Ne Wozanaa Waata Mintta Naagana Danddayay?

1-3. (a) Yihooway Solomona siiqidoy aybissee, qassi Solomoni ayba anjjo demmidee? (b) Ha huuphe yohuwan zaaruwaa demmana oyshati awugeetee?

SOLOMONI Israaꞌeela kawo gidiyo wode yelaga. I kawo gidido koyro heeran, Yihooway aymuwan ayyo qonccidi, “Taani neeyyo ai immanau koyai?” yaagiis. Solomoni hagaadan giidi zaariis: ‘Taani guutta naꞌa. Hegaa gishshawu, taani ne asaa ayssanawu taayyo ne ashkkaraayyo akeeka wozanaa imma.’ (1 Kaw. 3:5-10) I azazettiya “wozanaa imma” giidi ashkke gidiyoogaa bessiya oysha oychchiis. Yihooway Solomona ayssi siiqidaakko akeekana danddayoos! (2 Sam. 12:24) Nu Xoossay ha yelaga kawuwan keehi ufayttido gishshawu, I Solomonayyo “aadhdhida eratettaanne akeeka wozanaa” immiis.—1 Kaw. 3:12.

² Solomoni ammanettidi deꞌido wode ubban daro anjjuwaa demmiis. I “GODAA Israa7eela Xoossaa sunttaayyo” beeta maqidasiyaa keexxiyo bonchcho maataa demmiis. (1 Kaw. 8:20) I Xoossay ayyo immido aadhdhida eratettan keehi erettiya asa gidiis. Xoossaa ayyaanay denttettin I yootidobay Geeshsha Maxaafan deꞌiya heezzu maxaafatun xaafettiis. Hegeetuppe issoy Leemiso maxaafaa.

³ Wozanaa giyo qaalay Leemiso maxaafan 50⁠ppe dariya sohuwan odettiis. Leemisuwawu, Leemiso 4:23y, “Ubbabaappekka ne wozanaa minttada naaga” yaagees. Ha xiqisiyan, “wozanaa” geetettida qofay ay qonccissii? Nuuni ha huuphe yohuwan hegaa zaaruwaa beꞌana. Qassi, Seexaanay nu wozanaa mooranawu woy hambbalaashanawu waati baaxetii? Nuuni nu wozanaa mintti naaganawu ay oottana danddayiyoo? giya naaꞌꞌu oyshatu zaaruwaakka nuuni beꞌana. Nuuni Xoossaayyo ammanettidi deꞌanawu ha keehippe koshshiya oyshatu zaaruwaa akeekana bessees.

‘NE WOZANAY’ AYBEE?

4-5. (a) “Wozanaa” geetettida qaalaa nuuni akeekanaadan Mazamure 51:6y waati maaddii? (b) Nu garssa asatettay keehi koshshiyaaba gidiyoogaa nu bollaa payyatettay waatidi bessii?

⁴ Leemiso 4:23n “wozanaa” geetettida qaalay asi beꞌana danddayenna aybanne qonccissiyaaba. (Mazamure 51:6 nabbaba.) Qassi “wozanay” nu qofaa, nuussi siyettiyaabaa, nuna denttettiyaabaanne nu koyiyoobaa qonccissees. Hegee bolla baggaara beettiyaaba gidennan, nu garssa asatettaa bessiyaaba.

