Tumaa Tamaarissiyoogaa

1, 2. (a) Yesuusi ba deꞌuwan sinttayido oosoy aybee, qassi aybissi? (b) Nuuni ‘Xoossaara issippe oottiyaageeta’ gididi loytti oottanawu waatana bessii?

YESUUS KIRISTTOOSI anaaxe, qassi tamaarissiyaagaa. (Mar. 6:3; Yoh. 13:13) He naaꞌꞌubankka I gooba oosanchcha. I anaaxe gidiyoogaadan, xawulaappe goꞌꞌiya miishshaa medhdhanawu maaddiya miishshata waati goꞌettanaakko tamaariis. Qassi I mishiraachchuwaa tamaarissiyaagaa gidiyo gishshawu, asay Xoossaa Qaalaa tumaa akeekanaadan maaddanawu Geeshsha Maxaafaa eraa loytti goꞌettiis. (Maa. 7:28; Luq. 24:32, 45) Yesuusi bawu layttay 30 gidiyo wode, tamaarissiyoogee he oosuwaappe aadhdhiyoogaa eriyo gishshawu, anaaxe miishshata aggi bayiis. Xoossay A ha saꞌaa kiittido issi gaasoy Xoossaa Kawotettaa mishiraachchuwaa yootanaassa gidiyoogaa I yootiis. (Maa. 20:28; Luq. 3:23; 4:43) Yesuusi tamaarissiyoogaa ba deꞌuwan sinttayiis, qassi I banaara harati he oosuwaa oottanaadan koyiis.—Maa. 9:35-38.

² Nuuni anaaxe waayi gidana; shin nuuni mishiraachchuwaa tamaarissiyaageeta. He oosuwaa Xoossaykka oottiyo gishshawu hegee keehi koshshiyaaba; nuuni ubba ‘Xoossaara issippe oottiyaageeta’ geetettoos. (1 Qor. 3:9; 2 Qor. 6:4) Nuuni ‘Yihoowa qaalay tuma’ gidiyoogaa eroos. (Maz. 119:159, 160) Nuuni haggaazuwan “tumatettaa qaalaa suuretettan” yootanawu koyiyoy hegaassa. (2 Ximootiyoosa 2:15 nabbaba.) Yaatanawu, nuuni Yihoowabaa, Yesuusabaanne Kawotettaabaa tumaa tamaarissanawu goꞌettiyo waanna miishshaa, Geeshshaa Maxaafaa goꞌettiyoogan qara gidanawu ubbatoo baaxetoos. Nuuni loytti haggaazana mala maaddanawu, Yihoowa dirijjitee nuuni loytti erana bessiya hara miishshata dummayiis. Nuuni hegeeta Tamaarissanawu Goꞌettiyo Waanna Miishshata goos.

3. Sabbakanawu attida wodiyan nuuni halchchana koshshiya waannabay aybee, qassi Oosuwaa 13:48y yootiyoogaadan, nuuni koyana bessiyoogeeti oonee?

³ Hegee Sabbakanawu gidennan, Tamaarissanawu Goꞌettiyo Waanna Miishshata aybissi geetettiyaakko qoppana danddayoos. “Sabbakiyoogaa” giyoogee issi qofaa yootiyoogaa giyoogaa; shin “tamaarissiyoogaa” giyoogee issi uri tamaaridobaa oosuwan peeshshana mala issi qofay A wozanan xokkanaadan oottiyoogaa giyoogaa. Nuuni markkattanawu attida wodiyan, nu waanna halchchoy Geeshsha Maxaafaa xinaatiyaa doomissiyoogaanne asaa tumaa tamaarissiyoogaa gidana bessees. Hegaa giyoogee “merinaa deꞌuwaassi suure wozanaa koshshay deꞌiyoogeeta” wozanappe koyiyoogaanne eti ammaniyaageeta gidanaadan maaddiyoogaa giyoogaa.—Oosuwaa 13:44-48 nabbaba.a

4. “Merinaa deꞌuwaassi suure wozanaa koshshay deꞌiyoogeeti” oonakko nuuni waati erana danddayiyoo, qassi eta waati demmana danddayiyoo?

