Sarotettaa Koyite

“Ane nuuni sarotetta [ehiyaabaa] . . . koyoos.”—ROO. 14:19.

1, 2. Yihoowa Markkatu giddon sarotettay deꞌidoy aybissee?

HA WODIYAN, alamiyan deꞌiya asaa giddon sarotettay baawa. Issi biittan deꞌiya, issi qaalaa haasayiya asaa giddonkka darotoo haymaanootiyan, polotikaaninne haraban issippetetti baawa. Hegaappe dumma hanotan, “zare ubbaappe, qommo ubbaappe, yara ubbaappenne dumma dumma biitta qaala ubbaappe” yiidaba gidikkokka, Yihoowa asaa giddon issippetettay deꞌees.—Ajj. 7:9.

² Nu giddon deꞌiya sarotettay coo beettidaba gidenna. He sarotettay deꞌana danddayido waanna gaasoy, nu nagaraa gishshau ba suuttaa gussida, Xoossaa Naꞌan ammaniyoogan “nuuyyo Xoossaara sarotettai” deꞌiyo gishshataassa. (Roo. 5:1; Efi. 1:7) Hegaa bollikka, Xoossay ammanettidi baassi oottiyaageetuyyo geeshsha ayyaanaa immees; qassi geeshsha ayyaanaa ayfee sarotettaa gujjees. (Gal. 5:22) Nu issippetettay deꞌanaadan oottida harabay, nuuni ‘saꞌaabaa gidennaagaa.’ (Yoh. 15:19) Hegaa giyoogee, nuuni polotika allaalliyan gelokko; qassi olaa olettokko giyoogaa. Geeshsha Maxaafay yootiyoogaadan, Yihoowa asati “bantta bisuwaa marasha, bantta tooraakka baaca kessanau” qoxxidosona.—Isi. 2:4.

3. Nuuni demmana danddayiyo sarotettay nuna aybiyyo denttettii, ha huuphe yohuwan ay beꞌanee?

³ Nuuni issoy issuwaara deꞌiya gaytotettan demmana danddayiyo sarotettay, nu ishata qohiyaabaa oottennan aggiyoogaappekka aadhiyaabaa gujjees. Yihoowa Markkatu gubaaꞌiyan deꞌiya asay dumma dumma zariyaappenne wogaappe shiiqidaba gidikkokka, nuuni ‘issoy issuwaa siiqoos.’ (Yoh. 15:17) Nu giddon deꞌiya sarotettaappe denddidaagan, “asa ubbau lo77obaa oottoos; shin ubbaappe aattidi, nunaara ammanuwan de7iyaageetuyyo lo77obaa oottoos.” (Gal. 6:10) Sarotettay deꞌiyo nu ayyaana gannatee keehi alꞌꞌoba gidiyo gishshau, nuuni a naagana koshshees. Hegaa gishshau, gubaaꞌe giddon nuuni sarotettaa waati kaallana danddayiyaakko ane beꞌoos.

Nuuni Xubettiyo Wode

4. Nuuni issi uraa naaqqiyo wode sarotettaa kaallanau ay oottana danddayiyoo?

⁴ Erissiyo ashkkaraa Yaaqoobi, “Nuuni ubbaikka daroban baleettees; issi urai ba haasayan mulekka balana xayikko, i bana naaganau danddayiya bali bainna asa” yaagidi xaafiis. (Yaaq. 3:2) Yaatiyo gishshau, Kiristtaane gubaaꞌiyan issoy issuwaara maayettenna wodeenne issoy issuwaa qofaa bala ogiyan akeekiyo wodee deꞌana danddayees. (Pili. 4:2, 3) Gidikkokka, naaꞌꞌu asatu giddon merettida metoy gubaaꞌiyaa sarotettaa moorennan giigana danddayees. Leemisuwau, nuuni issi uraa naaqqidaba gidikko, kaallana bessiyo zoriyaa akeekite.—Maatiyoosa 5:23, 24 nabbaba.

