Yesuusa Leemisuwaa Kaalliyoogan Sarotettan Deꞌa

1-2. Yesuusi waayettidoy aybissee?

YESUUSI asa gididi saꞌan deꞌido wurssetta gallassi keehi waayettiis. I takkennan, nagaranchchatu kushiyan meqetti baynna hayquwaa hayqqana. SHin, Yesuusi hirggidoy I guutta wodiyaappe guyyiyan hayqqiyo gishsha xallaassa gidenna. I ba Aawaa keehi siiqeesinne A ufayssanawu koyees. Yesuusi bana he waayee gakkishin ammanettidi kanttikko, Yihoowa sunttay geeyanaadan oottanaagaa erees. Yesuusi asaakka siiqees; qassi I hayqqana gakkanawu ammanetti deꞌiyoogaa xallan, nuuni merinaa deꞌuwaa hidootan naagana danddayiyoogaa erees.

² Yesuusi keehi unꞌꞌettikkokka, I sarotettan deꞌiis. I ba kiittidoogeetussi, “Ta sarotettaa intteyyo immais” yaagiis. (Yoh. 14:27) Issi urawu Yihoowaara dabbotido alꞌꞌo dabbotay woppu gaanaadan oottiya ‘Xoossaa sarotettaa’ demissees. He sarotettay Yesuusi unꞌꞌettennaadan maaddiis.—Pili. 4:6, 7.

3. Nuuni ha huuphe yohuwan ay pilgganee?

³ Nuna ubbaa Yesuusi genccido metuwaa malay gakkibeenna; shin Yesuusa kaalliyaageeta ubbaa paacee gakkana. (Maa. 16:24, 25; Yoh. 15:20) Yesuusaagaadan, issi issitoo nuuni waayettana danddayoos. Nuuni keehi hirggennaadan, qassi nu sarotettay xayennaadan ay oottana danddayiyoo? Yesuusi saꞌan haggaazido wode oottido heezzubata pilggidi, nuna metoy gakkiyo wode A leemisuwaa waati kaallana danddayiyaakko ane beꞌoos.

YESUUSI DAROTOO WOOSSIIS

4. Koyro Tasalonqqe 5:17 hassayada, Yesuusi saꞌan deꞌido wurssetta gallassi darotoo woossidoogaa bessiya amarida leemisota yoota.

⁴ Koyro Tasalonqqe 5:17 nabbaba. Yesuusi saꞌan deꞌido wurssetta gallassan darotoo woossiis. Yesuusi I erissiyo ashkkarati A hayquwaa waati bonchchanakko bessido wode, I oyttaanne woyniyaa xeelliyaagan woossiis. (1 Qor. 11:23-25) Eti Paasikaa Baalaa bonchchido sohuwaappe beennan deꞌishin, I ba erissiyo ashkkaratuura woossiis. (Yoh. 17:1-26) Yesuusinne I erissiyo ashkkarati he galla qammi Dabira Zayte giyo deriyaa gakkido wode, I zaari zaaridi woossiis. (Maa. 26:36-39, 42, 44) I hayqqana haniiddi wurssettan haasayido qaalaykka woosa. (Luq. 23:46) Yesuusi ba deꞌuwan he wurssetta gallassi hanida ubbabaa xeelliyaagan Yihoowakko woossiis.

5. Yesuusi kiittidoogeetu xalatettay shuggidoy aybissee?

⁵ Yesuusi bana gakkida metuwaa gencci aattanaadan maaddida issibay, I ba Aawan ammanettidoogaanne darotoo A woossidoogaa. Hara baggaara qassi, he galla qammi Yesuusi kiittidoogeeti woosan genccibookkona. Hegaappe denddidaagan, eta waayee gakkido wode eta xalatettay shuggiis. (Maa. 26:40, 41, 43, 45, 56) Nuna paacee gakkiyo wode, nuuni ammanettidi deꞌana danddayiyoy Yesuusa leemisuwaa kaalliyoogaanne ‘aggennan woossiyoogaa’ xallaana. Nuuni woossana danddayiyoobay aybee?

