Kiristtaanetu Deꞌuwanne Haggaazuwa Shiiquwa Xannaꞌiyo Xuufiyan Odettida Xuufeta
© 2025 Watch Tower Bible and Tract Society of Pennsylvania
ICHCHASHE 5-11
XOOSSAA QAALAN DEꞌIYA ALꞌꞌOBAA ISIYAASA 17-20
“Nubaa Wolqqan Ekkiyaageetu” Saamaa
Ta Kawotettay Ha Alamiyaa Bagga Gidenna
16 Hegaadan laamettiyoogee keehi koshshiyaaba! Geeshsha Maxaafay sarotettaa erenna, yaanne haanne shocettiya abbaara asaa geeddarssees. (Isi. 17:12; 57:20, 21; Ajj. 13:1) Polotikaabay asaa balbbuqishin, shaakkishiininne coo kobayishin, nuuni sarotettaaninne issippetettan deꞌoos. Qassi Yihooway ha shaahettida alamiyaa beꞌiyo wode, I ba asaa giddon beꞌiyo issippetettan ufayttiyoogee erettidaagaa.—Sofonaasa 3:17 nabbaba.
SHaahettida Alamiyan Oossinne Exatennan Deꞌa
4 Nuuni deꞌiyo biittay polotikaaban woppu giidanne tumu goynuwaa diggennaba milatana danddayees. SHin Seexaanaa alamiyaa xayoy matiyo wode, oossinne exatennan deꞌiyoogee keehi koshshiyaaba gidanaagaa qoppana danddayoos. Ha alamiyan ‘sigettennanne’ zozzu giida asay kumiis; yaatiyo gishshawu, asay yaa shaahettana. (2 Xim. 3:3, 4) Issi issi biittan polotikaa hanotay eesuwan eesuwan laamettiyo gishshawu, nu ishantti issi baggawu exatanaadan paacciyaabay qoppennan eta bolli gakkiis. Nuuni alamiyaaban oossinne exatennan deꞌanawu murttidoogaa haꞌꞌi minttana koshshiyoy aybissakko akeekadii? Nuuni paacettana gakkanaassi naagikko, he paaciyan kunddana danddayoos. Yaatin shaahettida alamiyan waatidi oossinne exatennan deꞌana danddayiyoo? Hegawu nuna keehi maaddiya oyddubaa ane beꞌoos.
ip-1 198 ¶20-mwbr
Deretuppe Naagettanaadan Yihoowi Zoridobaa
20 Hegee ay kaalettii? Isiyasi hagaadan giis: “Sa7ai qammiyo wode, eti shabbirettana; sa7ai wonttanaappe kasetidi, eti xayiichchana; nubaa wolqqan ekkiyaageetu qaadainne nuna bonqqiyaageetu saamai hagaa.” (Isiyaasa 17:14) Daroti Yihoowa asaa iishiyogaaninne toochchiyogan eta keehi qohoosona. Tumu Kiristtaaneti ha saꞌaa waanna haymaanootetuura zuppetenna gishshawunne zuppetanawu koyenna gishshawu, eta boriyageetinne ixxiyageeti eta toochchiyogee metenna giidi qoppoosona. Shin Xoossaa asay eta gakkiya waayee xayiyo, ‘saꞌay wonttiyo’ wodee keehi matattidoogaa ammanettoosona.—2 Tasalonqqe 1:6-9; 1 Pheexiroosa 5:6-11.
Ayyaanaaban Alꞌꞌobaa
w06 12/1 11 ¶1-mwbr
Isiyasa Maxaafan Deꞌiya Kulkka Qofata—Shaaho 1
20:2-5—Isiyasi heezzu layttawu tumu kallo xiire hemettidee? Isiyasi bollaara maayidobaa xallaa qaaridi “garssa maayo xalaalaara” hemettennan aggenna.—1 Sameela 19:24, NW; tohossa qofaa.
Haasayaa
lmd gujo qofaa A, qofaa 14
Xoossay nuuni A woossanaadan koyees.—Maz. 62:8; 65:2; 1 Phe. 5:7.
ICHCHASHE 12-18
XOOSSAA QAALAN DEꞌIYA ALꞌꞌOBAA ISIYAASA 21-23
Sheebina Gakkidabaappe Tamaariyobaa
Seeray Xoossaa Siiquwaa Bessiyaaba
7 Seeraa goꞌꞌaa akeekanawu Yihooway seerido naaꞌꞌu asatubaa ane beꞌoos. Issoy Kawuwaa Hizqqiyaasa wode deꞌida Israaꞌeela asa gidida SHeebina; haray qassi ha wodiyan deꞌiya ishaa Giraama. SHeebini ‘kawo keettan sunttettidaagaa,’ hegee Kawuwaa Hizqqiyaasa keettaa gidennan aggenna; qassi awu daro maatay deꞌees. (Isi. 22:15) SHin, I bawu bonchchuwaa koyidi otorettidoogee azzanttiyaaba. I keehi bonchcho duufuwaa baayyo giigissiis; qassi ‘bonchcho para gaareta’ toggiis!—Isi. 22:16-18.
8 SHeebini bawu bonchchuwaa koyido gishshawu, Xoossay ‘daannatettaappe A shaaridi’ A gishshaa Eliyaaqiima sunttiis. (Isi. 22:19-21) Hegee hanidoy Asoore Kawoy Sanaakireebi Yerusalaame olanawu halchchi uttido wodiyaana. Guyyeppe, Ayhudata yashissanawunne kawuwaa Hizqqiyaasi kushiyaa immanaadan oottanawu sunttatanne daro olanchchata Sanaakireebi kiittiis. (2 Kaw. 18:17-25) Eliyaaqiimi he sunttata haasayissanaadan kiitettiis; shin I barkka bibeenna. I naaꞌꞌu asatuura biis; issoy waanna xaafe gididi oottiya SHeebina. SHeebini hanqqettennaaninne uluwan lancciyaa oyqqennan ba huuphiyaa kawushshidi guuttabaa oottanawu eeno giidoogaa nuuni hagaappe akeekana danddayoos. Nuuni SHeebinappe tamaarana danddayiyo heezzubaa kaallidi pilggana.
9 Koyruwan, SHeebini ba maataappe wodhdhiis. A gakkidabay ‘otoruwaa geeduwaa bashshay kaalliyoogaa, ayyuwaa geeduwaakka kunddettay kaalliyoogaa’ bessees. (Lee. 16:18) Neeyyo gubaaꞌiyan maatay deꞌikko, qassi harati nena keehi xoqqu ootti xeellikko, neeni ne huuphiyaa kawushshada deꞌanawu baaxetay? Neeyyo deꞌiyaaban woy neeni oottidoban bonchchettana bessiyay Yihoowa gidiyoogaa akeekay? (1 Qor. 4:7) Kiitettida PHawuloosi hagaadan giis: “Taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite.”—Roo. 12:3.
