Yihoowa Galata Yaatada Anjjetta

1. Nuuni Yihoowa galatana koshshiyoy aybissee?

“LO77O imo ubbainne kumetta woito ubbai” appe beettiyo Yihoowawu galatay bessees. (Yaaq. 1:17) I nuna siiqiya henttancha gidiyo gishshawu, asatettaaninne ayyaanaaban nuuyyo koshshiya ubbabaa kunttees. (Maz. 23:1-3) Ubba wode, ubba qassi nuna metoy gakkiyo wode, i “nuuni naagetti attiyo sohonne nuuyyo wolqqa.” (Maz. 46:1) “Yihooway keha gidiyo gishshawu, a galatite; aggenna a siiqoy merinaagaa” yaagidi yexxida mazamuraawiyaa qofaa nuuni maayiyo daro gaasoy deꞌees.—Maz. 106:1.

2, 3. (a) Nuuyyo deꞌiyaabaa nashshennaba gidikko, waanana danddayiyoo? (b) Ha huuphe yohuwan beꞌana oyshati awugeetee?

² Nuuni Yihoowa galatana koshshiyoy aybissee? Kasetidi odettidaagaadan, galatenna asay ha wurssetta gallassan kaseegaappe dariis. (2 Xim. 3:2) Daro asay demmido kehabaa darin nashshenna. Ha alamiyan deꞌiya miilooniyan qoodettiya asay bawu deꞌiyaaban woppu giidi deꞌiyoogaappe bawu baynna harabaa demmanawu baaxetees. Nuunikka hegaadan nashshennaageeta gidenna mala naagettana bessees. Beni Israaꞌeelatuugaadan, nuunikka galatennaageeta gididi, Yihoowaara deꞌiya dabbotaanne i immido loꞌꞌobaa nashshennaageeta gidana danddayoos.—Maz. 106:7, 11-13.

³ Qassi nuna wolqqaama metoy gakkiyo wode hanana danddayiyaabaa qoppa. Hegaa mala wodiyan nuuni keehi unꞌꞌettidi, Yihooway nuussi immido loꞌꞌobaa qoppennan aggana danddayoos. (Maz. 116:3) Yaatin nuuni ubbatoo waani galatiyaageeta gidana danddayiyoo? Qassi, wolqqaama metoy gakkiyo wodekka loꞌꞌobaa qoppanawu nuna aybi maaddii? Ane hegaa beꞌoos.

YIHOOWAWU “NEENI DARO MAALAALISSIYAABAA OOTTADASA”

4. Nuuni ubbatoo waani galatiyaageeta gidana danddayiyoo?

⁴ Nuuni ubbatoo galatiyaageeta gidanawu, Yihooway nuuyyo immidobaa akeekidinne nashshidi yererana, qassi i nuussi ba aggenna siiquwan oottidobaa qoppana bessees. Mazamuraawee yaatido gishshawu, Yihooway oottido gita gidida daroban maalaalettiis.—Mazamure 40:5; 107:43 nabbaba.

5. Galatiyoogaa xeelliyaagan kiitettida PHawuloosappe ay tamaariyoo?

⁵ Galatiyoogaa xeelliyaagan kiitettida PHawuloosappe darobaa tamaarana danddayoos. I zaari zaaridi wozanappe nashshidoogee, demmidobaa yereriya asa gidiyoogaa bessiyaaba. PHawuloosi i kase ‘cayiyaagaa, yedettiyaagaanne tuggayiyaagaa’ gidiyoogaa erees. I kase iitabaa oottida asa gidikkokka, Xoossaynne Kiristtoosi a maaridi ayyo gita oosuwaa immido gishshawu galatiis. (1 Ximootiyoosa 1:12-14 nabbaba.) PHawuloosi hara Kiristtaanetakka wozanappe nashshiis; qassi eti ammanettidi oottiyo loꞌꞌo oosuwaa gishshawunne eta loꞌꞌo eeshshaa gishshawu, Yihoowa darotoo galatiis. (Pili. 1:3-5, 7; 1 Tas. 1:2, 3) Qassi, bana metoy gakkin ishantti a koshshiya wodiyan maaddido wode, PHawuloosi sohuwaara Yihoowa galatiis. (Oos. 28:15; 2 Qor. 7:5-7) Hegaa gishshawu PHawuloosi, “Intte wozanan Xoossaa galatiiddi, . . . mazamuriyaa, Xoossaa sunttaa xoqqu oottiya yettaa yexxite” yaagidi Kiristtaaneta minttettidoogee garamissiyaaba gidenna.—Qol. 3:15-17.

