‘Mishiraachoy Odettana’

1. Sabbakiyo oosuwaa diggana danddayiya aybinne baynnaagaa waati eriyoo?

¹ Yihooway ba sheniyaa polennaadan diggana danddayiya issibinne deꞌenna. (Isi. 14:24) Daannaa Geedooninne a 300 asati, 135,000 Midiyaamatuura oletti xoonana danddayennaba milatikkonne, Yihooway Geedoonayyo: “Israa7⁠eela asaa Midiyaama asaa kushiyaappe ashsha. Be7a, nena kiittiyaagee tana” yaagiis. (Daan. 6:14) Ha wodiyan Yihooway kaafiyo oosoy awugee? Yesuusi: “Kawotettaa wonggeliyaa mishiraachchoi sa7a ubban odettana” yaagiis. (Maa. 24:14) Ha oosoy polettennaadan diggana danddayiya ooninne baawa!

2. Yihooway nuna huuphe xekkan haggaazuwan maaddanaagaa ammanettana danddayiyoy aybissee?

² Yihooway Nuna Huuphe Xekkan Maaddees: Yihooway ba Markkata cita xekkan murutanaadan oottiyoogaa ammanettana danddayikkonne, huuphe xekkankka nuna maaddanaagaa ammanettana danddayiyoo? Maadoy koshshido wode, kiitettida PHauloosi Yihooway ba Naꞌaa Yesuusa baggaara maaddidoogaa akeekiis. (2 Xim. 4:17) Nuuni a sheniyaa polanaadan Yihooway nunakka huuphe xekkan hegaadan anjjanaagaa ammanettana danddayoos.—1 Yoh. 5:14.

3. Yihooway nuna ayba hanotatun maaddii?

³ Galla galla deꞌuwan gakkiya unꞌꞌoy neeni haggaazuwau wolqqaa xayanaadan oottii? I “daafuranchchau wolqqaa immees.” (Isi. 40:29-31) Yedetay woykko ixoy nena gakkiiddi deꞌii? “Ne toohuwaa Xoossan wotta; i nena zemppissana.” (Maz. 55:22) Issi issitoo neeyyo giday baynnabadab siyettii? “Ba; taani nena haasayanau maaddana.” (Kes. 4:11, 12) Payyatettaa pacay neeni koyiyoogaa keenaa haggaazennaadan diggii? Neeni guuttaa haggaazikkokka, wozanappe oottidobaa Yihooway xoqqu oottidi xeelleesinne nashshana danddayees.—1 Qor. 3:6, 9.

4. Yihoowan ammanettiyoogee nuna waatidi goꞌꞌii?

⁴ Yihoowa kushee “micettiis; hegaa ooni guyye zaarana danddayii?” (Isi. 14:27) Yihooway nu haggaazuwaa anjjiyoogaa ammanettiyoogan, aggennan ubbatoo Yihoowa maaduwan “yayyennan” sabbakiyaageeta gidoos.—Oos. 14:3.