Yihoowa Dirijjitiyaa Loytti Eranaadan Intte Naata Maaddite
NAATI issibaa eranau koyoosona. Gibxxen deꞌiiddi Paasikaa Baalaa bonchido koyro qammi, Israaꞌeelatu naati oychana danddayiyo oyshata qoppite: ‘Dorssaa shukkana koshshidoy aybissee?’ ‘Aaway qosilettan suuttaa tiyiyoy aybissee?’ ‘Nuuni awa biyoo?’ Yihooway hegaa mala oyshata bessiyaabadan xeellidoogaa, Israaꞌeelan deꞌiya aawatuyyo i yootido azazuwaappe akeekana danddayoos. Sinttappe bonchana Paasikaa Baalaa xeelliyaagan Yihooway eta, “Intte naati inttena, ‘Ha bonchcho baalaa birshshettai aibee?’ yaagidi oichchiyo wode, intte eta, ‘Hagee GODAA bonchchanau yarshshiyo Paasikaa yarshshuwaa; aissi giikko, GODAI Gibxxe biittan Israa7eela asaa keettaa aggi aadhdhidi biidi, Gibxxeta woriiddi, nuna ashshido gishshataassa’ yaagite” yaagiis. (Kes. 12:24-27) Takkidi, i azazido “awaajuwaanne higgiyaa” xeelliyaagan Israaꞌeela biittan deꞌiya yelidaageeti bantta naatu oyshaa zaariyoogee keehippe koshshiyoogaa Yihooway eta hassayissiis.—Zaa. 6:20-25.
Naati tumu goynuwaa xeelliyaagan oychiyo oyshau, eti Yihoowa bantta Xoossaanne Ashshiyaagaa oottidi siiqanaadan denttettiya, aliya zaaruwaa demmanaadan Yihooway koyidoogee qoncce. Yihooway ha wodiyankka naatuyyo hegaa malabaa amottees. Naati Xoossaanne a asaa wozanappe siiqanaadan yelidaageeti tamaarissana danddayiyo issi ogee, Yihoowa dirijjitiyaa loytti eranaadaaninne a dirijjitiyaappe nuuni goꞌettiyo ogiyaa akeekanaadan maaddiyoogaa. Yaatiyo gishshau, naati Xoossaa dirijjitiyaa xeelliyaagan darobaa eranaadan maaddana danddayiya issi issi ogeta ane beꞌoos.
Gubaaꞌiyaa
Naati bantta soo asay shiiqiyo gubaaꞌiyaabaa loyttidi erana koshshees. Hegaadan oottanau, intte yelidaageeta gidiyoogaadan Kiristtaane shiiquwaa ubbaa intte naata efaanau koyeeta. Yaatiyoogan, Yihooway, “Eti ubbaikka siyidi, GODAASSI, intte Xoossaassi, yayyiyoogaa tamaarana mala, ha higgiyaa qaala ubbaa ammanettidi polana mala, asaa, attumanne macca, [naatakka] . . . issippe shiishshite. Ha higgiyaa qaalaa erenna eta naatikka . . . ha higgiyaa siyona; GODAAYYO, intte Xoossaayyo, yayyiyoogaa tamaarona” yaagidi azazido Israaꞌeelatu leemisuwaa kaalleeta.—Zaa. 31:12, 13.
Naati guutta naatettaappe doommidi, Yihoowa Qaalaa tamaarana danddayoosona. Kiitettida PHauloosi Ximootiyoosa xeelliyaagan, “Neeni guutta naatettaasappe doommada . . . geeshsha maxaafata eradasa” yaagiis. (2 Xim. 3:15) Keehi guutta naatikka Kawotettaa Addaraashan shiiquwan tamaariyoobaa akeekanaunne Kawotettaa mazamuriyaa eranau danddayoosona. Eti Geeshsha Maxaafaanne an baasettida xuufeta goꞌettiyoogaanne bonchiyoogaa shiiquwan tamaaroosona. Hegaa bollikka, tumuppe Kiristtoosa kaalliyaageeta erissiya eeshshaa, tumu siiquwaa nu shiiqotun akeekana danddayoosona. Yesuusi, “Taani inttena ooratta azazuwaa azazais; issoi issuwaa siiqite. Taani inttena siiqidoogaadankka, intte issoi issuwaa siiqana bessees. Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yoh. 13:34, 35) Kawotettaa Addaraashan qoncciya siiqoynne tumu sarotettay naata ufayssanaunne Kiristtaane shiiqotun beettiyoogaa bantta deꞌuwan ubbatoo oottana bessiyaabadan qoppanaadan maaddana danddayees.