⁴ “Merinaa deꞌuwaassi suure wozanaa koshshay deꞌiyoogeeti” oonakko waati erana danddayiyoo? Koyro xeetu layttaagaadan, he asata demmana danddayiyoy markkattiyoogaa xallaana. Hegaa gishshawu, “Intte geliyo kataman woi qeeri kataman ubban inttena mokkanau ufaittiyai oonakkonne akeekan xomoosite” yaagidi Yesuusi azazidoogaadan nuuni oottana koshshees. (Maa. 10:11) Cimmiya, otorettiya, woy ayyaanaabaa koyenna asay mishiraachchuwaa siyana giidi nuuni naagokko. Nuuni tumanchcha, banttana ziqqi oottiyaanne ayyaanaabaa saamettida asata koyoos. Yesuusi anaaxe gididi geella son goꞌettiyoobaa, penggiyaa, qambbaraa, woy harabaa oottanawu haniya mittaa koyidoogan hegaa leemisana danddayoos. I haniya mittaa demmikko, oosuwawu goꞌettiyo miishshaa oyqqidi, ba hiillaa goꞌettananne miishshaa medhdhana danddayees. Wozanaa suure asata erissiyo ashkkara oottanawu baaxetiyo wode, nuunikka hegaa malabaa oottana bessees.—Maa. 28:19, 20.

5. Tamaarissanawu Goꞌettiyo Waanna Miishshatubaa nuuni ay erana koshshii? Leemisuwaa yoota. (Doomettan deꞌiya misileta xeella.)

⁵ Oosuwawu goꞌettiyo hara miishshatuugaadan, miishsha ubbawu A oosoy oosoy deꞌees. Leemisuwawu, Yesuusi goꞌettido anaaxe miishshata qoppa.b Xawulaa likkidi malaataa wottanawu, qanxxanawu, lukkanawu, mittaa massanawu, laaganawu, sitti oottanawunne gatti oyttanawu ayyo miishshati koshshoosona. Hegaadan, nuuni Tamaarissanawu Goꞌettiyo Waanna Miishshatu ubbawu eta oosoy oosoy deꞌees. Yaatiyo gishshawu, he miishshata ane guuttaa beꞌoos; qassi nuussi imettida ha keehi koshshiya miishshata waati goꞌettanaakko akeekoos.

NUUNI OONAKKO ERISSIYA MIISHSHATA

6, 7. (a) Xomoosanawu maaddiya karddiyaa neeni waata goꞌettadii? (b) Gubaaꞌiyaa shiiquwaa shoobe woraqatay goꞌꞌiyo naaꞌꞌubay aybee?

⁶ Xomoosanawu maaddiya karddeta. Hageeti guutta gidikkonne asaa nubaa erissanawu nuuni goꞌettana danddayiyo maaddiya miishshata; qassi asay nubaa gujjidi eranaadaaninne Geeshsha Maxaafaa xannaꞌanawu oychchanaadan nu websaytiyaa yootite. Hegaa gishshawu, 400,000⁠ppe dariya asay Intterneetiyan Geeshsha Maxaafaa xannaꞌanawu oychchiis; qassi galla galla xeetan qoodettiya asay oychchees! Neeni ubba galla oosuwawu kiyiyo wode markkattanawu ha karddeta amaridaageeta oyqqana danddayaasa.

⁷ SHoobe Woraqatata. Nuuni gubaaꞌiyaa shiiquwawu shoobbiyo woraqataa giyoogee naaꞌꞌubawu maaddees. I hagaadan gees: “Yihoowa Markkatuura Geeshsha Maxaafaa xannaꞌanaadan shoobboos.” Qassi hegee “nu shiiquwan” ‘woy issi uri tamaarissin’ xannaꞌana danddayiyoogaa yootees. Hegaa gishshawu, ha miishshay nuuni oonakko erissiyoogaa xalla gidennan, “bantta ayyaanan hiyyeesa” gididaageeti woy banttassi ayyaanaabay koshshiyoogaa akeekiyaageeti nunaara Geeshsha Maxaafaa xannaꞌanaadankka shoobbees. (Maa. 5:3) Asay Geeshsha Maxaafaa xannaꞌanawu koyin koyana xayin, eti nu shiiqotun shiiqanaadan shoobboos. Eti nu shiiquwaa yiyo wode Geeshsha Maxaafaabaa ay keena erana danddayiyaakko beꞌana.

