Ubba Galla Yihoowaara Ootta

1. Nuuni ayba ogetun Yihoowaara issippe oottana danddayiyoo?

WOTTIYOOBI BAYNNA asay A halchchuwaa polanawu aara issippe oottanaagaa Medhdhidaagee kasetidi qoppiis. Asay ha wodiyan nagaranchcha gidikkonne, ammanettida asay galla galla Yihoowaara oottana danddayees. Leemisuwawu, Xoossaa Kawotettaa mishiraachchuwaa sabbakiyoogaaninne erissiyo ashkkara oottiyoogan nuuni ‘aara issippe oottoos.’ (1 Qor. 3:5-9) Saluwaanne saꞌaa medhdhida ubbabaa danddayiyaagee xoqqu ootti xeelliyo oosuwaa aara hashetidi oottana danddayiyoogee ay keena gita maatakko qoppa! SHin, nuuni Yihoowaara issippe oottiyo ogee sabbakiyoogaanne erissiyo ashkkara oottiyoogaa xalla gidenna. Ha huuphe yohuwan nuuni hegaadan oottana danddayiyo hara ogeta pilggana—nu soo asaanne nu mala Kiristtaaneta maaddiyoogaa, imattaa mokkiyoogaa, dirijjitee ootissiyo oosuwaa nu dosan oottiyoogaanne nu haggaazuwaa aassiyoogaa.—Qol. 3:23.

2. Nuuni Yihoowassi oottiyoobaa haratuugaara mule geeddarssana koshshennay aybissee?

² Nuuni ha huuphe yohuwaa xannaꞌiyo wode, neeni Yihoowawu oottana danddayiyoobaa haratuugaara geeddarssoppa. Issi ura layttay, payyatettay, hanotaynne abbee haraagaappe dummatiyoogaa hassaya. Kiitettida PHawuloosi ayyaanay denttettin hagaadan giis: “Asai ubbai huuphiyan huuphiyan ba oosuwaa paacco; hegaappe guyyiyan, hara asaagaara giigissennan, ba huuphe ooso xalaalan ceeqettiyoobaa demmana.”—Gal. 6:4.

INTTE SOO ASAANNE NE MALA KIRISTTAANETA MAADDA

3. Bantta soo asaa maaddiya ubbay Xoossaara hashetees gaana danddayiyoy aybissee?

³ Yihooway nuuni nu soo asaa maaddanaadan koyees. Leemisuwawu, neeni siiqiyoogeeta miishshan maaddanawu oottana koshshennan aggenna. Daro aayeti bantta guutta naata xeellanawu son takkoosona. Issi issi gastta naati sahettiya bantta aawaa woy aayyiyo maaddana koshshennan aggenna. Hegeeti oottana bessiya ooso. Xoossaa Qaalay hagaadan gees: “Baageetuyyo qassi ubbaappe aattidi, ba so asaayyo qoppenna urai oonanne gidikko, he aawi ba ammanuwaa kaddidaagaa. Ammanenna asaappekka aadhdhida iitaa.” (1 Xim. 5:8) Neessi so asaara gayttidaagan aawatettay deꞌikko, neeni Yihoowawu oottanawu koyiyoogaa keenaa oottana danddayennabadan neessi siyettana danddayees. SHin minna! Neeni ne soo asawu koshshiyaabaa kunttiyo wode Yihooway ufayttees.—1 Qor. 10:31.

4. Yelidaageeti Kawotettaabaa banttabaappe waati sinttayana danddayiyoonaa, qassi hegee ayba ayfe demissii?

⁴ Kiristtaane aawatinne aayeti bantta naati Yihoowawu haggaazanawu halchchanaadan maaddiyoogan aara issippe oottana danddayoosona. Hegaadan oottida daroti bantta attuma naatinne macca naati bantta sooppe haahosan kumetta wodiyaa haggaazuwaa doommiyoogaa guyyeppe beꞌidosona. Issoti issoti misoonaawe gididosona; harati aassiyaageeti keehi koshshiyoosan aqinye gididi oottoosona; harati qassi Beeteelen oottoosona. Haahuwan deꞌiyoogee eti bantta soo asaara koyiyoogaa keenaa gayttennaadan oottana danddayees. Gidoppe attin, bantta goꞌꞌaa aggi bayiya aawatinne aayoti bantta naati he oosuwaa genccidi oottanaadan minttettoosona. Aybissi? Eti bantta naati Xoossaa Kawotettaabaa sinttayiyoogaa eriyoogee eta keehi ufayssees. (3 Yoh. 4) He aawatuppenne aayotuppe darotussi ba naꞌaa Sameela Yihoowayyo ‘immida’ Hanniigaadan siyettennan waayi aggana. Hegaadan hashetiyoogaa he yelidaageeti gita maatadan xeelliyoogee bessiyaaba. Eti hegaappe dummabaa koyokkona.—1 Sam. 1:28.

