Alamiyaa Wurssettay Yaanay Awudee? Yesuusi Yootidobaa

ALAMIYAA WURSSETTAA XEELLIYAAGAN YESUUSI YOOTIDO NAAꞌꞌUBATA AKEEKA:

“Simmi taani, Asa Na7ai, yaana gallassaa woi saatiyaa intte erenna gishshau, naagi uttite.”—MAATIYOOSA 25:13.

“He wodee aude gidanaakko, intte erenna gishshau, naagettite; minnite.”—MARQQOOSA 13:33.

Yaatiyo gishshawu, ha alamiyaa wurssettay awude gidanaakko ha saꞌan deꞌiya ooninne erenna. SHin, alamee xayiyo ‘gallassaanne saatiyaa’ Xoossay keeri wottiis. (Maatiyoosa 24:36) Hegaa giyoogee ha iita alamee xayiyo wodiyaa eriyo ogee tumuppe baawa giyoogee? Hegaadaana gidenna. Wodiyaa wurssettay matidoogaa erissiya daro malaatati deꞌiyoogaa Yesuusi ba erissiyo ashkkaratussi yootiis.

MALAATATA

He malaatati ‘wodiyaa wurssetta’ bessiyaaba. Yesuusi hagaadan giis: “Aissi giikko, issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana.” (Maatiyoosa 24:3, 7) I “wurssiya harggee” denddanaagaakka yootiis. (Luqaasa 21:11) Yesuusi yootido hiraagay polettishin neeni beꞌaydda deꞌay?

Ha wodiyan asay olan, namisaaninne, biittaa qaattaa mala bolli bollan denddiya harggiyaa gaasuwan waayettees. Leemisuwawu 2004n, Hindde ano abbaa heeran denddida wolqqaama biittaa qaattay sunaamiya denttin 225,000 gidiya asay hayqqiis. Ubbasaa gakkiya Koronaa (COVID-19) harggiyaa gaasuwan heezzu layttaa giddon 6.9 miiloone gidiya asay hayqqiis. Ha malaatati ha iita alamiyaa wurssettay matidoogaa bessiyaaba gididoogaa Yesuusi yootiis.

“WODIYAA WURSSETTAA”

Geeshsha Maxaafay wurssettaappe kase deꞌiya wodiyaa, ‘wodiyaa wurssettaa’ giidi qonccissees. (2 PHeexiroosa 3:3, 4) Naaꞌꞌantto Ximootiyoosa 3:1-5y yootiyoogaadan wurssettaa wodiyan deꞌiya asay loꞌꞌo kandduwaa ixxiis gaana. (“Alamiyaa Wurssettaappe Kase” giya saaxiniyaa xeella.) Ha wodiyan asay bana siiqiyaagaa, yaaretiyaagaa, makkalanchchanne issoy issuwaa siiqennaagaa gidiyoogaa akeekabeykkii? Hegee nuuni ha alamiyaa wurssettay matido wodiyan deꞌiyoogaa bessiya naqaasha.

Wurssettaa gallassay ay keena wodiyawu takkanee? Geeshsha Maxaafay ‘guutta wode’ gidiyoogaa yootees. Hegaappe simmin, Xoossay ‘saꞌaa xayssiyaageeta’ xayssana.—Ajjuutaa 11:15-18, 12:12.

GANNATE SAꞌAY MATATTIIS!

Xoossay ha iita alamiyaa xayssana gallassaanne saatiyaa keeri wottiis. (Maatiyoosa 24:36) Qassi, hegaappe aaruwan ufayssiyaabay Xoossay ‘ooninne xayana mala koyennaagaa.’ (2 PHeexiroosa 3:9) I nuuni A sheniyaabaa tamaariyoonne hegawu azazettiyo injjiyaa nuussi immiis. Aybissi? Nuuni ha alamee xayiyo wode attidi gannate gidana ooratta saꞌan deꞌanaadan I koyiyo gishshataassa.

Xoossay ba Kawotettan ooratta alamiyan deꞌanawu koshshiyaabaa asa ubbay tamaaranaadan hanotaa giigissiis. Yesuusi Xoossaa Kawotettaabaa yootiya mishiraachchoy “sa7a ubban” sabbakettanaagaa yootiis. (Maatiyoosa 24:14) Kumetta saꞌan deꞌiya Yihoowa Markkati biilooniyan qoodettiya saatiyawu Geeshsha Maxaafaa hidootaabaa asawu yootoosonanne tamaarissoosona. Ha sabbakiyo zamachay wurssettay yaanaappe kasetidi kumetta saꞌan oosettanaagaa Yesuusi yootiis.

Asaa haaroy xayana wodee matattiis. SHin, ha alamiyaa xayuwaappe attada Xoossay qaalaa gelido Gannate saꞌan neeni deꞌana danddayiyoogee mishiraachcho. Kaalliya huuphe yohoy he ooratta alamiyan neeni waanada deꞌana danddayiyaakko qonccissana.