SINTTA HUUPHE YOHUWAA | GEESHSHA MAXAAFAA XANNAꞌANAWU KOYAY?

Asaa Xoossaa Qaalaa Xannaꞌissiyoogaa

Yihoowa Markkati sabbakiyoogan keehi erettoosona. SHin, nuuni kumetta saꞌan asaa Geeshsha Maxaafaa xannaꞌissiyoogaa eray?

Issi bitanee ba ooso sohuwan Geeshsha Maxaafaa xannaˈishin

Aginan aginan, 8,000,000ppe dariya Yihoowa Markkati 240ppe dariya biittan 2014n, 9,500,000 gidiya asaa Geeshsha Maxaafaa xannaꞌissidosona.a Nunaara Geeshsha Maxaafaa xannaꞌiya asay 140 gidiya biittatun huuphen huuphen deꞌiya asaa qoodaappe darees!

Yihoowa Markkati he timirttiyawu layttan layttan 700 gidiya qaalan issi biiloonenne bagga gidiya Geeshsha Maxaafata, maxaafata, maxeetetanne Geeshsha Maxaafaa xannaꞌanawu maaddiya hara xuufeta attamissoosona! Hegee asay Geeshsha Maxaafaa ba koyido qaalan xannaꞌanaadan maaddees.

“Taani tamaariyo wode xannaꞌiyoogaa dosikke; shin ha xinaatee ufayssiyaaba. Taani tamaaridobay qassi keehi minttettiyaaba!”—Katlega, Tohossa Afirkkaa.

“Xinaatee ta oysha ubbaa zaaruwaanne hara darobaa akeekanaadan maaddiis.”—Bertto, Mekisiiko.

“Tawu injjetiya wodiyan ta son Geeshsha Maxaafaa xannaꞌaas. Harabaa ay koyana danddayiyaanaa!” —Ezikiꞌela, Brazile.

“Taayyo injjetidaagaadan issi issitoo 15ppe 30 daqiiqa gakkanaassi, hara wode qassi hegaappe daruwaa xannaꞌays.”—Viniꞌano, Awusttiraaliyaa.

“Miishsha qanxxennan xannaꞌays—hegee maalaalissiyaaba!”—Ema, Beeniine.

“Geeshsha Maxaafaa tana xannaꞌissiyaara danddayanchanne keha. Nuuni keehi siiqettoos.”—Kareno, Huuphessa Ayerlandde.

“Yihoowa Markka gidennan Geeshsha Maxaafaa daro asay xannaꞌees.”—Dentena, Inggilize.

NUUNI GEESHSHA MAXAAFAA XANNAꞌISSIYO PROGRAAMIYAABAA ASAY DAROTOO OYCHIYO OYSHATU ZAARUWAA

Xannaꞌiyoobay waani giigidee?

Geeshsha Maxaafaappe dumma dumma qofaa denttidi, hegaara gayttiya Geeshsha Maxaafaa xiqiseta pilggoos. Leemisuwawu, kaallidi deꞌiyaageetu mala oyshatuyyo Geeshsha Maxaafan zaaroy deꞌees: Xoossay oonee? I ay mala Xoossee? Ayyo sunttay deꞌii? I awan deꞌii? Nuuni akko shiiqanawu danddayiyoo? Wayssiyaabay he oyshatu zaaroy Geeshsha Maxaafan awan deꞌiyaakko eriyoogaa.

Asay he oyshatu zaaruwaa demmanaadan maaddanawu 224 sinttay deꞌiyo, Tumuppe Geeshsha Maxaafay Tamaarissiyoy Aybee? giyo maxaafaa goꞌettoos.b Ha maxaafay keehi xoqqu ootti xeelliyo Geeshsha Maxaafaa timirtteta asay akeekanaadan maaddanawu giigiis. Ha maxaafay Xoossaabaa, Yesuus Kiristtoosabaa, asaa bolli gakkiya metuwaabaa, dendduwaabaa, woosaabaanne hara darobaa tamaarissees.

Awude, qassi awan xannaꞌissana danddayettii?

Neeyyo injjetiya saatiyaaninne sohuwan xannaꞌana danddayaasa.