5. Nuuni naaqettiyo wode sarotettaa kaalliyoogaa waati bessana danddayiyoo?

⁵ Issi uri nuna naaqqiyo wode shin ay oottana koshshii? Nuna naaqqida uri nuukko yiidi, ‘naaqqaas’ gaanaashin naagana koshshii? Koyro Qoronttoosa 13:5y, “Siiqoi naaqettidobaakka paidenna” yaagees. Nuuni naaqettiyo wode, atto giyoogaaninne hegaa dogiyoogan, giishin ‘naaqettidobaa paydennan’ aggiyoogan sarotettaa kaalloos. (Qolasiyaasa 3:13 nabbaba.) Nu giddon merettiya guutta metuwaa hegaadan giigissiyoogee loꞌꞌo; hegaadan oottiyoogee nu mala Kiristtaanetuura sarotettan deꞌanaadaaninne nuuyyookka garssa sarotettay deꞌanaadan oottees. Geeshsha Maxaafay, “Moorida urau atto giyoogeekka bonchchissees” yaagees.—Lee. 19:11.

6. Nu bolli gakkida naaqoy aggi bayanau metiyaagaa gidikko, nuuni ay oottana koshshii?

⁶ Nu bolli gakkida naaqoy nuuni aggi bayanau metiyaagaa gidikko shin ay oottana koshshii? Hegaa nuuni daro asau yootiyoogee aadhida eratetta gidenna. Hegaa mala zigirssay gubaaꞌiyaa sarotettaa moorees. He allaalliyaa giigissanau ay oottana koshshii? Maatiyoosa 18:15y, “Ne ishai nena naaqqikko, nerkka akko baada, a mooruwaa au yoota; i nebaa siyikko, ne ishaa balaappe zaaradasa” yaagees. Maatiyoosa 18:15-17y yootiyoy deexo nagaraabaa gidikkokka, paydo 15n deꞌiya zoriyaa hara wodetunkka oosuwan peeshshana danddayoos; nuna naaqqida uraakko biidi, kehatettan haasayissiyoogan aara sigettanau baaxetana koshshees.a

7. Merettida metuwaa nuuni sohuwaara giigissana koshshiyoy aybissee?

⁷ Kiitettida PHauloosi, “Hanqqettite; shin intte hanqquwan nagaraa oottoppite. Intte hanqqetti uttidaashin, awai wulloppo. Xalahe halaqaayyo soho immoppite” yaagidi xaafiis. (Efi. 4:26, 27) Yesuusi, “Nena mootiyaagaara pirdda keettaa baidda ogiyan elle aara sigettaichcha” yaagiis. (Maa. 5:25) Hegaa gishshau, sarotettaa kaallanau, merettida metuwaa sohuwaara giigissana koshshees. Aybissi giikko, masunttay sohuwaara akkamettana xayikko gooꞌiyoogaadan, nu giddon merettida metoykka sohuwaara giigissana xayikko keehi aakkees. Otorettiyoogee, qanaatiyoogee woykko miishshaa siiqiyoogee nu ishatuura merettida metuwaa nuuni sohuwaara giigissennaadan teqqana mala paqqadana koshshenna.—Yaaq. 4:1-6.

Daro Asaa Giddon Ooshshay Merettiyo Wode

8, 9. (a) Koyro xeetu layttan Roomen deꞌiya Kiristtaaneti issoy issuwaara ooyettidoy aybiinee? (b) Hegaara gayttidaagan PHauloosi Roomen deꞌiya Kiristtaaneta woygi zoridee?

⁸ Issi issitoo gubaaꞌe giddon merettiya metoy naaꞌꞌu asa xalla gidennan darota gujjana danddayees. Kiitettida PHauloosi ayyaanaa kaaletuwan etau dabddaabbiyaa xaafido, Roome Kiristtaanetu hanotay hegaa mala. Yan deꞌiya Ayhuda Kiristtaanetinne Ayhuda gidenna Kiristtaaneti issoy issuwaara maayettibookkona. He gubaaꞌiyan deꞌiya issoti issoti, shugo gidida woykko issi issibaa oottennaadan diggiya zoriya wozanay deꞌiyoogeeta toochoosona. SHugo zoriya wozanay deꞌiyoogeetikka hinkkootu bolli pirddoosona. SHin he naaꞌꞌu qommo asatikka palamettiyoy issoy issuwaa buzo allaalliyaana. PHauloosi he gubaaꞌiyan deꞌiyaageeta woygi zoridee?—Roo. 14:1-6.