Seeray Xoossaa Siiquwaa Bessiyaaba
10 Naaꞌꞌanttuwan, Yihooway SHeebina mintti zoridoogee SHeebini laamettana danddayiyoogaa Yihooway ammanidoogaa bessiyaaba gidana danddayees. (Lee. 3:11, 12) Ha wodiyan Xoossaa gubaaꞌiyan oottiyo maataappe wodhdhidaageeti hegaappe loꞌꞌobaa tamaaroosona! Eti hanqqettiyoogaappenne uluwan lancciyaa oyqqiyoogaappe, seeray Yihoowa siiquwaa bessiyaaba gidiyoogaa qoppidi, banttawu danddayettida ubban Xoossaayyo aggennan oottana danddayoosona. Bantta huuphiyaa kawushshidi deꞌiyaageeta nu Aaway wurssettan woytanaagaa hassaya. (1 PHeexiroosa 5:6, 7 nabbaba.) Siiquwan seeriyoogee Yihooway nuna moli giigissiyo oge gidana danddayiyo gishshawu, Yihoowa kushiyan shugo urqqa gididi deꞌiyaageeta gidoos.
Seeray Xoossaa Siiquwaa Bessiyaaba
11 Heezzanttuwan, yelidaageetanne gubaaꞌe cimata gujjin, seeriyo maatay deꞌiyoogeeti Yihooway SHeebina seeridoogaappe keehi maaddiyaabaa tamaaroosona. Yihoowa seeray I nagaraa ixxiyoogaa bessiyaaba gidana danddayikkonne, hegee nagaraa oottida uraayyo qoppiyoogaakka bessiyaaba gidana danddayees. Neeni yelidaagaa woy gubaaꞌe cima gidikko, seeriyo wode Yihoowa milatay?—Yih. 22, 23.
Ayyaanaaban Alꞌꞌobaa
w06 12/1 11 ¶2-mwbr
Isiyasa Maxaafan Deꞌiya Kulkka Qofata—Shaaho 1
21:1—“Abbaa lanqqen de7iya [bazzuwa]” geetettida moottay awugee? Baabiloonen abbaa lanqqe biitti deꞌana xayikkonne, I hegaadan xeesettees. Efiraaxiisanne Xegiroosa shaafati layttan layttan kumidi heeran goggidi torqqo “abbaa” medhdhiyo gishshawu hegaadan geetettiis.
Haasayaa
ijwyp huuphe yohuwa 71
Loꞌꞌo Leemiso Gidiya Ura Waata Doorana Danddayiyanaa?
“Timirtte keettan metiyabay gakkiyo wode, taagaadan metootida taani nashshiyo urabaa qoppiyogee maaddiis. Yaatada, aagaadan oottanawu malaas. Wayssiyabaa metootennan kanttanawu nashettiya ura milatiyogee maaddees.”—Heelo.
Leemiso gidiya uri neeni metuwan gelennaadaaninne halchchidobaa polanaadan maaddana danddayees. Leemiso gidiya loꞌꞌo asa dooriyogee hegawu keehi maaddees.
Akeekan doorana koshshiyoy aybissee?
Waatada dooruutee?
Ne laggeti woygiyonaa?
Akeekan doorana koshshiyoy aybissee?
● Neeni leemisodan xeelliyo uraagaadan oottana.
Geeshsha Maxaafay, “Eta oosuwa loꞌꞌo ayfiya yuushshi qoppidi, etaagaadan ammanite” yaagidi, Kiristtaaneti leemiso gidiya asata akeekanaadan zorees.—Ibraawe 13:7.
Maaddiya qofaa: Neeni leemisodan xeelliyo uraagaadan loꞌꞌobaa woy iitabaa oottana danddayiyo gishshawu, erettida asa woy ne keena yelagata coo dooriyogaappe tumu loꞌꞌo eeshshay deꞌiyogeeta doora.
“Addaama giyo ta mala Kiristtaaniya eeshshaappenne xeelaappe taani darobaa tamaaraas. I giidonne oottido issi issibata taani hanno gakkanawu hassayiyogee malaalees. I tana ay keena maaddidaakko erenna.”—Kolena.
● Neeni doorido leemisodan xeelliyo uraagaadan qoppana danddayaasa, qassi neeyyo aagaadan siyettana danddayees.
Geeshsha Maxaafay, “Ooninne inttena balettoppo. Iita asatuura zuppetiyogee loꞌꞌo meeziya bashshees” yaagees.—1 Qoronttoosa 15:33.
Maaddiya qofaa: Mera xallan gidennan, eeshshankka loꞌꞌo asa doora. Hankkoode, neeni azzanana danddayaasa.
“Nena ubbatoo keehi loꞌꞌiya asatuura geeddarssiyogee neeni nena loꞌꞌennanne pattenna asadan xeellanaadan oottees. Hegee ne meraabaa xallaa qoppanaadan oottana danddayees.”—Tamaaro.
Qoppana koshshiyabaa: Ispporttiyaninne allaxissiyogan erettida asata dooriyogee waati qohana danddayii?
● Neeni halchchidobaa polanaagee leemisodan xeelliyo asata dooriyogaara gayttidaba.
Geeshsha Maxaafay, “Aadhdhida eranchcha asatuura hemettiya asi aadhdhida eranchcha gidees” yaagees.—Leemiso 13:20.
Maaddiya qofaa: Neeni neeyyo deꞌanaadan koyiyo loꞌꞌo eeshshati deꞌiyo asata leemiso oottada doora. Neeni eta loytta wochchiyo wode, halchchidobaa polanawu oottanabaa tamaarana danddayaasa.
“‘Taani loytta ammanettiya asa gidanawu koyays’ yaagada coo halchchiyogaappe, ‘Taani Jenidan loytta ammanettiya asa gidanawu koyays. A awudekka keeruwa bonchchawusunne bawu imettidabaa tishshi gaada oottawusu’ yaagada halchcha.”—Miriyamo.
Waanna qofaa: Neeni leemiso gidiya loꞌꞌo asa doorikko, neeni koyiyogaa mala asa gidana danddayaasa.
Waatada dooruutee?
Ha naaꞌꞌu ogetuppe issuwan leemiso gidiya ura doorana danddayaasa.
