Taani Kaamiya Laaggiyogaa Aggana Koshshii?

Ne hanotaykka hegaa malee? Yaatikko, neeni laaggiyogaa aggana koshshiya koshshennaakko kuuyanawu nena aybi maaddana danddayii?

Issi issi biittatun, cimidaageeti kaamiya laagganawu dottoriyappe piqaadiya ekkana koshshees. Hegaa mala biittatun deꞌiya Kiristtaaneti kawotettay kessiyo higgiyawu azazettoosona. (Rom. 13:1) Neeni deꞌiyo biittan hegaa mala higgee baynnaba gidikkokka, qohuwa gattennan laaggana danddayiyakkonne eranawu maaddiya kaaletoti deꞌoosona.

NEENI LAAGGIYO HANOTAA YIGGA

Issi dirijjitee cimidaageeti kaallidi deꞌiya oyshata banttana oychchanaadan minttettees:

• Ogiya malaatata nabbabanawu woy qamman xeellanawu metootiyanaa?

• Qooriya yaa haa qaattada heregaa xeellanawunne haahosan deꞌiyabaa beꞌanawu metootiyanaa?

• Taani kaamiya laaggiyo wode nadaajiya immanawu woy pireeniya yedhdhanawu ta tohuwa eesuwan eesuwan laammanawu metootiyanaa?

• Taani keehi loddan laaggiyo gishshawu ogee gorddettanaadan oottiyanaa?

• Mata wode tana daafabati gakkiichchi attidonaa, woy issibaara domꞌꞌettido gishshawu ta kaamiyan narphphettidosaynne gaarettidosay deꞌii?

• Ta laaggiyo hanotaa gaasuwan tiraafike polisee tana darotoo essissidee?

• Taani laaggiyo wode tana xiskkoy metii?

• Taani loytta laaggennaadan diggana danddayiya xaleta mittiyanaa?

• Taani laaggiyo hanotay ta soo asaa woy ta laggeta hirggissidoogaa tawu yootidonaa?

Neeni ha oyshatuppe issuwa woy naaꞌꞌaa ee gaada zaarikko, giigissana bessiyabata qoppana daddayaasa. Leemisuwawu, kaseegaa keenaa laaggennan agganawu, ubba qassi qammi yaatennan agganawu kuuyana danddayaasa. Neeni laaggiyo hanotaa ubbatoo yigga. Neeni laaggiyo hanotaabaa yootanaadan ne soo asaappe woy ne laggetuppe issuwa oychchana danddayaasa. Geella qohuwa gattennan waata loytta laaggana danddayiyakko tamaarana danddayaasa. Shin qommoora odettida oyshatuppe darotussi neeni ee gaada zaarikko, laaggiyogaa aggiyogee loꞌꞌo gidana danddayees.a

GEESHSHA MAXAAFAY YOOTIYO MAARATA KAALLA

Neeni kaseegaadan loytta laaggennaagaa akeekanawu metootana danddayaasa. Laaggiyogaa aggana koshshiya koshshennaakko qoppiyogee woy haasayiyogee nena yiilloyana danddayees. Yaatin ne hanotaa loytta akeekanaadaaninne loꞌꞌobaa kuuyanaadan nena maaddana danddayiya Geeshsha Maxaafaa maarati awugeetee? Naaꞌꞌata ane beꞌa.

Ashkke gida. (Lee. 11:2) Nuuni cimiyo wode ayfeenne hayttay waayissana, qassi dibbaynne bollay maara oottennan aggana danddayees. Leemisuwawu, cimidaageetuppe daroti issi issi ispportte kaassata kaaꞌiyogaa aggidosona; ayssi giikko, hegee eta qohana danddayiyogaa akeekidosona. Kaamiya laaggiyogaara gayttidaagankka ha maaray hanees. Issi uri bana qohuwappe naaganawu kaamiya laaggiyogaa agganawu ashkketettan kuuyana danddayees. (Lee. 22:3) Qassi ashkke uri harati banttana qofissidabaa yootiyo wode siyanawu eeno gees.—2 Sameela 21:15-17ra gatta xeella.

Suuttan oyshettennaadan naagetta. (Zaa. 22:8) Issi uri naagettidi laaggana xayikko, I asa qohana woy worana danddayees. Issi uri laaggiyogan kaseegaadan gooba gidennaagaa eriiddi laaggiyogaa aggana xayikko, bana woy harata worana danddayees. Ubba I asa woridoogan oyshettana danddayees.

Neeni laaggiyogaa aggikko, harati nena bonchchiyogaa aggana gaada qoppoppa. Neeni ashkke, nena ziqqi oottiyanne haratu payyatettawu qoppiya asa gidiyogaa gujjin, neessi deꞌiya loꞌꞌo eeshshatu gishshawu Yihoowi nena siiqees. Qassi I nena maaddanawunne minttettanawu qaalaa geliis. (Isi. 46:4) I nena mulekka aggenna. Yaaniyo gishshawu, laaggiyogaa aggana koshshiya koshshennaakko kuuyanawu hayyuwanne akeekaa immanaadan A woossa.