Yihoowa Markkati Daafabaappe Shemppissanawu Maaddiyonaa?

Ee, Yihoowa Markkati daafabay gakkiyo wode darotoo maaddoosona. Nuuni Yihoowa Markkatakka Yihoowa Markka gidennaageetakka maaddoos; hegee Geeshsha Maxaafay Galaatiya 6:10n, “Nuuni . . . asawu ubbawu, ubba qassi ammanuwan nunaara dabbotiyageetuyyo loꞌꞌobaa oottana koshshees” yaagidi zoriyogaara maayiyaba. Daafabay qohidoogeeta nuuni etawu siyettiyabaaninne ayyaanaabankka maaddoos; hegaa mala wodiyan hegee etawu keehi koshshiyaba.—2 Qoronttoosa 1:3, 4.

Maarayettaa

Daafabay qohido heeran deꞌiya galchchatu cimati daafabaappe simmin he galchchatun deꞌiyageeti saro attidaakkonne, qassi eta aybin maaddana koshshiyakko eranawu eta ubbaa demmanawu maloosona. Yaatidi, cimati xomoosidi akeekidobaanne sohuwara maaddidobaa he biittaa Yihoowa Markkatu macara biiruwawu erissoosona.

Maaddana koshshiyabay heeraa galchchatussi danddayettennaba gidikko, Yihoowa Markkatu Oosuwa Kaalettiya Citay koshshiyabaa giigissees. Beni Kiristtaaneti koshaa wode issoy issuwa maaddidoogaara hegee issi mala. (1 Qoronttoosa 16:1-4) He biittaa macara biiroy oottana koshshiyabaa maarayana mala Daafaban Qohettidaageeta Maaddiya Kontteta sunttees. Hara biittaa Yihoowa Markkati banttawu deꞌiya wodiyaninne haraban bantta dosan maaddoosona.—Leemisota 17:17.

Miishshaa

Yihoowa Markkatu macara biirotussi immiyo miishshan oosettiya issibay daafaban qohettidaageeta maaddiyogaa. (Oosuwa 11:27-30; 2 Qoronttoosa 8:13-15) He oosoy miishsha ekkennan bantta dosan oottiyoba gidiyo gishshawu, mooddido miishshay qohettidaageetussappe attin, maarayiyageetussa gidenna. Imettiya miishshaa ubbaa akeekan oyqqoos.—2 Qoronttoosa 8:20.