1. Neeni giigissanawu koyiyo eeshshaa doorada he eeshshan neeni nashshiyo ura koya.
2. Neeni nashshiyo ura doorada neessi deꞌanaadan koyiyo A loꞌꞌo eeshshaa doora.
Ha huuphe yohuwara deꞌiya meezetiyobay hegawu nena maaddana danddayees.
Hageeti neeni leemisodan kaalliyo asata gidana danddayoosona:
Laggeta. “Taayyo keehi loꞌꞌo laggiya taani O milatanawu koyiyo asa. A wode xayada, harawu qoppiyogaa agga erukku. A taappe yelaga gidikkonne, tawu baynna loꞌꞌo eeshshati iyyo deꞌoosona, qassi hegee taani O milatanawu koyanaadan oottees.”—Miriyamo.
Gasttata. Hageeti nena yelidaageeta woy ne ammano miireta gidana danddayoosona. “Ta aawaykka ta aayyiyakka tawu loꞌꞌo leemiso. Etawu keehi loꞌꞌo eeshshati deꞌoosona. Taani eta balaa beꞌikkonne, hegaarakka eti ammanettiyogaa akeekays. Taani eta keena gidiyo wode, tabaakka asay hegaadan gaana gaada qoppays.”—Aneto.
Geeshsha Maxaafan odettidaageeta. “Taani Geeshsha Maxaafaappe eta ubbaakka dumma dumma gaasuwan milatanawu unddenna asata dooraas; hegeetikka, Ximootiyosa, Uruuto, Iyyooba, Pheexiroosanne Israaꞌeela biittaa guutta naꞌiyo. Geeshsha Maxaafan odettida asatubaa loytta eriyo wode, eti tawu qoncci beettoosona. Etaagaadan Ammanite giyo maxaafan deꞌiya haydaanne Yelagati Oychchiyo Oyshaa—Oosuwan Peꞌana Danddayiya Zaaruwa (Amaarattuwa) giyo naaꞌꞌu maxaafatun ‘Leemiso Gidiya Asatu Kesuwa’ giyagaa xannaꞌiyogee tana keehi ufayssees.”—Melindo.
Maaddiya qofaa: Issi ura xallaa leemiso oottoppo. Kiitettida Phawuloosi ba mala Kiristtaanetussi, “Nuuni inttena bessido ogiyadan deꞌiyageeta ubbatoo wochchite” yaagiis.—Piliphphisiyusa 3:17.
Hagaa eray? Neeni hara urawu leemiso gidana danddayaasa! Geeshsha Maxaafay, “Haasayiyoban, oottiyoban, siiquwan, ammanuwan, geeshshatettan waatanaakko ammanettiya asata bessa” yaagees.—1 Ximootiyosa 4:12.
“Giigissana koshshiyo eeshshati neeyyo deꞌikkokka, harati bantta eeshshaa giigissanaadan maaddana danddayaasa. Nena ooni wochchiyakko, qassi neeni yootiyobay issi asa deꞌuwa waati laammanaakko erakka.”—Kiyano.
Ne laggeti woygiyonaa?
“Allaxissiyogan erettida daroti Yihoowi banttawu immido bollaa bessenna ogiyan goꞌettoosona. Hegaa mala asata milatiyogee nuna qohana, qassi maara deꞌanawu waatana koshshiyakko nuuni qoppiyobaa moorana danddayees.”—Emo.
“Neeyyo leemiso gidiya loꞌꞌo asa demmiyogee ufayssiya deꞌo deꞌanaadan maaddees. Neeni gakkida metuwappe tamaarana danddayaasa, woy issi ura wochchada neeni oottana koshshiyabaa erana danddayaasa.”—Jastino.
“Neeni leemiso gidiya asata koyana bessees; hegawu asaa erananne etaara laggetana koshshees. Neeni qoppabeenna asati loꞌꞌo leemiso gidana danddayoosona.”—Mayka.
ICHCHASHE 19-25
XOOSSAA QAALAN DEꞌIYA ALꞌꞌOBAA ISIYAASA 24-27
“Hagee Tumu Nu Xoossaa”!
“Hagee Tumu Nu Xoossaa”
21 Issi guutta naꞌay ba laggetussi ba aawaa bessiiddi wozanappe ufayttiiddinne ceeqettiiddi, “Hagee ta aawaa” yaagishin siya eray? Xoossaayyo goynniyaageetuyyo Yihoowa xeelliyaagan hegaadan siyettiyo gaasoy deꞌees. Ammanettiya asay, “Hagee tumu nu Xoossaa” yaagidi yootiyo wodee yaanaagaa Geeshsha Maxaafay kasetidi yootiis. (Isiyaasa 25:8, 9) Neeni Yihoowa eeshshata loytta akeekiyo wode, I ooppenne aadhdhiya Aawa gidiyoogaa akeekana.
Yesuusi Daabbuwan Oottido Malaalissiyabaappe Nuuni Ay Tamaariyoo?
14 “Nuuyyo hachchissi koshshiya qumaa” immanaadan woossana mala Yesuusi tamaarissido wode, ‘Xoossaa shenee saluwan haniyogaadan saꞌankka’ hananaadan woossana malakka yootiis. (Mat. 6:9-11) He wode saꞌay ay mala gidana gaada qoppay? Xoossaa shenee saꞌan haniyo wode loꞌꞌo qumay deꞌanaagaa Geeshsha Maxaafay yootees. Isiyaasa 25:6-8y, maanawu malꞌꞌiya qumay kumi palahanaagaa yootees. Qassi Mazamure 72:16y hagaadan gees: “Biittan daro kattai mokko; dereti kattan kamettona.” He kattaappe ekkada neeni dosiyo qumaa woy oorattabaa kattanawu yeemottay? Hegaa bollikka, woyniya turata tokkada eta ayfiya maanawu yeemottennan aggakka. (Isi. 65:21, 22) Qassi saꞌan deꞌiya ubbay hegeetun ufayttana.
Nuuni Yihoowa Siiquwan Waani Goꞌettiyoo?
11 Gannate saꞌan neessi deꞌoy ay mala gidanaakko qoppa. Neeni sahettana woy hayqqana gaada mule hirggakka. (Isi. 25:8; 33:24) Yihooway neeni koyiyo loꞌꞌoba ubbaa neessi immana. Mehiya doꞌaabaa loytta eranawu koyay? Muuziqa miishshata kaaꞌiyogaa tamaaranawu koyay? Misiliya waati medhdhiyakko tamaaranawu koyay? Gannatiyan keexuwa halchchuwa kessiyageeti, keexxiyageetinne goshshanchchati koshshiyogee qoncce. Qassi yan qumaa kattiyogaa, issi issibaa giigissiyo miishshata medhdhiyogaanne saꞌaa loyttiyogaa malabatun maaddiyageetinne moorettidabaa giigissiyageeti koshshiyogee qoncce. (Isi. 35:1; 65:21) Neeni merinawu deꞌiyo wode ha ubbabatanne hara darobata oottiyo wodiya demmaasa.