WOTTI DENTTI QOPPIYOOGEENNE WOOSSIYOOGEE GALATANAWU MAADDEES

6. Neeni Yihoowa keehi galatiyoy aybissee?

⁶ Galatiyaageeta gidiyoogan PHawuloosa loꞌꞌo leemisuwaa waani kaallana danddayiyoo? Nuunikka aagaadan Yihooway nuuyyo oottidobaa wotti denttidi qoppana bessees. (Maz. 116:12) Issi asi, ‘Neeni Yihoowa galatanaadan oottiya, appe demmidobay aybee?’ giidi oychiyaakko woyga zaaruutee? Neeni Yihoowa dabbo gidiyoogaa yootanee? Neeni Kiristtoosa wozuwaa yarshshuwaa ammaniyo gishshawu ne nagaray atto geetettidoogaa shin yootanee? Nena wolqqaama metoy gakkido wode minttettida ishanttinne michontti oonakko yootanee? Neeni siiqiyo ne aqo laggiyaabaanne ne naatubaakka yootiyoogee attenna. Yihooway nuussi immido he gita imotata wodiyaa bazzidi wotti dentti qoppiyoogee, nuuni nashshiyaageetanne ubba galla galatiyaageeta gidanaadan maaddees.—Mazamure 92:1, 2 nabbaba.

7. (a) Nuuni woosan Yihoowa galatana koshshiyoy aybissee? (b) Woosan Yihoowa galatiyoogee nena waati goꞌꞌii?

⁷ Nuuyyo Yihooway immido anjjuwaa ubbatoo qoppiyaageeta gidikko, Yihoowakko woossanawunne a galatanawu ubba wode giigettidaageeta gidoos. (Maz. 95:2; 100:4, 5) Daroti woosay Xoossaa issibaa oychiyo oge xalla giidi qoppoosona. SHin, nuuni nuuyyo deꞌiyaabawu galatiyo wode Yihooway ufayttiyoogaa eroos. Haannanne Hizqqiyaasi woossidoogaa mala galata woosay daroy Geeshsha Maxaafan deꞌees. (1 Sam. 2:1-10; Isi. 38:9-20) Neenikka galatiyoogan he asatu leemisuwaa kaalla. Neeni demmidobaa gishshawu Yihoowa woosan galata. (1 Tas. 5:17, 18) Hegaadan oottiyoogaa goꞌꞌay keehi daro. Hegee neeni minettanaadan, Yihoowa loytta siiqanaadaaninne kaseegaappe aaruwan Yihoowakko shiiqanaadan maaddees.—Yaaq. 4:8.

8. Yihooway nuuyyo oottidobaa nuuni nashshennaadan oottana danddayiyaabay aybee?

⁸ Nuuni naagettana xayikko, Yihooway immido loꞌꞌobaa gishshawu a nashshiyoogaa aggana danddayoos. Aybissi? Nuuni laattido nagaray galatennaageeta oottiyo gishshataassa. Nu koyro aawanne aayo gidida Addaamanne Hewaano Xoossay edene gannatiyan wottiis. I etawu koshshiya ubbabaa kunttidi immiis; qassi eti merinawu ufayssan deꞌana danddayoosona. (Doo. 1:28) SHin Yihooway immidobaa eti nashshibookkona. Eti yaaretidi darobaa amottidosona. Yaatiyo gishshawu, he ubbabaappe mela attidosona. (Doo. 3:6, 7, 17-19) Ha alamiyan deꞌiya daro asay galatennaagaa gidiyo gishshawu, nuunikka Yihooway nuuyyo immidobaa nashshennaageeta gidana danddayoos. Nuuni Yihoowa dabbo gidiyoogaa xaasayi xeellana danddayoos. Kumetta alamiyan nu ishatuura deꞌiya issippetettaa nashshiyoogaa aggana danddayoos. Qassi, ha aadhana haniya alamiyan deꞌiyaabaa dosiyoogaa doommana danddayoos. (1 Yoh. 2:15-17) He piriyan gelennaadan, nuuni Yihoowappe demmido daro anjjuwaa wotti denttidi qoppananne a asa gidiyo gita maataa gishshawu a ubba wode galatana koshshees.—Mazamure 27:4 nabbaba.

