Nabbabiyageetu Oyshaa
Mazamure 12 paydo 6ynne 7y yootiyobay waani gayttii?
Daawiti Mazamure 12:1-4n ‘asa giddon ammanettiyabi xayiichchidoogaa’ koyruwan yootiis. Kaallidi Mazamure 12:5-7n hagaadan giis:
“GODAI, ‘Hiyyeesati un77ettido gishshaunne,
Metootanchchatu ooliyaa gishshau,
Ha77i taani denddana.
Taani eti amottiyo sarotettan eta wottana’ yaagees.
GODAA qaalati walahi bainna geeshshata;
Coociyaa taman laapputoo tigettida biraadan geeyidaageeta.
Abeet GODAU, neeni nuna sarotettan naaganne
Hagaa mala asappe merinau nuna ashsha.”
Paydo 5y Xoossay ‘metootanchchatubaa’ woygidaakko yootees. I eta ashshana.
Paydo 6y gujjidi, “GODAA qaalati walahi bainna geeshshata, . . . biraadan geeyidaageeta” yaagees. Kiristtaaneti ubbay ha qofan loytti maayettoos.—Maz. 18:30; 119:140.
Issi issi Geeshsha Maxaafaa birshshettatun Mazamure 12:7y hagaadan birshshettiis: “Neeni eta ashshana.” Qassi ha xiqisiyappe kasetidi odettida qofay “GODAA qaalati” giyo gishshawu, Xoossay ba qaalaa ‘naagees’ giyogaa giidi amaridaageeti qoppoosona. Qassi Geeshsha Maxaafaa goꞌettennaadan digganawunne muleera xayssanawu eqettiyageeti keehi baaxetikkonne Xoossay ba Qaalaa naagidoogaa nuuni eroos.—Isi. 40:8; 1 PHe. 1:25.
Gidikkokka, Yihooway paydo 5n odettida asaakka naagees; qassi I ‘unꞌꞌettidaageetanne metootidaageeta’ haꞌꞌikka sinttappekka maaddeesinne ashshees.—Iyy. 36:15; Maz. 6:4; 31:1, 2; 54:7; 145:20.
Yaaniyo gishshawu, paydo 7n Yihooway naagees geetettiday aseeyye A Qaalee?
Nuuni ha mazamuriya loytti pilggiyo wode he qofay asaa qonccissiyogaa akeekoos.
Mazamure 12:1, 2n, Daawiti asay ammanettiyogaa aggidoogeenne worddanchcha gididoogee inne harati waayettanaadan oottidoogaa yootiis. Iitabaa haasayiya he asata Yihooway xayssanaagaa paydo 3y yootees. Xoossaa qaalay walahi baynna geeshsha gidiyo gishshawu I ba asaa gishshaa issibaa oottanaagaa nuuni ammanettanaadan oottiyabaa ha mazamuree yootees.
Yaatiyo gishshawu, paydo 7y yootiyogaadan, Yihooway asaa naagees; hegeetikka iitati qohido asata.
Yaatin issi issi Geeshsha Maxaafaa birshshettati ha xiqisiya “Neeni eta naagana” giidi birshshidoy aybissee? He birshshettay ammanttiya Ibraawettuwan Xaafettida Geeshsha Maxaafaa qonccissees. Shin Giriiketto Septujenttiyan he qofay hagaadan geetettiis: “I nuna naagana” qassi “I nuna ashshana.” Yaaniyo gishshawu, he qofay unꞌꞌettidanne metootida ammanettida asata qonccissees. Eti iitatettaa aassiya “hagaa mala asappe,” naagetti attana. (Maz. 12:7, 8) Ibraawettuwan Xaafettida Geeshsha Maxaafaappe Aramayke doonan birshshettidaagee hagaadan gees: “Abeet GODAWU, neeni xillota naagana, iitatuppe merinawu neeni eta ashshana.” Hagee Mazamure 12:7y yootiyobay Xoossaa Qaalaa gidennan, asaa qonccissiyogaa bessiya gujjo naqaasha.
Hegaa gishshawu, ha xiqisee ‘ammanettida asatussi’ deꞌiya hidootaa, hegeekka Xoossay eta gishshawu issibaa oottanaagaa qonccissees.