12 Hayquwappe denddiyageeta mokkiyogee keehi ufayssiyagaa gidana! (Oos. 24:15) Yihooway medhdhido darobata tamaariyogan abaa loyttada eriyogee nena ay keena ufayssanaakkokka qoppa. (Maz. 104:24; Isi. 11:9) Aybinne zilꞌꞌiyabi baynnan Yihoowawu goynniyogee ha ubbabaappe aaruwan keehi ufayssiyaba gidana! Nagaran ‘guutta wodiyawu ufayttana’ gaada sinttappe demmana ha anjjota agganawu koyay? (Ibr. 11:25) Mule koyakka! Ha anjjoti nuuni ha wodiyan aggibayiyo aybippekka aadhdhoosona. Gannate saꞌay ubbatoo hidoota xalla gididi attennaagaa hassaya. Wurssettan, nuuni yan deꞌana. Ha ubbabay hanana danddayiyoy Yihooway nuna keehi siiqidi ba Naꞌay nuuyyo hayqqanaadan oottido gishshataassa!
Ayyaanaaban Alꞌꞌobaa
Yihooway Ne Afutta Ubbaa Akeekees
18 Yihooway giidobay Hizqqiyasa minttettiis. Hegaadan Xoossaa Qaalay nunakka minttettana danddayees. Nuuni unꞌꞌettiyo wode Geeshsha Maxaafaa baggaara Yihooway yootiyobay nuna minttetteesinne nuuni woppu gaanaadan maaddees. (Roo. 15:4) Arggo Afirkkan deꞌiya issi michchiya kanssere O oyqqidoogaa erada darotoo yeekkaasu. A hagaadan gaasu: “Tana keehi minttettida xiqisee Isiyaasa 26:3. Darotoo nuuni nu metuwa qaarana danddayennaba gidikkokka, ha xiqisee Yihooway nuuni woppu gaanaadaaninne ay metuwakka genccanaadan maaddana danddayiyogaa yootees.” Hidooti baynnaba milatiya hanotay nena gakkin, nena minttettida xiqisee deꞌii?
ICHCHASHE 26–USUPPUNE 1
XOOSSAA QAALAN DEꞌIYA ALꞌꞌOBAA ISIYAASA 28-29
Intte Inxxarssaaninne Intte Wozanan Yihoowa Bonchchite
ip-1 299 ¶23-mwbr
Isiyasi Yihoowi Oottana ‘Imatta Oosuwa’ Kasetidi Yootiis
23 Yihudan haymaanootiya kaalettiyageeti banttana ayyaanaaban wozannaama giikkonne, Yihoowa aggidosona. Shin eti ammanennaagaa, pokkiya tunabaa oottiyogaanne asaa Xoossaappe shaakkiya ogiyan kaalettiyogaa kammanawu suurebaanne suure gidennabaa xeelliyagan bantta geella qofaa tamaarissoosona. Eti sholloorebaa hanido gishshawu, Yihoowi ‘malaaliya’ ba ‘imatta oosuwan’ eta oychchana. I hagaadan giis: “Hagee asai ba bolla doonan taakko shiiqees; ba inxxarssan tana bonchchees; shin eta wozanai taappe haahuwan de7ees. Eti asi medhdhido wogaa tamaariiddi, taassi hadan goinnoosona. Hegaa gishshau, be7ite, taani ha asaa bolli zaarettadakka maalaalissiyaabaa oottana; maalaaliyaabaanne oorattabaa oottana. eranchchatu aadhdhida eratettai daallamana; eta akeekanchchatu akeekaikka qosettana.” (Isiyaasa 29:13, 14) Yihoowi alamiyan wolqqaama Baabiloone kawotettay kaddida Yihudaa haymaanootiya muleera xayssanaadan oottiyo wode, eti bantta qofaadan hayyottiyobaynne akeekiyobay xayana. Koyro xeetu layttan bantta qofaadan hayyottiyageeti Ayhudata wora kaalettido wodekka hegaadan haniis. Ha wodiyankka banttana Kiristtaane giyageeti hegaadan hanana.—Maatiyosa 15:8, 9; Roome 11:8.
Xillota Aybinne Xubbana Danddayenna
7 Yesuusi ba wodiyan deꞌiya haymaanootiyaa kaalettiyaageeti asay Yihoowayyo suure goynnanaadan tamaarissenna gishshawu, eta eqettiis. Leemisuwawu, Parisaaweti cimmiyaageeta gidiyoogaa I qonccissiis; ayssi giikko, eti bantta kushiyaa meecettanawu qoppiyoogaa keena banttana yelidaageetuyyo koshshiyaabaa kunttanawu qoppokkona. (Maa. 15:1-11) Yesuusi erissiyo ashkkarati I haasayidoban maalaalettennan aggokkona. Yaatiyo gishshawu, eti A hagaadan oychchidosona: “Parisaaweti neeni haasayidoogaa siyidi, hanqqettidoogaa akeekai?” yaagin, Yesuusi hagaadan zaariis: “Saluwan de7iya ta Aawai tokkibeenna mitta ubbai shodettana. Etabau hirggoppite; eti qooqe kaalettiya qooqeta; qooqee qooqe kaalettikko, naa77aikka ollan kunddana.” (Maa. 15:12-14) Haymaanootiyaa kaalettiyaageeti Yesuusi haasayidobaa gishshawu hanqqettiyaaba gidikkonne, I tumaa yootiyoogaa aggibeenna.
Merinawu Yihoowa Imatta Gida!
8 ‘Bantta wozanan tumaa haasayiyageeti’ hara asi eta beꞌiyo wode xalaalan gidennan, banttarkka deꞌiyo wodekka Xoossawu azazettoosona. (Isi. 29:13) Eti cimmiya asa gidokkona. Cimmiya uri Yihoowa higgetuppe amaridaageeti loꞌꞌo gidokkona giidi qoppiyogaa doommana danddayees. (Yaaq. 1:5-8) Keehi koshshennabata giidi I qoppiyo allaalletun Yihoowawu azazettennan aggana danddayees. I azazettennan ixxiyo wode iitabay A gakkennaba milatikko, hanttaaraba oottiyogaa doommana danddayees. I Xoossawu haggaaziiddi deꞌiyabadan qoppikkokka A goynuwa Yihooway ekkenna. (Era. 8:11) Shin nuuni ubbaban tumanchcha gidanawu koyoos.