8. Asay nu shiiqotuppe issuwaakkonne yiyoogee keehi koshshiyaaba gidiyoy aybissee? Leemisuwaa yoota.

⁸ Issitookkonne gidin asay nu shiiquwaa yaanaadan aggennan asaa shoobbiyoogee keehi koshshiyaaba. Aybissi? Eti ayyaanaaban keehi azzanttiya hanotan deꞌiya Gita Baabiloonippe ayyaanaabay kumi palahido nu shiiqoti keehi dummatiyoogaa beꞌana. (Isi. 65:13) Amarkkaa biittan deꞌiya Reynne Linda giyo issi azinaynne machchiyaa amarida layttaappe kase hegaa akeekidosona. Eti woosa keetti baana koshshiyoogaa kuuyidosona. Eti Xoossaa ammaniyoonne ayyaanaabaa koyiyo gishshawu, bantta kataman deꞌiya woosa keetta ubbaa biidosona. Yan daro woosa keettatinne daro haymaanooteti deꞌoosona. He azinaynne machchiyaa koyroppekka doommidi eti yame gidana woosa keettan deꞌana bessiya naaꞌꞌu hanotaa kuuyidosona. Koyruwan, haymaanoote shiiquwan eti issibaa tamaarana koshshees, qassi naaꞌꞌanttuwan, he woosa keettaa yameti eti Xoossaa asa gidiyoogaa bessiyaabaa oottana bessees. Amarida layttappe guyyiyan, eti he kataman deꞌiya ubba woosa keettaa biidosona; shin keehi azzanidosona. Eti aybanne tamaaribookkona; qassi woosa keettaa biyaageeti bonchchissenna maayuwaa maayoosona. Eti baanawu qoppido wurssetta woosa keettaappe kiyi simmin, Linda ba oosuwawu baasu, Rey qassi soo biis. I biiddi, kaamiyaa laaggidi SHiiquwaa Addaraashaa mataara kanttiiddi, ‘Ane gelada hegan eti ay oottiyaakko beꞌays’ giidi qoppiis. I beꞌido ubbabaappe hegee aadhdhees! SHiiquwaa Addaraashan deꞌiya ubbay kehanne pashkka, qassi eti giiga maayuwaa maayidosona. Rey sintta baggan deꞌiyaasan uttidi I tamaaridobaa dosiis! Kiristtaanetu shiiquwaa koyro yiido gallassi, “Xoossai tumu intte giddon de7ees” yaagiya asabaa kiitettida PHawuloosi yootidoogaara hegee issi mala. (1 Qor. 14:23-25) Hegaappe simmin, Rey Woggaa galla ubbatoo shiiquwaa bees; qassi saaminttawu gidduwan shiiqiyo shiiquwaa ubbaa bees. Lindakka shiiquwaa biyoogaa doommaasu, qassi etassi layttay 70⁠ppe darikkonne, Geeshsha Maxaafaa xannaꞌidi xammaqettidosona.

HAASAYAA DOOMMANAWU MAADDIYA MIISHSHATA

9, 10. (a) Traktteti goꞌettanawu metennay aybissee? (b) Xoossaa Kawotettay Aybee? giyo trakttiyaa waati goꞌettanaakko qonccissa.

⁹ Traktteta. Haasayaa doommanawu nuna keehi maaddiya, goꞌettanawu wayssenna hosppun traktteti deꞌoosona. Ha traktteti 2013n kiyoosappe doommidi, ichchashu biiloone gidiyaageeti attamettidosona! Ha traktteti ubbay issi mala ogiyan giigidosona. Yaatiyo gishshawu, neeni etappe issuwaa waata goꞌettanaakko tamaarikko, eta ubbaa goꞌettana danddayaasa. Issi ura haasayissiyoogaa doommanawu issi trakttiyaa waata goꞌettana danddayay?

