Ha Wodiyan Deꞌiya Asay Qoppiyobaanne Haniyobaa Xeelliyagan Geeshsha Maxaafay Kasetidi Yootii?

Geeshsha Maxaafay yootiyobaa

Ee, Geeshsha Maxaafay ha wodiyan deꞌiya asa eeshshay kaseegaappe yaa iiti iiti baanaagaa kasetidi yootees. Ayssi giikko, asay geeshsha kandduwa maaraanne issoy issuwara sarotettan maayettidi deꞌanawu maaddiya maarata kaallanawu koyennaagee hegaa bessees.a (2 Ximootiyosa 3:1-5) Shin amaridaageeti hegaa mala iita eeshsha kaallennaagaa Geeshsha Maxaafay yootees. Hegaa bollikka, Xoossay eta maaddin he iita qofaa eqettoosonanne A ufayssiya ogiyan qoppanawunne oottanawu baaxetoosona.—Isiyaasa 2:2, 3.

Ha huuphe yohuwan

Ha wodiyan deꞌiya asay qoppiyobaanne haniyobaa xeelliyagan Geeshsha Maxaafay kasetidi yootiyobay aybee?

Ha wodiyan daro asawu deꞌiya iita eeshshawunne oosuwawu pulttoy bana dosiyogaa gidiyogaa Geeshsha Maxaafay yootees. Asay “bana naagenna,” “ba xalaalaa siiqana” qassi “Xoossaa siiqiyogaa aggidi bana ufayssiyabaa siiqana” yaagees.—2 Ximootiyosa 3:2-4.

Ha hiraagan odettidabay tuma; gaasoykka, ha wodiyan asay bantta xallaassi qoppiyageeta, banttana goꞌiyabaa xalla koyiyageeta, banttawu loꞌꞌo milatidabaanne loꞌꞌo duussa deꞌanawu qopiyogeetanne hegaa malabaa xalaala koyiyageeta. He hiraagay yootiyogaadan, daro asay ba xalawu koshshiyabaa koyees; qassi hegaa mala eeshshay kaseegaappe aaruwan yaa gujjiis. Daro asay ‘loꞌꞌobaa dosiyogaa aggidi’ bantta goꞌꞌaa xalaalaa qoppiyogaappe denddidaagan, etawu loꞌꞌo eeshshay deꞌana danddayibenna. Eti ‘galatennaageeta’ gidiyo gishshawu, banttawu deꞌiyabawu, woy haraati etawu oottidobawu galatana bessennabadan etawu siyettees.—2 Ximootiyosa 3:2, 3.

Bana dosiyogee ha wodiyan asay bessiyo hara eeshshatussikka pultto:

Yaaretiyogaa. Daro asati “miishshaa siiqiyaageeta.” Etawu deꞌiya miishshay woy aqoy eti deꞌuwan banttawu injjetidogaa bessiyabaa giidi qoppoosona.—2 Ximootiyosa 3:2.
Otoruwa. Daro asati “ceeqettana, axiraarana,” qassi “otorettana.” (2 Ximootiyosa 3:2, 4) Hegaa mala asati bantta eran, abbiyan, woy bantta duretettan bessiyaagaappe aaruwan ceeqettoosonanne ayyiyoosona.
Sunttaa bashshiyogaa. ‘Toochchiyogee’ qassi ‘sunttaa bashshiyogee’ keehi aakkiis. (2 Ximootiyosa 3:2, 3) Hegaa mala asati harata woy Xoossaa cayoosona woy etawu wordotoosona.
Zozzu giyaageeta. Daro asati ‘haratuyyo ammanettennaageeta,’ ‘haratuura maayettennaageeta,’ ‘bantta laggiya qohiyaageeta,’ qassi ‘zozzu giyageeta.’ (2 Ximootiyosa 3:2-4) He asati haratu qofan maayettanawu koyokkona, woy bantta gelido qaalaa naagokkona.
Danobaa oottiyageeta. Ha wodiyan deꞌiya daro asay ‘biittaa goggiyageeta;’ eti eesuwan hanqqettiyageeta gidiyo gishshawu, hegee eta makkalabawu woy danobawu kaalettees.—2 Ximootiyosa 3:3.
Iitatetta. Yesuusi nu wodiyan ‘iitatettay daranaagaa’ yootiis. (Maatiyosa 24:12) I gujjidikka ‘shabbirssay’ keehi daranaagaa kasetidi yootiis.—Luqaasa 21:9.
So asaa siiqoy irxxana. Daroti ‘bantta aawaassinne aayeessi azazettennaageeta,’ qassi ‘so asaa siiqennaageeta’ gidiyo gishshawu, daro so asati issoy issuwa sheneho goosonanne issoy issuwa naaqqoosona.—2 Ximootiyosa 3:2, 3.
Ammaniya asa milati beettiyogaa. ‘Xoossaayyo haggaaziyaba milatiya’ asay dariis. (2 Ximootiyosa 3:5) Xoossay yootiyobaa siyiyogaa aggidi, eti siyanawu koyiyo qofaa etawu yootiya haymaanootiya kaalettiyageetu qofaa siyoosona.—2 Ximootiyosa 4:3, 4.