Ayyaanaaban Alꞌꞌobaa
it “Ariiꞌeela” ¶1; it “Ariiꞌeela” Paydo 3-mwbr
Ariiꞌeela
(Ariiꞌeela) [Xoossawu Yarshshiyosaa Gimbbiya; woy Xoossaa Gaammuwa].
3. Isiyaasa 29:1, 2, 7n deꞌiya Yerusalaame geema suntta. Yerusalaamee yarshshiyosay A giddon deꞌiyo Xoossaa garuwa qato. Hegaa gishshawu, he katamay Xoossawu yarshshiyosaa gimbbe mala. Qassi Yihoowayyo goynniyo geeshsha goynuwawu humꞌꞌodan xeelliyo soho. Shin Isiyaasa 29:1-4n Baabilooneti 607 K.K., Yerusalaame xayssana aayyeero giissiya xayuwabay odettiis; he wode A hara ginan ‘yarshshiyosaa gimbbe’ gidana: hegeekka, he kataman suuttay goggana, I taman xuugettana, qassi he bashshan hayqqidaageetu anhay yan kumana. He bashshawu gaasoy paydo 9ppe 16n odettiis. Gidoppe attin, he bashshaa halchchida deretu halchchoy halanaagaa Isiyaasa 29:7, 8y yootees.
USUPPUNE 2-8
XOOSSAA QAALAN DEꞌIYA ALꞌꞌOBAA ISIYAASA 30-32
Yihoowa Qefiya Garssan Deꞌite
w01 11/15 16 ¶7-mwbr
Yihoowi Nuussi Baqati Attiyosaa
7 Yihoowi nuussi baqati attiyosaa gidiyo gishshawu, ha qofay nuna minttettees: “I ba baalletun nena kammana; a qefetu garssi neeni baqatada qosetta attana. I ammanettiyaagaa; a tumatettai neeyyo gonddalle.” (Mazamure 91:4) Kafoy ba maraa naaganawu aallanttiyogaadan, Xoossay nuna naagees. (Isiyaasa 31:5) ‘I ba baalletun nuna kammees.’ Xaaxi waaxin, kafuwa ‘baalleti’ A qefeta. Kafoy ba maraa qohiyabaappe naaganawu qefiyan kammees. Nuuni Yihoowi essido tumu Kiristtaane dirijjitiyan qatido gishshawu, kafo maraadan A baalletu garssan hirggennan deꞌoos.—Uruto 2:12; Mazamure 5:1, 11.
Meto Wodiyan Yihooway Nena Maaddana
13 Nuuni oottana koshshiyabaa. Haratuppe haakkennan agganawu baaxeta. Nuuni haratuppe haakkiyo wode nubaanne nuna gakkiya metuwa xalla qoppana danddayoos. Hegaappe denddidaagan nuuni loꞌꞌobaa kuuyennan aggana danddayoos. (Lee. 18:1) Azzanttiyabay nuna gakkiyo wode, nurkka takkiyo wodee nuussi keehi koshshiyogee tuma. Shin nuuni nurkka adussa wodiya takkikko, Yihooway goꞌettiyo asatu maaduwa sheneho gaana danddayoos. Meto wodiyan yaatiyogee keehi deexxiyaba gidikkokka so asaappe, laggetuppenne cimatuppe maaduwa ekka. Yihooway nena maaddanawu eta goꞌettiyogaa akeeka.—Lee. 17:17; Isi. 32:1, 2.
‘Yihooway Nena Waati Minttii?’
19 Neeni ne hidootaa waata minttana danddayay? Leemisuwawu, neeni saꞌan merinawu deꞌanawu hidootiyaba gidikko, Geeshsha Maxaafay gannatiyabaa yootiyobaa nabbaba, qassi hegaa wotta dentta qoppa. (Isi. 25:8; 32:16-18) Ooratta alamiyan deꞌoy ay mala gidanaakko wotta dentta qoppa. Neeni yan deꞌiyabadan qoppa. Neeni oona beꞌay? O cenggurssaa siyay? Ne qoppiyobay aybee? Gannatee ay mala gidana danddayiyakko qoppanawu nu xuufetun deꞌiya misiliya xeella, woy Yaana Ooratta Alamiya, woykko He Wodiya Qoppa (Amaarattuwa) woy qassi Yeemoyida Sarotettaa! giyagaa mala biiduwan giigida muuziqaa beꞌa. Nuuni ooratta alamiyan demmanabaa ubbatoo qoppikko, nu metoy ‘haꞌꞌissawu waayettiyo guutta waaye’ gidana. (2 Qor. 4:17) Yihooway neessi immido hidootay neeni minnanaadan oottana.
Ayyaanaaban Alꞌꞌobaa
it “Oyttaa” ¶6-mwbr
Oyttaa
Harabawukka Leemiso. Geeshsha Maxaafan “oyttay” darobawu leemiso. Leemisuwawu, Yaasunne Kaaleebi Kanaanen deꞌiya asati banttawu ‘haatta ushshakka gakkennaagaa’ woykko oytta muussa mala gidanaagaa, hegeekka, eta metootennan xoonana danddayiyogaanne hegaappe denddidaagan Israaꞌeela asay minnanaagaa etayyo yootidosona. (Qoo 14:9) Mazamure 80:5n, Israaꞌeelata Heemmiya Yihoowabaa, “Neeni yeehuwaa qumadan [woy oyttadan] eta mizadasa” giyobay Xoossay ufayttennaagaara gayttida gita kayyuwa yootees. Yihoowi ba asay morkketi dooddin hananabay oyttadaaninne haattadan etawu meeze gidanaagaa qonccissanawu “metuwaa oittaanne tuggaa haattaa” etawu immanaageekka odettiis.—Isi 30:20.
USUPPUNE 9-15
XOOSSAA QAALAN DEꞌIYA ALꞌꞌOBAA ISIYAASA 33-35
“I Intteyyo Intte Wodiyaa Minttiyaagaa”
Meto Wodiyan Yihooway Nena Maaddana
7 Metiyabaa. Waayissiyabay nuna gakkiyo wode nuuni kaseegaadan qoppana woy oottana danddayokko. Azzanttiyabay nuna bolli bollan gakkiiddi deꞌiyabadan qoppana danddayoos. Qommoora ibay odettido Aana Luwisi hayqqi simmin daro ogetun keehi azzanidoogaa yootaasu. A hagaadan gaasu: “Issi issitoo taani unꞌꞌettaasinne azzanaas. Qassi I hayqqidoogan yiillotaas.” Aana barkka attidabadan qoppaasu; qassi Luwisi kase loytti oottiyobatuura gayttidaagan A kuuyana koshshido wode hidootaa qanxxaasu. Issi issitoo A beetay denddido abbaa giddon deꞌiyabadan qoppaasu. Nuuni keehi azzaniyo wode Yihooway nuna waati maaddii?
