Ne Haggaazo Moottan Deꞌiya Asaa Waata Xeellay?

1-2. Yesuusi Yohaannisa 4:35, 36n deꞌiya qofaa yootidoogee woyganaassee?

YESUUSI kattay biron caariyo gadiyaara kanttennan aggenna. (Yoh. 4:3-6) He kattay oyddu agina gidiya wodee aadhdhin cakettana danddayees. Hegaa gishshawu, Yesuusi “goshshaa loitti xeellite; kattai cahaa bessiis” yaagidoogee meeze gidennaba milatennan aggenna. (Yohaannisa 4:35, 36 nabbaba.) I woyganawu koyidee?

² Yesuusi kattaabaa gidennan, asaa shiishshiyoogaabaa haasayiiddi deꞌiyaaba milatees. Sohuwaara aybi hanidaakko qoppa. Ayhudati Samaariyaa asaara hassayokkona; shin Yesuusi Samaariyaa maccaaseessi sabbakin A siyaasu! Yesuusi gadiyaabaa yootiiddi “kattai cahaa bessiis” giidoogee, Yesuusabaa maccaaseeppe siyidi appe tamaaranawu yiiddi deꞌiya cora Samaare katamaa asaabaa yootanaassa. (Yoh. 4:9, 39-42) Issi Geeshsha Maxaafaa eranchchay, “Asay Yesuusaara gayttanawu sohuwaara yiidoogeenne I yootiyoobaa siyidoogee eti cahaa bessida katta mala gidiyoogaa bessees” yaagiis.

3. Neeni asaa Yesuusaagaadan xeellikko, loytta sabbakiyaagaa waana gidanee?

³ Neeni etawu mishiraachchuwaa sabbakiyo asaa waata xeellay? Neeni eta cahaa bessida kattaadan xeelay? Yaatikko, heezzubay hanana. Koyroogee, kaseegaappe eesuwan sabbakana. Cahaa wodee guutta; coo hada aattiyo wodee baawa. Naaꞌꞌanttoogee, asay mishiraachchuwaa siyiyoogaa beꞌiyoogee nena ufayssana. Geeshsha Maxaafay, “Asai kattaa cakkiyo wode [ufayttees]” yaagees. (Isi. 9:3) Qassi heezzanttoogee, ne haasayissiyo asa ubbay sinttappe erissiyo ashkkara gidana gaada neeni qoppana; yaatiyo gishshawu ne haasayissiyo qofaa asaa ufayssiya ogiyan laammana.

4. Ha huuphe yohuwan kiitettida PHawuloosappe nuuni ay tamaaranee?

⁴ Yesuusa kaalliyaageetuppe amaridaageeti Samaare asay mule erissiyo ashkkara gidana danddayenna giidi qoppikkonne, Yesuusi hegaadan qoppibeenna. I eta erissiyo ashkkara gidana asa oottidi xeelliis. Nuunikka nu haggaazo moottan deꞌiya asay sinttappe Kiristtoosi erissiyo ashkkara gidana giidi qoppana koshshees. Kiitettida PHawuloosi nu kaallana bessiyo loꞌꞌo leemiso. Nuuni appe ay tamaariyoo? I (1) etawu sabbakido asaa ammanuwaabaa waati eridaakko, (2) eta ufayssiyaabaa waati akeekidaakko, qassi (3) eta Yesuusi erissiyo ashkkara gidana asadan waati xeellidaakko ha huuphe yohuwan beꞌana.

ETI AMMANIYOOBAY AYBEE?

5. PHawuloosi Ayhuda woosa keettan ba haasayaa ezggiyaageetu hanotaa akeekana danddayidoy aybissee?

⁵ PHawuloosi Ayhuda woosa keettan darotoo sabbakiis. Leemisuwawu, Tasalonqqen Ayhuda woosa keettan “heezzu Sambbata gallassatun Xoossaa maxaafatuppe [Ayhudatuura] haasayiis.” (Oos. 17:1, 2) Ayhudatu woosa keettan sabbakiyoogee PHawuloosa ufayssennan aggenna. I Ayhuda asa. (Oos. 26:4, 5) PHawuloosi Ayhudatu hanotaa akeekiyo gishshawu, etayyo xalatettan sabbakana danddayiis.—Pili. 3:4, 5.