⁹ PHauloosi he ooyettiya naaꞌꞌu qommo asatakka zoriis. Muuse Higgiyaa kaallana koshshennaagaa akeekidaageeti bantta ishata toochenna mala PHauloosi zoriis. (Roo. 14:2, 10) Muuse Higgee diggiyoobaa maanau shenetiya Kiristtaaneta hegaa mala qofay xubbana danddayees. PHauloosi, “Xoossaa oosuwaa quma gishshau bashshoppa; . . . Asho meennan woi ushsha uyennan aggiyoogee woikko ne ishaa xubbiyaabaa aibanne oottennan aggiyoogee lo77o” yaagidi zoriis. (Roo. 14:14, 15, 20, 21) Hara baggaara, issi issibaa oottennaadan diggiya zoriya wozanay deꞌiyoogeeti aassi qoppiyaageeta, ammanettenna asadan pirddenna mala zoriis. (Roo. 14:13) I ‘eti qoppanau bessiyoogaappe aattidi otoruwan qoppenna mala’ yootiis. (Roo. 12:3) He yohuwan ooyettiya naaꞌꞌu qommo asatakka PHauloosi zoriiddi, “Yaatikko, ane nuuni sarotetta ehiyaabaanne nuna issuwaa issuwaara minttettiyaabaa ubbaa koyoos” yaagiis.—Roo. 14:19.

10. Koyro xeetu layttan Roomen deꞌida Kiristtaaneti oottidoogaadan, ha wodiyan merettiya metuwaa giigissanau waatana koshshii?

¹⁰ Roomen deꞌiya Kiristtaaneti PHauloosa zoriyaa siyidi, koshshiyaabaa oottidoogaa ammanettana danddayoos. Ha wodiyankka, nu mala Kiristtaanetuura nuuni maayettennan aggiyo wode, Geeshsha Maxaafaa zoriyaa ashkketettan pilggidi oosuwan peeshshiyoogan, merettida metuwaa siiquwan giigissana koshshennee? Gubaaꞌe giddon daro asaa ooshshiyaabay ha wodiyan merettiyo wode, “issoi issuwaara sarotettan” deꞌanau Roome Kiristtaaneti oottidoogaadan, he asatikka hegaa giigissana koshshees.—Mar. 9:50.

Gubaaꞌiyaa Cimati Maaddiyo Ogiyaa

11. Issi Kiristtaanee ba mala Kiristtaaniyaara merettida metuwaa yootiyo wode gubaaꞌe cimay ay oottana koshshii?

¹¹ Issi Kiristtaanee ba soo asaara woykko ba mala Kiristtaaniyaara merettida metuwaa gubaaꞌiyaa cimau yootanau koyiyo wode cimay waatana koshshii? Leemiso 21:13y, “Hiyyeesaa waasuwaa siyanaappe giidi, ba haittaa tucciya uri, ikka waassana; waassin alliyaabai xayana” yaagees. Issi cimay ‘ba hayttaa tuccana koshshennaagee’ erettidaagaa. SHin hara leemisoy, “Kasetidi daannan mootiya uri baarigaarai yiidi a oichchana gakkanaashin, ubbatonkka he urai xillo milatees” yaagees. (Lee. 18:17) Cimay kehatettan siyana koshshiyaaba gidikkokka, naaqettidoogaa yootida uraa bagga gidennaadan naagettana koshshees. Cimay he yohuwaa siyidoogaappe guyyiyan, he uri bana naaqqiis giyo uraara he allaalliyaabaa haasayidaakkonne oychana danddayees. He cimay, naaqettida uray sarotettaa gishshau kaallana koshshiyo Geeshsha Maxaafaa zoriyaakka yootana danddayees.

