‘Ayyaanaa Issippetettaa Naagidi Deꞌite’
KIITETTIDA PHAWULOOSI Efisoonan deꞌiya Kiristtaaneta hagaadan giidi zoriis: “Issoy issuwa siiqiyo gishshawu mooruwa qoodennan deꞌite, issoy issuwara sarotettan deꞌiyogan ayyaanaa issippetettaa naagidi deꞌanawu wozanappe baaxetite.”—Efi. 4:2, 3.
Nuuni ‘ayyaanaappe,’ hegeekka, Xoossaa wolqqaappe denddidaagan ‘issippetettan’ deꞌoos. Shin Phawuloosi yootidoogaadan hegawu baaxetana koshshees. Ooni? “Ayyaanaa issippetettaa naagidi deꞌanawu” ubba Kiristtaanetikka baaxetana bessees.
Leemisuwawu, neeyyo issi uri kushiyan dadettida ooratta maayuwa immiis gaada qoppa. He maayuwa ooni loytti oyqqana bessii? Hegaa zaaroy qoncce. Neeni loytta oyqqennan aggin maayoy peerettikko, he imotaa immidaagaa bolli gaasoyana danddayakka.
Hegaadankka, Kiristtaanetu issippetettay Xoossaa imota gidikkokka, nuuni ubbay hegaa naaganawu baaxetana koshshees. Nuuni issi ishaara woy issi michcheera sarotettan deꞌennaba gidikko, nuna hagaadan oychchana koshshees: ‘Ayyaanaa issippetettaa naagada deꞌanawu tawu danddayettida ubbabaa oottiyanaa?’
“ISSIPPETETTAA NAAGIDI DEꞌANAWU WOZANAPPE BAAXETITE”
Issi ishay woy issi michchiya nuna yiilloyiyo wode ayyaanaa issippetettaa naagidi deꞌanawu nuuni issi issitoo metootana danddayiyogaa Phawuloosi yootidobaappe akeekoos. Issi metoy merettiyo wode issippetettaa naagidi deꞌanawu hegaabaa izaawura ubbatoo haasayana koshshii? Koshshennan aggana danddayees. Nena hagaadan oychcha: ‘Taani yaatikko, hanotay yaa iitaneeyye giiganee?’ Issi issitoo, izaawussi atto giyogee woy yohuwa dogiyogee loꞌꞌo gidana danddayees.—Lee. 19:11; Mar. 11:25.
Nena hagaadan oychcha: ‘Taani yaatikko, hanotay yaa iitaneeyye giiganee?’
Phawuloosi giidoogaadan, nuuni “issoy issuwa siiqiyo gishshawu mooruwa qoodennan” deꞌana koshshees. (Efi. 4:2) Issi xuufee ha qofay “eta hanotaadan eta mokki ekkiyogaa” geetettidi birshshettana danddayiyogaa yootees. Hegee nu ishatinne michchoti nunadan nagaranchcha gidiyogaa akeekiyogaa giyogaa. Nuuni “ooratta eeshshaa” maayanawu baaxetoos. (Efi. 4:23, 24) Gidoppe attin, nuuppe ooninne wottiyobi baynna ogiyan yaatana danddayenna. (Rom. 3:23) Nuuni hegaa akeekikko, danddayanawu, issoy issuwawu atto gaanawunne “ayyaanaa issippetettaa naagidi deꞌanawu” metootokko.
Nuuni nu wozanan lanccidobaakka aggiyo wode, ubbatoo “issoy issuwara sarotettan” deꞌana. Efisoona 4:3n “issoy issuwara” geetetti birshshettida Giriiketto qaalay Qolasiyasa 2:19n ‘shayaa’ geetettiis. Shayay meqettaa meqettaara gatti oyttiya mino bollaa qommo. Hegaadankka, nu ishatuban nuuni dosennabay deꞌikkokka, sarotettaynne eta siiqiyogee issippetettan deꞌanaadan maaddees.
Hegaa gishshawu, ne mala Kiristtaanee nena lanccissikko woy yiilloyikko, A boriyogaappe ayyo qaretta. (Qol. 3:12) Asay ubbay nagaranchcha gidiyo gishshawu, neenikka issi issitoo issi ura lanccissennan aggakka. Neeni hegaa hassayiyogee ‘ayyaanaa issippetettaa naagada deꞌanawu’ maaddees.