatanne meezeta xeelliyaagan harati ta hanotaa eriyoonaa?’—2 Qoronttoosa 6:17; 1 PHeexiroosa 4:3, 4.

17. Suure wozanay deꞌiyoogeeti Yihoowa miyyiyan eqqanaadan aybi denttettana danddayii?

¹⁷ Geeshsha Maxaafan baasettida nu hanotay, alamee nuna nashshanaadan oottennaagee tuma; shin suure wozanay deꞌiyoogeeti eranau koyanaadan denttettana danddayees. Hegaa mala asati nu ammanoy Geeshsha Maxaafan minni baasettidoogaanne nu deꞌo ubbaara gayttidoogaa eriyo wode, ayyaanan tiyettidaageeta: “Xoossai inttenaara de7⁠iyoogaa nuuni siyido gishshau, ane nuunikka nenaara boos” giyoogaa malabaa oottana danddayoosona.—Zakkaariyaasa 8:23.

Tumu Kiristtaane Siiquwaa Bessite

18. Yihoowanne nu shooruwaa siiqiyoogee ay gujjii?

¹⁸ Yesuusi: “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa”; qassi, “neeni ne shooruwaa ne huuphedan siiqa” yaagiis. (Maatiyoosa 22:37, 39) He siiqoy (Giriikettuwan agaappe) suureban baasettidaba; issi uri oottana bessiyoobaara gayttidaba; qassi kandduwau imettida bessiya kaaletuwaaranne maaraara moggiyaabaa oottiyaaba. Gidikkokka, darotoo wozanappe qarettiyoogaara gayttidaba. Hegee wozanappe siiqiyoogaa malaatees. (1 PHeexiroosa 1:22) Hegee ba xallaa siiqennaagaa bessiya haasayaaninne oosuwan qoncciyo gishshau, ba huuphiyaa siiqiyoogaappe dumma.—1 Qoronttoosa 13:4-7 nabbaba.

19, 20. Kiristtaane siiquwau wolqqay deꞌiyoogaa bessiya issi issi temokruwaa yoota.

¹⁹ Siiqoy Xoossaa ayyaanaa ayfiya macara gidiyo gishshau, zariyaa, wogaanne polotikaa dummatettaa xooniyoogaa mala, harati oottana danddayennabaa tumu Kiristtaaneti oottanaadan danddayissees. (Yohaannisa 13:34, 35 nabbaba; Galaatiyaa 5:22) Hegaa mala siiquwaa beꞌiyoogee dorssa mala asata wozanappe denttettees. Leemisuwau, Israaꞌeele biittan issi yelaga Ayhuda bitanee Kiristtaane shiiquwan koyro beettido wode, Yihoowa Markka gidida Ayhudatinne Arabati issippe Yihoowayyo goynniyoogaa beꞌidi keehippe garamettiis. Hegaappe denddidaagan, ubbatoo shiiquwan beettiyoogaa doommiis; qassi Geeshsha Maxaafaa xannaꞌanau eeno giis. Neeni ne ishanttussi hegaa mala wozanappe gidida siiquwaa bessay? Qassi eti au biitta asa gidin, eta meray woykko eta deꞌuwaa hanotay ayba gidin, Kawotettaa Addaraashaa yiya oorattata siiquwan mokka ekkanau baaxetay?

²⁰ Kiristtaane gidiyoogaadan nuuni ubba asau siiquwaa bessanau baaxetoos. El Salvaadoore biittan issi yelaga Yihoowa Markkiyaa, layttay 87 gidido, Kaatolikke haymaanootiyaa mintta kaalliya issi maccaasiyo Geeshsha Maxaafaa xannaꞌissausu. Issi galla, he maccaasiyaa keehippe sahettada hosppitaaliyaa gelaasu. A hosppitaaliyaappe soo simmido wode, michoti o oychanau yiidi, qumaa iyyo kattidosona. Issi agina gidiyaagaa hegaadan oottidosona. I haymaanootiyaa kaalliya asaappe ooninne o oychibeenna. Hegaappe denddidaagan, a haymaanoote misileta sooppe xayssaasu; ba haymaanootiyaappe kiyaasu; qassi Geeshsha Maxaafaa zaarettada xannaꞌiyoogaa doommaasu. Ee, Kiristtaane siiquwau wolqqay deꞌees! Kiristtaane siiquwaa bessiyoogee coo sabbakiyoogaappe aaruwan asaa denttettana danddayees.

21. Nu sinttanaa deꞌoy ammanttiyaagaa gidanaadan ay oottana danddayiyoo?

²¹ Yesuusi wordduwan baassi oottays giyaageeta, mata wode: “Taani inttena mulekka erikke; iitabaa oottiyaageeti intte ta matappe haakkite” yaagana. (Maatiyoosa 7:23) Yaatiyo gishshau, Aawaanne Naꞌaa bonchissiya ayfiyaa ayfiyaageeta gidoos. Yesuusi, “Hagaa ta qaalaa siyidi oottiya ubbai shuchchan ba keettaa keexxida wozannaama asa mala” yaagiis. (Maatiyoosa 7:24) Ee, nuuni tumuppe Yesuusa kaalliyaageeta gidikko, Xoossan nashettana; qassi shuchan keexettida keettadan, nu sinttanaa deꞌoy ammanttiyaagaa gidana!

[Footnotes]

Hassayay?

• Tumuppe Kiristtoosa kaalliyaageeti worddotuppe waanidi dummatiyoonaa?

• Tumu Kiristtaaneta shaakki erissiya issi issi ‘ayfeta’ yoota.

• Kiristtaanetuppe koyettiya ayfiyaa ayfanau ay hoolliyaa kessana danddayay?

[Sinttaa 21n deꞌiya misiliyaa]

Haggaazuwan Geeshsha Maxaafaa ubbatoo goꞌettiyoogaa meeze oottadii?

[Sinttaa 23n deꞌiya misiliyaa]

Geeshsha Maxaafaara moggenna baalata xeelliyaagan harati ne hanotaa eriyoonaa?