¹⁰ Xoossaa Kawotettay Aybee? giya trakttiyaa goꞌettanawu qoppana danddayaasa. Koyro sinttan deꞌiya oyshaa bessaydda hagaadan oychcha: “Xoossaa Kawotettay aybeeshsha gaada qoppa eray? Neeni Xoossaa Kawotettay . . . ?” Yaatada heezzu zaarotuppe I awugaa dooriyaakko oychcha. A zaaroy likke woy likke gidenna geennan giddon deꞌiya, “Geeshsha Maxaafay Yootiyoobaa” giyaagaa bessa; qassi hegan deꞌiya xiqiseta, Daaneela 2:44⁠nne Isiyaasa 9:6 nabbaba. Danddayettikko, gujjada tobba. Wurssettan, zokko baggan deꞌiya, “Qoppana Koshshiyaabaa”: “Xoossaa Kawotettay haariyo wode asay ay mala deꞌo deꞌanee?” giya, zaaretti oychchiyo wode denttana oyshaa bessa. Izaawuura haranttuwaa tobbanawu hegee maaddees. Haroode gayttiyo wode, Geeshsha Maxaafaa xinaatiyaa doomissanawu maaddiya miishshatuppe issuwaa gidida, Xoossaappe Yiya Mishiraachuwaa! giyo brooshuriyaa timirtte 7 goꞌettana danddayaasa.

GEESHSHA MAXAAFAA AMMANANAADAN MAADDIYA MIISHSHATA

11. Nu maxeeteti giigiyoy aybissee, shin etabaa nuuni ay erana koshshii?

¹¹ Maxeeteta. Wochiyo Keelaynne Beegottite! maxeeteti alamiyan hara ay maxeeteppenne aaruwan attamettoosonanne birshshettoosona. Ha maxeeteta daro biittatun asay nabbabiyo gishshawu, etawu sintta baggan kiyiya qofay ubbasan deꞌiya asay ufayttiyooba gididi giigees. Ha wodiyan asay ba deꞌuwan keehi koshshiyaabaa loytti qoppanaadan maaddanawu nuuni ha maxeeteta goꞌettana koshshees. SHin, ha maxeeteta asawu immanawu eti ubbay giigidoy oossakko nuuni erana koshshees.

12. (a) Beegottite! maxeetee giigiyoy oossee, qassi I giigiyo halchchoy aybee? (b) Mata wode ha maxeetiyan neeni demmido ayfee aybee?

¹² Beegottite! maxeetee Geeshsha Maxaafaa eray guutta gidido woy mule baynna asata maaddanawu giigees. Eti Kiristtaane haymaanootiyaa timirttiyaa waayi erana, haymaanootiyaabaa guuttaa sirennan aggokkona, woy qassi Geeshsha Maxaafay maaddiyoogaa waayi akeekana. Beegottite! maxeetee giigiyo waanna halchchoy nabbabiyaageeti Xoossay deꞌiyoogaa ammananaadaana. (Roo. 1:20; Ibr. 11:6) Qassi hegaa nabbabiya uri Geeshsha Maxaafay ‘tumukka Xoossaa qaala’ gidiyoogaa ammanaadan maaddanawu giigees. (1 Tas. 2:13) Sintta baggan 2018n kiyiya heezzu qofati hageeta: “Ufayssaa Demmiyo Ogiyaa,” “So Asaa Ufayssawu Maaddiya 12 Zoriyaa,” qassi “Kayyottiyaageeta Maaddiyaabaa”.

13. (a) Asawu immiyo Wochiyo Keelaa maxeetee giigiyoy oossee? (b) Mata wode ha maxeetiyan neeni demmido ayfee aybee?