⁵ Nu garssa asatettay keehi koshshiyaaba gidiyoogaa nu bollaa payyatettay waatidi bessiyaakko akeeka. Koyruwan, nu bollay payya gididi deꞌanaadan nuuni bollawu maaddiya qumaa maananne ubbatoo bollaa minttiyaabaa oottana bessees. Hegaadankka, ayyaanaaban payya gididi deꞌanawu, ayyaanaaban nuna maaddiya qumaa maananne Yihoowa ammaniyoogaa ubbatoo bessana koshshees. Nuuni tamaaridobaa oosuwan peeshshiyoogaaninne nu ammanuwaabaa haratuyyo yootiyoogan Yihoowa ammaniyoogaa bessoos. (Roo. 10:8-10; Yaaq. 2:26) Naaꞌꞌanttuwan, nu garssa asatettay sahettikkokka bolla baggaara beettiyaaba xallan nuuni payya giidi qoppana danddayoos. Hegaadankka, nuuni ayyaanaabaa oosuwaa ubbatoo oottiyoogaa gaasuwan nu ammanoy mino giidi qoppana danddayoos; shin iita amoy nu giddon diccana danddayees. (1 Qor. 10:12; Yaaq. 1:14, 15) Seexaanay nuuni aagaadan qoppanaadan oottiyoogan nu qofaa moorana koyiyoogaa nuuni hassayana koshshees. I hegaadan waati oottana danddayii? Qassi nuuni nuna waati naagana danddayiyoo?

SEEXAANAY NU WOZANAA MOORANAWU WAATI BAAXETII?

6. Seexaanaa halchchoy aybee, qassi I hegaa polanawu waati baaxetii?

⁶ Yihooway kessido maaraa xaasayidi xeelliyaanne ba xallaa siiqiya makkalanchcha Seexaanay nuuni A mala gidanaadan koyees. Seexaanay nuuni aagaadan qoppanaadaaninne oottanaadan wolqqanttana danddayenna. Yaatiyo gishshawu, I ba halchchuwaa hara ogiyan polanawu baaxetees. Leemisuwawu, I moori uttido asay nu yuushuwan kumanaadan oottees. (1 Yoh. 5:19) Iita laggetettay nuuni qoppiyo ogiyaanne oottiyo ogiyaa ‘mooranaagaa’ eroos; shin nuuni etaara wodiyaa aattanawu doorana giidi I qoppees. (1 Qor. 15:33) He hiillan Kawuwaa Solomoni cimettiis. I eeqawu goynniya daro maccaasata ekkiis; guyyeppe eti ‘A keehi qohidosona,’ qassi ‘A wozanay loddan loddan’ Yihoowappe wora baanaadan oottidosona.—1 Kaw. 11:3, NW; tohossa qofaa.

7. Seexaanay ba qofaa aassanawu goꞌettiyo harabay aybee, qassi nuuni hegaappe naagettana koshshiyoy aybissee?

⁷ Seexaanay ba qofaa aassanawu pilmetanne televizhiiniyaa prograameta goꞌettees. Seexaanay taarikee nuna ufayssiyoogaa xalla gidennan, A qofaa, ayyo siyettiyaabaanne I oottiyoobaa nuuni tamaaranaadan oottiyoogaa erees. Yesuusi tamaarissanawu taarikiyaa loytti goꞌettiis. Leemisuwawu, I Samaare biittaa bitaniyaabaanne sooppe kiyi biidi ba laattido aquwaa xayssida naꞌaabaa yootido taarikiyaa akeeka. (Maa. 13:34; Luq. 10:29-37; 15:11-32) SHin, Seexaanaa qofan eta qofay moorettido asati nu qofaa mooranawu taarikiyaa goꞌettana danddayoosona. Nuuni akeekanchcha gidana koshshees. Pilmetuuninne televizhiiniyaa prograametun nu qofay moorettennan, etan ufayttananne etappe tamaarana danddayoos. Gidikkokka, nuuni naagettana bessees. Nuuni wodiyaa aattiyoobaa dooriyo wode, nuna hagaadan oychchana koshshees: ‘Ha pilmee woy televizhiiniyaa prograamee taani asatettaa amuwaa polikkokka aynne baa gaada qoppanaadan oottii?’ (Gal. 5:19-21; Efi. 2:1-3) Issi prograamee Seexaanaa qofaa aassiyoogaa neeni akeekikko, waatana bessii? Asappe asa oyqqiya harggiyaagaadan neeni hegaappe haakka!