8 Yihooway oottiyobaa. I nuna minttanawu qaalaa geliis. (1 PHeexiroosa 5:10 nabbaba.) Abban denddiya beetay markkabiya qohiya hanotan yaanne haanne sugana danddayees. Hegaadan qaaxxennaadan oottanawu daro markkabetuyyo naꞌꞌu baggaarakka haattaa giddo yeggiyobay deꞌees. Hegee markkabee keehi qaaxxennaadan maaddana danddayees; yaatiyo wode markkabiyan deꞌiya asay qohettenna, qassi metootennan bees. Shin markkabee sinttawu biyo wode hegee loytti oottees. Hegaadankka, wayssiya wodiyan nuuni Yihoowawu ammanettidi haggaaziyo wode, I nuna minttana.
Paacee Gakkiyo Wode Waani Genccana Danddayiyoo?
10 Ufayttiyoogaa aggennaadan ay oottana danddayiyoo? Yihooway aadhdhida eratettaa immanaadan oychchite. Nuuni paacee gakkishin ufayssan genccanawu, loꞌꞌobaa kuuyanawu Yihooway aadhdhida eratettaa immanaadan kasetidi woossana bessees. (Yaaqooba 1:5 nabbaba.) Yihooway nu woosaa sohuwaara zaaribeenna giidi qoppikko, nuuni ay oottana koshshii? Yaaqoobi nuuni zaari zaaridi Xoossaa ‘woossanaadan’ yootiis. Yihooway nuuni zaari zaaridi oychchin nuna hanqqettenna. Nuna gakkiya paaciyaa genccanawu aadhdhida eratettaa immanaadan nuuni A oychchikko, saluwan deꞌiya nu Aaway “kehatettan” immees. (Maz. 25:12, 13) I nuna gakkiya metuwaa beꞌees, nuuni waayettiyo wode qarettees, qassi nuna maaddanawu keehi koyees. Hegee nuuni ufayttanaadan oottees! Gidoshin, Yihooway nuussi aadhdhida eratettaa waatidi immii?
11 Yihooway ba Qaalaa baggaara nuussi aadhdhida eratettaa immees. (Lee. 2:6) Nuuni he aadhdhida eratettaa demmanawu Xoossa Qaalaanne nu xuufeta xannaꞌana bessees. SHin nu coo xannaꞌiyoogaa xallay gidenna. Nuuni oottanaadan Xoossay yootiyoobaa oottana bessees. Yaaqoobi “Xoossaa qaalaa oottiteppe attin, sissa [xallaa]” siyoppite yaagiis. (Yaaq. 1:22) Nuuni Xoossay zoriyoogaadan oottiyo wode, kaseppe aaruwan eeno giyaanne maariya, qassi saro asa gidoos. (Yaaq. 3:17) He eeshshati nuuni ayba paacee gakkikkonne ufayttiiddi genccanaadan maaddoosona.
ip-1 352-355 ¶21-22-mwbr
“Xiyoonen De7iya Ooninne, ‘Taani Harggais’ Yaagenna”
21 Shin Isiyasa hiraagay ha wodiyankka polettees. Yihoowa asay ha wodiyan ayyaanaabankka paxiis. Eti shemppoy hayqqenna giyogaa, Sillaasiyanne siꞌooliya tamaa mala worddo timirttiyappe laꞌa kiyidosona. Kandduwa xeelliyagan etawu kaaletoy imettees; hegee eti pokkobaa oottennaadaaninne loꞌꞌobaa kuuyanaadan maaddees. Qassi Yesuus Kiristtoosi eta wozanawu yarshshettido gishshawu, eta kahay geeshsha gidin, Xoossaa sinttan geeshshatettan deꞌoosona. (Qolasiyasa 1:13, 14; 1 Pheexiroosa 2:24; 1 Yohaannisa 4:10) Ayyaanaaban hegaadan paxiyogee asatettan maaddees. Leemisuwawu, Kiristtaaneti pokkiya tuna nagaraa oottennaageenne tambbuwa sarbbennaagee inddaa gaytettan oyqqiya harggiyappenne issi issi kansseriyappe naagees.—1 Qoronttoosa 6:18; 2 Qoronttoosa 7:1.
22 Hegaa bollikka, Isiyaasa 33:24y Armmageedoonappe simmin Xoossay ehiyo ooratta alamiyan aaruwan polettana. Mase Kawotettaa haaruwan, asay ayyaanaaban paxiyogaa bolli, asatettankka laggetiyabi baynna paxuwa paxana. (Ajjuutaa 21:3, 4) Seexaanaa alamee xayi simmin sohuwara, Yesuusi saꞌan oottidoogaa mala malaaliyabati kumetta saꞌan hananaagee qoncce. Qooqeti xeellana, tulleti siyana, wobbeti hemettana! (Isiyaasa 35:5, 6) Hegaappe denddidaagan, gita waayiyappe attiyageeti ubbay saꞌaa gannate oottiyo gita oosuwa maadetti oottana.
Ayyaanaaban Alꞌꞌobaa
‘Geeshshatettaa Ogiyan’ Biyoogaa Aggoppa
8 Amaridaageeti hagaadan qoppana danddayoosona: ‘He ubbabay keehi ufayssiyaaba gidikkonne, Ayhudatuura gayttidaagan hanidabay daro layttaappe simmin ha wodiyan deꞌiya nuna maaddii?’ Ee maaddees; ayssi giikko, nuuni oottiyoobaa ‘Geeshshatettaa Ogiyan’ hemettiyoogaara geeddarssana danddayoos. Nuuni tiyettidaageeta woy ‘hara dorssata’ gidin ‘Geeshshatettaa Ogiyan’ aggennan hemettana koshshees. Hegee nuuni ayyaanaabaa gannatiyan deꞌanaadaaninne Kawotettay sinttappe ehaana anjjota demmanaadan oottana. (Yoh. 10:16) Daro miiloone attuma asati, macca asatinne naati 1919 M.Lppe doommidi worddo haymaanootiyaa xaaxa waaxa qonccissiya Gita Baabiloonippe kiyidi leemiso hanotan odettida ogiyan hemettiyoogaa doommidosona. Neenikka etappe issuwaa gidennan aggakka. Asay he ogiyan biyoogaa 100 gidiya layttaappe kase doommikkonne, harati he ogiyaa giigissiyoogaa daro layttappe kase doommidosona.
