Xannaꞌiya Asa Demmiyo Ichashu Ogeta
1. Nu haggaazo moottan xannaꞌissiyo asa demmanau metootikko, waatana koshshii, aybissi?
1 Geeshsha Maxaafaa xannaꞌissiyo asa demmanau metootay? Koyiyoogaa aggoppa. Yihooway azallennan ubbatoo a sheniyaa oottiyaageeta anjjees. (Gal. 6:9) Hagaappe kaallidi deꞌiya ichashu qofay nena maaddana.
2. Asay Geeshsha Maxaafaa xannaꞌanaadan waati shoobbana danddayiyoo?
2 Xannaꞌanaadan SHoobbiyoogaa: Daro asay nuuni Wochiyo Keelaanne Beegottite! maxeetiyaa asau immiyoogaa erees; shin nuuni Geeshsha Maxaafaa xannaꞌissiyoogaa erennan aggana danddayees. Sooppe soo haggaaziyo wode, asay Geeshsha Maxaafaa xannaꞌanaadan shoobbana danddayaasa. Qassi siyanau koyiyaageeta zaarettada oychiyo wode, Geeshsha Maxaafaa xannaꞌana koyiyaakkonne oychana danddayaasa. Eti koyennaba gidikko, xuufiyaa ubbatoo immiyoogan issi wode koyanaadan maaddana danddayaasa. Issi ishay issi azinaunne macheeyyo daro layttau maxeetiyaa immiiddi takkiis. I etau ooratta maxeetiyaa immidi, baana haniiddi, “Intte Geeshsha Maxaafaa xannaꞌanau koyeetii?” giidi oychiis. Eti ee gin i keehi ufayttiis. Eti haꞌꞌi xammaqettidosona.
3. Gubaaꞌiyan shiiqiya ooratta asati ubbay Geeshsha Maxaafaa xannaꞌiyaageeta giidi nuuni qoppana koshshii? Qonccissa.
3 SHiiquwaa Yiidaageeta: Gubaaꞌiyaa shiiquwaa yiya ooratta asati ubbay Geeshsha Maxaafaa xinaatiyaa doommidaageeta gaada qoppoppa. Issi ishay, “Taani xannaꞌissido asatuppe baggaappe dariyaageeti shiiquwaa yiida asata haasayissiyoogan demmoogeeta” yaagiis. Issi michiyaa xammaqettida naati deꞌiyo, issi dungguuxa maccaasiyo haasayissanau qofaa qachaasu. A 15 layttau gubaaꞌiyaa shiiquwaa yaasu; a ubbatoo, Kawotettaa Addaraashaa shiiqoy doommi simmin yaada, wuriyoorin ba aggausu. A xannaꞌanau eeno gaada, guyyeppe Yihoowa Markka gidaasu. Michiyaa, “A xannaꞌanau koyiyaakkonne oychanau taani 15 layttaa takkido gishshau azzanays!” yaagaasu.
4. Xinaatetu baggaara hara xinaatiyaa waati koyana danddayiyoo?
4 Xinaatetu Baggaara Koyiyoogaa: Issi michiyaa harati xannaꞌissiyo wode darotoo issippe xannaꞌissana koyausu. Xinaatiyaa wurssettan, a xannaꞌissiyaaro paqqadissada, hara xannaꞌanau koyiya ura eriyaakkonne xinaatiyo oychausu. Zaarettada oychiyo urau Geeshsha Maxaafay Tamaarissiyoy giya maxaafaa immiyo wode, “Ha maxaafaa ekkana koyiya hara ura eray?” gaada oychana danddayaasa. Aassiyaageetinne aqinyeti haggaazo moottan demmiyo asata xannaꞌissanau hanotay etau issi issitoo injjetennan aggana danddayees. Hegaa gishshau, neeni xannaꞌissanau koyiyoogaa haratuyyo yoota.
5. Nu gubaaꞌiyan deꞌiya ishatu woy michotu ammanenna aqo laggeti xannaꞌana koyiyaakkonne oychana koshshiyoy aybissee?
5 Ammanenna Aqo Laggeta: Ammanenna aqo laggeti deꞌiyo ishati woy michoti intte gubaaꞌiyan deꞌiyoonaa? Issi issi ammanenna asati Kiristtaane gidida bantta aqo laggiyaara Geeshsha Maxaafaabaa haasayanau koyokkona; shin xannaꞌanaadan hara uri eta shoobbiyo wode eeno gaana danddayoosona. Woygi haasayissanaakko qoppanau, ammaniya aqo laggiyaara kasetidi haasayiyoogee darotoo maaddees.
6. Xannaꞌiya asa koyiyo wode woosay waati maaddii?
6 Woosaa: Woosay keehi maaddiyoogaa akeeka. (Yaaq. 5:16) I koyiyoogaadan woossiyaaba gidikko, nu woosaa siyanau Yihooway qaalaa geliis. (1 Yoh. 5:14) Oosoy bichaarissiyo issi ishay Geeshsha Maxaafaa xannaꞌiya asa demmanau woossiyoogaa doommiis. I xannaꞌissiyo asa suure oyqqanau, ubba qassi xannaꞌissiyo uri daro metootiyaaba gidikko, gidiya wode demmanddeeshsha gaada a keettaayiyaa hirggaasu. A ba keettaaway xinaate demmanaadan woossiyo wode bana hirggissidabaakka Yihoowayyo yootaasu. Naaꞌꞌu saamintta gidiya wodeppe guyyiyan, eta gubaaꞌiyan deꞌiya issi aqinyiyaa xannaꞌanau koyiya issi bitaniyaa he ishau immido wode eta woosay zaaruwaa demmiis. Ishaa keettaayiyaa hagaadan gaasu: “Geeshsha Maxaafaa xinaatiyaa xannaꞌissiyoogee metana danddayees giidi qoppiya ubbaa, ‘Intte koyiyoobaa woosan qonccissite; qassi hegau woossiyoogaa aggoppite’ gaada zorays. Nuuni hagaadan ufayttana gaada qoppa erikke” yaagaasu. Gencciyaaba gidikko, neenikka Geeshsha Maxaafaa xannaꞌiya ura demmananne ‘deꞌuwau efiya ogiyan’ baanaadan maaddiyoogan ufayttana danddayaasa.—Maa. 7:13, 14.