5. Ne gubaaꞌiyaa yameta koshshiyaaban neeni waata maaddana danddayay? (Doomettan deꞌiya misiliyaa xeella.)

⁵ Neessi so asaara gayttidaagan aawatettay darana xayikko, sahettida ura harggissiya, sahettida, cimida woy haraban metootida ne mala Kiristtaaniyaa maaddana danddayay? Gubaaꞌiyan deꞌiya, maadoy koshshiyoogeeta akeekidi maaddiyoogee loꞌꞌo. Cimida ba aawaa woy ba aayyiyo heemmiya Kiristtaane michchiyaa harabaa oottiyo wode geella neeni I aawaara woy aayeera wodiyaa aattana danddayaasa. Woy qassi eta shiiquwaa efiiyoogan, issi issibaa shammiyoogan, kiitettiyoogan woy sahettidi hosppitaaliyan deꞌiya ura oychchiyoogan neeni maadoy koshshiyoogeeta maaddana danddayaasa. Yaatiyoogan, eta woosawu zaaro gidiyaaban Yihoowaara issippe oottana danddayaasa.—1 Qoronttoosa 10:24 nabbaba.

IMATTAA MOKKA

6. Nuuni waati imattaa mokkana danddayiyoo?

⁶ Xoossaara issippe oottiyaageeti imattaa mokkiyoogan erettoosona. Giriiketto Geeshsha Maxaafan, “imattaa mokkiyoogaa” geetetti birshshettidaagee “imattawu kehiyoogaa” giyoogaa. (Ibr. 13:2) Nuuni hegaadan siiqanaadan tamaarissiya hanotata Xoossaa Qaalay yootees. (Doo. 18:1-5) Eti ‘nunaara ammanuwan deꞌiyaageeta’ gidin aggin, nuuni harata ubbatoo maaddana danddayiyo hanotaa koyana danddayoos; qassi yaatana koshshees.—Gal. 6:10.

7. Aqiyo sohoy koshshiyo, kumetta wodiyaa haggaaziyaageeta mokkanawu neeni qoppana koshshiyoy aybissee?

⁷ Aqiyo sohoy koshshiyo, kumetta wodiyaa haggaaziyaageeta mokkiyoogan Yihoowaara issippe oottana danddayay? (3 Yohaannisa 5, 8 nabbaba.) Hegaa mala hanotay darotoo nuuni ‘issoy issuwaa minttettanaadan’ oottees. (Roo. 1:11, 12) Olafa hanotaa qoppa. I woradaa xomoosiya, aqo oyqqibeenna ishaa daro layttaappe kase bantta gubaaꞌiyan ooninne ba son ayssanawu koyibeennaagaa hassayees. Woradaa xomoosiya ishay bantta son takkana danddayiyaakkonne Yihoowa Markka gidenna ba aawaanne aayyiyo yelaga Olafi oychchiis. Eti eeno giidosona; shin Olafi soofan zinꞌꞌana koshshiyoogaa yootidosona. Olafi hegaadan oottiis, qassi I yaatidoogan zilꞌꞌettibeenna. Olafi hagaadan giis: “He saaminttay keehi ufayssiyaagaa! Woradaa xomoosiyaageenne taani ubba galla xiskkuwaappe guuran denddidi qanꞌꞌiyaa qanꞌꞌiiddi ufayssiya darobaa haasayida. I minttettidoogee kumetta wodiyaa haggaazuwaa doommanawu koyanaadan tana denttettiis.” Aadhdhida 40 layttawu, Olafi misoonaawe gididi dumma dummasan haggaaziis.

8. Asay koyro nashshennaba milatikkonne, nuuni kehatettaa bessanaadan oottiyaabay aybee? Leemisuwaa yoota.

⁸ Neeni oottiyoobaa koyro heeran ooninne nashshana xayikkonne, imattata siiqiyoogaa daro ogiyan bessana danddayaasa. Ha hanotaa qoppa. Isppeene biittan aassiya issi michchiyaa Ekuwadoreppe yiida Yesiko Geeshsha Maxaafaa xannaꞌissaydda, A yeekkiyoogaa beꞌaasu. Aassiyaara A aybissi yeekkiyaakko oychchaasu. Yesika he biitti baanaappe kase keehi hiyyeesa gidiyo gishshawu issi galla baassi miyoobi aybinne baynnaagaa yootaasu. A ba naꞌeessi immidobay haatta xalla. Yesika Xoossay maaddanaadan woossaydda ba naꞌiyo xiskkissanawu malaasu. Hegaappe simmin takkennan, naaꞌꞌu Yihoowa Markkati I soo biidosona, shin Yesika eta bolli ufayssennabaa haasayaasunne michchontti immido maxeetiyaa daakkaasu. A “Ta naꞌeeyyo taani immanaadan intte koyiyo qumay hagee?” gaada eta oychchaasu. Michchontti O minttettanawu malikkonne, A siyennan ixxaasu. Guyyeppe, eti zambbiliyan qumaa ehiidi I penggen wottidosona. Yesika ba woosaa Xoossay zaarin xaasayada xeellidoogaa akeekido gishshawu, xannaꞌiyo wode yeekkaasu. SHin haꞌꞌi A Yihoowayyo haggaazanawu murttaasu. Eti kehatettan immidoogee loꞌꞌo ayfiyaa demissiis.—Era. 11:1, 6.