Haasayaa
lmd gujo qofaa A, qofaa 15
Nuuni waati woossanaakko Geeshsha Maxaafay tamaarissees.—Maa. 6:7-13; Luq. 11:1-4.
USUPPUNE 16-22
XOOSSAA QAALAN DEꞌIYA ALꞌꞌOBAA ISIYAASA 36-37
“Neeni Siyido Cashshaa Qaalaassi Yayyoppa”
it “Hizqqiyasa” Paydo 1 ¶14-mwbr
Hizqqiyasa
Sanaakireebi Yerusalaamen Xoonettidoogaa. Hizqqiyasi qoppidoogaadan, Sanaakireebi Yerusalaame olanawu murttiis. Sanaakireebi ba olanchchatuura mino gimbbiyan direttida Laakisha katamaa dooddi uttidi, Yerusalaame asay awu anggati gaanaadan olaa gadaawatuura amarida olanchchata kiittiis. Kiitettidaageetu gishshaa haasayiya Rabishaaqi (bitaniya suntta gidennan, ayyo olaa beeraa sunttaa) Ibraawettuwa loytti haasayees. I hara biittaa asatu xoossati banttassi goynniyageeta Asoore kawuwappe ashshibeennaagaadan Yihoowikka Yerusalaame ashshana danddayennaagaa ceeqettidi, ba qaalaa xoqqu oottidi Hizqqiyasanne Yihoowa qilliicciis.—2Kaw 18:13-35; 2Odi 32:9-15; Isi 36:2-20.
ip-1 387 ¶10-mwbr
Kawoy Ba Ammanuwan Anjjettiis
10 Hegaappe simmin, Rabishaaqi Ayhudati olawu etappe keehi laafa gidiyogaa yootiis. I keehi ceeqettidi, hagaadan naassiis: “Neeni togganau danddayiya, gidiya asa demmikko, naa77u sha7u parata taani neeyyo immana.” (Isiyaasa 36:8) Shin loohida Yihudaa olanchchati daro woy guutta gidiyogee tumuppe qofissiyabee? Akkay gidenna; ayssi giikko, Yihudaa asay attanaadan oottiyay eta olaa minotettaa gidenna. Leemiso 21:31, “Olaayyo paraa kooranau danddayettees; shin olaa xoonissiyaagee GODAA” yaagidi hanotaa qonccissees. Hegaappe simmin, Rabishaaqi Yihoowi anjjiyoy Asooretappe attin, Ayhudata gidennaagaa yootiis. Hankkoode Asooreti Yihudaa moottaa hegaadan gelana danddayennaagaa I yootiis.—Isiyaasa 36:9, 10.
ip-1 388 ¶13-14-mwbr
Kawoy Ba Ammanuwan Anjjettiis
13 Rabishaaqi ba toora mala haasayan hara ola miishshaa denttiis. Hizqqiyasi, “GODAI nuna ashshana” giikkokka, Ayhudati ammanennaadan Rabishaaqi etawu yootiis. Tammu yaratu kawotettaa Asooreti xoonennaadan Samaariya xoossati diggana danddayibeennaagaa Rabishaaqi Ayhudata hassayissiis. Asooreti xoonido hara biittatu xoossati shin? I hagaadan giis: “Hamaata xoossatinne Arifaada xoossati awan de7iyoonaa? Safuriwaima giyo katamaa xoossati awan de7iyoonaa? Eti Samaariyaa ta kushiyaappe wotti ekkidonaa?”—Isiyaasa 36:18-20.
14 Kaddida Samaaree Hizqqiyasi haariyo Yerusalaameppe keehi dummatiyogaa worddo xoossatussi goynniya Rabishaaqi akeekennaagee tuma. Tammu yaratu kawotettaa ashshanawu Samaariya worddo xoossatussi wolqqi baa. (2 Kawotu 17:7, 17, 18) Shin Hizqqiyasi haariyo Yerusalaame asay worddo xoossatussi goynniyogaa aggidi, zaarettidi Yihoowawu haggaazees. Gidoppe attin, Yihudaa gishshaa eqqida heezzu asati Rabishaaqawu hegaa qonccissanawu malibookkona. “Asai issi qaalanne ayyo zaarennan co77u giis. Aissi giikko, kawoi eta, ‘Ayyo ainne zaaridi odoppite’ yaagi wottiis.” (Isiyaasa 36:21) Eliyaqiimi, Sheebininne Yoꞌaahi Hizqqiyasakko simmidi, Rabishaaqi woygidaakko ayyo yootidosona.—Isiyaasa 36:22.
Ayyaanaaban Alꞌꞌobaa
it “Bixaalaa” ¶4-mwbr
Bixaalaa
Yihoowi Asoora Kawuwa Sanaakireebawu, “Taani ne siiriyan ta dafuwaa aattana; ne doonankka ta bixaalaa barssana. Yaatada ne yiido ogiyaara taani nena guyye zaarana” yaagiis. (2Kaw 19:28; Isi 37:29) Sanaakireebi ba shenen gidana xayikkonne Yihoowi wolqqanttin Yerusalaame dooddidoogaa aggidi Nanawe simmiis; yan A naaꞌꞌu attuma naati A guyyeppe woridosona. (2Kaw 19:32-37; Isi 37:33-38) Yihoowi morkketu manggaagan bixaalaa barssiyogee, mehiya bixaalan koyidosaa efiyogaadan eta muleera haaranaagaa bessees.—Isi 30:28.
USUPPUNE 23–LAAPPUNE 1
XOOSSAA QAALAN DEꞌIYA ALꞌꞌOBAA ISIYAASA 38-40
“I Ba Wudiyaa Henttanchchaadan Mizees”
Geeshsha Maxaafay A Xaafissidaagaabaa Woygii?
3 Isiyaasa 40:8 nabbaba. Daro shaꞌu layttawu Xoossaa Qaalay ammanettida asawu loꞌꞌo zoriyaa zoriiddi takkiis. Waatidi? Geeshsha Maxaafay daro layttappe kase sohuwaara moorettiyaaban xaafettido gishshawu, koyro xaafettidaageetuppe awugeenne ha wodiyan baawa. SHin Yihooway Geeshsha Maxaafaa asay duuqqidi xaafanaadan oottiis. He asati nagaranchcha gidikkokka, akeekan xaafidosona. Leemisuwawu, Ibraawetto Geeshsha Maxaafaa xeelliyaagan issi eranchchay hagaadan giis: “Beni xaafettida maxaafatuppe qofay laamettennan duuqetti xaafettida hara ay maxaafaykka baynnaagaa nuuni ammanoos.” Yaatiyo gishshawu, Geeshsha Maxaafay sohuwaara moorettiyaaban daro layttappe kase xaafettidabanne A duuqqi xaafida asati nagaranchcha gidikkonne, nuuni ha wodiyan Geeshsha Maxaafaappe nabbabiyoobay, A xaafissida Yihoowa qofaa gidiyoogaa ammanettana danddayoos.
