“Taani Ne Sunttaayyo Yayyana Mala, Taayyo Issi Wozanaa Imma”

1. Xoossawu yayyiyoogaa giyoogee woygiyoogee, qassi Yihoowa siiqiyaageetuyyo hegee keehi koshshiyoy aybissee?

KIRISTTAANETI Xoossaa siiqoosona; qassi awu yayyoosona. Issotu issotuyyo hegee phalqqettiyaaba milatana danddayees. SHin, nuuni yootiyo yashshay nena baqibaqissiyaaba gidenna. Nuuni dumma yashsha qommuwaa beꞌana. Hegaadan yayyiyaageeti Xoossaa wozanappe bonchchoosona. Eti Xoossaara dabbotido dabbotay moorettanaadan koyenna gishshawu, saluwan deꞌiya bantta Aawaa azzanttanawu koyokkona.—Maz. 111:10; Lee. 8:13.

2. Mazamure 86:11n deꞌiya, Kawuwaa Daawita woosaappe nuuni tobbana naaꞌꞌubati aybee?

² Mazamure 86:11 nabbaba. Intte he qaalata qoppiyo wode, wozanappe Yihoowa bonchchiyoogee keehi koshshiyoogaa Daawiti eriyoogaa loytti akeekana danddayeeta. Daawiti ba woosan giidobaa nuuni waati oosuwan peeshshana danddayiyaakko haꞌꞌi beꞌana. Koyruwan, nuuni Xoossaa sunttaa wozanappe bonchchana koshshiyo amarida gaasoti aybakko beꞌana. Naaꞌꞌanttuwan, Xoossaa sunttaa bonchchiyoogaa galla galla nu deꞌuwan waati bessanaakko tobbana.

NUUNI YIHOOWA SUNTTAA BONCHCHANA KOSHSHIYOY AYBISSEE?

3. Muusee Xoossaa sunttaa wozanappe bonchchidi deꞌanaadan maaddida hanotay aybee?

³ Muusee zaallaa kooppuwaa giddo gelidi, ba sinttaara kanttiya Yihoowa bonchchuwaa beꞌiyo wode ayyo aybi siyettidaakko qoppa. Hegee Yesuusi saꞌaa yaanaappe kase ay asinne beꞌidobaappe keehi maalaaliyaaba gidennan aggenna! Muusee kaallidi deꞌiya qaalaa siyidoy kiitanchchaa baggaara gidiyoogee qoncce: “Taani GODAA; taani GODAA; qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. Taani ta aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa.” (Kes. 33:17-23; 34:5-7) Muusee Yihoowa sunttaa goꞌettido wode he hanotaabaa qoppennan aggenna. Guyyeppe Muusee Xoossaa asa gidida Israaꞌeelati ‘maalaalissiyaanne yashshiya A sunttaa bonchchanaadan’ yootidoogee garamissiyaaba gidenna.—Zaa. 28:58.

4. Nuuni kaseegaappe aaruwan Yihoowa bonchchanaadan nuna maaddana danddayiyaabay aybee?

⁴ Nuuni Yihoowa sunttaabaa qoppiyo wode, Yihooway ay mala Xoossakkokka qoppana koshshees. Nuuni Yihoowa eeshshaabaa, hegeekka A wolqqaabaa, A aadhdhida eratettaabaa, A suure pirddaabaanne A siiquwaabaa qoppana bessees. Hegeetanne hara eeshshata wotti dentti qoppiyoogee kaseegaappe aaruwan A bonchchanaadan nuna denttettana danddayees.—Maz. 77:11-15.

5-6. (a) Xoossaa sunttaa birshshettay aybee? (b) Kessaabaa 3:13, 14⁠ynne Isiyaasa 64:8y yootiyoogaadan, Yihooway aybikka hananaadan waatidi oottii?

⁵ Nuuni Xoossaa sunttaa birshshettaabaa eriyoobay aybee? Yihoowa sunttaa birshshettay “Hananaadan Oottees” giyoogaa gidennan aggenna giidi daro eranchchati maayettoosona. He birshshettay Yihooway koyiyoobaa oottennaadan aybinne teqqana danddayennaagaanne I aybinne hananaadan oottana danddayiyoogaa nuna hassayissees. Waatidi?

⁶ Yihooway ba halchchuwaa polanawu koshshiya aybanne haniyoogan aybikka hananaadan oottees. (Kessaabaa 3:13, 14 nabbaba.) Ha xiqisiyan “Taani tanattennee” giya qaalay “Taani Hanana Koyiyoobaa Hanana” geetettidikka birshshettana danddayees. Nu xuufetun, ha maalaalissiya Xoossaa eeshshaabaa qoppanaadan darotoo nuussi minttettoy imettees. Qassi Yihooway nagaranchcha asaa I koyiyoogaadan oottiyoogan awu haggaazanaadaaninne A halchchuwaa polanaadan oottana danddayees. (Isiyaasa 64:8 nabbaba.) Yaatiyoogan, Yihooway ba oosoy polettanaadan oottees. I ba halchchuwaa polanawu oottiyoobaa aybinne teqqana danddayenna.—Isi. 46:10, 11.

