Geeman Alamiyaa Haariyaagee Oonakko Erettiis

YESUUSI issi wode asau, “Ha sa7aa haariyaagee ha77i kare olettana” yaagiis. Guyyeppe, gujjidi ‘ha saꞌaa haariyaagee a aynne oottana danddayennaagaa,’ qassi “sa7aa haariyaagee [pirddettiichchidoogaa]” yootiis. (Yoh. 12:31; 14:30; 16:11) Yesuusi obaa yootidee?

Yesuusi ‘ha saꞌaa haariyaagaa’ xeelliyaagan yootidobaa qoppiyo wode, ba Aawaa, Xoossaa Yihoowabaa yootibeennaagee qoncce. Yaatin, “ha sa7aa haariyaagee” oonee? I ‘kare olettanay,’ qassi ‘pirddettiichidoy’ ayba ogiyaanee?

“Ha Sa7aa Haariyaagee” Bana Qonccissiis

Danobaa oottiyaageeta kaalettiya uri darotoo ba maatan otorettiyoogaadan, Dabloosi Xoossaa Naꞌaa, Yesuusa paaccido wode hegaadan oottiis. Seexaanay Yesuusa “sa7aa kawotettaa ubbaa” bessi simmidi, “Ha wolqqa ubbainne bonchchoi taassi imettido gishshau, taani dosiyo oossinne immana; neessikka immana. Hegaa gishshau, neeni taassi goinnikko, ha ubbai neessi gidana” yaagidi shoobbiis.—Luq. 4:5-7.

Issoti issoti giyoogaadan Dabloosi iita qofa gidikko, he paaciyaa qonccissana danddayiyoy ayba ogiyaanee? Yesuusi xammaqetti simmidi paacettidoy issi iita qofaanee, woy ba giddon deꞌiya iita hanotaanee? Hegaadaana gidikko, waatidi “aani nagari baawa” gaana danddayettii? (1 Yoh. 3:5) Yesuusi Dabloosau asaa haariyo maatay deꞌiyoogaa kashi giyoogaappe, i ‘shemppo woriyaagaa,’ qassi ‘worddanchaa’ gidiyoogaa yootidi, ‘ha saꞌaa haariyaagaa’ gidiyoogaa qonccissiis.—Yoh. 14:30; 8:44.

Dabloosi Yesuusa paaccido wodiyaappe 60ppe dariya layttay aadhi simmin, kiitettida Yohaannisi, “ha mule sa7aikka xalahe halaqan haarettidoogaa” yootidi, Dabloosi gattiyo qohoy wolqqaama gidiyoogaa Kiristtaaneta akeekissiis. Yohaannisi Dabloosi “sa7a ubbaa” balettiyoogaakka yootiis. (1 Yoh. 5:19; Ajj. 12:9) Geeshsha Maxaafay “ha sa7aa haariyaagee” ayfiyan beettenna issi ayyaana mereta gidiyoogaa geeshshidi yootees. SHin i asaa ay keena qohana danddayii?

Saꞌaa Haariyaagee Banaara Haaranaadan Haratuyyo Maataa Immees

Kiitettida PHauloosi Kiristtaaneti ammanuwau olettiyoogaabaa xaafido wode eta iita morkkee oonakko qonccissiis. I, “Nuuni saluwaa sohuwan de7iya iita ayyaana wolqqatuura, haariyaageetuura, godatettai de7iyoogeetuuranne ha xuma biittaa haariyaageetuura olettiyoogaappe attin, asaara baaxetokko” yaagidi qonccissi yootiis. (Efi. 6:12) Yaatiyo gishshau, nuuni olettiyoy “asaara” gidennan “iita ayyaana wolqqatuura” gidiyo gishshau, ha olay asappe bolla gididaageetuura olettiyoogaa.