12. Issi uray maganniyo wode hegaa siyosaara pirddiyoogee iita gidiyoogaa qonccissiya leemisota yoota.

¹² Ooshshay merettiyo wode issi baggaa xallaa siyosaara pirddiyoogee iita gidiyoogaa Geeshsha Maxaafan deꞌiya heezzu leemisoti qonccissoosona. PHoxiifaari ba maccaasiyaa, Yooseefi banaara wolqqan zinꞌꞌanau koyiis gaada yootidobaa ammaniis. PHooxiifaari keehippe yiillotidi, Yooseefa qasho keettan yeggiis. (Doo. 39:19, 20) Kawuwaa Daawiti, Xiibi ba goday Mafibosheeti Daawita morkketuura exatiis giidi yootidobaa ammaniis. Daawiti sohuwaara, “Be7a! Mafibosheetayyo de7iyaabai ubbai ha77i neessa” yaagiis. (2 Sam. 16:4; 19:25-27) Ayhudati Yerusalaame gimbbiyaa gimbbiyoy Parsse kawuwaa bolli makkalanaassa giidi Ayhudatu morkketi Kawuwaa Arxxekssiisau yootidosona. Kawoy he wordduwaa ammanidi, Yerusalaamen gimbbiyo gimbbiyaa teqissiis. Hegaa gishshau, Ayhudati Xoossaa beeta maqidasiyaa keexxiyoogaa aggidosona. (Izi. 4:11-13, 23, 24) Gubaaꞌiyaa cimati, issi allaalliyaa eesotidi kuuyennaadan PHauloosi Ximootiyoosa zorido zoriyaa eratettan kaalloosona.—1 Ximootiyoosa 5:21 nabbaba.

13, 14. (a) Ooyettida naaꞌꞌu asata xeelliyaagan nuuni erennabay aybee? (b) Cimati suure daannatanaadan aybi maaddii?

¹³ Ooyettida naaꞌꞌu asatu qofaa akeeki simmidikka, “Ooninne baayyo aibakko eriyaabaa milatikko, i biron eranau bessiyoogaa eriichchibeenna” yaagiya Geeshsha Maxaafaa zoriyaa hassayana koshshees. (1 Qor. 8:2) Eti ooyettanaadan oottidabaa ubbaa wurssi eriyoo? He ooyettida asatubaa shin wurssi eriyoo? Cimati hegaa mala yohuwaa daannatiyo wode, wordduwaaninne balettiya qofan cimettennaadan keehi naagettana koshshees. Xoossay sunttido Daannay, Yesuus Kiristtoosi xilluwan pirddees. I, “ba aifee be7idoban coo pirddenna; woikko ba haittai siyidoban coo kuuyenna.” (Isi. 11:3, 4) Hegaappe dumma ogiyan, Yesuusi Yihoowa ayyaanaa kaaletuwaa kaallees. Gubaaꞌiyaa cimatikka hegaadan Xoossaa ayyaanaa kaaletuwaa kaallana bessees.

¹⁴ Cimati Kiristtaanetu giddon merettida ooshshaa daannatanaappe kase, Yihoowa geeshsha ayyaanaa demmanau woossana koshshees; qassi eti Geeshsha Maxaafaanne ‘ammanettida wozannaama ashkkaray’ giigissiyo xuufeta goꞌettiyoogan Yihoowa ayyaanay banttana kaalettanaadan paqqadana koshshees.—Maa. 24:45.

Sarotettau Giidi Oottana Bessennabaa

15. Issi Kiristtaanee oottido deexo nagaraa nuuni eriyaaba gidikko, hegaa cimatussi yootana koshshiyoy awudee?

¹⁵ Kiristtaane gidiyoogaadan, nuuni sarotettaa koyanaadan zoree imettiis. SHin Geeshsha Maxaafay, “Bollappe yiya aadhdhida eratettai ubbaappe kase geeshsha. Qassi sarotetta” yaagees. (Yaaq. 3:17) Sarotetta dosiya asa gidiyoogee geeshsha gidiyoogaappe kaallidi qonccidaba; hegaa giyoogee, Xoossay kessido geeshshatettaa maaraa naagiyoogaa, qassi i nuuppe koyiyoogaadan a xillotetta maaraara moggidi deꞌiyoogaa giyoogaa. Issi Kiristtaanee deexo nagaraa oottidoogaa hara Kiristtaanee eriyaaba gidikko, hegaa i cimatuyyo yootanaadan minttettana koshshees. (1 Qor. 6:9, 10; Yaaq. 5:14-16) Nagaraa oottida uri cimatuyyo yootana xayikko, he nagaraabaa eriya Kiristtaanee etau yootana koshshees. Issi uri nagaraa oottida uraara sarotettan deꞌanau koyidi, hegaa cimatuyyo yootana xayikko, ikka nagaraa oottees.—Wog. 5:1; Leemiso 29:24 nabbaba.