6. Sarotettan deꞌanaadan ammanoy nuna waati maaddanee?

⁶ Yihooway ‘nuussi ammanuwaa gujjanaadan’ woossana danddayoos. (Luq. 17:5; Yoh. 14:1) Nuussi ammanoy koshshees; ayssi giikko, Yesuusa kaalliyaageeta ubbaa Seexaanay paaccana. (Luq. 22:31) Metoy bolli bollan gakkiyo wodekka, sarotettan deꞌanaadan ammanoy nuna waati maaddii? Nuuni metuwaa xoonanawu nuuyyo danddayettida ubbabaa oottikko, Yihooway nuna maaddanaagaa ammaniyoogee hirggennaadan oottees; ayssi giikko, I koshshiya wodiyan ubbabaa giigissanaagaa eroos. I nuuni oottana danddayiyo aybippenne aadhdhiya loꞌꞌobaa ay oottanaakko eriyoogaa nuuni ammanettiyo gishshawu, sarotettan deꞌoos.—1 PHe. 5:6, 7.

7. Roberti yootidobaappe ay tamaaradii?

⁷ Nuna ayba metoy gakkikkonne, woosay nuuni sarotettan deꞌanaadan maaddees. Haꞌꞌi layttay 80⁠ppe aadhdhido ammanettida gubaaꞌe cima gidida ishaa Roberta hanotaa qoppa. I hagaadan giis: “Piliphphisiyuusa 4:6, 7n deꞌiya zoree ta deꞌuwan gakkida daro metuwaa taani genccanaadan maaddiis. Tana miishshay metiis. Qassi gubaaꞌe cima gidada oottiyo maataappe guutta wodiyawu wodhdhaas.” Roberti sarotettan deꞌanaadan A aybi maaddidee? I hagaadan giis: “Taani unꞌꞌettiyo wode sohuwaara woossays. Taani kaseegaappe aaruwan darotoonne wozanappe woossiyo wode aaro sarotettaa demmiyoogaa ammanays.”

YESUUSI MINNIDI SABBAKIIS

8. Yohaannisa 8:29y qonccissiyoogaadan, Yesuusi sarotettaa demmanaadan oottida harabay aybee?

⁸ Yohaannisa 8:29 nabbaba. Yesuusi yedetay gakkido wodekka sarotettan deꞌiis; ayssi giikko, hegee ba Aawaa ufayssiyoogaa I erees. Azazettiyoogee awu deexxiyaaba gidiyo wodekka I azazettiis. I ba Aawaa siiqees, qassi I Yihoowawu haggaaziyoogee A deꞌuwan aybippenne aadhdhees. I saꞌaa yaanaappe kase, Xoossawu “waanna oosanchcha.” (Lee. 8: 30) Qassi I saꞌan deꞌiyo wode, haratussi ba Aawaabaa keehi minttidi tamaarissiis. (Maa. 6:9; Yoh. 5: 17) He oosoy Yesuusawu gita ufayssaa demissiis.—Yoh. 4:34-36.

9. Sabbakiyo oosuwaa minnidi oottiyoogee sarotettan deꞌanaadan nuna waati maaddii?

⁹ Nuuni Yihoowawu azazettiyoogaaninne ‘ubba wode Godaa oosoy’ daridoogeeta gidiyoogan Yesuusa leemisuwaa kaallana danddayoos. (1 Qor. 15:58) Nuuni sabbakiyo oosuwaa mintti oottiyo wode, nu metuwaa xeelliyaagan loꞌꞌobaa qoppana danddayoos. (Oos. 18:5) Leemisuwawu, nuuni haggaazuwan demmiyoogeeta darotoo nuugaappe aaro metoy gakkees. Gidikkokka, eti Yihoowa siiqiyoogaa tamaaridi A zoriyaa oosuwan peeshshiyo wode, eta deꞌoy kaseegaappe giiga gidees; qassi eti ufayttoosona. Hegaa malabaa beꞌiyoogee, Yihooway nuussi qoppiyoogaa kaseegaappe aaruwan ammanettanaadan oottees. Hegaa mala ammanoy nu sarotettay xayennaadan maaddees. Ba deꞌido laytta ubban unꞌꞌettiyaanne bana pattenna asa gaada qoppiya issi michchiyaa hegee tuma gidiyoogaa beꞌaasu. A hagaadan gaasu: “Taani minnada haggaaziyo wode, woppu gaysinne ufayttays. Ayssi giikko, taani haggaaziyo wode Yihoowakko keehi shiiqidabadan qoppays.”

