Nabbabiyaageetu Oyshaa
Mazamure 144:12-15y, Xoossaa asaa hanotaa qonccissiiyye paydo 11n odettida iita allagatu hanotaa qonccissii?
Ibraawettuwaa qofaa he naaꞌꞌu ogiyankka birshshana danddayettees. Gidoshin, kaallidi deꞌiya yohoti nuuni qofaa suure akeekanaadan maaddoosona:
He mazamuriyan deꞌiya hara qofaa akeeka. Paydo 12n (Ooratta Alamiyaa Birshshettan) “yaanin” giya qaalaa goꞌettiyoogee, paydo 12ppe 14 gakkanaashin deꞌiya anjjoti iitatuppe banttana ‘ashshanaadan’ woossiya geeshshatu hanotaa qonccissiyoogaa akeekanaadan oottees (paydo 11). Maayettiya naaꞌꞌu yohota yootiya paydo 15ykka he qofaa qonccissees. Hegaa giyoogee, naaꞌꞌusan “anjjettidaageeta” (‘ufayttiyaageeta,’ NW) giya qofay issi asaabaa—‘eta Xoossay Yihoowa’ gidido asatubaa yootees.
He qofay Geeshsha Maxaafan deꞌiya, Xoossay baassi ammanettida asata anjjanaagaa yootiya hara qofatuura maayees. Ha mazamuree Xoossay Israaꞌeelata eta morkketuppe ashshi simmidi, asay ufayttanaadaaninne duretanaadan oottidi eta anjjanawu gelido, mino naqaashay deꞌiyo qaalaa Daawiti ufayssan naagiyoogaa qonccissees. (Wog. 26:9, 10; Zaa. 7:13; Maz. 128:1-6) Leemisuwawu, Zaarettido Wogaa 28:4y hagaadan gees: “Ne uluwaa aifee, ne shooqaa aifee, ne mehiyaa maratinne ne dorssaanne ne deeshshaa wudiyaa marati corattidi anjjettidaageeta gidana.” Daawita naꞌaa Solomona haaruwaa wode, Israaꞌeelati laggetiyaabi baynna sarotettaaninne duretettan deꞌidosona.—1 Kaw. 4: 20, 21; Maz. 72:1-20.
Qofaa kuuyanawu, Mazamure 144 hegaadan akeekiyoogee Yihoowa ashkkarati daro wodiyawu xoqqu ootti xeellido hidootaa, hegeekka Xoossay iitata xayssanaagaanne hegaappe simmin xillotuyyo merinaa sarotettaanne duretettaa immanaagaa he mazamuree kumettay loytti qonccissanaadan oottees.—Maz. 37:10, 11.