4 Yihooway ‘loꞌꞌo imo ubbaanne kumetta woyto ubbaa’ nuussi immees. (Yaaq. 1:17) Geeshsha Maxaafay Yihooway nuussi immido alꞌꞌo imotatuppe issuwaa. Issi uri nuussi imotaa immiyoogee I nunanne nuussi koshshiyaabaa loytti eriyoogaa bessees. Geeshsha Maxaafaara gayttidaagankka hanotay hegaa mala. Nuuni he imotaa pilggiyo wode Yihoowaabaa darobaa tamaaroos. I nunanne nuussi koshshiyaabaa loytti erees. Yihoowa eeshshatuppe heezzata xeelliyaagan Geeshsha Maxaafaappe nuuni tamaariyoobaa ha huuphe yohuwan pilggana; hegeetikka, A aadhdhida eratettaa, suure pirddaanne siiquwaa. Xoossay aadhdhida eranchcha gidiyoogaa Geeshsha Maxaafay waati qonccissiyaakko ane koyro beꞌoos.
‘Xoossay Nu Qatoy’ Naagiyo Wolqqaa
7 Yihooway bana henttanchchaara geeddarssiyoogan, I nuna naaganawu wozanappe koyiyoogaa yootees. (Hizqqeela 34:11-16) Isiyaasa 40:11 Yihoowabaa yootiyoobaa ha maxaafan SHemppo 2n beꞌidoogaa hassaya: “I ba wudiyaa henttanchchaadan mizees; ba dorssa maratakka ba qesiyan shiishshidi, ba kiyuwan idimmana.” Guutta dorssa maray henttanchchaa “kiyuwan” waani idimettii? Dorssa maray henttanchchaakko shiiqidi A gediyaa loddaara bochchana danddayees. SHin hokkidi dorssa maraa tookkidi ba kiyuwan loddan idimmiyay henttanchchaa. Hagee nu Gita Henttanchchay nuna naaganawu koyiyoogaa bessiya keehi loꞌꞌo leemiso!
I “Daafuranchchau Wolqqaa Immees”
4 Isiyaasa 40:26 nabbaba. Saluwan deꞌiya xoolintteta ubbaa ooninne qoodana danddayenna. Milkkiwey gaalakisiyaa xallan 400 biiloone gidiya xoolintteti deꞌiyoogaa saynttistteti yootoosona. SHin Yihooway eta ubbawu sunttaa sunttiis. Hegaappe ay tamaariyoo? Yihooway xoolinttetubaa qoppiyo gishshawu, neeyyo hegaappe aaruwan qoppiyoogee erettidaba. Neeni oottana bessiyo gishsha xallawu gidennan, A siiqiyo gishshawu ayyo oottaasa. (Maz. 19:1, 3, 14) Nu siiqo aaway nebaa wurssi erees. I “harai atto, [ne] huuphiyan de7iya binnaana” ubbaakka qoodi wottiis. (Maa. 10:30) Qassi mazamuraawee, “Suure asatu ogiyaa GODAI erees” yaagiis. (Maz. 37:18) Nena gakkiya metuwaa I akeekees; qassi he ubbaban genccanaadan neeyyo wolqqaa immana danddayees.
5 Isiyaasa 40:28 nabbaba. Yihooway wolqqa ubbawu Pultto. Leemisuwawu, I awa xallawu immiyo wolqqaa qoppa. Saynisiyaa eranchchay Devid Bodenesi, sokonddiyan sokonddiyan awa ayfiyaappe xuuqqi kiyiya wolqqay daro biiloone atome bombbiyaagaa keena gidiyoogaa yootiis. Hara eranchchay qassi kumetta saꞌan deꞌiya asawu 200,000 layttawu gidiya wolqqay issi sokonddiyan awa ayfiyaappe kiyiyoogaa akeekiis! Awaayyo wolqqaa immida Yihooway nu metuwan genccanawu nuussi koshshiya wolqqaa immanaagee qoncce.
6 Isiyaasa 40:29 nabbaba. Yihoowawu haggaaziyoogee keehi ufayssees. Yesuusi ba erissiyo ashkkaratuyyo, “Ta qambbaran waaxettite” yaagiis. Qassi I gujjidi, “Intte shemppuwaukka intte shemppo demmana. Aissi giikko, ta qambbarai giiga; qassi taani inttena toossidoogeekka kaushsha” yaagiis. (Maa. 11:28-30) Hegee tuma! Issi issitoo, nuuni shiiquwaa baanawu woy haggaazanawu sooppe kiyiyo wode daafurana danddayoos. SHin simmiyo wode waaniyoo? Gazddoos; qassi nuna gakkiya metuwaa genccanawu giigidaageeta gidoos. Yesuusa qambbaray tumukka giiga!
Ayyaanaaban Alꞌꞌobaa
ip-1 400 ¶7-mwbr
“Ta Asaa Minttettite”
7 Ha hiraagay polettidoy usuppuntta xeetu layttan K.K., tumu goynoy zaaretti eqqido wode xallaana gidenna. Koyro xeetu M.Lnkka polettiis. “Bazzuwan ba qaalaa xoqqu oottidi” haasayiyogan Isiyaasa 40:3 polidaagee Asaa Haattan Muukkiya Yohaannisa. (Luqaasa 3:1-6) Yohaannisi Isiyasi giidobay ba bolli polettidoogaa ayyaanay kaalettin yootiis. (Yohaannisa 1:19-23) Yohaannisi 29 M.Lppe doommidi, Yesuus Kiristtoosawu ogiya giigissiis. Yohaannisi kasetidi awaajjidoogee asay I yootiyobaa siyanawunne A kaallanawu yaana geetettida Masiya koyanaadan denttettiis. (Luqaasa 1:13-17, 76) Zilꞌꞌettidi laamettidaageeti Xoossaa Kawotettaa xallay kessana danddayiyo laꞌatettawu, hegeekka, nagaraanne hayquwa aylletettaappe kiyanaadan Yihoowi Yesuusa baggaara eta kaalettana. (Yohaannisa 1:29; 8:32) Ayyaanaa Israaꞌeelatuppe attidaageeti 1919n Gita Baabiloonippe laꞌa kiyiyonne tumu goynuwa zaarettidi goynniyo wode Isiyasi yootidobay aaruwan polettiis.