METUWAA GENCCIYO WODE

9. Wolqqaama metoy gakkiyo wode, Yihooway nuussi immidobaa wotti denttidi qoppana koshshiyoy aybissee?

⁹ Galatiyaageeta gidiyoogee wolqqaama metuwaa genccanawu maaddana danddayees. Aqo laggee kaddiyoogaa, iita harggee oyqqiyoogaa, siiqiyo asi hayqqiyoogaa woy meretay gattiyo daafabaa gaasuwan keehi qohettiyoogaa malabay qoppennan nu bolli gakkiyo wode, keehi unꞌꞌettana danddayoos. Yihooway nuussi immidobaa wotti dentti qoppiyoogee hegaa mala wodiyan minettanawunne genccanawu maaddees. Hagaappe kaallidi deꞌiya issi issi leemisuwaa beꞌa.

10. Irena demmido anjjuwaa wotta dentta qoppiyoogan waana goꞌettadee?

¹⁰ Irenaa Huuphessa Amarkkan kumetta wodiyaa aqinye gidada haggaazawusu; kase gubaaꞌe cima gidida i azinay hara maccaasa siiqidi, onne heezzu naata aggidi biis. Yaatin, Irena Yihoowawu ammanettada haggaaziyoogaa aggennaadan aybi maaddidee? A hagaadan gaasu: “Yihooway tana qaretan oyqqido gishshawu keehi galatays. Taani demmido anjjuwaa galla galla qoppiyo wode, taani Yihooway eriyoonne siiqiyo asa gidiyoogee gita maata gidiyoogaa akeekays; i saluwan deꞌiya, nuna naagiya Aawa. I tana mule aggennaagaa erays.” Irena daro metuwaa genccidaba gidikkokka, a ufayttiya asa gidiyoogee okka haratakka minttettiis.

11. Kiyun-suka iita sahuwaa genccanaadan maaddidabay aybee?

¹¹ Isiyan deꞌiya Kiyun-suka 20ppe dariya layttaa aqinye gidada ba azinaara haggaazaasu. A qoppennan, paxenna goofiniyaa harggiyan oyqettidoogaa, qassi heezzaappe usuppun agina gakkanaashin deꞌanaagaa aakimeti odidosona. Anne i azinay daro metuwaa genccidaba gidikkokka, ubba wode bantta payyatettay loꞌꞌo giidi qoppidosona. A, “Taani ha harggiyan oyqettidoogaa erido wode keehi unꞌꞌettaas; taappe ubbabay halidabadan qoppaasinne keehi dagammaas” yaagaasu. Kiyun-suka genccanaadan maaddidabay aybee? A hagaadan gaasu: “Ubba gallassi taani xiskkanaappe kase, pooqiyan deꞌiya kifiliyaa baada, he gallassi demmido ufayssiya ichashubaa xeelliyaagan ta cenggurssaa xoqqu oottada galatays. Yaatiyoogee tana minttetteesinne Yihoowa siiqiyoogaa yootanawu denttettees.” Kiyun-suka qamman qamman woossiyo woosan waana goꞌettadee? A, “Yihooway meto wodiyan nuna minttettiyoogaa, qassi nu bolli gakkiya metuwaappe nuussi deꞌiya anjjoy keehi daro gidiyoogaa akeekaas” yaagaasu.

12. Jeseni ba keettaayiyaa hayqqa simmin waani minettidee?

¹² Afirkka biittan deꞌiya issi macara biiruwan oottiya Jeseni 30ppe dariya layttaa kumetta wodiyaa haggaaziis. I hagaadan giis: “Laappun layttappe kase, ta keettaayiyaa hayqqaasu; hegee keehi kayyoyana danddayiyaaba. A kansseriyaa sahettido wode keehi tuggatidoogaa taani ubbatoo qoppiyaaba gidiyaakko, unꞌꞌettana danddayays.” Jeseni genccanaadan maaddidabay aybee? I hagaadan giis: “Issi wode, taani ta keettaayeera aattido ufayssiya wodiyaa hassayada, he loꞌꞌobaa gishshawu Yihoowa galataas. Hegee tana woppu oottiis; guyyeppe, hegaa mala ufayssiyaabaa hassayido payduwan Yihoowa galatiyoogaa doommaas. Galatiyoogee taani maara qoppanaadan maaddiis. Taani haꞌꞌikka issi issitoo azzanays; shin ufayssiya aqo deꞌuwan deꞌido gishshawunne a keehi siiqiya aqo laggeera issippe ayyo oottido gishshawu Yihoowa galatiyoogee, taani suure qoppanaadan maaddiis.”