¹³ Wochiyo Keelay, asawu immiyoogee, Xoossaanne A Qaalaa guuttaa bonchchiya asati ayyaanaabaa loytti qoppanaadan giigees. Eti Geeshsha Maxaafaabaa guuttabaa erana danddayikkonne, Geeshsha Maxaafaa timirttiyaa suure akeekokkona. (Roo. 10:2; 1 Xim. 2:3, 4) Sintta baggan kiyiya qofati 2018n ha heezzu oyshata zaaroosona: “Geeshsha Maxaafay Ha Wodiyan Maaddii?,” “Sinttappe Aybi Hananee?,” qassi “Xoossay Neessi Qoppii?”

DENTTETTIYA MIISHSHATA

14. (a) Tamaarissanawu Goꞌettiyo Waanna Miishshatun deꞌiya oyddu biidotu goꞌꞌay aybee? (b) Mata wode ha biidota bessada neeni demmido ayfee aybee?

¹⁴ Biidota. Yesuusa wode, issi anaaxee kushe miishsha xallaa goꞌettees. SHin, ha wodiyan mittaappe miishshata medhdhiyaageetussi mittaa qanxxanawu, lukkanawu, laaganawu, misimaariyaa gelissanawunne hegaa mala harabaa oottanawu goꞌettiyo, korinttiyan oottiya miishshati deꞌoosona. Attamettida xuufeti deꞌiyoogaa bolli, asaa bessiyo keehi loꞌꞌo biidotikka deꞌoosona; hegeetuppe oyddati hageeta: Geeshsha Maxaafaa Xannaꞌana Koshshiyoy Aybissee?, Geeshsha Maxaafaa Waati Xannaꞌiyoo?, Kawotettaa Addaraashan Oosettiyaabay Aybee?, qassi Yihoowa Markkati Oonakko Eray? Koyro haasayissiyo wode, naaꞌꞌu daqiiqa kumennan wuriya biidoti keehi maaddoosona. Zaarettidi oychchiyo wode, qassi guuttaa takkana danddayiyaageetussi daro daqiiqan wuriya biidota goꞌettana danddayoos. Ha keehi loꞌꞌo miishshati asay Geeshsha Maxaafaa xannaꞌanaadaaninne shiiquwaa shiiqanaadan denttettana danddayoosona.

15. Asay ba qaalan giigida nu biidotuppe issuwaakkonne beꞌiyoogee waati maaddana danddayiyaakko leemisuwaa yoota.

¹⁵ Leemisuwawu, issi michchiyaa Yapize qaalan haasayaa koyro doommida Maykronezhiyaappe yiida issi maccaaseera gayttada, Geeshsha Maxaafaa Xannaꞌana Koshshiyoy Aybissee? giyo biiduwaa I qaalan O bessaasu. Biidoy doommiyo wode maccaasiyaa hagaadan gaasu: “Hagee ta qaalaa. Hagee maalaaliyaaba! A haasayaappe I nu haruuruwaa asa gidiyoogee qoncce. I ta haasayiyo qaalaa haasayees!” Hegaappe simmin, A jw.org saytiyan ba qaalan deꞌiya ubbabaa nabbabanaagaanne beꞌanaagaa yootaasu. (Oosuwaa 2:8, 11⁠ra gatta xeella.) Hara hanotaa qoppa. Amarkkaa biittan deꞌiya issi michchiyaa hara biittan deꞌiya ba ishaa naꞌaassi A qaalan giigida he biiduwaa linkkiyaa yeddaasu. I hegaa beꞌidi iyyo hagaadan giidi imeeliyaa kiittiis: “Iita wolqqay ha alamiyaa haariyoogaa yootiya qofay tana keehi garamissiis. Geeshsha Maxaafaa xannaꞌanawu qitsiyaa kunttaas.” I nu oosoy digettido biittan deꞌees!

TUMAA TAMAARISSIYO MIISHSHATA

16. Ha brooshureti ubbay ayba halchchuwan giigidaakko qonccissa: (a) Xoossay Yootiyoobaa Siya Yaatada Merinau Deꞌa. (b) Xoossaappe Yiya Mishiraachuwaa! (c) Ha Wodiyan Yihoowa SHeniyaa Poliyaageeti Oonee?

