Eray?

Baabiloonen deꞌida Belshshaaxaara oosuwaabaa biittaa bookkidi demmidobay waati qonccissii?

GEESHSHA MAXAAFAA boriyaageeti, daro layttawu, Daaneela maxaafan odettida Kawuwaa Belshshaaxaari mule deꞌibeenna giiddi takkidosona. (Dane. 5:1) Eti hegaadan qoppidoy biittaa bookkidi xannaꞌiyaageeti I deꞌidoogaa bessiya naqaashaa demmibeenna gishshataassa. SHin, hegee 1854 M.Ln laamettiis. Aybissi?

He laytti, J. J. Teyler geetettiya, Britishe kawunssilee ha wodiyan tohossa Iraaqen deꞌiya beni wode Ura katamay laalettido sohuwaa xannaꞌiis. Hegan, gita keelaa giddon urqqaappe oosettida koottaa milatiya corabata demmiis. Hegeetu geesay tammu santti meetire keena aduqqees, qassi eta bolli xaafettidabay deꞌees. He koottaa milatiyaabatuppe issuwaa bolli xaafettidabatuppe issoy Baabiloone Kawuwaa Naabooniidesinne A bayra naꞌaa Belshshaaxaari adussa layttaa deꞌanaadan shiiqida woosa. Hegaappe denddidaagan, Belshshaaxaari deꞌuwan deꞌida asa gididoogaa boriyaageetikka maayettidosona.

SHin, Geeshsha Maxaafay Belshshaaxaari deꞌuwan deꞌida asa xalla gidennan kawo gidiyoogaa yootees. Boriyaageeti hegee deꞌishinkka siroosona. Leemisuwawu, 19tta xeetu layttan deꞌida Wiliyam Talbot geetettiya Inggilize saynttisttee issoti issoti “Belshshaaxaari ba aawaa Naaboonidesaara issippe haaridoogaa yootiyoobaa gidikkonne, hegaa bessiya guutta naqaashaykka” baynnaagaa yootiis.

Urqqaappe merettida koottaa milatiya haratun xaafettidabay Belshshaaxaara aawaa Naabonidesi adussa layttawu Baabilooneppe gaxaara takkidoogaa qonccissido wode he palamay shatimettiis. I baynna wode aybi hanidee? Insaykiloppidiyaa Britaanika giyo maxaafay yootiyoogaadan “Naabonidesi baqatidi biido wode, Belshshaaxaari ba araatan uttanaadaaninne olanchchatuppe dariya baggaa azazanaadan sunttiis.” Hegaa gishshawu, Belshshaaxaari he wode Baabiloonen kawodan oottiis. Biittaa bookkidi xannaꞌiyaagaanne qaalaa eranchchaa gidida Alen Milardi “Daaneela Maxaafay Belshshaaxaara Baabiloone kawo giidi xaafidoogee” bessiyaaba yaagiis.

Xoossaa ashkkaratussi Daaneela maxaafay ammanttiyaagaanne Xoossaa ayyaanan xaafettidaagaa gidiyoogawu ubbaappe aadhdhiya markkay Geeshsha Maxaafan deꞌiya naqaashaa gidiyoogee tuma.—2 Xim. 3:16.