Yihooway Nuussi Deꞌiyo Soho

1, 2. Xoossaa ashkkarati ha alamiyan ayba ogiyan deꞌidonaa? Etau deꞌiya keettay aybee?

NEENI ha alamiyan ufayttada deꞌay? Ufayttana xayikko, darotu hanotay hegaa mala. Asi deꞌido wode ubban, Yihoowa tumuppe siiqiyaageeti ubbay ha alamiyan imattadaaninne yedetettidi kiyida asadan deꞌidosona. Leemisuwau, Xoossau ammanettidi haggaazida asati Kanaanen dumma dummasaa biidi dunkkaaniyan deꞌiyo wode, “sa7an imattanne yedetettidi kiyida asata gididoogaa” qoncciyan yootidosona.—Ibr. 11:13.

² Eta “biittai saluwaana” gidido Kiristtoosa kaalliya tiyettidaageetikka, ha alamiyan banttana “imattanne yedettin asasan de7iyaageeta” oottidi xeelloosona. (Pili. 3:20; 1 PHe. 2:11) Yesuusi “sa7aassa gidennaagaadan,” Kiristtoosa “hara dorssatikka” “sa7aassa gidokkona.” (Yoh. 10:16; 17:16) SHin, Xoossaa asau keettay deꞌees. He keettay ayfiyan beꞌana danddayiyooba gidenna; shin hegee nuuni deꞌana danddayiyo keettaa ubbaappe aaruwan ufayssiyaagaanne woppu giidi deꞌanaadan oottiyaagaa. Muusee he keettaabaa hagaadan giis: “Godau, neeni yeleta ubban nuuni de7iyo soho gidadasa.”a (Maz. 90:1) Yihooway beni wode baayyo ammanettidi haggaazidaageetussi tumuppe “de7iyo soho” gididoy ayba ogiyaanee? I ha wodiyan ba sunttan xeesettiyaageetussi tumuppe “de7iyo soho” gidiyoy ayba ogiyaanee? I sinttanaukka ammanttiya deꞌiyo soho gidanay ayba ogiyaanee?

YIHOOWAY BENI WODE BAAYYO HAGGAAZIDAAGEETUSSI TUMUPPE “DE7IYO SOHO” GIDIIS

3. Mazamure 90:1n odettida waanna allaallee, a misatiyaabaynne eti issi mala gidido ogee aybee?

³ Geeshsha Maxaafan deꞌiya daro leemisotuugaadan, Mazamure 90:1y, waanna allaalliyaa, a misatiyaabaanne eti issi mala gidido ogiyaa yootees. Waanna allaallee Yihoowa. Misatiyaabay deꞌiyo sohuwaa. Yihooway daroban deꞌiyo soho mala. Leemisuwau, Yihooway ba asaa naagees. Hegee i siiquwau waanna leemiso gidiyoogaara maayettiyaaba. (1 Yoh. 4:8) I baayyo ammanettiyaageeta ‘saruwan naagi wottiya,’ sarotettaa Xoossa. (Maz. 4:8) Leemisuwau, Abrahaamanne appe simmin deꞌiya bantta soo asau huuphe gidida, ammanettida asata i oyqqido ogiyaa qoppa.

4, 5. Xoossay Abrahaamassi tumuppe “de7iyo soho” gididoy ayba ogiyaanee?

⁴ Abrahaami Yihooway bana, “Neeni ne biittaappe, ne [dabbotuppe] . . . shaahettada, taani nena bessiyo biitti ba” yaagidoy aybisseeshsha giidi qoppennan aggenna. SHin, Yihooway hegaappe kaallidi haasayidobay a keehi minttettennan waayi aggana: “Taani nena gita kawotetta oottana; qassi taani nena anjjana; taani ne sunttaa gitayana; . . . taani nena anjjiyaageeta anjjana; qassi nena qanggiyaageeta taani qanggana.”—Doo. 12:1-3.

