Aggidobaa “Guyye” Xeelloppa

“Booraa goyiiddi, guyye xeelliyai ooninne Xoossaa kawotettaassi bessenna.”—LUQ. 9:62.

WOYGADA ZAARUUTII?

Nuuni ‘Looxe macheebaa qoppana’ koshshiyoy aybissee?

Nuuni ubbatoo qoppana bessenna heezzubati aybee?

Nuuni Yihoowa dirijjitiyaara issippe hemettana danddayiyoy ayba ogiyaanee?

1. Yesuusi woygi zoridee, qassi ayba oyshay denddii?

“ANE Looxe machcheebaa qoppite!” (Luq. 17:32) Yesuus Kiristtoosi 2,000 laytta gidiya wodiyaappe kase zorido ha zoree, awudeegaappenne aaruwan ha wodiyan keehi koshshees. SHin Yesuusi ay akeekissanau hegaadan giidee? I yootiyoobaa siyiya Ayhudati Looxe machee bolli gakkidabaa eroosona. A ba soo asaara Sadoomappe baqata kiyaydda azazettennan ixxada guyye xeellido gishshau, maxine tuussa gidaasu.—Doomettaabaa 19:17, 26 nabbaba.

2. Looxe machiyaa guyye xeellidoy geella aybisseeshsha, a azazettabeennaagee i bolli ay kaalettidee?

² SHin Looxe machiyaa guyye xeellidoy aybissee? A aybi hanettiiddi deꞌiyaakko eranau koyennan aggukku. Woy a guyye xeellidoy Sadooma katamay xayiiddi deꞌiyoogaa ammanabeenna gishshataassa gidana danddayees. I ammanoy shuggennan aggenna. Woy a Sadooman aggada yiidobaa amottido gishshataassa gidennan aggenna. (Luq. 17:31) A guyye xeellidoy aybissanne gido, azazettennan ixxido gishshau hayqqaasu. Ane qoppa! A Sadoomaaninne Gamooran deꞌiya iita asatuura issi gallassi hayqqaasu. Yesuusi, “Looxe machcheebaa qoppite” giidoy hegaassa!

3. Leemiso hanotan guyye xeellana bessennaagaa Yesuusi qonccissidoy ayba ogiyaanee?

³ Nuunikka deꞌiyoy leemiso hanotan guyye xeellana bessenna wodiyaana. Yesuusi issi wode he qofaa qonccissiis. Hegaa i yootidoy, issi bitanee a kaallanau koyidi, koyro ba soo asaa saro deꞌite gaanau baana danddayiyaakkonne oychido oyshaa zaarido wode. Yesuusi, “Booraa goyiiddi, guyye xeelliyai ooninne Xoossaa kawotettaassi bessenna” yaagiis. (Luq. 9:62) Yesuusi hegaadan zaaridoogee i harshshuushidoogaa woy qarettibennaagaa bessiyaabee? Akkay; ayssi giikko, he bitanee aawatettaa ekkennan agganau gaaso shiishshanau oychidoogaa Yesuusi erees. Yesuusi hegaadan haganaa sugiyoogee “guyye” xeelliyoogaa gidiyoogaa yootiis. Goyiya uri goyiiddi issi kutti gidin woy goyiyoogaa aggidi guyye xeelliyoogee qohana danddayii? He naaꞌꞌu hanotankka, i oottana koshshiyaabaappe a qofay shaahettees, a oosoykka moorettees.

4. Nu ayfee tishshi oottidi xeellana koshshiyoy aybee?

⁴ Nuuni kase aadhidabaa qoppiyoogaappe, sinttanau hananabaa tishshi oottidi xeellana bessees. Leemiso 4:25n hegee waani qonccidaakko akeeka: “Sitti gaada sinttau xeella; ne aifee ne sinttan de7iyaabaa tishshi oottidi xeello.”