Ha wodiyan birshshettida daro Geeshsha Maxaafaa birshshettati yootiyoogaadan, ha sohuwan ‘iita ayyaanaa wolqqaa’ geetettidaagee ayfiyan beettenna iita qofa gidennan, wolqqaama gidida iita ayyaana meretaa. Issi issi birshshettati kaallidi deꞌiyaagaadan birshshidosona: ‘Saluwan deꞌiya, iitatetta ayyaanaa wotaaddarata’ (1954 birshshettaa, Amaarattuwaa), “saluwan deꞌiya tuna ayyaana wotaaddarata” (Addisu Medebegna birshshettaa, Amaarattuwaa), “saluwan deꞌiya, asaagaappe aadhiya wolqqay deꞌiyo iitata” (Zi Niwu Inglish Baybl). Hegaa gishshau, Dabloosi “bantta de7iyoosaa,” saluwaa aggida makkalancha kiitanchatu baggaara ba aawatettaa qonccissees.—Yih. 6.

Hiraaga maxaafa gidida Daaneela maxaafay, ‘biittaa haariya’ ha iita ayyaanati beni wodeppe doommidi saꞌaa waatidi haaridaakko qonccissees. Hananabaa yootiya Daaneeli 537n K.K. Baabloona omooduwaappe simmida ba mala Ayhudatubay keehippe qofissin heezzu saaminttau eta gishshaa woossiis. Hananabaa yootiyaagaa minttettanaadan Xoossay kiittido issi kiitanchay, i takkidoy aybissakko Daaneelau hagaadan giidi yootiis: “Parsse kawotettaa halaqa gidiya ayyaanai laatamanne isiini gallassaa tana teqqiis.”—Dane. 10:2, 13.

Ha ‘Parsse kawotettaa halaqay’ oonee? Kiitanchay yootidoy, Daaneelaunne a asau he wode loꞌꞌobaa oottida Parsse Kawuwaa Qiiroosabaa gidennaagee qoncce. Hegaa bollikka, issi kiitanchay 185,000 wolqqaama olanchata woridoy issi qammaana gidishin, kawo gidida issi asi issi kiitanchaa heezzu saaminttau waatidi teqqana danddayii? (Isi. 37:36) Meqetta iita gidida ‘Parsse halaqay’ Parsse Kawotettaa haaranaadan Dabloosi aawatettaa immido daydantta gidana bessees. Guyyeppe he taarikiyan, Xoossaa kiitanchay zaarettidi ‘Parsse halaqaaranne’ “Giriike halaqa” gidiya hara daydanttaara olettanaagaa yootiis.—Dane. 10:20.

Nuuni hegaappe ay akeekana danddayiyoo? Bantta halaqaa Seexaanaa Dabloosa kaaletuwan, aara issippe ‘biittaa haariya,’ ayfiyan beettenna daydanttati deꞌiyoogaa akeekoos. SHin hanno gakkanaashin eta koshshay aybee?

Alamiyaa Haariyaagaa Tumu Koshshay Erettiis

Kiitettida Yohaannisi, Geeshsha Maxaafan wurssetta gidida Ajjuutaa maxaafan, Yesuusi kiitanchatu halaqaa Mikaaꞌeela gidiyoogaadan Dabloosanne daydanttata xoonido ogiyaa, qassi eti saluwaappe olettidoogee kaalettido iitabaa qonccissiis. I, “[Sa7au] . . . aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagiis.—Ajj. 12:9, 12.

Dabloosi keehippe hanqqettidoogaa bessidoy ayba ogiyaanee? Danobaa oottiya, hidootaa qanxxida daroti, ‘haara; hegee ixxikko xayssa’ giya qofaa kaalliyoogaadan, Dabloosinne daydanttati saꞌaynne a bolli deꞌiyaageeti banttanaara issippe xayanaadan oottanau murttidosona. Dabloosi baayyo attida wodee guutta gidiyoogaa eridi, ba haaruwan deꞌiya, asaa naatu issippetettay eqqido dirijjitetuppe issuwaa gidida, gita zalꞌꞌe dirijjitiyaa goꞌettidi, asay yaaretidi darobaa shiishshanaadan denttettees. Hegee meretaa aqoy wuri wuri baanaadaaninne alame yuushuwan heeray moorettanaadan oottiis; hegaappe denddidaagan asaa naati deꞌanaagee hirggissiyaaba gidiis.—Ajj. 11:18; 18:11-17.