SHiiqoy doomettanaappe kasetidi Kawotettaa Addaraashaa intte yiyaabanne shiiquwaappe simmin takkiyaaba gidikko, intte naati haratuura laggetana danddayoosona. Eti naatu xallaara laggetanaadan oottiyoogaappe, ishatunne michotu ubbaara erettanaadan ayssi oottekketii? Gasttatuura erettiyaaba gidikko, intte naati gasttatuyyo loꞌꞌo temokroynne aadhida eratettay deꞌiyoogaa akeekana danddayoosona. Beni wode deꞌida Zakkaariyaasi, “Xoossaa yashshatettaa” tamaarissiyoogan Yihuda kawuwaa Ooziyaana yelagatettan loꞌꞌobau denttettidoogaadan, ha wodiyan daro layttau Yihoowayyo ammanettidi oottidaageetikka yelagata loꞌꞌobau denttettoosona. (2 Odi. 26:1, 4, 5) Kawotettaa Addaraashan deꞌiya laybireeriyaa, erissuwaa kaqqiyo saleedaanne harabaa goꞌꞌaa intte naatuyyo qonccissana danddayeeta.
Alame Yuusho Dirijjitiyaa
Intte gubaaꞌee alame yuusho dirijjitiyan deꞌiya 100,000ppe dariya gubaaꞌetuppe issuwaa gidiyoogaa intte naati erana koshshees. Ha dirijjitiyaa hanotaanne i oottiyo ogiyaa, qassi naati ha dirijjitiyaa oosuwaa waatidi kaafana danddayiyaakko yootite. Woradaa shiiquwaa, awuraajjaa shiiquwaanne woradaa bollaara geeddiyaagee yiyo wodiyaa intte yeemottidi naagiyoy aybissakko etau qonccissite.—Sinttaa 32n deꞌiya, “So Asaa Goynuwaa Wode Tobbana Danddayiyo Allaalleta” giya saaxiniyaa xeella.
Intteyyo injjetiyo wode, awuraajjaanne woradaa bollaara geeddiyaageeta, missoonaaweta, Beeteele so asaa yametanne kumetta wodiyaa oottiya harata intte son shoobbite. Eti naata haasayissanau wode xayoosona giidi qoppoppite. Kumetta wodiyaa haggaaziya he asati, ubbatoo naata mokki ekkidi haasayissida Yesuusa leemisuwaa kaallanau baaxetoosona. (Mar. 10:13-16) Yihoowayyo oottiya he asati temokruwaa yootiyo wode siyiyoogaaninne eti geeshsha oosuwaappe demmiyo ufayssaa beꞌiyoogan, intte naatikka kumetta wode haggaazuwau hoolliyaa kessana danddayoosona.
Intte naati Yihoowa dirijjitiyaa loytti eranaadan maaddanau harabaa ay oottana danddayeetii? Hagaappe kaallidi issi issi qofay qoncciis: Xoossaa Kawotettaabaa Awaajjiya Yihoowa Markkata giya Inggilizetto maxaafaa so asaara xannaꞌanau halchite. Yihoowayyo oottiyaageeti minnidi oottidoogaa, eta ashkketettaanne eti ammanettidaageeta gididi oottido hanotaa qonccissite. Kumetta saꞌan mishiraachuwaa aassanau Yihooway eta waatidi goꞌettidaakko yootite. Beni wodenne ha wodiyan hanettida keehi goꞌꞌiyaabata tamaarissanau Yihoowa dirijjitee giigissido biiduwaa goꞌettite. Danddayiyaaba gidikko, intte biittan woy hara biittan deꞌiya macara biiruwaa woy Beeteele biidi beꞌite. Hegaadan oottiyoogee, Yihoowa dirijjitiyau saꞌaa baggay koyro xeetu layttaagaadan ammanettida wozannaama ashkkaraa kaaletuwan saꞌaa yuushuwan deꞌiya ishanttussi ayyaana qumaanne kaaletuwaa immanau giigi uttidoogaa intte naati akeekanaadan oottees.—Maa. 24:45-47; Oos. 15:22-31.