7. Nuuni saluwan deꞌiya nu Aawaa kaseegaappe aaruwan nashshanawunne bonchchanawu ay oottana danddayiyoo?

⁷ Yihooway oottidobaanne I nuussi oottana danddayiyoobaa wotti dentti qoppiyoogan saluwan deꞌiya nu Aawaa kaseegaappe aaruwan nashshana danddayoos. Leemisuwawu, Yihooway medhdhido ubbabaa nuuni qoppiyo wode, I oottido ubbaban keehi maalaalettoos. (Maz. 8:3, 4) Qassi Yihooway A sheniyaa polanaadan nuna maaddidoogaa wotti dentti qoppiyo wode, kaseegaappe aaruwan A bonchchoos. Yihoowa giyo sunttay tumukka keehi bonchcho. He sunttay nu Aawaabaa, I oottidobaanne I oottanabaa ubbaa qonccissees.—Maz. 89:7, 8. 

‘TAANI YIHOOWA SUNTTAA AWAAJJANA’

8. Zaarettido Wogaa 32:2, 3y yootiyoogaadan, Yihooway ba ashkkarati ba sunttaa waatanaadan koyii?

⁸ Israaꞌeelati Hidootaa Biittaa gelanaappe kase, Yihooway Muuseyyo ha mazamuriyaa yootiis. (Zaa. 31:19) Muuseekka asaa ha mazamuriyaa tamaarissana koshshiis. (Zaarettido Wogaa 32:2, 3 nabbaba.) Nuuni paydo 2⁠ninne 3n deꞌiya qofaa wotti dentti qoppiyo wode, bonchchuwaa daruwan xeesana bessennabadan xeellidi A sunttaa genttanaadan Yihooway koyennaagaa akeekoos. I ubba asay ba sunttaa eranaadan koyees! Israaꞌeelati Yihoowaabaanne A bonchcho sunttaabaa Muuseppe tamaariyoogee etawu gita maata! Diifee carshshay diccanaadan oottiyoogaadan, Muusee eta tamaarissidobay eta ammanoy minnanaadaaninne eti minettanaadan oottiis. Nuuni hegaadan tamaarissanawu waatana danddayiyoo?

9. Yihoowa sunttay geeyanaadan waati maaddana danddayiyoo?

⁹ Nuuni sooppe soo woy dabaaban haggaaziyo wode, Yihoowa giyo, Xoossaa buzo sunttaa asaa bessanawu Geeshsha Maxaafaa goꞌettana danddayoos. Nuuni Yihooway bonchchettanaadan oottiya keehi ufayssiya xuufeta, maaddiya biidota, qassi nu websatiyan deꞌiyaabata eta shoobbana danddayoos. Ooso sohuwan, timirtte keettan woy oge biyo wode nuuni siiqiyo Xoossaabaanne I ay mala Xoossakko yootana danddayoos. Nunaara gayttiyaageetussi Yihooway asawunne saꞌawu halchchidobaa yootiyo wode, Yihoowa xeelliyaagan nu yootiyoobay etawu muleera oorattaba gidana danddayees. Siiqiya nu Aawaabaa haratussi tumaa yootiyo wode, nuuni Yihoowa sunttay geeyanaadan maaddoos. Qassi asay abaa daro worddota tamaaridoogaa akeekanaadan eta maaddoos. Nuuni Geeshsha Maxaafaappe asaa tamaarissiyoobay eti tamaarana danddayiyo keehi woppissiyaaba.—Isi. 65:13, 14.

10. Geeshsha Maxaafaa xannaꞌissiyo wode, Xoossaa higgiyaa tamaarissiyoogaa xallay gidennay aybissee?

¹⁰ Nuuni Geeshsha Maxaafaa xannaꞌissiyo wode, xannaꞌiyaageeti Yihoowa eranaadaaninne A sunttaa goꞌettanaadan maaddanawu koyoos. Hegaa bollikka, eti Yihoowa loytti eranaadan maaddanawu koyoos. Nuuni kaaletota, Yihooway kessido maaratanne higgeta eta tamaarissiyoogaa xallan, hegaa oottana danddayiyoo? Gooba tamaaree Xoossaa higgiyaabaa akeekananne, ubba qassi hegaa bonchchana danddayees. SHin, he tamaaree Yihoowa siiqiyoogaappe denddidaagan ayyo azazettanee? Hewaana Xoossaa higgiyaa erikkonne, Xoossaa tumuppe siiqabeennaagaanne Addaameekka siiqibeennaagaa hassaya. (Doo. 3:1-6) Hegaa gishshawu, nuuni harata Xoossaa higgiyaa tamaarissiyoogaa xallay gidenna.