⁵ Yihooway Abrahaamayyoonne a zerettaayyo woppu giidi deꞌiyo soho gidanau qofaa qachidoogaa hegaadan giidi yootiis. (Doo. 26:1-6) Yihooway qaalaa gelidobaa poliis. Leemisuwau, I Gibxxe Kawoynne Garaara Kawuwaa Abimeleki Saaro dafi ekkidi Abrahaama worennaadan naagiis. I Yisaaqanne Irbbiqokka hegaadan naagiis. (Doo. 12:14-20; 20:1-14; 26:6-11) Geeshsha Maxaafay, “Xoossai eta ooninne naaqqanau immibeenna; eta gishshau kawota seeriiddi, ‘Taani tiyidoogeeta bochchoppite; ta hananabaa yootiyaageeta qohoppite’ yaagiis” yaagees.—Maz. 105:14, 15.

6. Yisaaqi ay oottanaadan Yaaqoobau yootidee, qassi Yaaqoobi woygidi qoppana danddayii?

⁶ Abrahaama naꞌaa naꞌay Yaaqoobi he hananabaa yootiyaageetuppe issuwaa. Yaaqoobi macho ekkiyaagaa gidido wode, a aaway Yisaaqi assi hagaadan giis: “Kanaane biittaa macca naatuppe neeyyo machcho ekkoppa. Dendda! Denddada ne aayee aawaa Baatu7eelakko, Masphphexoomiyaa biitti ba; baada yaappe . . . Laabaana macca naatuppe issinno neeyyo machcho ekka.” (Doo. 28:1, 2) Yaaqoobi Yisaaqi azazidobaa sohuwaara poliis. Yaaqoobi Kanaanen deꞌiya bantta soo asaara hirggennan deꞌiyoogaa aggidi, daro xeetu kilo meetiriyaa haakkidi deꞌiya Kaaraane barkka biis. (Doo. 28:10) I geella hagaadan qoppennan aggenna: ‘Taani yan ay keena wodiyaa takkanee? Ta aayee ishay tana mokki ekkidi, Xoossaa yayyiya macho tau immanee?’ Yaaqoobi hegaadan hirggikko, i Berssaabehappe 100 kilo meetire gidiyaagaa haakkidi deꞌiya Looza gakkiyo wode hirggiyoogaa aggidoogee qoncce. Loozan hanidabay aybee?

7. Xoossay aymuwan Yaaqooba minttettidoy ayba ogiyaanee?

⁷ Loozan Yihooway Yaaqoobau aymuwan qonccidi hagaadan giis: “Taani nenaara de7ais; neeni biyoosa ubban taani nena naagana; qassi taani nena ha biitti guyye zaarada ehaana; taani neeyyo oottana giidoogaa oottana gakkanaassi nena yeggikke.” (Doo. 28:15) He kehabaa yootidoogee Yaaqooba ay keena minttettideeshsha! Hegaappe simmin Yaaqoobi, Xoossay ba qaalaa waati polanaakko beꞌanau amottiiddi horddofiyaagaa qoppa. Neeni hara biittan haggaazanau ne sooppe biidaba gidikko, Yaaqooba qofissiyaabaa akeekennan aggakka. Gidoppe attin, Yihooway neessi qoppiyoogaa neeni akeekidoogee qoncce.

8, 9. Yihooway Yaaqoobau tumuppe “de7iyo soho” gididoy ayba ogiyaanee, qassi nuuni hegaappe ay tamaarana danddayiyoo?

⁸ Yaaqoobi Kaaraane gakkin, a aayee ishay Laabaani a mokki ekkiis; qassi guyyeppe ayyo Liyonne Raaheelo macho oottidi immiis. SHin, guuttaa takkidi Laabaani Yaaqooba damoozaa tammutoo laammidi a qohiis. (Doo. 31:41, 42) Gidikkokka, Yaaqoobi Yihooway baassi qoppiyoogaa ammanettidi hegaadan qohettiiddi gencciis; qassi Yihoowaykka assi qoppiis! Yaaqoobi Kanaane guyye baanaadan Xoossay ayyo yootiyo wode, “daro wudiyaa, macca ashkkaratanne attuma ashkkarata, daro gaameelatanne hareta haariis.” (Doo. 30:43) Yaaqoobi Xoossaa woossiyo wode hagaadan giidi galatiis: “Neeni ne ashkkaraayyo oottido kehatettaunne tumatettau ubbau taani bessennaagaa. Taani ha Yorddaanoosa SHaafaa pinnido wode, taayyo issi xam77a xalaalai de7ees; shin ha77i taani naa77u cita gidaas.”—Doo. 32:10.