13. So asaappe daroy hayqqido wode SHerila genccanaadan maaddidabay aybee?

¹³ Wolqqaama diꞌoynne gotee 2013 wurssettan Pilippinsse biittaa keehi qohido wode, layttay 13 gidido SHerila darobaappe mela attaasu. A, “Nu keettay xayiis; nu soo asaappekka daroy hayqqiis” yaagaasu. He wolqqaama diꞌuwan i aaway, i aayyiyaa, i ishaynne i naaꞌꞌu michontti hayqqidosona. He bashshaa wode, SHerila wozanaa bayada kayyottennaadan maaddidabay aybee? A galatiyaaronne he wodiyankka baassi deꞌiya loꞌꞌobaa akeekiyaaro gidiyoogee o maaddiis. A hagaadan gaasu: “Ishatinne michoti maadoy koshshiyoogeeta maaddanawunne minttettanawu oottiyo ubbabaa beꞌaas. Kumetta alamiyan deꞌiya ishati taayyo woossiyoogaa erays.” A gujjada, “Yihooway ta Xoossaa gidiyo gishshawu galatays. I nuussi koshshiya ubbabaa immees” yaagaasu. Nuussi deꞌiya loꞌꞌobaa akeekiyoogee azzanttiyaabay gakkiyo wode keehi kayyottennaadan maaddees. Nashshiyaageeta gidiyoogee ay metoy gakkikkokka nuuni genccanaadan maaddees.—Efi. 5:20; Piliphphisiyuusa 4:6, 7 nabbaba.

“TAANI GODAN UFAITTANA”

14. Nuna sinttappe keehi ufayssanabay aybee? (Ha huuphe yohuwaa doomettan deꞌiya misiliyaa xeella.)

¹⁴ Ubba wodiyan deꞌida Yihoowa asay baassi deꞌiya loꞌꞌoban ufayttees. Leemisuwawu, Israaꞌeelati Zoꞌo Abbaa lanqqen Paaroonappenne a olanchatuppe attido wode, galataanne sabaa mazamuriyaa ufayssan yexxidosona. (Kes. 15:1-21) Ha wodiyan nuuni ufayttanaadan oottiya anjjotuppe issoy, metoynne tuggay mata wode xayanaagaa eriyoogaa. (Maz. 37:9-11; Isi. 25:8; 33:24) Yihooway ba morkketa ubbaa xayssidi, nuna sarotettaynne xillotettay kummido ooratta alamiyaa gelissiyo wode neeyyo aybi siyettanaakko qoppa. Hegee Yihoowa keehippe galatiyo gallassa gidana!—Ajj. 20:1-3; 21:3, 4.

15. Neeni 2015n ay oottanawu murttadii?

¹⁵ Nuuni 2015n Yihoowappe ayyaanaaban daro anjjuwaa demmanaagaa hidootoos. Nuna issi issi metoy gakkana danddayiyoogaakka eroos. Ay metoy gakkikkokka, Yihooway nuna mule yeggibayennaagaa eroos. (Zaa. 31:8; Maz. 9:9, 10) Nuuni ayyo ammanettidi oottanaadan i nuussi koshshiya ubbabaa immana. Yaatiyo gishshawu, hananabaa yootiya Imbbaaqoomaagaadan ubba wode qoppiyaageeta gidana koshshees; i hagaadan giis: “Balasiyaa giyo mittai aifana xayikkokka, woiniyaa turan aifee xayikkokka, wogarai aifennan ixxikkokka, gadee kattaa mokkennan ixxikkokka, birddiyan dorssi xayikkokka, qassi aqon mehee xayikkokka, hegee ubbai xayikkokka, taani GODAN ufaittana; tana ashshiya Xoossan taani ufaissaa poccu gaana.” (Imb. 3:17, 18) Ee, yiya laytti nuuyyo deꞌiya ubbabaa ufayssan wotti dentti qoppiiddi, “Yihooway keha gidiyo gishshawu, a galatite” yaagiya 2015 laytta xiqisiyan deꞌiya zoriyaa kaalliyaageeta gidoos.—Maz. 106:1, NW.