11. Nuuni xannaꞌissiyoogeeta Xoossaa higgeta tamaarissiyo wode, eti Higgiyaa Immidaagaa siiqanaadan waati maaddana danddayiyoo?

¹¹ Yihoowa higgeti nuna ubbatoo maaddoosona. (Maz. 119:97, 111, 112) SHin, nu xannaꞌissiyoogeeti Yihooway nuna siiqiyo gishshawu he higgeta immidoogaa akeekana xayikko, he higgeti maaddiyaabadan qoppana danddayokkona. Hegaa gishshawu, nu xannaꞌissiyoogeeta hagaadan oychchana danddayoos: Xoossay ba ashkkarati hagaa oottanaadan woy hagaa oottennaadan yootiyoy aybissa gaada qoppay? Hegee nuussi Yihoowabaa ay qonccissii? Nuuni xannaꞌissiyoogeeti Yihoowabaa qoppanaadaaninne A bonchcho sunttaa loytti siiqanaadan oottikko, eta wozanaa denttettana danddayoos. Nu xannaꞌissiyoogeeti higgiyaa xalla gidennan, Higgiyaa Immidaagaakka siiqana koshshees. (Maz. 119:68) Hegee eti ammanuwan minnanaadaaninne gakkiya metuwaa genccanaadan maaddana.—1 Qor. 3:12-15.

‘NUUNI YIHOOWA SUNTTAN HEMETTANA’

12. Issi wode Daawiti ba wozanay shaahettanaadan waati oottidee, qassi hegee ay kaalettidee?

¹² Kawuwaa Daawiti Mazamure 86:11n, “taayyo issi wozanaa imma” giido qofaykka keehi koshshiyaaba. Wozanay shaahettanaadan oottiyoogee metennaba gidiyoogaa I ba deꞌuwan beꞌiis. Issi wode, ba keettaa bolli dembbayidi keexxidosan deꞌiiddi, I hara ura keettaayyiyaa bollaa meecettishin beꞌiis. He wode, Daawita wozanay issuwaa gidideeyye shaahettidee? I, “Ne shooruwaa keettaayyiyo . . . amottoppa” giya Yihoowa higgiyaa erees. (Kes. 20:17) Gidikkonne, I xeelliyoogaa aggibeenna. Berssaabo giyo maccaasiyo amottiyoogaaninne Yihoowa ufayssanawu koyiyoogan A wozanay shaahettiis. Daawiti daro wodiyawu Yihoowa siiqidinne yayyidi deꞌidaba gidikkonne, I ba xallaa siiqiyoogaa bessiis. Hegaappe denddidaagan, Daawiti iitabaa oottiis. I Yihoowa sunttay cayettanaadan oottiis. Qassi Daawiti ba soo asaa gujjin, aynne mooribeenna asay qohettanaadan oottiis.—2 Sam. 11:1-5, 14-17; 12:7-12.

13. Daawita wozanay zaarettidi issuwaa gididoogaa waati eriyoo?

¹³ Yihooway Daawita seeriis; qassi I zaarettidi Yihoowaara dabbotiis. (2 Sam. 12:13; Maz. 51:2-4, 17) Daawiti ba wozanay shaahettanaadan oottidoogaappe denddidaagan metootidoogaanne kayyottidoogaa hassayiis. Daawita wozanay kumetta woy issuwaa gidanaadan Yihooway maaddidee? Ee; ayssi giikko, guyyeppe Yihoowa Qaalay Daawita xeelliyaagan ‘kumetta wozanaappe Yihoowa ba Xoossaa’ siiqida asa giidi qonccissiis.—1 Kaw. 11:4; 15:3.

14. Nuuni nuna woygidi oychchana koshshii, qassi aybissi?

¹⁴ Daawita hanotay nuna minttettees, qassi nuuni naagettanaadan zorees. I gita nagaraa oottidoogee ha wodiyan deꞌiya Xoossaa ashkkarati naagettanaadan odettidaba. Nuuni hegaa mala nagaraa oottanawu koyokko. Nuuni Yihoowawu haggaaziyoogaa mati doommidaageeta gidin, woy daro layttawu haggaazidaageeta gidin, nuna hagaadan oychchana koshshees: ‘Seexaanay ta wozanay shaahettanaadan oottanawu paacciyo wode eqettiyaanaa?’