8. Naati bantta wozanaa mintti naaganaadan eta yelidaageeti waati maaddana danddayiyoonaa?

⁸ Yelidaageetoo, intte naatu wozanaa Seexaanay mooranawu baaxetiyo gishshawu, intte naata mintti naagiyo dumma aawatettay intteyyo deꞌees. Intte naata harggiyaappe naaganawu intteyyo danddayettida ubbabaa oottiyoogee qoncce. Intte keettaa ubbatoo geeshsheeta; qassi intte woy intte naati sahettanaadan oottiya aybanne diggeeta. Hegaadankka, Seexaanaa qofan intte naatu qofay moorettanaadan oottana danddayiya pilmetuppe, televizhiiniyaa prograametuppe, elektronike kaassatuppenne Intterneetiyaappe intte naata naagana koshshees. Intte naati Yihoowaara dabbotanaadan maaddiyo aawatettaa Yihooway intteyyo immiis. (Lee. 1:8; Efi. 6:1, 4) Hegaa gishshawu Geeshsha Maxaafay yootiyo maaraara maayiya higgiyaa intte soo asawu kessanawu yayyoppite. Intte naatussi eti beꞌana danddayiyoobaanne danddayennabaa yootite; qassi intte hegaadan kuuyidoy aybissakko eti akeekanaadan maaddite. (Maa. 5:37) Intte naati dicciyo wode, Yihooway kessido maaraadan likke gididabaa woy likke gidennabaa banttarkka shaakki eranaadan eta loohissite. (Ibr. 5:14) Qassi intte naati intte haasayiyoobaappe aaruwan intte oottiyoobaappe tamaariyoogaa hassayite.—Zaa. 6:6, 7; Roo. 2:21.

9. Seexaanay aassiyo issi qofay aybee, qassi hegee qohiyoy aybissee?

⁹ Nuuni Yihoowa qofan ammanettiyoogaappe asa aadhdhida eratettan ammanettanaadan oottiyoogankka Seexaanay nu wozanaa mooranawu baaxetees. (Qol. 2:8) Seexaanay aassiyo issibaa, hegeekka dure gidiyoogee nu deꞌuwan aybippenne aadhdhana bessees giyoogaa qoppa. Hegaadan qoppiyaageeti dure gidana woy gidennan aggana danddayoosona. Eti dure gidin aggin, banttana qohoosona. Aybissi? Eti halchchuwaa polanawu miishsha demmanawu bichchaariyo gishshawu bantta payyatettaa qohoosona, qassi bantta soo asaara deꞌiya dabbotaa, ubba Xoossaara dabbotido bantta dabbotaa moorana danddayoosona. (1 Xim. 6:10) Nuuni miishshaa suure xeellanaadan aadhdhida eranchcha gidida, saluwan deꞌiya nu Aaway nuna maaddiyo gishshawu galatoos.—Era. 7:12; Luq. 12:15.

NU WOZANAA WAATI MINTTI NAAGANA DANDDAYIYOO?

10-11. (a) Nuuni nuna naaganawu ay oottana koshshii? (b) Beni wode naagiyaageeti ay oottiyoonaa; qassi nu kahay nuna naagiyaabadan waati oottana danddayii?

¹⁰ Nuuni nu wozanaa mintti naaganawu, qohiyaabaa shaakki erananne hegaappe nuna eesuwan naagana koshshees. Leemiso 4:23n “minttada naaga” geetettidi birshshettida qaalay naagiya uri oottiyoobaa nuna hassayissees. Kawuwaa Solomona wode, naagiyaageeti katamaa gimbbiyaa bolli eqqidi naagoosona; qassi eti qohiyaabay yiyoogaa beꞌikko alaahoosona. Hegaa qoppiyoogee Seexaanay nu qofaa moorennaadan teqqanawu ay oottana bessiyaakko akeekanaadan maaddees.