DIRIJJITEE OOTISSIYO OOSUWAA NE DOSAN OOTTA

9, 10. (a) Beni Xoossaa asaa giddon bantta dosan oottiyaageeti koshshido issi issi wodeti awugeetee? (b) Ha wodiyan gubaaꞌiyan attumaageeti bantta dosan oottana koshshiyo issi issi oosoy aybee?

⁹ Beni Israaꞌeela biittaa taarikiyan bantta dosan oottiyaageeti dumma dumma wodiyan koshshidosona. (Kes. 36:2; 1 Odi. 29:5; Nah. 11:2) Ha wodiyan, neeyyo deꞌiya wodiyan, aquwaaninne eran neenikka ne dosan ne ishanttanne michchontta maaddana danddayiyo daro hanotati deꞌoosona. Neeni yaatiyo wode, keehi ufayttananne daro anjjuwaa demmana.

¹⁰ Attumaageeti gubaaꞌiyawu oottanawunne cima gidanawu baaxetiyoogan Yihoowaara issippe oottanaadan Xoossaa Qaalay minttettees. (1 Xim. 3:1, 8, 9; 1 PHe. 5:2, 3) Hegaadan oottiyaageeti ayyaanaabankka harabankka harata maaddanawu koyoosona. (Oos. 6:1-4) Neeni gubaaꞌiyan mokkanawu woy xuufiyaara, haggaazo moottaara, loyttiyoobaaranne hegaa mala harabaara gayttidabaa oottanawu koyiyaakkonne cimati nena oychchidonaa? Hegaa malabaa oottiyaageeti harata maaddiyoogee keehi ufayssiyoogaa neeyyo yootana.

11. Keexxiyo oosuwaa oottiyo wode demmido laggetettan issi michchiyaa waana goꞌettadee?

¹¹ Bantta dosan keexxiyaageeti darotoo ooratta laggeta demmoosona. SHiiquwaa Addaraashaa keexxiyo oosuwan 18 layttawu oottida michchee Marji hanotaa qoppa. Daro layttan, A amarida yelaga michchontta loohissaasu. He hanotay issoy issuwaa ayyaanaaban minttettiyo loꞌꞌo oge gidiyoogaa A akeekaasu. (Roo. 1:12) Marjo I deꞌuwan paacciyaabay gakkido wodiyan, keexxiyo oosuwan demmido laggeti O minttettidosona. Hegaa mala keexxiyo oosuwan ne dosan ootta eray? Neeni issi hiillaa erin aggin, ne dosan oottana danddayaasa.

12. Daafabay gakkin qohettidaageeta waata maaddana danddayay?

¹² Daafabay gakkiyo wode, Xoossaa asay bantta ishantta koshshiyaaban maaddiyoogan Xoossaara oottana danddayoosona. Leemisuwawu, eti qohettidaageeta miishshan maaddoosona. (Yoh. 13:34, 35; Oos. 11:27-30) Hara ogee qassi geeshshiyoogan woy zaarettidi keexxiyoogan maaddiyoogaa. Diꞌoy I keettaa laalido, Poolandde biittaa michchiyaa Gabriꞌela mata gubaaꞌiyaappe ishantti yiidi maaddido wode ufayttaasu. A hagaadan gaasu: “Taani taayyo xayidabaa haasayanawu koyikke; hegee aquwaaba. SHin taani demmido darobaa yootana koyays. He hanotay Kiristtaane gubaaꞌiyaa yara gidiyoogee dumma maatanne keehi ufayssiyaaba gidiyoogaa taani ammanettanaadan oottiis.” Daafabay gakki simmin maaduwaa demmida darotussi hegaadan siyettees. Hegaadan maaddiyoogan Yihoowaara issippe oottiyaageetikka keehi ufayttoosona.—Oosuwaa 20:35; 2 Qoronttoosa 9:6, 7 nabbaba.