Asaa naatu taarikiyaa doomettaappe doommidi, Dabloosi haaranau keehippe koyiyoogee polotikaaninne haymaanootiyankka qoncciis. Ajjuutaa maxaafay polotikan haariyaageeta Dabloosi “gita maataa” immido doꞌan leemisees. Haymaanootee Polotikan geliyoogee ayyaanaaban shaaramuxiyoogaa gidiyoogaa yootiyoogan, hegee yeellayiyaaba gidiyoogaakka qonccissees. (Ajj. 13:2; 17:1, 2) Daro xeetu layttau, miilooniyan qoodettiyaageeti hayqqanaadan oottida huqqunnaa, aylletettan haariyoogaa, olaanne issi zaree haraara kobattiyoogaa qoppite. Asaa naatu taarikiyaa moorida, yashshiyaanne bollay caalanaadan oottiya hanotata, issi uri tumuppe asi oottiyo meeze gididaba gaana danddayii? Woy qassi hegaa oottanaadan denttettiyay ayfiyan beettenna iita ayyaana wolqqatee?

Geeshsha Maxaafay haariyaageetanne alamiyaa wolqqata kaalettiyay oonakko geeshshidi qonccissees. Asaa naati eriiddi gidin aggin, alamiyaa haariyaagaa eeshshaa qonccissoosona; qassi ‘haara; hegee ixxikko xayssa’ giya a qofaa kaalloosona. SHin asaa naati Dabloosa haaruwan awude gakkanaashin tuggatanee?

Dabloosa Xayuwaa

Koyro xeetu layttan Yesuusi saꞌan oottidobay Dabloosinne daydanttati mata wode xayanaagaa bessees. Yesuusi erissiyo ashkkarati iita ayyaanaa waati kessidaakko yootido wode, i etayyo, “Seexaanai wolqqanttadan saluwaappe kunddishin, taani be7aas” yaagiis. (Luq. 10:18) Hegaadan giyoogan, Yesuusi saluwaa biidi Kiitanchatu Halaqaa Mikaaꞌeela gididi, alamiyaa haariyaageeta sinttappe xoonanaagaa qoppidi ufayttiis. (Ajj. 12:7-9) Geeshsha Maxaafaa hiraagata loytti xannaꞌiyoogee, Yesuusi 1914n woy hegaappe simmin gamꞌꞌennan saluwan hegaadan xoonidoogaa qonccissees.a

He wodeppe doommidi, Dabloosi baayyo xayanau attida wodee guutta gidiyoogaa erees. ‘Ha mule saꞌaa xalahe halaqay haariyaaba’ gidikkokka, ha wodiyan miilooniyan qoodettiya asay i yibbaatidi eta haaranau cimmiyooban cimettokkona. Geeshsha Maxaafay eti a tumu oonatettaanne a halchuwaa eranaadan maaddiis. (2 Qor. 2:11) PHauloosi ba mala Kiristtaanetuyyo, “Sarotettaa Xoossai Seexaanaa intte tohuwaappe garssan haakkenna matan gaacci qolana” giidoogan eti hidootaa wottoosona.b—Roo. 16:20.

Mata wode Dabloosi xayana! Kiristtoosi siiquwan haariyo wode, leemiso hanotan Xoossaa gedee yedhiyoosa gidida saꞌaa xillo asati gannate oottana. Makkalay, ixoynne yaaretiyoogee merinau xayana. Geeshsha Maxaafay, “Kasebai ubbai [hassayettenna]” yaagees. (Isi. 65:17) Geeman ha alamiyaa haariyaagaappenne a haaruwaappe naxa kiyiya ubbau hegee ayba woppissiyaaba gidanee!

[Tohossa qofata]

[Sinttaa 9n deꞌiya misiliyaa qonccissuwaa]

Kiristtoosi siiquwan haariyo wode, xillo asati saꞌaa gannate oottana