Yihoowa Markkatu Dirijjitiyaa Essiday Oonee?

Ha wodiyan deꞌiya Yihoowa Markkatu dirijjitee 19tta xeetu layttaa wurssettan doommiis. He wode, Amarkkan, Penssilveeniyan, Pitisberge katamaa matan deꞌiya Geeshsha Maxaafaa tamaaretu guutta citay, Geeshsha Maxaafaa loyttidi pilggiyoogaa doommiis. Eti woosa keettati tamaarissiyo timirtteta Geeshsha Maxaafay tumuppe tamaarissiyoobaara geeddarissidosona. Eti eridobaa maxaafatun, gaazexatuuninne ha wodiyan Yihoowa Kawotettaa Erissiya Wochchiyo Keelaa geetettiya Maxeetiyan attamissiyoogaa doommidosona.

Ammanettida Geeshsha Maxaafaa tamaaretu citan CHarels Tez Raasila giyo bitanee deꞌees. Raasili he wode Geeshsha Maxaafaa tamaarissiyo oosuwaa kaalettidabanne Wochchiyo Keelaa koyro attamissidaba gidikkokka, I ooratta haymaanootiyaa essibeenna. Raasilanne Geeshsha Maxaafaa Tamaare geetettidi he wode xeegettiyaa haratu halchchoy, Yesuus Kiristtoosa timirttiyaa erissiyoogaanne koyro xeetu layttaa Kiristtaane gubaaꞌiyaa oosuwaa kaalliyoogaa. Kiristtaane ammanuwaa Essidaagee Yesuusa gidiyo gishshawu, nu dirijjitiyaa essidaagee A giidi ammanoos.—Qolasiyaasa 1:18-20.