¹¹ Beni wode, naagiyaageeti katamaa penggiyaa naagiya asatuura hashetidi oottoosona. (2 Sam. 18:24-26) Eti morkkee matattiyo wode penggeti gorddettanaadan oottiyoogan katamay naagettanaadan issippe maaddoosona. (Nah. 7:1-3) Geeshsha Maxaafan loohida nu kahayb naagiya uradan oottananne Seexaanay nu wozanaa, hegeekka nu qofaa, nuussi siyettiyaabaa, nuna denttettiyaabaa woy nu amuwaa mooranawu baaxetiyo wode nuna yeꞌꞌe gaana danddayees. Qohiyaabay deꞌiyoogaa nu kahay nuuyyo yootiyo wode ubban, hegaappe haakkanawu nuussi danddayettida ubbabaa oottana koshshees.

12-13. Nuuni ay oottanawu paacettana danddayiyoo, shin nuuni waatana bessii?

¹² Seexaanaa qofan nuuni qohettennaadan nuna naaganawu waatana danddayiyaakko akeekanawu issi leemisuwaa beꞌa. ‘Nu giddon shaaramuxiyoogeenne tunatetta ubbay mulekka siyettana’ bessennaagaa Yihooway nuna tamaarissiis. (Efi. 5:3) Gidoppe attin, ooso sohuwan woy timirtte keettan nu laggeti shaaramuxiyoogaabaa haasayiyoogaa doommikko nuuni ay oottanee? Nuuni ‘nagara oosuwaanne ha saꞌaa amuwaa aggana’ bessiyoogaa eroos. (Tii. 2:12) Naagiyaagee, nu kahay, he qohiyaabaa xeelliyaagan nuna yeꞌꞌe gaana danddayees. (Roo. 2:15) SHin nuuni hegaa siyanee? Nuuni nu laggeti yootiyoobaa siyanawunne eti beꞌiyo misileta beꞌanawu paacettana danddayoos. SHin nuuni harabaa haasayanaadan oottiyoogan woy eta aggidi biyoogan qohuwaappe haakkana koshshees.

¹³ Balabaa qoppanaadan woy oottanaadan nu laggeti denttettiyoogaa eqettanawu xalatettaa koshshees. Nuuni baaxetiyoogaa Yihooway beꞌiyoogaa ammanettana danddayoos; qassi I Seexaanaa qofaa nuuni eqettanawu koshshiya minotettaanne aadhdhida eratettaa nuuyyo immana. (2 Odi. 16:9; Isi. 40:29; Yaaq. 1:5) SHin, nuuni nu wozanaa mintti naaganawu harabaa ay oottana danddayiyoo?

MULETOO NAAGA

14-15. (a) Nuuni nu wozanaa aybissi dooyana koshshii, qassi yaatanawu waatana danddayiyoo? (b) Leemiso 4:20-22y nuuni Geeshsha Maxaafaa nabbabiyoogan loytti goꞌettanaadan waati maaddii? (Waata Wotta Denttada Qoppana Danddayay? giya saaxiniyaakka xeella.)

¹⁴ Nu wozanaa mintti naaganawu, qohiyaabaa teqqiyoogaa xalla gidennan loꞌꞌobaakka ekkana bessees. Gimbbiyan direttida katamaa leemisuwaa ane zaarettada qoppa. Penggiyaa naagiyaagee morkkee katamaa gelennaadan teqqanawu katamaa penggeta gorddees; shin hara wode kattaanne harabaa katamaa gelissanawu I penggeta dooyees. Penggeti mule dooyettennaba gidikko, kataman deꞌiyaageeti namisettana. Hegaadankka, nuuni Xoossaa qofay nuna ubbatoo maaddanaadan nu wozanaa dooyana koshshees.