5. Nuuni guyye xeellana bessenna gaasoy aybee?

⁵ Nuuni guyye xeellana bessenna loꞌꞌo gaasoy deꞌees. He gaasoy nuuni “wurssetta gallassi” deꞌiyoogaa. (2 Xim. 3:1) Mata wode, Xoossay naaꞌꞌu iita katamatu xalla gidennan, Seexaanaa iita siraataa kumettaa xayssana. Looxe machiyo gakkidabaa malabay aybinne nu bolli gakkennaadan aybi maaddana danddayii? Koyruwan, nuuni guyye xeellanau paacettana danddayiyo issi issibati aybakko shaakki erana bessees. (2 Qor. 2:11) Hegaa gishshau, hegeeti aybakko, qassi etan qofaa wottennaadan naagettana danddayiyoy ayba ogiyaanakko ane beꞌoos.

KASE DEꞌIDO LOꞌꞌO GIYO DEꞌUWAA

6. Nuuni kase wodiyaabaa hassayiyoobay ubbatoo ammanttiyaaba gidennay aybissee?

⁶ Kase deꞌoy haꞌꞌiigaappe kehees giidi qoppiyoogan balana danddayoos. Kasebaa nuuni hassayiyo ogeenne tumuppe hanettidabay issi mala gidennan aggana danddayees. Nuuni akeekennan kase nuna gakkida metuwaa guutti xeellananne kase wodiyan ufayttidobaa keehi xoqqu ootti xeellana danddayoos. Woykko hanettidabaappe dumma hanotan, kase wodebay keha giidi qoppiyoogaa doommana danddayoos. Hegaa mala bala qofay loꞌꞌo giyo beni wodiyaa nuuni amottanaadan oottana danddayees. SHin Geeshsha Maxaafay hagaadan giidi zorees: “‘Ha77i wodiyaappe kase aadhdhida wodee aissi keha gididee?’ gaada oichchoppa; aissi giikko, hegaa mala oishai aadhdhida eranchcha giyo asi oichchiyo oisha gidenna.” (Era. 7:10) Hagaa mala qofay keehi qohiyaaba gididoy aybissee?

7-9. (a) Israaꞌeelati Gibxxen deꞌiyo wode eta aybi gakkidee? (b) Israaꞌeelati ufayttanaadan oottiyaabaa ay beꞌidonaa? (c) Israaꞌeelati aybaassi amassaliyoogaanne zuuzummiyoogaa doommidonaa?

⁷ Muuse wodiyan deꞌida Israaꞌeelata gakkidabaa akeeka. Gibxxeti Israaꞌeeleta koyro imattadan xeellidaba gidikkokka, Yooseefi hayqqi simmin, “deexo oosuwan [Israaꞌeeleta] tuggayana mala, eta bolli meqetti bainna kaabbota sunttidosona.” (Kes. 1:11) Guyyeppe, Paarooni Israaꞌeelati corattennaadan koyido gishshau, etau attuma naati yelettiyo wode worana malakka azaziis. (Kes. 1:15, 16, 22) Yaatiyo gishshau, Yihooway Muusessi hagaadan giidoogee garamissenna: “Taani Gibxxe biittan ta asai tuggatiyo tuggaa geeshsha be7ada, eti bantta kaabbotuppe waassiyo waasuwaa siyada, taani eta waayiyaa qoppaas.”—Kes. 3:7.

⁸ Israaꞌeelati aylletettan deꞌiyo Gibxxeppe naxa kiyidi biido wode, eti ay keena ufayttidaakko qoppana danddayay? Yihooway otorettiya Paaroonanne a asaa bolli Tammu Boshaa yeddido wode, eti a wolqqaa maalaaliya ogiyan beꞌidosona. (Kessaabaa 6:1, 6, 7 nabbaba.) Wurssettan, Gibxxeti Israaꞌeelati baanaadan paqqadiyoogaa xalla gidennan, daro worqqaanne biraa immidi eti baanaadan woossidosona; he hanotay Xoossaa asay “Gibxxe asatu aquwaa bonqqi” woykko wurssi ekkiis giyoogaa mala. (Kes. 12:33-36) Guyyeppe Israaꞌeelati, Paarooninne a olanchati Zoꞌo Abban xayiyoogaa beꞌido wode ufayttidosona. (Kes. 14:30, 31) Hegaa mala ufayssiyaabaa beꞌiyoogee eta ammanuwaa keehippe minttidoogee erettidaba.