Ba xalla siiqiya asati haratu bolli ayba qohuwa gattiyonaa?

Daro asay bana keehi siiqiyogee, awudeegaappenne aaruwan harati qofan qohettanaadan oottiis. (Eranchchaa 7:7) Leemisuwawu, isooti issooti miishsha siiqiyogee harata cimmanaadaaninne balettanaadan oottiis. Meretaa siiqoy asa giddon xayidoogee so asaa bolli naaquwa gatteees, qassi hegee so asaa yarati unꞌꞌettanaadan woy banttana banttarkka woranaadan oottees. Qassi asay issoy issuwa kaddiyogee eti kaddidoogeeti qofan keehi qohettanaadan oottees. He qohoy adussa wodiyawu takkana danddayees.

Asaa eeshshay kaseegaappe yaa iiti iiti biidoy aybissee?

Geeshsha Maxaafay asaa eeshshay hegaadan iitido waanna gaasuwa yootees:

Xoossaanne asaa tumuppe siiqiyo siiqoy irxxiis. (Maatiyosa 24:12) Hegaappe denddidaagan ba xalla siiqiya asay dariis.
Seexaanaa Dabloosi saluwapppe duge saꞌawu olettiisinne guyye simmennaadan teqettiis. (Ajjuutaa 12:9, 12) He wodiyappe doommidi ba xallaa siiqiya asay daranaadan oottiis.—1 Yohaannisa 5:19.

Asaa eeshshay moorettidoogan nuussi aybi siyettana koshshii?

Xoossaa Qaalay, “hegeetu achchappe kichchaychcha” yaagees. (2 Ximootiyosa 3:5) Hegaa giyogee nuuni asaa ubbaappe baqatidi harasaa baana koshshees giyogaa gidenna. Shin hegee bantta xalla siiqiya Xoossaa higgiya kaallenna asatuura mata laggetettaa medhdhennan aggana koshshiyogaa bessiyaba.—Yaaqooba 4:4.

Asaa ubbaa eeshshay moorettidee?

Chii. Geeshsha Maxaafay issooti issooti “oosettiya tunatettaa gishshau, ooliiddinne kayyottiiddi [deꞌiyogaa]” kasetidi yootees. (Hizqqeela 9:4) Eti bantta xalla siiqiyogaappe haakkoosonanne Xoossay kessido maaraadan bantta deꞌuwa kaalettoosona. Eta haasayaynne oosoy hara asaagaappe dummatiyogee qoncci beettees. (Milkkiyaasa 3:16, 18) Leemisuwawu, eti ubbaa asaara sarotettan deꞌanawu baaxetoosona; qassi olaa olettokkonanne danobaa oottokkona.—Mikiyaasa 4:3.

Iita eeshshay deꞌiyo asay ubbay muleera laamettana danddayenna giyogee?

Chii. Maaraa xayidanne danobaa oottiya asatappe attin ubba asay iita asa gidenna. Ubbaa, Xoossay ba maara kaallenna asata mata wode xayssanawu kuuyiis. (Mazamure 37:38) I “ooratta saꞌaa,” hegeekka ooratta deretettaa ha saꞌan giigissana; yan ashkke asati sarotettan merinawu deꞌana. (2 Pheexiroosa 3:13; Mazamure 37:11, 29) He hidootay aymuwan miido pilaa mala gidenna. Geeshsha Maxaafay ha wodiyankka asaa deꞌoy Xoossay kessido xillotettaa maaraara maayiya ogiyan laamettanaadan maaddiiddi deꞌees.—Efisoona 4:23, 24.

a Geeshsha Maxaafaa hiraagaynne alamiyan haniiddi deꞌiyabay bessiyogaadan, nuuni deꞌiyo wode ‘wayssiyabay’ darido “wurssetta gallassatun” deꞌiyogaa qonccissees. (2 Ximootiyosa 3:1) Gujjada eranawu, “‘Wurssettaa Gallassaa,’ Woy ‘Wodiyaa Wurssettaa’ Malaatay Aybee?” giya huuphe yohuwa xeella.