6. Ateenan giyan deꞌiyaageeti PHawuloosi Ayhudatu woosa keettan sabbakido asatuppe waani dummatiyoonaa?

⁶ Asay Tasalonqqeppenne Beeriyaappe PHawuloosa wolqqan yedettin I Ateena biis. Zaarettidikka I “Aihuda woosa keettan Aihudatuuranne Xoossaassi goinniya Aihuda gidenna asatuura” haasayiis. (Oos. 17:17) SHin, PHawuloosi giyan sabbakiyo wode hara asaara gayttiis. He asatu giddon I ‘tamaarissiyoobaa ooratta yoho’ giidi qoppida eranchchatinne Ayhuda gidenna harati deꞌoosona. Eti A hagaadan giidosona: “Neeni nuuyyo oorattabaa yootaasa.”—Oos. 17:18-20.

7. Oosuwaa 17:22, 23y yootiyoogaadan, haasayissiyo qofaa PHawuloosi hanotaadan waati laammidee?

⁷ Oosuwaa 17:22, 23 nabbaba. PHawuloosi Ateenan deꞌiya Ayhuda gidenna asatuura haasayido ogee Ayhuda woosa keettan deꞌiya Ayhudatuura haasayido ogiyaara issi mala gidenna. Ateenan deꞌiya asay ammaniyoobaa PHawuloosi qoppennan aggenna. I ba yuushuwan deꞌiyaabaa loytti xeelliis; qassi asatu haymaanootiyaa meeziyaa akeekiis. Kaallidi, PHawuloosi Geeshsha Maxaafan deꞌiya tumaappe eti bantta goynuwan maayiyoobaa yootiyoogan doommiis. Issi Geeshsha Maxaafaa eranchchay hagaadan giis: “Xoossaa ammanenna Giriiketi Ayhuda Kiristtaanetuugaadan Ayhudatinne Kiristtaaneti goynniyo ‘tumu’ Xoossawu goynnennaagaa I erees; shin I Xoossaabaa xeelliyaagan etawu yootiyo tumay Ateena asati eriyoogaappe dummatennaagaa qonccissanawu baaxetiis.” Hegaa gishshawu, PHawuloosi asaa haasayissiyoogaa hanotaadan laammanawu eeno giis. PHawuloosi Ateena asay goynnanawu baaxetiiddi deꞌiyo ‘Erettenna Xoossaappe’ yiida kiitaa I yootiyoogaa odiis. Ayhuda gidennaageeti Xoossaa Qaalaa erana xayikkonne, PHawuloosi eti Kiristtaane gidana danddayokkona giidi qoppibeenna. I cahaa bessida kattaadan eta xeelliis; qassi mishiraachchuwaa yootiyo ogiyaa asaa hanotaadan laammiis.

8. (a) Ne haggaazo moottan deꞌiya asay ammaniyoobaa eranawu nena aybi maaddana danddayii? (b) Issi uri bawu haymaanootee deꞌiyoogaa neeyyo yootikko, woygana danddayay?

⁸ PHawuloosaagaadan, akeekan xeella. Ne haggaazo moottan deꞌiya asay ammaniyoobay aybakko bessiya malaatata xeella. Keettaaway ba keettaa aybin alleeqissidee? A sunttay, A maayoynne I alleeqettiyoobay, ubba qassi I haasayiyo ogee I ammaniyoobaa qonccissii? I bawu haymaanootee deꞌiyoogaa neeyyo yootana danddayees. Hegaa malabay gayttiyo wode Fulchuro giyo dumma aqinyiyaa hagaadan gawusu: “Taani ammaniyoobaa neeni ammananaadan giddanawu yabeykke, shin . . . ha qofaa haasayanawu yaas . . . ”

9. Haymaanootee deꞌiyo asa haasayanawu I maayiyo qofaa waata goꞌettana danddayay?

⁹ Haymaanootee deꞌiyo uraara ay allaalliyaa tobbana danddayay? Intte maayettiyo qofaa akeekanawu mala. I issi Xoossaa xallawu goynnana danddayees, I Yesuusi asaa ashshiyaagaa gidiyoogaa ammanana danddayees, woy nuuni deꞌiyo iita wodee matan xayanaagaa I ammanana danddayees. Geeshsha Maxaafaappe A ufayssiya ogiyan yootanawu intte maayettiyo qofaappe doomma.