⁹ Israaꞌeelati maalaaliya ogiyan naxa kiyidaba gidikkokka, takkennan amassaliyoogaanne zuuzummiyoogaa doommidoogee ammananau metiyaaba. Eti aybaassi zuuzummidonaa? Qumau! Eti Yihooway immiyooban ufayttennan ixxidi, hagaadan giidi amassalidosona: “Nuuni Gibxxe biittan miishsha qanxxennan coo miyo moliyaa hassayeettees; qassi qayye miyo paranjja leehiyaa, zolddo leehe milatiya mal77iya haattai kumido meelooniyaa, adussa paranjja sunkkuruutuwaanne tuummuwaa hassayeettees. SHin ha77i nu qooree gorddettiis; nu aifeekka ha mannaappe attin, harabaa ainne be7enna.” (Qoo. 11:5, 6) Eti ubba aylletettan deꞌido biitti simmanau amottana gakkanaassi eta qofay moorettiis. (Qoo. 14:2-4) Israaꞌeelati aggidobaa guyye xeellin, eti Yihoowan nashettiyoogee attiis.—Qoo. 11:10.

10. Israaꞌeelatu leemisuwaappe ay tamaariyoo?

¹⁰ Ha wodiyan nuuni hegaappe ay tamaariyoo? Metoy gakkiyo wode, kase wodebay, geella nuuni tumaa eranaappe kase hanettidabay loꞌꞌo giidi ubbatoo qoppana koshshenna. Nuuni deꞌuwan beꞌidobaappe tamaaridobaa woy hassayiyo ufayssiyaabaa wotti dentti qoppiyoogee bala gidana xayikkonne, kasebaa ubbatoo bessiyaagaadan, qassi tumuppe hanettidabaa qoppana koshshees. Hankkoode, haꞌꞌi nuuni deꞌiyo hanotan keehi ufayttennan agganaunne zaarettidi kaseegaadan deꞌanau koyana danddayoos.—2 PHeexiroosa 2:20-22 nabbaba.

KASE AGGI BAYIDOBATA

11. Issoti issoti kase aggi bayidobaa ayba ogiyan xeelliyoonaa?

¹¹ Issoti issoti kase aggi bayidobaa guyye xeelliyoogeenne hegan banttappe issibay halidabadan qoppiyoogee azzanttiyaaba. Geella neeyyo he wode xoqqa timirttiyaa tamaaranau, hayttatanau woykko duretanau hanotay injjetidaba gidikkonne, hegaa agga bayanau kuuyennan aggakka. Nu ishatuppenne michotuppe daroti zalꞌꞌiyaara, allaxxiyoobaara, timirttiyaara woy ispporttiyaara gayttidaagan daro miishsha demissiyaaba aggi bayidosona. Haꞌꞌi daro wodee aadhiis, shin wurssettay yiichibeenna. Neeni hegeeta agga bayennaakko hanana danddayiyaabaa aymottay?

12. PHauloosi aggi bayidoban ayyo aybi siyettidee?

¹² Kiitettida PHauloosi Kiristtoosa kaalliyaagaa gidanau darobaa aggi bayiis. (Pili. 3:4-6) Aggi bayidoban ayyo aybi siyettidee? I, “Tana go77iya ubbabaa Kiristtoosa gishshau bayidabaadan qoodaas” yaagiis. Aybissi? I gujjidi hagaadan giis: “Taani ta Godaa Kiristtoos Yesuusa eriyoogee ubbabaappe keehi aadhdhiyo gishshau, ubbabaa tana mulekka go77ennabaadan qoodaas; taani a gishshau ubbabaa yegga bayaas. Kiristtoosa demmanaunne aara de7anau ubbabaa wora olidobaadan qoodais.”a (Pili. 3:7, 8) Pituwaa woy buuraa olida uri he olidoban guyyeppe zilꞌꞌettennaagaadan, PHauloosi alamiyan demmana danddayiiddi aggi bayidoban zilꞌꞌettibeenna. He aggidobaa goꞌꞌiyaabadan qoppibeenna.

13, 14. PHauloosa leemisuwaa ayba ogiyan kaallana danddayiyoo?