13. Nuuni nu dosan oottiyoogee Yihoowaara dabbotido dabbotaa waati minttana danddayii? Leemisuwaa yoota.

¹³ Istefananne aassiya harati Amarkkaa betida Yihoowa Markkata maaddiyoogan Xoossaara issippe oottidi ufayttidosona. Eti olan qohettida heeraappe yiida so asay keettaanne son koshshiya miishshaa demmanaadan maaddidosona. Istefana hagaadan gaasu: “Eti kumetta saꞌan deꞌiya ishantti siiqiyoogaa beꞌidi ufayttiyoogeenne nashshiyoogee nuna minttettiis. He so asati nuuni eta maaddidabadan qoppoosona, shin nuna keehi maaddiday eta.” A gujjada hagaadan gaasu: “Siiquwaa, issippetettaa, ammanuwaanne Yihoowan ammanettiyoogaa nuuni beꞌidoogee, nuuni Yihoowa kaseegaappe aaruwan siiqanaadaaninne A dirijjitiyaa baggaara demmiyo ubbabaa wozanappe nashshanaadan oottiis.”

NE HAGGAAZUWAA AASSA

14, 15. (a) Hananabaa yootiya Isiyaasawu deꞌiya xeelay ay malee? (b) Kawotettaabaa sabbakiyaageeti Isiyaasa leemisuwaa ha wodiyan waati kaallana danddayiyoonaa?

¹⁴ Neeni Yihoowaara kaseegaappe loytta oottanawu koyay? A dirijjitiyan aassiyaageeti keehi koshshiyoosaa baada haggaazanawu eeno guutee? Xoossaa asay kehatettan immanawu bantta sooppe haakkidi baana koshshennaagee qoncce. SHin, amarida ishanttinne michchontti harasaa baana danddayoosona. Eta xeelay hananabaa yootiya Isiyaasaagaa mala. Yihooway, “Oona kiittoo? Nuuyyo oonee baanai?” giidi oychchin, I, “Hekko, tana kiitta” yaagiis. (Isi. 6:8) Neeni Yihoowa dirijjitiyaa maaddana danddayay, qassi koyay? Neeni maaddana danddayiyo amarida ogeti aybee?

¹⁵ Sabbakiyoonne erissiyo ashkkara oottiyo oosuwaa xeelliyaagan Yesuusi hagaadan giis: “Kattai daro; shin cakkiya asai guutta. Simmi kattaa Godai kattaa cakkanau oosanchcha yeddana mala, a woossite.” (Maa. 9:37, 38) Neeni aassiyaageeti keehi koshshiyoosan geella aqinye gidada haggaazana danddayay? Woy qassi hara uri hegaadan oottanaadan maaddana danddayay? Daro ishanttinne michchontti kattaa cakkiyaageeti keehi koshshiyo heeran woy moottan aqinye gididi oottiyoogee Xoossaanne nu shooruwaa siiqiyoogaa bessiyo aybippenne aadhdhiya oge giidi qoppoosona. Ne haggaazuwaa aassiyo hara ogeta qoppana danddayay? Yaatiyoogee daro ufayssaa demissees.

16, 17. Neeni Yihoowawu haggaaziyoogaa aassana danddayiyo amarida hara ogeti awugeetee?

¹⁶ Guutta wodiyawu woy qassi ne sooppe simerettada Beeteelen woy keexxiyoosan maaddanawu eeno guutee? Awaaninne qassi ayba oosonne Yihoowayyo oottana danddayiyaageeti ubbatoo koshshoosona. Yaatanawu, etawu hara ooso eray deꞌikkonne, eti koshshiya hara ooso oottana bessennan waayi aggana. Gidoppe attin, bantta goꞌꞌaa aggi bayidi oosoy koshshiyo awaaninne haggaaziyaageeta Yihooway nashshees.—Maz. 110:3.

¹⁷ Geeshsha oosuwaa loytta oottanawu gujjada loohanawu keehi koyay? Yaatikko, Kawotettaa Mishiraachuwaa Yootiyaageeti Tamaariyo Timirtte Keettan tamaarana danddayaasa. He timirtte keettay Yihoowawu kumetta wodiyaa haggaaziya kayma ishanttinne michchontti A dirijjitiyan loytti oottana mala loohissees. He timirtte keettan tamaaranawu koyiyaageeti anjjetti simmidi imettiya aybanne oottanawu eeno gaana koshshees. Yihoowawu hegaadan kaseegaappe loytta oottanawu koyay?—1 Qor. 9:23.

18. Ubba galla Yihoowaara oottiyoogaa goꞌꞌay aybee?

¹⁸ Nuuni Yihoowa asa gidiyo gishshawu, kehoos, qarettoos, siiqoosinne loꞌꞌo gidiyoogaa bessoos; qassi nuuni haratussi ubba galla qoppoos. Nuuni yaatiyo wode, gita ufayssaanne sarotettaa demmoos. (Gal. 5:22, 23) Ne hanotay ayba gidikkokka Yihoowadan kehatettan immiyoogaaninne aara issippe oottiya ura gidiyoogan ufayttana danddayaasa!—Lee. 3:9, 10.