¹⁵ Geeshsha Maxaafan Yihoowa qofay deꞌiyo gishshawu, nuuni A nabbabiyo wode ubban nu qofaa, nuussi siyettiyaabaanne nuuni oottiyoobaa Yihoowa qofay maaddanaadan eeno goos. Geeshsha Maxaafaa nabbabiyoogan nuuni waani loytti goꞌettana danddayiyoo? Woosay keehi koshshiyaaba. Issi michchiyaa, “Taani Geeshsha Maxaafaa nabbabanaappe kase, A Qaalan deꞌiya ‘maalaalissiyaabaa beꞌanaadan’ maaddana mala Yihoowa woossays” yaagaasu. (Maz. 119:18) Qassi nuuni nabbabiyoobaa wotti dentti qoppana koshshees. Nuuni woossiyo wode, nabbabiyo wodenne wotti dentti qoppiyo wode Xoossaa Qaalaa ‘nu wozanan wottoos,’ qassi Yihoowa qofaa siiqoos.—Leemiso 4:20-22 nabbaba; Maz. 119:97.

16. JW Brodkastingiyan daroti waani goꞌettidonaa?

¹⁶ Xoossaa qofay nuna maaddanaadan nuuni eeno giyo hara ogee JW Brodkastingiyan^® deꞌiyaabaa beꞌiyoogaa. Issi azinaynne machchiyaa hagaadan giidosona: “Aginan aginan kiyiya prograamee nu woosaayyo loꞌꞌo zaaro gidiis! Hegee nuna minttettiis; qassi nuuni azzaniyo wode woy boorasiyo wode minnanaadan oottiis. Qassi hegan kiyiya muuziqata ubbatoo nu son siyoos. Kattiyo wode, geeshshiyo wode woy shayiyaa uyiyo wode eta siyoos.” Ha prograameti nuuni nu wozanaa mintti naaganaadan maaddoosona. Eti nuuni Yihoowagaadan qoppanaadaaninne Seexaanaa qofaa eqettanaadan tamaarissoosona.

17-18. (a) Koyro Kawotu Maxaafaa 8:61 yootiyoogaadan, nuuni Yihoowappe tamaariyoobaa oosuwan peeshshiyo wode, hananabay aybee? (b) Kawuwaa Hizqqiyaasa hanotaappe ay tamaarana danddayiyoo? (c) Mazamure 139:23, 24n deꞌiya Daawita woosaara maayettiya ogiyan nuuni aybawu woossana danddayiyoo?

¹⁷ Nuuni likke gididabaa oottiyoogee demissiyo goꞌꞌaa akeekiyo wode ubban nu ammanoy minnees. (Yaaq. 1:2, 3) Yihooway nuna ba naatudan xeegidi ceeqettiyo gishshawu ufayttoos; qassi nuuni kaseegaappe aaruwan A ufayssanawu koyoos. (Lee. 27:11) Paace ubbay nuuni nu Aawawu loytti haggaazanawu murttidoogaa bessanaadan oottana danddayees. (Maz. 119:113) Nuuni Yihoowa azazota azazettanawunne A sheniyaa polanawu murttiyoogan nu kumetta wozanaappe A siiqiyoogaa bessoos.—1 Kawotu Maxaafaa 8:61 nabbaba.

¹⁸ Nuuni balabaa oottanee? Ee; nuuni nagaranchcha. Nuuni xubettikko, Kawuwaa Hizqqiyaasa hanotaa hassayoos. I baliis. SHin I ba nagaraappe simmiis; qassi “kumetta wozanan” Yihoowawu oottiyoogaa aggibeenna. (Isi. 38:3-6; 2 Odi. 29:1, 2; 32:25, 26) Yaakko, Seexaanay nuuni aagaadan qoppanaadan maliyoobaa eqettoos. Nuussi azazettiya ‘wozanay’ deꞌanaadan woossoos. (1 Kaw. 3:9; Mazamure 139:23, 24 nabbaba.) Ubbabaappekka aaruwan nu wozanaa mintti naagikko, Yihoowayyo ammanettidi deꞌana danddayoos.