10. Brenda yootidobaappe ay tamaariyoo?

¹⁰ Brendo giyo issi michchee hanotaakka beꞌa. Anne I naꞌiyaa wolqqaama sahuwaa sahettoosona. Brenda hemettanawu danddayenna gishshawu yaa haa qaaxxanawu asi sugiyo gaariyan goꞌettawusu, qassi iyyo abbee guutta. A danddayiyo wode sooppe soo biyoogan sabbakiyaaba gidikkonne, A sabbakiyo waanna ogee dabddaabbiyaa xaafiyoogaa. A hagaadan gaasu: “Ha wodiyan ta sahuwaappe paxana danddayennaagaa akeekido wode ta xeelaa muleera haggaazuwan wottaas. Taani sabbakiyo wode, tana hirggissiyaabaa qoppikke. SHin taani nu gubaaꞌiyaa haggaazo moottan demmiyoogeeta waata maaddanaakko qoppays. Hegee qassi tawu deꞌiya sinttanaa hidootaa ubbatoo hassayanaadan oottees.”

YESUUSI BA LAGGETU MAADUWAA EENO GIIDI EKKIIS

11-13. (a) Yesuusi kiittidoogeetinne harati awu tumu lagge gidiyoogaa waati bessidonaa? (b) Laggetu maadoy Yesuusa waatidee?

¹¹ Yesuusi sabbakido wode ubban, I kiittido ammanettidaageeti awu tumu lagge gidiyoogaa bessidosona. Eti, “Ishappe aadhdhidi ammanttiya laggee de7ees” giidi Geeshsha Maxaafay qonccissiyo lagge mala. (Lee. 18:24) Yesuusi hegaa mala laggeta xoqqu ootti xeelliis. I saꞌan haggaaziyo wode, A ishatuppe issoynne aani ammanibeenna. (Yoh. 7:3-5) Issi wode, A dabboti haray atto I gooyidabadan qoppidosona. (Mar. 3:21) Gidoppe attin, I hayqqanaappe kase qammi, ba kiittido ammanettidaageeta, ‘Taani paacettiyo wode tana yeggibeekketa’ yaagiis.—Luq. 22:28.

¹² Yesuusi kiittidoogeeti issi issitoo A azzanttidosona; shin I eta balaa gidennan, eti aani ammaniyoogaa qoppiis. (Maa. 26:40; Mar. 10:13, 14; Yoh. 6:66-69) Hayqqanaappe kase etaara aattido qammi, Yesuusi ha ammanettida asatussi, “Taani inttena ta laggeta gaas. Aissi giikko, ta Aawaappe siyido ubbabaa taani intteyyo yootaas” yaagiis. (Yoh. 15:15) Yesuusa laggeti A keehi minttettidoogawu siree baa. Haggaazuwan eti A maaddidoogee I keehi ufayttanaadan oottiis.—Luq. 10:17, 21.

¹³ Yesuusi kiittidoogeetuppe hara laggeti, attumaageetikka maccaageetikka, haggaazuwaaninne hara ogetun A maaddidaageeti deꞌoosona. I qumaa maana mala issoti issoti A bantta soo shoobbidosona. (Luq. 10:38-42; Yoh. 12:1, 2) Harati I oottiyoosaa ubbaa aara biidosona; qassi banttawu deꞌiyaabaappe ayyo immidosona. (Luq. 8:3) Yesuusi etawu loꞌꞌo lagge gidiyo gishshawu, ayyo loꞌꞌo laggeti deꞌoosona. I etawu loꞌꞌobaa oottiisinne eti oottana danddayiyoogaappe aarobaa etappe naagibeenna. Yesuusi nagari baynna asa gidikkonne, nagaranchcha gidida laggetu maaduwaa nashshiis. I sarotettan deꞌanaadan eti A maaddidoogaa ammanettana danddayoos.

14-15. Nuuni loꞌꞌo laggeta waati demmana danddayiyoo, qassi eti nuna waati maaddana danddayiyoonaa?

