NABBABIYAAGEETU OYSHAA

Ermmaasi Raaheela ba naatuyyo yeekkidoogaa yootidoy ay qonccissanaassee?

Ermmaasa 31:15y hagaadan gees: “GODAI hagaadan yaagees; ‘Yeehoinne zilaassai Raama giyo kataman siyettiis; Raaheela ba naatuyyo yeekkausu; eti xayido gishshau, agga gin, aggennan ixxaasu’ yaagees.”

Raaheeli attuma naati naaꞌꞌati a hayqqiyo wode paxa deꞌoosona. Hegaappe denddidaagan, Ermmaasi Raaheela hayqqoosappe 1,000 layttappe guyyiyan xaafidobay tuma milatennan aggana danddayees.

Raaheeliyyo bayra naꞌay Yooseefa. (Doo. 30:22-24) Guyyeppe, a Biniyaama giyo hara attuma naꞌaa yelaasu. SHin Raaheela hayqqidoy he kaalo naꞌaa yeliyo wode. Ermmaasa 31:15y, Raaheela ba naati “xayido gishshau” yeekkidoogaa yootees. Yaatin, Ermmaasi hegaadan giidoy aybissee?

Guyyeppe, i bayra naꞌay Yooseefi Minaasanne Efireema giyo naata yelidoogaa akeekana bessees. (Doo. 41:50-52; 48:13-20) Takkidi, Efireema zaree Israaꞌeela huuphessa kawotettan erettidaagaa gidido gishshawu, he kawotettan deꞌiya tammu zareti ubbay an xeesettidosona. Hara baggaara qassi Raaheeli kaalo naꞌaa gidida Biniyaama zerettay Yihudaara Israaꞌeela tohossa kawotettaa bagga gidiis. Hegaa gishshawu, Raaheela huuphessa kawotettawunne tohossa kawotettawu woykko Israaꞌeela aayotu ubbawu leemiso geetettana danddayawusu.

Ermmaasa maxaafay xaafettiyo wode, Asooreti huuphessa baggan deꞌiya tammu zaretu Israaꞌeela kawotettaa xoonidi, yan deꞌiya asaappe daruwaa omooddidosona. SHin Efireema zaretuppe amaridaageeti baqatidi Yihuuda biitti beennan aggona. Qassi, Baabilooneti 607n K.K. tohossa baggan deꞌiya naaꞌꞌu zaretu Yihuuda kawotettaa xayssidosona. He wode, omoodettida daroti Yerusalaameppe huuphessan 8 kilo meetire gidiyaagaa haakkiya Raaman shiiqennan aggokkona. (Erm. 40:1) Etappe amaridaageeta Biniyaama zawan deꞌiya, Raaheela moogettido sohuwan asay worennan aggenna. (1 Sam. 10:2) Yaatiyo gishshawu, Raaheela yeekkidoogaa yootiya taarikee leemiso hanotan a Biniyaama zariyawu ubbawu, woy qassi Raaman deꞌiyaageetussi yeekkidoogaa bessiyaaba gidana danddayees. Woy qassi hegee Xoossaa asa gidida Israaꞌeelati omooddettidi biido wode etayyo aayo gidiyaageeti keehi azzanidoogaa bessiyaaba gidana danddayees.

Hegawu birshshettay aybanne gidin, Ermmaasi Raaheela yeekkidoogaa yootidobay xeetan qoodettiya layttaappe guyyiyan, issi kawoy Yesuusa woranawu koyido wode hanidabaa bessiyaaba. Kawuwaa Heeroodisi Yerusalaameppe tohossa baggan Beetaliheemen deꞌiya, layttay naaꞌꞌanne hegaappe guuxxiyo attuma naati ubbay hayqqanaadan azaziis. Hegaappe denddidaagan, ubba naati hayqqidosona. Bantta naati hayqqido aayoti kayyottidi ay keena yeekkidaakko qoppa. Eta yeehoy Yerusalaameppe huuphessa baggan deꞌiya Raaman siyettidoogaa mala.—Maa. 2:16-18.

Hegaappe denddidaagan, Raaheela ba naatuyyo yeekkidoogaa yootiya taarikee, Ermmaasa wodiyankka Yesuusa wodiyankka bantta naati hayqqido gishshawu keehi mishettidi yeekkiya aayotu hanotaa loytti qonccissiyaaba. Gidikkokka, dendduwaa wode, ‘morkke biittan’ deꞌiyaageeti simmidi yaana; hegeekka eti hayquwaappe denddana.—Erm. 31:16; 1 Qor. 15:26.