10. Nuuni ay oottanawu baaxetana koshshii, qassi aybissi?

¹⁰ Asay bantta haymaanootee tamaarissiyo ubbabaa ammanennan aggana danddayiyoogaa hassaya. Hegaa gishshawu, issi uri kaalliyo haymaanootiyaa era simmada, I woygi ammaniyaakko akeekanawu baaxeta. Awusttiraaliyan dumma aqinye gididi haggaaziya Devidi, “Ha wodiyan daroti asa aadhdhida eratettaa haymaanootiyaara walakkoosona” yaagiis. Albaaniyan deꞌiya Donalta hagaadan gaasu: “Nunaara gayttiya issi issi asay haymaanootee banttawu deꞌiyoogaa yootoosona; shin guyyeppe eti tumuppe Xoossan ammanennaagaa qonccissoosona.” Qassi Arjjenttiinan misoonaawe gididi haggaaziya ishay akeekidoogaadan, issi issi asay Sillaasiyan ammaniyoogaa yootees; shin eti Aaway, Naꞌaynne geeshsha ayyaanay issi Xoossa giidi waayi ammanana. I, “Hegaa eriyoogee he uri maayiyo qofaa akeekanawu metootennaadan oottees” yaagiis. Hegaa gishshawu, asay ammaniyoobaa akeekanawu mala. Yaatiyo wode, neeni PHawuloosaagaadan, “ubba asatuura ubbaban eta mala” gidana danddayaasa.—1 Qor. 9:19-23.

ETA UFAYSSIYAABAY AYBEE?

11. Oosuwaa 14:14-17y yootiyoogaadan, PHawuloosi Lisxxiran deꞌiya asawu mishiraachchuwaa ufayssiya ogiyan waati yootidee?

¹¹ Oosuwaa 14:14-17 nabbaba. PHawuloosi asaa ufayssiyaabaa akeekiis; yaatidi eta haasayissiyo ogiyaa hanotaadan laammiis. Leemisuwawu, Lisxxiran I yootiyoobaa siyiya cora asay Geeshsha Maxaafaabaa darin erenna woy mule erenna. Hegaa gishshawu, PHawuloosi eti akeekiyo ogiyan haasayiis. I muruta ayfe ayfida kattaabaanne deꞌuwan ufayttiyoogaabaa yootiis. I yootiyoobaa ezggiyaageeti akeekanawu metootenna qaalatanne leemisota goꞌettiis.

12. Asaa ufayssiyaabaa waata akeekananne haasayissiyo ogiyaa hanotaadan waata laammana danddayay?

¹² Ne haggaazo moottan deꞌiya asaa ufayssiyaabaa loytta akeeka; qassi ne haasayissiyo ogiyaa hanotaadan laamma. Issi ura haasayissiyo wode woy A son deꞌiyaabaa beꞌiyo wode A ufayssiyaabaa waata akeekana danddayay? Haꞌꞌikka, akeekan xeella. I ataakilttiyaa tokkiiddi, maxaafaa nabbabiiddi, moorettida kaamiyaa giigissiiddi, woy harabaa oottiiddi deꞌana danddayees. I oottiiddi deꞌiyoobaa goꞌettada haasayissiyoogaa doommana danddayaasa. (Yoh. 4:7) Issi uri maayiyo maayoy I awu biittaa asakko, A oosoy aybakko woy I dosiyo ispportte citay awugaakko bessana danddayees. Gustavi hagaadan giis: “Erettida issi yettanchchaa misilee A maayuwaa bolli deꞌiyo, layttay 19 gidido naꞌaara haasayiyoogaa doommaas. Taani he maayuwaabaa A oychchin I he yettanchchaa dosiyo gaasuwaa tawu yootiis. Hegaadan doommido haasayay I Geeshsha Maxaafaa xannaꞌanaadan oottiis; qassi I haꞌꞌi nu isha.”