⁹ Ha leemisoti Muusee, “Godau, neeni yeleta ubban nuuni de7iyo soho gidadasa” yaagidoogee tuma gidiyoogaa bessoosona. (Maz. 90:1) “Ba sohuwaa laammiya kuwaadan laamettenna” Yihooway baayyo ammanettidaageetussi muletoo ammanttiyaanne ufayssiya deꞌiyo soho gidiyo gishshau, he qaalay ha wodiyankka tuma. (Yaaq. 1:17, NW) Hegee tuma gididoy ayba ogiyaanakko ane beꞌoos.

YIHOOWAY HA WODIYAN NUUSSI TUMUPPE “DE7IYO SOHO”

10. Yihooway ba ashkkaratussi ubbatoo ammanttiya deꞌiyo soho gidiyoogaa nuuni ammanana danddayiyoy aybissee?

¹⁰ Neeni alame yuushuwan danobaa oottiya dirijjitiyaa bolli pirdda keettan markkattiyaabadan qoppa. He dirijjitiyaa kaalettiyaagee keehi cincca, wolqqaama, qassi bulla worddanchanne shemppo woriyaagaa. Neeni he gallassi pirdda keettaappe kiyiyo wode saro aykko baa gaada qoppuutee? Akkay! Nena naaganaadan neeni oychanaagee erettidaagaa. Hegaara issi mala hanotan, nuuni Yihoowayyo haggaaziyaageeti au suutta morkke gidida Seexaanaa bolli markkattoos. (Ajjuutaa 12:17 nabbaba.) SHin, Seexaanay Xoossaa asaa oosuwaa teqqidee? CHii teqqibeenna. Nuuni alame yuushuwan keehi daro asau sabbakiiddi deꞌoos. Nuuni hegaadan oottana danddayidoy aybissee? Yihooway nuussi tumuppe “de7iyo soho” gidiyo gishshataassa. (Isiyaasa 54:14, 17 nabbaba.) SHin, Seexaanay cimmanaadan nuuni eeno geennan ixxiyo wode xallan, Yihooway nuussi ubbatoo “de7iyo soho” gidees.

11. Beni wode bantta soo asau huuphe gididaageetu leemisuwaappe ay tamaarana danddayiyoo?

¹¹ Nuuni Abrahaamappe, Yisaaqappenne Yaaqoobappe harabaakka tamaarana danddayoos. Eti Kanaane biittan deꞌidaba gidikkonne, yan deꞌiya asati oottiyo iitabaanne shori baynnabaa ixxiyo gishshau, etappe dummatidi deꞌidosona. (Doo. 27:46) Iitaa kehaa eranau etassi daro higge koshshibeenna. Eti Yihoowabaanne a eeshshaabaa eriyoogaa xallay etau gidiis. I etayyo deꞌiyo soho gidido gishshau, eti danddayiyo keenan alamiyaara dabbotanau koyibookkona. Banttau danddayettida ubban alamiyaappe haakkidi deꞌidosona. Eti nuussi keehi loꞌꞌo leemiso! Neeni laggetanne allaxxiyoobaa dooriyo wode, ammanettida he asatu leemisuwaa kaallanau baaxetay? Gubaaꞌiyan deꞌiya issoti issoti Seexaanaa alamiyan amaridaagaa ufayttiyoogee azzanttiyaaba. Neenikka guuttaa hegaadan qoppiyaaba gidikko, hegaa xeelliyaagan woossa. Ha alamee Seexaanaagaa gidiyoogaa hassaya. Alamiyaa asaykka Seexaanaadan ba xallaa siiqees; qassi nuussi qoppenna.—2 Qor. 4:4; Efi. 2:1, 2.

