Geeshsha Maxaafaabaa Oychchiyobatu Zaaruwa / Deꞌuwanne Hayquwa / Hayquwawu Yayyiyogaa Waata Xoonana Danddayay?
Geeshsha Maxaafay yootiyobaa
Nuuni hayquwa nu morkkedan xeellidi bessiyagaadan yayyiyo gishshawu nuna naaganawu koshshiyabata oottoos. (1 Qoronttoosa 15:26) Shin worddo timirttiyappe woy bala ammanuwappe denddidaagan bessiyagaappe aaruwan hayquwawu yayyiyogee asay “bantta deꞌo laytta ubban aylledan” deꞌanaadan oottees. (Ibraawe 2:15) Tumaa shaakka eriyogee ne deꞌuwan ufayssaa xayanaadan oottana danddayiya yashshaappe, hegeekka nena qachchi oyqqiya hayquwa yashshaappe neeni laꞌa kiyanaadan oottana.—Yohaannisa 8:32.
Hayquwa xeelliyagan tumay aybee?
Hayqqidaageeti aynne erokkona. (Mazamure 146:4) Geeshsha Maxaafay hayquwa xiskkuwan leemisiyo gishshawu, hayqqa simmada waayettaneeshsha woy tuggataneeshsha gaada neeni yayyana bessenna.—Mazamure 13:3; Yohaannisa 11:11-14.
Hayqqidaageeti nuna qohana danddayokkona. Kase wolqqaama gidida morkketikka ‘hayqqiyo’ wode wolqqaa xayoosona. (Leemiso 21:16) ‘Eta ixoynne qanaatee ubbay etaara issippe xayiichchidoogaa’ Geeshsha Maxaafay yootees.—Eranchchaa 9:6.
Hayqoy nu deꞌuwawu wurssetta giyogaa gidenna. Xoossay hayqqidaageeta hayquwappe denttidi deꞌuwan wottana.—Yohaannisa 5:28, 29; Oosuwa 24:15.
Xoossay ‘hayqoy deꞌenna’ wodee yaanaagaa qaalaa geliis. (Ajjuutaa 21:4) Hayquwawu yayyiyogee muleera attiyo he wodiya xeelliyagan Geeshsha Maxaafay hagaadan gees: “Xilloti biittaa laattananne yan merinau de7ana.”—Mazamure 37:29.