Naaꞌꞌu Qommo Deꞌuwa Deꞌiyogaa Waatada Aggana Danddayiyanaa?

Xoossawu goynniyageetuppe amaridaageeti Geeshsha Maxaafaa maaraadan deꞌanawu oottiyobay hegaa keena koshshiyabakko issi issitoo qoppoosona. (Mazamure 73:2, 3) Eti ubba Yihoowa higgiyara maayettennabaa oottiyogaa doommana, qassi bantta oottido iitabaa qosiyogan harata balettanawu malana.

Ha huuphe yohoy geella hegaa mala deꞌuwa doommidaba gidikkonne hegaa agganawu koyiyageeta maaddanawu giigiis.

Ha huuphe yohuwan

• Naaꞌꞌu qommo deꞌoy aybee?

• Naaꞌꞌu qommo deꞌuwa deꞌiyogee taani iita asa giyogee?

• Naaꞌꞌu qommo deꞌuwa deꞌiyogaa taani waatada aggana danddayiyanaa?

• Ne laggeti woygiyonaa?

Naaꞌꞌu qommo deꞌoy aybee?

Naaꞌꞌu qommo deꞌuwa deꞌiyogee Yihoowawu goynnenna ne laggetuura deꞌiyo wode eraydda iitabaa oottiyogaa; shin Yihoowawu goynniyageetura deꞌiyo wode awu haggaazanawu koyiyaba milatanawu baaxetaasa. Hegee neessi naaꞌꞌu asatettay deꞌiyabanne he asatettaa giddon dumma dummabaa qottidaba mala.

“Neeni naaꞌꞌu qommo deꞌuwa deꞌiyo wode, naaꞌꞌaappekka issiba issibaa qottaasa, yaatiyo gishshawu ne tumu oonatettaa ooninne erenna. Neeni naaꞌꞌu qommo deꞌuwa deꞌiyo wode ooyyonne ammanettenna asa gidaasa.”—Erino.

Hagaa eray? Naaꞌꞌu qommo deꞌoy nerkka deꞌiyo wode eraydda Yihoowi dosennabaa oottiyogaa gujjana danddayees.

“Tawu layttay 14 gidido wode, shori baynnabaa Intternneetiyan beꞌiyogaa doommaas. Haratu sinttan taani pornograafiya ixxiyaba milatanawu malays, shin taani hegaa ixxennaagaa ta wozanay erees.”—Nolaana.

Geeshsha Maxaafaa maaraa: “Naaꞌꞌu godatuyyo aylle gidana danddayiya uri baawa; ayssi giikko, I issuwa ixxana qassi hankkuwa siiqana; woy issuwassi ammanettana qassi hankkuwa karana.”—Maatiyosa 6:24.

Naaꞌꞌu qommo deꞌuwa deꞌiyogee taani iita asa giyogee?

Gidennan aggana danddayees. Issoti issoti Geeshsha Maxaafaa maaraadan deꞌennan agganawu kuuyidoogee tuma. Shin tumuppe neenikka hegaadan deꞌanawu koyay? Woy kaallidi deꞌiyagaa mala hara gaasoy deꞌii?

• Ne laggetuppe dummati beettiyo wode yayyiyogee.

• Ne galchchan deꞌiyageetuura issippe oottiyobaappe aaruwan nenaara tamaariyageetuura oottiyobay deꞌiyogee.

• Xoossaa azazota ubbaa kaallanawu neeni danddayennabadan qoppiyogee.

“Naaꞌꞌu qommo deꞌo deꞌiya issi issi yelagati aybanne gido harati oottiyobaa oottanawu koyiyo gishshawu, eti kaalliyo Kiristtaane deꞌuwa deꞌennaageetuura wodiya aattanawu ufayttoosona.”—Devida.

Shin hageetuppe awugeenne naaꞌꞌu qommo deꞌuwa deꞌiyogaa bessiyaba oottenna. Ubba, hegee loꞌꞌo asaykka waanidi hegaa mala balabaa oottana danddayiyakko akeekanawu maaddees. Neeni hegaa malabaa oottidaba gidikko, nena aybi maaddana danddayii?

Naaꞌꞌu qommo deꞌuwa deꞌiyogaa taani waatada aggana danddayiyanaa?

1. 1. Neeni haꞌꞌi deꞌiyo hanotaabaa qoppa. Nena hagaadan oychcha: ‘Taani tumuppe hagaa mala asa gidanawu koyiyanaa? Gidana xayikko, taani dooridobay tana awa kaalettii?’

   Geeshsha Maxaafaa maaraa: “Cincca asi metoi yiyo wode [beꞌees]; shin akeekai paccido asi sitti gi biidi, metuwan gelees; yaatidi guyyeppe wai ana gees.”—Leemiso 27:12.

2. 2. Tumanchcha gida. Yihoowa higgeta bonchchiya nena yelidaageetuura woy kayma laggetuura ne hanotaa tobba. Neeni eta maaduwa oychchidoogan eti ufayttanaagee qoncce. Qassi neeni suurebaa oottanawu koyiyogaa beꞌidi eti ufayttana!

   

   “Taani hano gakkanawu oottidobaappe deexxiyagee ta mooruwa haratuyyo yootiyogaa, shin issitoo yootada gita woppaa demmaas.”—Nolan.

   Geeshsha Maxaafaa maaraa: “Ba nagaraa genttiya uri aacenna; shin paaxiyaageenne nagaraa aggiyaagee maarettana.”—Leemiso 28:13.

3. 3. Hegee kaalettiyobaa ammanada ekka. Issibaa nena yelidaageetuppenne galchchaappe genttikko, hegee eti nena ammananawu metootanaadan oottiyogaa dogoppa. Hegaappe denddidaagan, nena yelidaageeti woy galchchaa cimati neeni amarida wodiyawu issi issibaa oottennaadan teqqana danddayosona. Ne oosoy kaalettidobaa ammana ekka, qassi hegaappe simmin “ubbaban xillobaa hananawu” murtta.—Ibraawe 13:18.

   Geeshsha Maxaafaa maaraa: “Zoriyaa siya; timirttiyaakka ekka. Yaatikko, neeni wurssettan aadhdhida eranchcha gidana.”—Leemiso 19:20.

4. 4. Xoossay nena siiqiyogaa mintta ammana. Yihoowi nuna siiqiyo gishshawu, nuuni oottiyo ubbabaa loyttidi erees. Yaatiyo gishshawu, neeni naaꞌꞌu qommo deꞌuwa deꞌikko, I hegaa erees, qassi hegan azzanees. Gidikkokka, ‘I neeyyo qoppiyo gishshawu,’ ne ogiya laammanaadan nena maaddanawu koyees.—1 Pheexiroosa 5:7.

   Geeshsha Maxaafaa maaraa: “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.”—2 Hanidabaa Odiya 16:9.