15. Neeni Xoossawu yayyiyoogee pokkobaa qoppanaadan oottiya misiliyaa beꞌennaadan waati naagana danddayii?

¹⁵ Leemisuwawu, neeni pokkobaa qoppanaadan oottana danddayiya misiliyaa Televizhiiniyan woy Interneettiyan beꞌikko waatuutee? He misilee woy biidoy pokkobaa bessiyaaba gidenna gaada qoppana danddayaasa. SHin hegee ne wozanay shaahettanaadan Seexaanay oottiyoobeeshsha? (2 Qor. 2:11) He misilee issi uri ordde mittaa qooꞌanawu goꞌettiyo kobbiyaa mala. Koyro kobbiyawu leeꞌe baggan mittaa caddees. Yaatidi kobbiyaa wolqqan giddo gelissiyo wode mittay phalqqettees. Televizhiiniyan woy Interneettiyan beꞌiyo mattumaa gaytettaa qaaqqatanaadan oottiya misilee he kobbiyawu lochchatiyaasaa mala gidana danddayennee? Qohiyaaba milatenna hegaa malabaa beꞌiyoogee issi uri guuttaa takkidi Yihoowa bolli nagaraa oottanaadan denttettana danddayees. Hegaa gishshawu bessennabaa aybanne ne wozanaa giddo gelissoppa! Yihoowa sunttawu yayyana mala ne wozanaa issuwaa ootta!

16. Balabaa oottanaadan paacettiyo wode, nuuni nuna oychchana koshshiya oyshati awugeetee?

¹⁶ Seexaanay nuna paaccanawu pokkobaa bessiya misiliyaa xalla gidennan, harabaakka goꞌettees. Nuuni waatanee? Hagee darin iitaba gidenna giidi qoppiyoogee metenna. Leemisuwawu, hagaadan qoppana danddayoos: ‘Taani hagaa oottiyoogan bohettenna gishshawu, hegee gita nagara gidenna.’ Hegaadan qoppiyoogee gita bala. Nuna kaallidi deꞌiyaagaadan oychchiyoogee loꞌꞌo: ‘Seexaanay ta wozanay shaahettanaadan oottanawu ha paaciyaa goꞌettiiddi deꞌii? Taani pokkobaa amottiyoogee Yihoowa sunttay borettanaadan oottanee? Ha hanotay taani Xoossaakko shiiqanaadan oottaneeyye appe haakkanaadan oottanee?’ Ha oyshata wotta dentta qoppa. Nena nerkka cimmennan, hageeta zaaranawu aadhdhida eratettaa demmana mala woossa. (Yaaq. 1:5) Yaatiyoogee nena naagana danddayees. Hegee Yesuusi paacettido wode, “Laa ha Seexaanau haakka” giidoogaadan neenikka paaciyaa minnada eqettanawu maaddana danddayees.—Maa. 4:10.

17. Nu wozanay shaahettiyoogee loꞌꞌo gidennay aybissee? Leemisuwaa yoota.

¹⁷ Nu wozanay shaahettiyoogee loꞌꞌo gidenna. Issi ispportte citan deꞌiiddi issoy issuwaara maayettennaageeta ane qoppa. Issoti issoti bantta xallay bonchchettanaadan koyoosona, amaridaageeti higgiyaa kaallidi kaaꞌanawu koyokkona, qassi harati loohissiyaagaa karoosona. Hegaa mala citay xoonennan aggana danddayees. SHin, issippetettay deꞌiyo citay xoonana danddayiyoogee qoncce. Neeni Yihoowayyo haggaaziyoogan ne qofaa, ne koshshaanne neeyyo siyettiyaabaa issuwaa oottikko, ne wozanaykka he xooniya citaa mala gidana danddayees. Seexaanay ne wozanay shaahettanaadan koyiyoogaa hassaya. I neeni oottanaadan Yihooway koyiyoogaa ne eriyoobay ne iita amuwaara ne wozanan gaaddetanaadan koyees. SHin, neeni Yihoowayyo haggaazanawu ne wozanay kumetta gidana bessees. (Maa. 22:36-38) Seexaanay ne wozanaa shaakkanaadan oottoppa!

18. Mikiyaasa 4:5y yootiyoogaadan, neeni ay oottanawu murttadii?

¹⁸ Daawiti “taani ne sunttaayyo yayyana mala, taayyo issi wozanaa imma” giidoogaadan, neenikka hegaadan Yihoowa woossa. Ha woosaa ne deꞌuwan oosuwan peeshshanawu danddayettida ubbabaa ootta. Guuttabaappe gitabaa gakkanaashin galla galla neeni kuuyiyoobay Yihoowa gita sunttaa bonchchiyoogaa bessiyaaba gidanaadan murtta. Yaatiyoogan, neeni Yihoowa Markka gidiyoogaadan, he sunttaabaa wotta dentta qoppana. (Lee. 27:11) Qassi hananabaa yootiya Mikiyaasaagaadan nuuni ubbay, “GODAA nu Xoossaa sunttan meri merinau hemettana” gaana danddayoos.—Mik. 4:5.