Haluwa Kiyiyogaabaa Geeshsha Maxaafay Woygii?
Geeshsha Maxaafay yootiyobaa
Issi uri haluwa kiyiyogee bessiyabadan qoppiyakkokka: “‘I tau oottidoogaadan, taani au oottana; taani au a oosuwaa kushiyaa zaarana’ yaagoppa” giidi zoriya Geeshsha Maxaafaa qofaappe hegee dummatees. (Leemiso 24:29) Daroti haluwa kiyanawu koyiyogaa agganaadan Geeshsha Maxaafay maaddiis.
Ha huuphe yohuwan
Haluwa kiyiyogee bala gidiyoy aybissee?
Issi uri nena yiilloyikko woy qohikko, hanqqettiyogeenne he uri oottidobawu qaxxayettanaadan koyiyogee wottin deꞌiyaba. Shin, haluwa kiyiyogee Geeshsha Maxaafay yootiyobaara maayettenna. Aybissi?
Asay bawu haluwa kiyanawu koyiyogee Xoossaa ufayssenna. Geeshsha Maxaafan Yihoowia hagaadan giis: “Haluwa kessiyagee tana; taani bessiyabaa qanxxana.” (Roome 12:19) Qohettidaageeti haluwa kiyanawu koyiyogaappe, danddayettiyo wode ubban merettida metuwa saruwan birshshiyo ogeta koyanaadan Geeshsha Maxaafay minttettees. (Roome 12:18) Saruwan birshshiyo ogee xayikko woy oottana danddayiyo ubbabaa oottinkka ixxikkoshin? Mooroba ubbaa Yihoowi giigissanaagaa ammanettanaadan Geeshsha Maxaafay nuna hassayissees.—Mazamure 42:10, 11.
Xoossay likke ogiyan waati qaxxayii?
Haꞌꞌissawu, mooriya asaa qaxxayiyo maataa Xoossay deriya haariyageetussi immiis. (Roome 13:1-4) I ba wodiyan, iitatettawu gaaso gidida ubbaa bolli pirddananne waayiya muleera xayssana.—Isiyaasa 11:4.
Haluwa kessanawu koyiyogaa waata aggana danddayiyanaa?
Hanqquwan eexxa kiyoppa. (Leemiso 17:27) Elle hanqqettiya asati darotoo, simmidi zilꞌꞌettiyobaa oottoosona. Shin issibaa oottanaappe kase takki giidi qoppiyageeti loꞌꞌo kuushsha kuuyana danddayoosona.—Leemiso 29:11.
Tuma shaakkada era. (Leemiso 18:13) Naaqettida uri bana hagaadan oychchiyogee loꞌꞌo, ‘tana yiilloyida izaawu hegaadan oottanaadan denttettida ta erennabi deꞌanddeeshsha? I unꞌꞌetti uttideeshsha? Woy I hegaa erennan oottidee?’ Issi issitoo nuna yiilloyanawu qoppidi oottidoba milatiyabaykka, erennan balidobaa gidana danddayees.
Haluwa kiyiyogaabaa asay qoppiyo bala qofaa
Bala qofaa: Geeshsha Maxaafay “aife gishshaa aife” yaagiyo gishshawu haluwa kiyiyogaa paqqadees.—Wogaabaa 24:20.
Tumaa: “Aife gishshaa aife” giya higgee beni wode Israaꞌeelati banttawu haluwa kiyanaadan minttettenna. Waannatettan, he higgee giigidoy daannati mooruwawu bessiya qixaatiya immanaadan maaddanaassa.b—Zaarettido Wogaa 19:15-21.
Bala qofaa: Geeshsha Maxaafay nuuni haluwa kiyanaagaa diggiyo gishshawu, nuuni nuna qohuwappe naagana danddayokko.
Tumaa: Issi uri qohettiyo wode bana qohuwappe teqqana woy deriya haariyageetaa maaduwa oychchana danddayees. Gidoppe attin, danddayettiyo wode ubban nuuni kobaa kessennaadan Geeshsha Maxaafay yootees.—Leemiso 17:14.
a Geeshsha maxaafan qonccidaagaadan Yihoowi, Xoossaa suntta.
b Ha higgiyabaa gujjada eranawu koyikko “‘Ayfiya Gishshaa Ayfe’ Giyogee Woygiyogee?” giya huuphe yohuwa xeella