13. Neeni asaa Geeshsha Maxaafaa xannaꞌissanawu koyiyoogaa ufayssiya ogiyan waata qonccissana danddayay?

¹³ Issi ura Geeshsha Maxaafaa xannaꞌissiyo wode, A hegee ufayssanaadan ootta; qassi xannaꞌiyoobay A waati maaddanaakko I akeekanaadan ootta. (Yoh. 4:13-15) Leemisuwawu, Popi giyo michchiyaa yootiyoobaa siyanawu koyiya issi maccaasiyaa A soo gelanaadan shoobbaasu. Popa he maccaasiyaa timirttiyaabaa xannaꞌida profeesere gididoogaa bessiyaabay godan kaqettidaagaa beꞌido wode, Geeshsha Maxaafaa xannaꞌissiyo prograamiyaaninne nu shiiqotun nuunikka asaa tamaarissiyoogaa minttada iyyo yootaasu. He maccaasiyaa Geeshsha Maxaafaa xannaꞌiyoogaa doommaasu; kaalliya gallassi A shiiquwaa baasu; qassi hegaappe simmin takkennan woradaa shiiquwaa shiiqaasu. A issi layttappe simmin xammaqettaasu. Nena hagaadan oychcha: ‘Taani zaaretta oychchiyo ura ufayssiyaabay aybee? Nuuni Geeshsha Maxaafaa xannaꞌissiyo prograamiyaabaa eta ufayssiya ogiyan qonccissiyaanaa?

14. Xinaatetu hanotaadan Geeshsha Maxaafaa waata xannaꞌissana danddayay?

¹⁴ Neeni issi uraa Geeshsha Maxaafaa tamaarissiyoogaa doomma simmada, A xannaꞌissanabaa ubbatoo loytta giigetta. Eta soo asaabaa, A timirttiyaabaa, A meeziyaabaanne A ufayssiyaabaa qoppa. Neeni giigettiyo wode, ay xiqise nabbabanaakko, ay biido bessanaakko, qassi Geeshsha Maxaafaa tumaa qonccissiya ay leemiso goꞌettanaakko kuuya. Nena hagaadan oychcha: ‘Ha xinaatiyaa ufayssanaynne A wozanaa denttettanay aybee?’ (Lee. 16:23) Floro giyo dumma aqinyeera xannaꞌiya Albaaniyan deꞌiya issi maccaasiyaa, “Taani dendduwaabaa yootiya timirttiyaa ammanikke” gaada iyyo minttada yootaasu. Flora A hegaabaa ammananaadan wolqqanttabeykku. A hagaadan gaasu: “Dendduwaabaa ammananaappe kase, A hegaa polanawu qaalaa gelida Xoossaabaa koyro erana bessiyoogaa akeekaas.” Flora he wodeppe doommada, xannaꞌissiyo wode ubban Yihoowa siiquwaabaa, A aadhdhida eratettaabaanne A wolqqaabaa loytta qonccissaasu. Guyyeppe he xinaatiyaa dendduwaabaa loyttada ammanaasu. A haꞌꞌi mino Yihoowa Markka.

ETI SINTTAPPE ERISSIYO ASHKKARA GIDANA GAADA QOPPA

15. Oosuwaa 17:16-18y yootiyoogaadan, PHawuloosi Ateena asatun azzananaadan oottidabay aybee, shin I etawu sabbakiyoogaa aggibeennay aybissee?

¹⁵ Oosuwaa 17:16-18 nabbaba. Ateena asay eeqawu goynniyaaba, pokkobaa oottiyaabanne asa aadhdhida eratettan ammaniyaaba gidikkonne, PHawuloosi etan hidootaa qanxxibeenna. Qassi I bana eti cayikkonne etawu sabbakiyoogaa aggibeenna. PHawuloosi kase ‘cayiyaagaa, yedettiyaagaanne tuggayiyaagaa’ gidikkonne, guyyeppe Kiristtaane gidiis. (1 Xim. 1:13) Yesuusi PHawuloosi erissiyo ashkkara gidana giidi qoppidoogaadan, Ateena asaykka erissiyo ashkkara gidana giidi PHawuloosi qoppiis. I hegaadan qoppidoogee likke.—Oos. 9:13-15; 17:34.

