Deꞌuwan Tumu Ufayssaa Demmana Danddayettii?
“DEꞌUWAN tumu ufayssaa demmana danddayettii?” Zawi baynna daro asay hegaadan oychees. SHin eti deꞌuwaa ayba ogiyan xeelliyaaba gidikkokka, Osttriyaa biitta asa gidida, Viktor E. Frankl geetettiya Dottoree giidoogaadan, daro asau “deꞌoy ufayssennaagaanne hada” gidiyoogee azzanttiyaaba.
Daro asau hegaadan siyettiyoy aybissee? Hegau issi gaasoy, alame yuushuwan miilooniyan qoodettiya asay keehippe azzanttiya hanotan deꞌiyo gishshataassa. Eti ubba wodekka, hiyyeesatettan, harggiyan, makkalaaninne naaquwan qohettiiddi deꞌoosona. Beni wode deꞌida Iyyoobi asaa naatu waayiyaabaa yootidoogaadan, eta deꞌoykka “metuwan kumi uttiis.” (Iyy 14:1) Eta keehi qofissiyaabay galla galla duussaa.
Miilooniyan qoodettiya harati qassi, wogi baynna duretettan deꞌoosona. Deꞌuwan tumu ufayssaa demmanau koshshiya ubbabay etau deꞌiyaaba milatees. SHin daroti bantta deꞌuwan ufayttokkona. Aybissi giikko, darotoo ‘metoynne tuggay,’ giishshin ikkonoomiyaara gayttidaagan qoppennan wolqqaama metoy gakkiyo wode woy naꞌa hayquwaa mala keehippe azzanttiyaabay merettiyo wode, eti hidootidobay ubbay atti aggees.—Maz. 90:10.
Daro asau deꞌoy “ufayssennaagaanne hada” gidanaadan oottiya hara gaasoy deꞌees. Hegee aybee? Asaa naati guutta wode xallau deꞌidi hayqqiyoogaa. Darobaa oottana danddayiya asaa naati guutta wode xalla deꞌiyoogee aybissakko akeekanau daro asay metootees. Hara asaa bolli gakkiya keehi azzanttiya hanotay nu deꞌuwan gakkana xayikkokka, sohuwaara gidin takkidi, nuuni hayqqiyoogee attenna. Hegaadan hanidoy aybissakko daroti akeekokkona.—Era. 3:19, 20.
Deꞌuwan Awudekka Gidin Ufayttana Danddayettennee?
Beni Israaꞌeela Kawuwaa Solomoni asaa naatu hanotaa loytti qonccissiis. I ba wodiyan deꞌiya asay, ha wodiyan deꞌiya asaagaadan kattaa tokkiyoogan, bulꞌꞌiyoogan, keettaa keexxiyoogan, qassi ba soo asau koshshiyaabaa kunttiyoogan bau deꞌiya abbiyaanne eraa goꞌettidi minni oottiyoogaa akeekiis. I, ‘Hegaa ubbaa wurssettay aybee?’ giidi oychiis gaana danddayettees. Asi oottiyo ubbabay “hada; carkkuwaa oiqqanau yedettiyoogaa mala” gidiyoogaa i yootiis.—Era. 2:17.
SHin Kawuwaa Solomoni, asaa naati oottiyo ubbabay, ubbatoo “hada; carkkuwaa oiqqanau yedettiyoogaa mala” giidi qoppidee? CHii. I asaa deꞌuwan gakkiya hanotaa qonccissana koyiis. Gidikkokka, ayyaanaa kaaletuwan xaafettida Xoossaa Qaalay, hanotay ubbatoo hegaa mala gidennaagaa ammanettanaadan oottees!
Neeni hegaa waata ammanettana danddayay? Hayyanaa hagaappe kaalliya naaꞌꞌu huuphe yohota nabbaba. Ha huuphe yohoti, deꞌoy hada milatiyoy aybissakko, he hanotay ayba ogiyan giiganaakko, qassi ha wodiyankka gidin neeni ne deꞌuwan tumu ufayssaa waata demmana danddayiyaakko akeekana mala maaddoosona.