Ubba Naata Eta Hanotaadan Tamaarissiyoogaa
Intte naata tamaarissiyo wode, Yesuusi ba kiittidoogeeta tamaarissido ogiyaa hassayite. I issi wode etau, “Taani intteyyo odiyoobai darobai de7ees; shin ha77i intteyyo gelenna” yaagiis. (Yoh. 16:12) Yesuusi ba erissiyo ashkkaratuyyo bolli bollan darobaa yootibeenna. Hegaadan oottiyoogaappe, eti loytti akeekanaadan keehippe koshshiya tumaa loddan loddan tamaarissiis. Inttekka hegaadan intte naatuyyo darobaa issi kutti yootoppite. Yihoowa dirijjitiyaabaa guuttaa guuttaa ubbatoo tamaarissiyoogan, eta koshshaa denttettanaunne Kiristtaane gubaaꞌiyaabaa tamaariyoogan eti ufayttanaadan oottana danddayeeta. Intte naatuyyo koshshiyaabay laamettiyo wode, eti kase tamaaridobaa zaarettanaunne aahuwan qonccissanau danddayeeta.
Kiristtaane gubaaꞌee nuuyyo Xoossaara deꞌiya dabbotaa minttanau keehippe maaddiyaaba gidiyo gishshau, gubaaꞌiyaa oosuwaa wozanappe oottiya yelagati Seexaanaa alamiyaa sugettaa loꞌꞌo hanotan eqettoosona. (Roo. 12:2) Intte naati Yihoowa dirijjitiyaa loytti eranaadan maaddiyoogan intte daro ufayttanaagaa ammanettoos. Xoossaa anjjuwan, eti a dirijjitiyaanne nuuni ayyo oottiyo, siiqiya Xoossaa ubbatoo ammanettidi baxuuxanaadan amottoos.
[Sinttaa 32n diya misiliyaa]
So Asaa Goynuwaa Wode Tobbana Danddayiyo Allaalleta
Yihoowa dirijjitiyaara gayttidaagan So Asaa Goynuwaa omarssan tobbana danddayiyo issi issi allaalleti kaallidi deꞌiyaageeta.
▪ Intte gubaaꞌiyaa taarikiyaa denttidi haasayite. I eqqidoy ayba hanotaanee, qassi awudee? Gubaaꞌee shiiquwau goꞌettido Kawotettaa Addaraashati woy sohoti awugeetee? Hegaa tobbiyo wode, intte naatu oyshaa zaaranaadan gubaaꞌiyan daro laytta takkida ura intte soo aybissi shoobbekketii?
▪ Gubaaꞌiyaa shiiqotunne gita shiiqotu halchuwaa, qassi naati hegaappe waati goꞌettana danddayiyaakko qonccissite.
▪ Yihoowa dirijjitee giigissido dumma dumma timirtte keettaa halchuwaa tobbite. He timirtte keettatun tamaaridaageeti ayfiyo loꞌꞌo ayfiyaa qonccissiya temokruwaa yootite.
▪ Mishiraachuwaa ubbatoo yootiyoogee keehippe koshshiyoogaa naati akeekanaadan maaddite. Yihoowa Markkatu Laytta Maxaafan kiyiya alame yuusho irpporttiyan gujettiyaabaa eti oottana danddayiyo ogiyaa yootite.
▪ Naati Yihoowa dirijjitiyan oottana danddayiyo dumma dumma kumetta wode haggaazuwaabaa tobbite. Yihoowa SHeniyaa Oottanau Giigettidaageeta giya maxaafaa shemppo 10n loꞌꞌo qofay deꞌees.
▪ Gubaaꞌee issibaa oottanau kaalliyo maaraa aybissi kaalliyaakko naati akeekanaadan maaddite. Guuttaba milatiya hanotankka gidin, Yihoowa dirijjitiyaa kaaletuwaa eti kaallana koshshiyoy aybissakko qonccissite. Cimatu kaaletuwaa kaalliyoogan gubaaꞌiyan maaray deꞌanaadan eti maaddana danddayiyo ogiyaa yootite.
[Misiliyaa]
Intte naati daro wodiyau haggaazidaageetuura laggetiyoogan goꞌettoosona
[Sinttaa 30n deꞌiya misiliyaa]
Beni Israaꞌeelatuugaadan, naati Yihoowa dirijjitiyaabaa oychiyo wode ha wodiyan deꞌiya yelidaageeti aliya zaaruwaa immanau baaxetoosona