12. (a) Yihooway ba keetta asa gididaageetuyyo ayyaanaaban koshshiyaabaa kunttiyoy ayba ogiyaanee? (b) Ha giigissota ayba ogiyan xeellay?

¹² Seexaanaa cimuwaa teqqanau, Yihooway bana ammaniya ba soo asau, giishin a banttau deꞌiyo soho oottidaageetussi ayyaanaaban giigissidobaa nuuni loyttidi goꞌettana koshshees. He giigissidobatuppe amaridaageeti gubaaꞌiyaa shiiquwaa, so asaa goynuwaanne deꞌuwan gakkiya metuwaa xoonanau nuuni baaxetiyo wode, nuna minttettanaadaaninne maaddanaadan Xoossay sunttido heemmiyaageeta, woykko “imota” gidida attuma asata. (Efi. 4:8-12) Bolla Gididi Heemmiyaagaa yara gididi daro layttau oottida ishaa Jorjj Gangaasi, “Taani [Xoossaa asaara] deꞌiyo wode, ayyaanaa gannatiyan ta soo asaara woppu gaada deꞌays” yaagidi xaafiis. Neenikka hegaadan ufayttada deꞌay?

13. Ibraawe 11:13ppe nuuni tamaarana danddayiyo keehippe koshshiyaabay aybee?

¹³ Beni wode bantta soo asau huuphe gididaageetu leemisuwaa nuuni kaallana koshshiyo hara eeshshay, eti bantta yuushuwan deꞌiya asaappe dumma gididi deꞌidoogaa. Mentto 1n beꞌidoogaadan, “eti sa7an imattanne yedetettidi kiyida asata gididoogaa” qoncciyan yootidosona. (Ibr. 11:13) Neeni dumma gidada deꞌanau murttadii? Hegaadan oottiyoogee issi issitoo metiyaaba gidiyoogee qoncce. SHin Xoossay, qassi nu ishanttinne michontti maaddin he metuwaa xoonana danddayaasa. Hegaadan metootiyay ne xalla gidennaagaa hassaya. Yihoowau haggaazanau koyiya ubbay baaxetiyo baaxee deꞌees. (Efi. 6:12) Nuuni Yihoowan ammanettiyaabaanne a nuussi ammanttiya deꞌiyo soho oottiyaaba gidikko, he baaxiyan xoonana danddayoos.

14. Yihoowa ashkkarati naagido ‘katamay’ aybee?

¹⁴ Woytuwaa tishshi ootti xeelliyoogan Abrahaama leemisuwaa kaalliyoogeekka keehi koshshiyaaba. (2 Qor. 4:18) Kiitettida PHauloosi, “Abrahaami Xoossai lo77o baasuwan hayyottidi keexxido katamaa” naagidoogaa yootiis. (Ibr. 11:10) He ‘katamay’ Mase Kawotettaa. Abrahaami he “katamaa” naagana koshshiis. Amarida ogiyan, nuuni naagana koshshenna. He Kawotettay saluwan haariiddi deꞌees. Qassi, mata wode saꞌaa muleera haaranaagaa bessiya daro naqaashay deꞌees. Ne deꞌoy neeni he Kawotettan tumuppe ammaniyoogaa bessii? Neeni ne deꞌuwan he Kawotettaa kaseyada, alamiyaappe dumma gidada deꞌay?—2 PHeexiroosa 3:11, 12 nabbaba.

YIHOOWAY WURSSETTAY MATIYO WODEKKA NUUSSI TUMUPPE “DE7IYO SOHO” GIDANA

15. Ha alamiyan ammanettiya asay sinttappe waananee?

¹⁵ Seexaanaa alamiyaa xayoy matiyo wode, ‘leessoy’ ayyo yaa wolqqaamana. (Maa. 24:7, 8) Gita waayiyaa wode, ubbabay yaa iiti iiti baanaagee erettidaba. Alame yuushuwan wolqqaama bashshay gakkananne asau kirqqi gaana; qassi asay keehi hirggana. (Imb. 3:16, 17) Asay yibbaatau ‘gonggolonne shuchaa kooppuwaa’ malaban qosettana. (Ajj. 6:15-17) Gidikkonne, gonggoloykka dere mala gidida, polotikaanne zalꞌꞌe dirijjiteekka eta ashshenna.

