Xoossaa A Sunttan Erana Danddayay?

Issi bonchettida ura a sunttaa xeesidi haasayissanaadan i shoobbiyoogee gitaba. Gita asay darotoo, “Pirezddanttiyau,” “Daannau” woykko “Daannee” giyaagaa mala boncho sunttan xeesettees. SHin gita maatay deꞌiyo uri nena, “Hayyanaa tana ta sunttan xeesa” yaagikko, hegan neeni bonchettidabadan neeyyo siyettanaagee sirissenna.

TUMU Xoossay ba Qaalan, Geeshsha Maxaafan, “Taani Yihoowa; hegee ta sunttaa” yaagiis. (Isi. 42:8)a Ayyo “Medhidaagaa,” “Ubbabaa Danddayiyaagaanne” “Ubbabaa Haariyaagaa” yaagiyaagaa mala boncho sunttay deꞌikkokka, ammanettida ba ashkkarati bana ba buzo sunttan xeesanaadan oottiyoogan eta ubbatoo bonchiis.

Leemisuwau, hananabaa yootiya Muusee issi wode Xoossaa woossiiddi, “Abeet Yihoowau” yaagidi doommiis. (Kes. 4:10) Kawuwaa Solomoni Yerusalaamen beeta maqidasiyaa anjjissido wode ba woosaa, “Abeet Yihoowau” yaagidi doommiis. (1 Kaw. 8:22, 23) Hananabaa yootiya Isiyaasi Israaꞌeele asaa gishshaa Xoossaa haasayissiiddi, “Abeet Yihoowau, neeni nu aawaa” giis. (Isi. 63:16) Saluwan deꞌiya nu Aaway nuuni a a sunttan xeesanaadan shoobbiyoogee qoncce.

Yihoowa a sunttan xeesiyoogee keehippe koshshiyaaba gidikkokka, a tumuppe a sunttan eriyoogee hegaappe aadhiyaaba gujjees. Bana siiqiyaanne banan ammanettiya ura xeelliyaagan Yihooway, “I ta sunttaa erido gishshau, taani a naagana” yaagidi qaalaa geliis. (Maz. 91:14) Xoossaa sunttaa eriyoogee, Xoossaa naaguwaa demmanau koshshiya waannaba gidiyo gishshau, hegee darobaa gujjana bessiyoogee qoncce. Yaatin, neeni Yihoowa a sunttan eranau koyettiyaabi aybee?

[Tohossa qofata]