¹³ Nuuni nuuppe haliis giidi qoppiyoobaa aymottiyoogaa doommikko, aybi maaddana danddayii? PHauloosa leemisuwaa kaallana koshshees. Ayba ogiyan? Haꞌꞌi neeyyo deꞌiyaabaa goꞌꞌaa qoppa. Yihoowaara alꞌꞌo dabbotaa medhadasa, qassi a sinttan ammanettada deꞌadasa. (Ibr. 6:10) Nuuni haꞌꞌi demmidonne sinttappe demmana ayyaanaabaa anjjuwaadan goꞌꞌiyaabaa alamee ay immana danddayii?—Marqqoosa 10:28-30 nabbaba.

¹⁴ PHauloosi hegaappe kaallidi ammanettidi deꞌanaadan nuna maaddiyaabaa yootiis. I, “Taappe guyyeera de7iyaagaa doga aggada, sinttan de7iyaagaa oiqqanau warettais” yaagiis. (Pili. 3:13) PHauloosi keehi koshshiya naaꞌꞌubaa qonccissidoogaa akeeka. Koyruwan, nuuni kase aggi bayidobaa dogana bessees; hegaa qoppiiddi nu alꞌꞌo wolqqaanne wodiyaa wurssana bessenna. Naaꞌꞌanttuwan, ba wottaa wurssanau matida wottanchaadan ubbatoo nu sinttan deꞌiyaabaa qoppiiddi, hegaa demmanau baaxetana koshshees.

15. Xoossau ammanettida ashkkaratu leemisuwaa wotti dentti qoppiyo wode ayba goꞌꞌaa demmiyoo?

¹⁵ Beni wode deꞌidanne ha wodiyan deꞌiya, Xoossaayyo ammanettidi oottida asatu leemisuwaa qoppa. Eta leemisoy guyye xeelliyoogaappe ubbatoo sinttau suganaadan nuna maaddees. Leemisuwau, Abrahaaminne Saara ubbatoo Uura katamaa qoppidaba gidiyaakko, “guyye simmiyo qaadaa demmennan aggokkona.” (Ibr. 11:13-15) SHin eti simmidi yaa bibookkona. Muusee Gibxxeppe koyro kiyiyo wode, Israaꞌeelatuppe ooninne guyyeppe aggidobaappe aadhiyaabaa aggi bayiis. SHin, i hegaa amottidoogaa bessiyaabi aybinne xaafettibeenna. Hegaappe dumma ogiyan, Geeshsha Maxaafay i wodeppe demmana woytuwaa “tishshi oottidi xeellido gishshau, Gibxxe biittaa miishsha ubbaappe Kiristtoosa gishshau borettiyoogee daro aadhdhiya duretetta gididoogaa” qoppidoogaa yootees.—Ibr. 11:26.

DEꞌUWAN KASE GAKKIDABATA

16. Kase gakkidabay nuna waati qohana danddayii?

¹⁶ Nuuni deꞌuwan beꞌido issi issibay nuna metidaba gidana danddayees. Nuuni kase oottido nagaraa woykko balaa qoppiyoogan unꞌꞌettana danddayoos. (Maz. 51:3) Nuuyyo wolqqaama seeray imettido gishshau, hanno gakkanau azzanana woy yiillotana danddayoos. (Ibr. 12:11) Nu bolli gakkida woy gakkiis giidi qoppiyo pirdda pacaabaa ubbatoo qoppana danddayoos. (Maz. 55:2) Hegaa malabay nuuni aggidobaa guyye xeellanaadan oottenna mala waatana danddayiyoo? Heezzu leemisota qoppa.

17. (a) PHauloosi bana “geeshshatu ubbaa giddon laafiyaagaa” giidoy aybissee? (b) PHauloosi minttettenna qofan sheekkennaadan aybi maaddidee?