16. Gubaaꞌiyaa xeelliyaagan nu qofay ayba gidana koshshii, qassi aybissi?

¹⁶ SHin, Yihoowa asay banttassi tumuppe “de7iyo soho” gidida Xoossaa Yihoowan naagettidi attana. Hananabaa yootiya Imbbaaqoomadan, eti Yihoowan “ufaittana.” Eti banttana ‘ashshiya Xoossan ufayssaa poccu gaana.’ (Imb. 3:18) Ubbabay balbbuqettiyo he wodiyan, Yihooway nuuyyo tumuppe “de7iyo soho” gidanay ayba ogiyaanee? Hegee haniyo wode beꞌanaba. SHin hagaa ammanettana danddayoos: Gibxxeppe kiyidi biya Israaꞌeelatuugaadan, ‘zaway baynna daro asay’ daraajjayettidi, Xoossaa kaaletuwaa beegottidi naagana. (Ajj. 7:9; Kessaabaa 13:18 nabbaba.) Xoossay he kaaletuwaa immanay gubaaꞌiyaa baggaara gidennan aggenna. Ha wodiyan alame yuushuwan deꞌiya, daro shaꞌu gubaaꞌeti Isiyaasa 26:20n (nabbaba.) “soo” geetettida naagetti attiyo soho gidennan waayi aggana. Neeni gubaaꞌe shiiquwaa nashshay? Yihooway gubaaꞌiyaa baggaara immiyo kaaletuwaa sohuwaara oosuwan peeshshay?— Ibr. 13:17.

17. Yihooway baassi ammanettida, hayqqida ba ashkkaratuyyokka tumuppe “de7iyo soho” gidiyoy ayba ogiyaanee?

¹⁷ Yihooway gita waayee doommanaappe kase hayqqida ammanettidaageetuyyokka tumuppe “de7iyo soho” gidana. Ayba ogiyan? Beni wode bantta soo asau huuphe gididaageeti hayqqoosappe daro wodee aadhi simminkka, Yihooway Muuseyyo, “Taani . . . Abrahaama Xoossaa, Yisaaqa Xoossaa, Yaaqooba Xoossaa” yaagiis. (Kes. 3:6) Yesuusi he qofaa zaaretti yooti simmidi, hagaadan giis: “Xoossai merinau de7iyaageetu Xoossaa gidiyoogaappe attin, haiqqidaageetu Xoossaa gidenna.” (Luq. 20:38) Ee, Yihoowau ammanettida, hayqqida asati a sinttan paxa deꞌiya asa mala; eti denddiyoogee attenna.—Era. 7:1.

18. Ooratta alamiyan, Yihooway ba asau dumma hanotan tumuppe “de7iyo soho” gidanay ayba ogiyaanee?

¹⁸ Matan yaana ooratta alamiyan, Yihooway hara ogiyankka ba asau tumuppe “de7iyo soho” gidana. Ajjuutaa 21:3y, “Xoossaa keettai asaara de7ees; Xoossai asaara issippe de7ana” yaagees. Koyro, Yihooway Kiristtoos Yesuusa baggaara saꞌan bau haarettiyaageetuura issippe deꞌana. SHaꞌu layttaa wurssettan, Xoossay saꞌau halchidobaa Yesuusi wurssi polidi, Kawotettaa ba Aawau sheedhana. (1 Qor. 15:28) Hegaappe simmin, asaa naati polo gidiyo gishshau, Yesuusi etau gaannatana koshshenna; Yihooway etaara issippe deꞌana. Sinttappe nuuni demmanabay keehi ufayssiyaaba! Yaanikko, he wodee gakkanaassi, Yihoowa nuuyyo tumuppe “de7iyo soho” oottiyoogan beni wode deꞌida ammanettida asatu leemisuwaa kaalloos.