¹⁴ Loꞌꞌo laggeti nuuni Yihoowawu ammanettidi deꞌanaadan nuna maaddana. Qassi loꞌꞌo laggeta demmanawu maaddiya ubbaappe aadhdhiya ogee haratussi loꞌꞌo lagge gidiyoogaa. (Maa. 7:12) Leemisuwawu, Geeshsha Maxaafay nu wodiyaanne nu wolqqaa harata, ubba qassi “hiyyeesata” maaddanawu goꞌettanaadan minttettees. (Efi. 4:28) Ne gubaaꞌiyan neeni maaddanawu danddayiyo issi ura qoppana danddayay? Sooppe kiyana danddayenna issi aassiyaagawu giyaappe issi issibaa shammana danddayay? Miishshaa pacay deꞌiyo issi keettaa asawu miyoobaa immanawu danddayay? Neeni jw.org^® websaytiyaanne JW Library^® appiyaa goꞌettiyoogaa erikko, hegan deꞌiya alꞌꞌo buquraa ne gubaaꞌiyan deꞌiyaageeti waati goꞌettana danddayiyaakko maaddana danddayay? Nuuni harata maaddanawu minnidi oottiyo wode, kaseegaappe aaruwan ufayttana danddayoos.—Oos. 20:35.

¹⁵ Nuna metoy gakkiyo wode, sarotettan deꞌanaadan laggeti nuna maaddana. Iyyoobi ba metuwaabaa yootiyo wode Eelihu ezggidoogaadan, nu laggeti nuna qofissidabaa nuuni yootiyo wode danddayan ezggiyoogan nuna maaddoosona. (Iyy. 32:4) Nu laggeti nu gishshaa kuuyanaadan naagana bessenna; shin eti Geeshsha Maxaafaappe immiyo zoriyaa loytti ezggikko, aadhdhida eranchcha gidoos. (Lee. 15:22) Qassi Kawuwaa Daawiti ba laggetu maaduwaa bana ziqqi oottidi ekkidoogaadan, nuuyyo maadoy koshshiyo wode nuna maaddanawu laggeti immiyo zoriyaa ekkanawu otorettana koshshenna. (2 Sam. 17:27-29) Hegaa mala loꞌꞌo laggeti Yihoowa imota.—Yaaq. 1:17.

SAROTETTAN WAANI DEꞌANEE?

16. Piliphphisiyuusa 4:6, 7y yootiyoogaadan, nuuni sarotettaa demmana danddayiyo mexi issi ogee awugee? Qonccissa.

¹⁶ Piliphphisiyuusa 4:6, 7 nabbaba. Yihooway I immiyo sarotettaa nuuni ‘Yesuus Kiristtoosa baggaara’ demmana danddayiyoogaa yootiyoy aybissee? Nuuni sarotettan deꞌananne hegaa naagana danddayiyoy Yesuusi Yihoowa halchchuwan oottiyoobaa akeekiyoogaananne ammaniyoogaa xallaana gidiyo gishshataassa. Leemisuwawu, Yesuusa wozuwaa yarshshuwaa baggaara nu nagara ubbay atto geetettana danddayees. (1 Yoh. 2:12) Hegee nuna keehi woppissiyaaba! Xoossaa Kawotettaa Kawoy Yesuusi, Seexaanaynne A alamee nu bolli gattiyo qoho ubbaa xayssana. (Isi. 65:17; 1 Yoh. 3:8; Ajj. 21:3, 4) Hegee keehi ufayssiya hidoota! Qassi Yesuusi nuuyyo deexo oosuwaa immidaba gidikkonne, ha wurssetta gallassatun nuna maaddanawu I nunaara deꞌees. (Maa. 28:19, 20) Hegee nuna keehi xalissees! Woppay, hidootaynne xalatettay nuuni sarotettan deꞌanaadan keehi koshshiyaabata.

17. (a) Issi Kiristtaanee sarotettan waani deꞌana danddayii? (b) Yohaannisa 16:33y yootiyoogaadan, nuuni ay oottana danddayiyoo?

¹⁷ Yaatin, nena wolqqaama metoy gakkin neeni unꞌꞌettiyo wode, waanada sarotettan deꞌana danddayay? Yesuusa leemisuwaa kaallada I oottidobata oottiyoogan sarotettan deꞌana danddayaasa. Koyruwan, woossanne woosan gencca. Naaꞌꞌanttuwan, Yihoowayyo azazettiyoogeenne minnada sabbakiyoogee deexxiyaaba gidiyo wodekka, hegaadan ootta. Heezzanttuwan, meto wodiyan ne laggeti nena maaddanaagaa ammanetta. Yaatiyo wode, Xoossaa sarotettay ne wozanaanne ne qofaa naagana. Qassi, Yesuusaagaadan ay metuwaakka neeni xoonana.—Yohaannisa 16:33 nabbaba.