¹⁷ Kase balidobaa. Kiitettida PHauloosi bana “geeshshatu ubbaa giddon laafiyaagaa” yaagiis. (Efi. 3:8) Ayyo hegaadan siyettidoy aybissee? I, “Xoossaa woosa keettaa waissido” gishshataassa gidiyoogaa yootiis. (1 Qor. 15:9) PHauloosi kase yedettidoogeetuura gayttiyo wode ayyo aybi siyettidaakko ane qoppa. SHin, PHauloosi hegaa mala minttettenna qofan sheekkiyoogaappe, Xoossay baayyo bessido aaro kehatettaa ubbatoo qoppiis. (1 Xim. 1:12-16) Hegaappe denddidaagan, PHauloosa wozanay galatan kumin, hegee i ba oosuwan sinttau suganaadan denttettiis. PHauloosi doganau murttidobay i kase oottido nagaraa gujjees. Nuunikka Yihooway nuna maarido maarotaa ubbatoo hassayiyaaba gidikko, nuuni laammana danddayenna kasebaa qofan sheekkiyoogan nu wolqqaa wurssokko. Nu wolqqaa haꞌꞌi oottiyo oosuwau goꞌettana danddayoos.

18. (a) Nuuni issi wode imettida seeraa ubbatoo qoppidi yiillotiyaaba gidikko aybi hanana danddayii? (b) Zoriyaa ekkiyoogaa xeelliyaagan Solomoni yootidobaa waatidi oosuwan peeshshana danddayiyoo?

¹⁸ Wolqqaama seeraa. Issi wode nuuyyo imettida seeraa ubbatoo qoppidi yiillotiyaaba gidikko shin? Hegee nuuni azzananaadan woy yiillotanaadan oottidi, hidootaa qanxxissana danddayees. (Ibr. 12:5) Nuuni he seeraa sohuwaara ixxis giidaba gidin woykko ekki simmidi guyyeppe oosuwan peeshshibeennaba gidin, he naaꞌꞌu hanotankka he zoriyan goꞌettokko. Solomoni, “Tamaaridoogaa [“seeraa,” NW] hassaya; timirttee neeyyo de7o gidido gishshau, loitta naaga; yeddoppa” yaagido zoriyaa oosuwan peeshshiyoogee keehi maaddiyaaba. (Lee. 4:13) Ogiyan deꞌiya malaataa kaaletuwaa kaallidi kaamiyaa laaggiya uradan ane zoriyaa ekkiyaageeta, oosuwan peeshshiyaageetanne sinttau sugiyaageeta gidoos.—Lee. 4:26, 27; Ibraawe 12:12, 13 nabbaba.

19. Imbbaaqoomaagaanne Ermmaasaagaa mala ammanuwaa ayba ogiyan bessana danddayiyoo?

¹⁹ Gakkida woy gakkiis giidi qoppiyo pirdda pacaa. Issi issi bessennabay hananaadan Yihooway paqqadidoy aybissakko akeekibeenna gishshau akko waassida, hananabaa yootiya Imbbaaqoomaagaadan nuuyyo issi issitoo siyettana danddayees. (Imb. 1:2, 3) “Taani GODAN ufaittana; tana ashshiya Xoossan taani ufaissaa poccu gaana” yaagida, Imbbaaqoomaagaa mala ammanuwaa nuuni bessiyoogee keehi koshshiyaaba. (Imb. 3:18) Nuuni beni wode deꞌida Ermmaasaagaadan Yihoowa wozanappe ammaniyoogan ‘hidootan’ a naagiyaaba gidikko, suure pirddiya Xoossay ubbabaa bessiya wodiyan giigissanaagaa ammanettoos.—Zil. 3:19-24.

20. ‘Looxe macheebaa qoppiyoogaa’ bessana danddayiyoy ayba ogiyaanee?

²⁰ Ufayssiya wodiyan deꞌoos. Ha wodiyan maalaaliyaabay haniiddi deꞌees, qassi matan hegaa mala darobay hanana. Nuuni ubbay Yihoowa dirijjitiyaara issippe hemettiyaageeta gidoos. Nu sinttan deꞌiyaabaa xeellanaadaaninne aggidobaa guyye xeellennaadan Geeshsha Maxaafay immiyo zoriyaa oosuwan peeshshiyaageeta gidoos. Yaatiyoogan, ‘Looxe macheebaa qoppiyoogaa’ bessoos.

[Tohossa qofaa]