¹⁶ Brooshureta. Loytti nabbabenna ura woy A qaalan xuufee baynna ura tumaa waata tamaarissana danddayay? Xoossay Yootiyoobaa Siya Yaatada Merinau Deꞌa giyo brooshuree hegawu haniya miishsha.c Xoossaappe Yiya Mishiraachuwaa! giyo brooshuree xinaatiyaa doomissanawu keehi loꞌꞌo miishsha. Issi urawu he broosheriyawu zokko baggan deꞌiya 14 huuphe yohota bessananne I keehi koyiyoy awugaakko oychchana danddayaasa. Yaatada he timirttiyaa xannaꞌissiyoogaa doomma. Zaarettada oychchiyo wode neeni hegaadan ootta eray? Tamaarissiyo miishshatuppe heezzantto brooshuree Ha Wodiyan Yihoowa SHeniyaa Poliyaageeti Oonee? giyoogaa. Hegee xinaateti nu dirijjitiyaa eranaadan giigiis. Geeshsha Maxaafaa xannaꞌissiyo wode ubban A waata goꞌettanaakko akeekanawu, Laappune 2017, Kiristtaanetu Deꞌuwaanne Haggaazuwaa-Xannaꞌiyo Xuufiyaa xeella.

17. (a) Xannaꞌissiyo maxaafati giigido halchchoy aybee? (b) Xammaqettiyaageeti ubbay ay oottana koshshii, qassi aybissi?

¹⁷ Maxaafata. Issi brooshuriyaa xannaꞌissiyoogaa doomma simmada, Geeshsha Maxaafay Nuna Ay Tamaarissii? giyo maxaafan xannaꞌissiyoogaa awudenne doomissana danddayaasa. Ha maxaafay izaawu Geeshsha Maxaafaabaa loytti eranaadan maaddees. He maxaafaa wurssin xannaꞌiya uri ayyaanaaban diccikko, Xoossaa Siiquwan Deꞌa giyo maxaafaa xannaꞌissa. Xannaꞌiya uri ba deꞌuwan ubba galla Geeshsha Maxaafaa maaraa waati kaallanaakko he maxaafay tamaarissees. Mati xammaqettida uri hegaappe simminkka, ha naaꞌꞌu maxaafata wurssana gakkanaashin xannaꞌana koshshiyoogaa hassaya. Hegee I tuman minni eqqanaadan maaddees.—Qolasiyaasa 2:6, 7 nabbaba.

18. (a) Nuuni tumaa tamaarissiyo wode ay oottanaadan 1 Ximootiyoosa 4:16y minttettii, qassi yaatiyoogee ayba ayfe demissii? (b) Tamaarissanawu Goꞌettiyo Waanna Miishshata goꞌettiyo wode nuuni ay halchchana koshshii?

¹⁸ Nuuni Yihoowa Markkati asawu merinaa deꞌuwaa demissana danddayiya ‘tumu kiitaa wonggeliyaa’ hadaraa ekkida. (Qol. 1:5; 1 Ximootiyoosa 4:16 nabbaba.) Yaatanawu nuna maaddiya Tamaarissanawu Goꞌettiyo Waanna Miishshati nuussi deꞌoosona. (“Tamaarissanawu Goꞌettiyo Waanna Miishshata” giyo saaxiniyaa xeella.) Ha miishshata simi nuuyyo danddayetta keenan loytti goꞌettoos. Eranawu koyiya ura, tamaarissanawu goꞌettiyo waanna miishshatuppe awugaa erissanaakko, qassi awude erissanaakko aassiya ubbay kuuyana danddayees. SHin nu halchchoy xuufiyaa asawu immiyoogaa xalla gidenna; woy qassi nuuni yootiyoobaa eranawu koyenna asawu xuufiyaa immana koshshenna. Nu halchchoy tumanchcha, banttana ziqqi oottiyaanne ayyaanaabaa saamettida, hegeetikka “merinaa deꞌuwaassi suure wozanaa koshshay deꞌiyoogeeta” erissiyo ashkkara oottiyoogaa.—Oos. 13:48; Maa. 28:19, 20.