16. Yeehu Kawuwaa Yoraamaara gayttido wode oottidobaappe ay tamaarana danddayiyoo?

¹⁶ Yeehu taarikee bessiyoogaadan, sarotettaa koyiyoogaappe Xoossaa geeshshatettay kasetees. Xoossay Kawuwaa Akaaba keettaa asaa xayssanaadan Yeeha kiittiis. Akaabanne Elzzaabeeli naꞌa gidida, iita Kawuwaa Yoraami paraa gaariyaa laaggiiddi Yeehuura gayttanau yiidi, “Yeehuu, sa7i saroo?” yaagidi oychiis. Oychin Yeehu, “Ne aayee Elzzaabeeli eeqaa goinoinne bitainne hegaa keeni daridaashin, saroi waani de7anau danddayii?” yaagidi zaariis. (2 Kaw. 9:22) Hegaappe guyyiyan, Yeehu ba wonddafiyaa dafidi Yoraama wozanaa caddiis. Gubaaꞌiyaa cimatikka Yeehudan tangguwaa ekkoosona; bantta nagaraappe simmanau koyennaageetuura sarotettan deꞌanau koyidi, eti koshshiya tangguwaa ekkiyoogaappe guyye gaana bessenna. Xoossaa sarotettay gubaaꞌiyan deꞌanaadan, eti bantta nagaraappe simmennaageeti bohettanaadan oottoosona.—1 Qor. 5:1, 2, 11-13.

17. Sarotettay deꞌanaadan ubba Kiristtaaneti ay oottana koshshii?

¹⁷ Ishatu giddon merettiya metoy darotoo deexo nagara gidenna. Hegaa gishshau, haratu balaa siiquwan aggiyoogee daro loꞌꞌo. Xoossaa Qaalay, “Naaqettidi ba naaquwaa genttiya urai siiquwaa koyees; shin yoho zaari zaaridi woociya urai, ammanettiya laggeta shaakkees” yaagees. (Lee. 17:9) Ha zoriyaa kaalliyoogee gubaaꞌiyan sarotettay deꞌanaadaaninne nuuyyo Yihoowaara loꞌꞌo dabbotay deꞌanaadan maaddees.—Maa. 6:14, 15.

Sarotettaa Koyiyoogee Anjjuwaa Demissees

18, 19. Sarotettaa koyiyoogee ayba goꞌꞌaa demissii?

¹⁸ ‘Sarotettaa ehiyaabaa’ koyiyoogee nuuyyo daro anjjuwaa demissees. Sarotettaara gayttidaagan Yihoowa leemisuwaa kaalliyo wode, aara mino dabbotay deꞌiyoogeeta, qassi gubaaꞌiyaa issippetettaa naagiyaageeta gidoos. Gubaaꞌe giddon sarotettay deꞌanaadan baaxetiyoogee, nuuni “sarotettaa wonggeliyaa mishiraachchuwaa” yootiyo asatuurakka waanidi sarotettan deꞌana danddayiyaakko akeekanau maaddees. (Efi. 6:15) Nuuni ‘ubbaayyo kehiyaageetanne danddayancha gidanau’ bessees.—2 Xim. 2:24.

¹⁹ Nagaranchatikka xillotikka hayquwaappe denddanau deꞌiyoogaa hassayite. (Oos. 24:15) He hidootay ha saꞌan polettiyo wode, “sa7ai merettoosappe doommidi” deꞌida, dumma dumma wogan diccida, qassi dumma dumma eeshshay deꞌiyo, miilooniyan qoodettiya asay hayquwaappe denddana! (Luq. 11:50, 51) Hayquwaappe denddiyaageeta sarotettaa ogiyaa tamaarissiyoogee gita maata. Nuuni sarotettaa medhiyaageeta gidanaadan ha wodiyan loohiyoogee, he wode nuna keehippe maaddiyaaba!

[Tohossa qofaa]

Ay Tamaaradii?

• Nuuni issi uraa naaqqidaba gidikko, sarotettaa koyiyoogaa waati bessana danddayiyoo?

• Nuna hara uri naaqqiyo wode sarotettaa koyanau ay oottana koshshii?

• Ooyettida naaꞌꞌu asatuppe issuwaa bagga gidiyoogee eratetta gidennay aybissee?

• Sarotettau giidi oottana koshshennabay aybakko qonccissa.

[Sinttaa 25n deꞌiya misiliyaa qonccissuwaa]

Haratu mooruwaa atto giyaageeta Yihooway siiqees