Issitoo xannaꞌiyoogee ay keena wodiyan wurii?

Daro asay saaminttan saaminttan issi saate gidiyaagaa he xinaatiyawu bazzees. SHin he saatee hanotaadan hanotaadan laamettana danddayees. Neeyyo injjetiyaagaadan he prograamiyaa giigissana. Issoti issoti saaminttan saaminttan 10 woy 15 daqiiqa xallawu xannaꞌoosona.

Xannaꞌanawu ay keenaa qanxxana koshshii?

Xinaatiyawunne xannaꞌissiyo xuufiyawu miishsha qanxxana koshshenna. Hegee Yesuusi bana kaalliyaageeta, “Intte coo ekkideta; coo immite” giidi azazidoogaara maayettiyaaba.—Maatiyoosa 10:8.

Xinaatee muleera ay keena wodiyan wurii?

Xinaatee wuriyo wodee ne hanotaadaana. Tumuppe Geeshsha Maxaafay Tamaarissiyoy Aybee? giyo maxaafan 19 timirtteti deꞌoosona. Neeni doorido timirttee woy qassi ubba timirttee ne hanotaadan wurana danddayees.

Taani Yihoowa Markka Gidana Koshshii?

CHii. Ammaniyoobaa doorana danddayiyo maatay issi urawu deꞌiyoogaa akeekoos. SHin Geeshsha Maxaafaappe keehi koshshiyaabaa erida asaa, eridobay loꞌꞌobaa dooranaadan maaddana danddayees.

Hara qofaa awuppe demmana danddayiyaanaa?

Yihoowa Markkatu ammanuwaabaanne oosuwaabaa jw.org Weyb sayttee suure qofaa yootees.

Geeshsha Maxaafaa xannaꞌanawu waata oychana danddayiyaanaa?

Asay Intternneetiyan, dabddaabbiyaaninne silkke mazggafaa goˈettiyoogan Geeshsha Maxaafaa xannaˈanawu oychishin

Intternneetiyan www.jw.org Weyb sayttiyan oycha.
Ha maxeetiyan sinttaa naaꞌꞌan deꞌiya adrashatuppe neeyyo injjetiyaasaa xaafa.
Ne heeran deꞌiya Yihoowa Markkatuura gaytta.

a Darotoo Geeshsha Maxaafaa issi ura xallaa woy amarida asata issippe xannaꞌissoos.

b Yihoowa Markkati attamissidoogaa. Ha maxaafay 260ppe dariya qaalan, 230 miilooneppe daroy attamettiis.

SO ASAA MAADDIYAABAA

“Ta machiyaa Geeshsha Maxaafaa xannaꞌiyoogaa doommido wode, a daroban laamettidoogaa akeekaas. Nu son kaseegaappe giiga deꞌo deꞌoos. A tamaariyoobaa eranawu keehi koyido gishshawu, taanikka xannaꞌiyoogaa doommaas. Tamaaridobay loꞌꞌo asa gidanaadan tana maaddiis. Geeshsha Maxaafaa xannaꞌidoogee nuuni son maayettanaadan oottiis.”—Ezikiyela.

“Taani Geeshsha Maxaafaa xannaꞌiyoogaa doomma simmada jallissiyaabaa goꞌettiyoogaanne ushshaa likkiyaappe aattada uyiyoogaa agga bayaas, qassi ta hanqquwaa teqqiyoogaa tamaaraas. Ta keettay kaseegaappe geeyiisinne mankkatiis. Ta so asaa kaseegaappe aaruwan nashshays; qassi eta ufayssiyaabaa oottiyoogaa dosays. Kaseegaappe keehi ufayttays.”—Kareno.

“Taani Geeshsha Maxaafaa xannaꞌiyo gishshawu, amarida asay tana borees. SHin ta azinay, ‘Asay ay ginkka hegee tana qofissenna. Taassi keehi koshshiyaabay neeni kaseegaappe loꞌꞌiyoogaa beꞌiyoogaa. Xannaꞌiyoogaa aggoppa’ yaagidi, tana minttettiis. Nuuni haꞌꞌiigaa mala loꞌꞌo deꞌo deꞌi erokko!”—Viniyano.