16-17. Ubba qommo asay Kiristtoosi erissiyo ashkkara gidana danddayiyoogaa bessiyaabay aybee? Leemisuwaa yoota.

¹⁶ Koyro xeetu layttan, ubba qommo asay Yesuusi erissiyo ashkkara gidiis. PHawuloosi Giriike katama gidida Qoronttoosan deꞌiyaageetussi xaafido wode, gubaaꞌiyan deꞌiyaageetuppe issoti issoti issi wode danobaa oottidaageeta woy shori baynna iita deꞌuwaa deꞌidaageeta gidiyoogaa yootiis. Qassi I gujjidi, “Intteppekka issi issi asai hegeetu mala. SHin . . . meecettidetanne geeyideta” yaagiis. (1 Qor. 6:9-11) Nena gidiyaakko, he asati laamettananne Yesuusi erissiyo ashkkara gidana gaada qoppuutee?

¹⁷ Ha wodiyan, daro asay koshshiyaaban laamettidi Yesuusi erissiyo ashkkara gidanawu eeno gees. Leemisuwawu, dumma aqinye gidada Awusttiraaliyan haggaaziya Yukiina Geeshsha Maxaafay yootiyoobaa ubba qommo asay siyiyoogaa akeekaasu. Issi gallassi, zalꞌꞌe sohuwan keehi aaho maayuwaa maayidanne I bollan niqqisaatee deꞌiyo issi yelagiyo beꞌaasu. Yukiina hagaadan gaasu: “Taani mammottikkonne, iira haasayiyoogaa doommaas. A Geeshsha Maxaafaa dosiyo gishshawu I bollan deꞌiya niqqisaatetuppe amaridaagee Mazamure maxaafaappe ekettida xiqise gidiyoogaa taani akeekaas!” He maccaasiyaa xannaꞌiyoogaanne shiiquwaa shiiqiyoogaa doommaasu.b

18. Nuuni asaabaa kasetidi kuuyana koshshennay aybissee?

¹⁸ Yesuusi kattay cahaa bessiis giidi qoppidoogee daro asay bana kaallana giidi naagiis giyoogee? CHii. An ammananaageeti amaridaageeta gidiyoogaa Geeshsha Maxaafay kasetidi yootiis. (Yoh. 12:37, 38) Qassi Yesuusi asa wozanan deꞌiyaabaa erana danddayees. (Maa. 9:4) I banan ammanana amarida asatun xeelaa wottikkonne, ubba asawu minnidi sabbakiis. Nuuni asaa wozanan deꞌiyaabaa erana danddayenna gishshawu, issi haggaazo moottaabaa woy issi uraabaa kasetidi kuuyana koshshennaagee qoncce! SHin asay sinttappe erissiyo ashkkara gidana gaada qoppa. Burkina Fason misoonaawee gididi haggaaziya Marki hagaadan giis: “Taani diccana gaada qoppido asati darotoo xannaꞌiyoogaa aggoosona. SHin taani diccokkona gaada qoppidoogeeti darotoo ayyaanaaban mino gididosona. Hegaa gishshawu, Yihoowa ayyaanay nuna kaalettanaadan eeno gaana bessiyoogaa akeekaas.”

19. Nuuni nu haggaazo moottan deꞌiya asaa waati xeellana koshshii?

¹⁹ Koyro heeran, cahaa bessida kattaa mala asati nu moottan daro gidennabadan nuuyyo siyettana danddayees. SHin, Yesuusi ba erissiyo ashkkaratussi giidobaa hassaya. Kattay cahaa bessiis. Asay laamettananne Kiristtoosi erissiyo ashkkara gidana danddayees. Sinttappe erissiyo ashkkara gidana he asata Yihooway ‘aqodan’ woy alꞌꞌobadan xeellees. (Hag. 2:7) Nuuni asaa Yihoowaagaadaaninne Yesuusaagaadan xeellikko, eti diccido wogaanne eta ufayssiyaabaa akeekana. Nuuni etabaa bessennabaa qoppokko, shin eti nu ishanttanne michchontta gidana giidi qoppoos.