YELAGATI OYCHCHIYO OYSHAA
Cashshay Tumu Iitabee?
“Cashshaa siyiyogaa taani ubbatoo meezetido gishshawu hegee tawu aynne iitaba milatenna.”—Kiristtofera, 17.
“Taani yelagatettan deꞌiyo wode darotoo cayays. Iitabaa haasayiyogee doommanawu aynne wayssenna, shin agganawu keehi metees.”—Ribiqo, 19.
Oyshaa
Harati cayiyogaa siyiyo wode neeyyo aybi siyettii?
Taani hegaa meezetido gishshawu aynne akeekikke.
Tana hegee guuttaa qohees; shin cayennaadan odikke.
Hegee keehi iitaba; hegaa meezetana danddayikke.
Neeni caya eray?
Mule caya erikke
Issi issitoo cayays
Darotoo cayays
Cashshay iitaba gaada qoppay?
Chii, hegaadan qoppikke
Ee, keehi iitaba
Neeni haasayiyobaa loytta qoppana koshshiyoy aybissee?
Cayiyogee keehi iitaba gaada qoppay? ‘Chii,’ gaada zaarennan aggakka. Hagaadankka qoppana danddayaasa: ‘Hegaappe iita darobay deꞌees. Qassi, oonne cayees!’ Shin hegee tumee?
Ha wodiyan iitabaa haasayenna daro asay deꞌees. Qassi eti cayenna loꞌꞌo gaasoy deꞌees. Leemisuwawu:
Neeni haasayiyobay ne ay mala asakko loytti qonccissees. Harata hanqqetissiyabaa neeni haasayiyogee etawu siyettiyabay nena aynne qofissennaagaa bessiyaba. Yaatin neeni tumu hegaa mala asee?
Geeshsha Maxaafay hagaadan gees: “Doonaappe kiyiya ubbabay wozanaappe kiyees.”—Maatiyosa 15:18.
Cashshay carkkuwa mooriya gaaziya mala. Yaatin, nenakka haratakka qohana danddayiya iitabaa ayssi haasayay?
Cayiyogee harati nena iita asadan qoppanaadan oottana danddayees. Kas Kontirol giyo maxaafay hagaadan gees: “Nuuni haasayiyo ogee nunaara laggetanawu koyiyay oonakko, nu so asaynne nunaara oottiyageeti nuna waati bonchchanaakko, haratuura waani dabbotanaakko, oosuwa woy aawatettaa demmanaakko woy agganaakko, qassi nuna erenna asaykka nubaa ay qoppanaakko qonccissees.” He maxaafay gujjidikka, “‘Taani cayennan aggiyakko haratuura loytta dabbotana danddayiyanaa?’ gaada qoppa” yaagiis.
Geeshsha Maxaafay hagaadan gees: “Cashshaa ubbaa . . . intteppe xaissite.”—Efisoona 4:31.
Cayiyogee neeni qoppiyogaadan haratun nashettanaadan oottenna. Dottoriya Aleks Paakeri, Hawu Rud! giyo ba maxaafan hagaadan giis: “Ubbatoo cayiya uri haasayiyobaa siyiyogee salettiyaba.” I gujjidikka hagaadan giis: “[Ubbatoo iita qaalaa haasayiya uri] miichchiya, minttettiya woy siiqiyogaa bessiya darobaa haasayana danddayenna. Neeni ubbatoo issi mala iitabaa haasayikko hegee nena eranchcha oottenna.”
Geeshsha Maxaafay hagaadan gees: ‘Intte doonaappe iita qaalay mulekka kiyoppo.’—Efisoona 4:29.
Neeni ay oottana danddayay?
Oottanabaa halchcha. Issi agina gidiya wodiyawu iita qaala haasayennan agganawu baaxeta. Ne ay keenaa laamettidaakko xaafa oyqqana danddayaasa. Shin, iitabaa haasayiyogaa muleera agganawu hegaappe aarobaa oottana koshshennan aggenna. Leemisuwawu:
Daro iita haasayaa siyiyogan allaxxoppa. Geeshsha Maxaafay hagaadan gees: “Iita laggetettai lo77o hanotettaa moorees.” (1 Qoronttoosa 15:33) ‘Laggetettaa’ geetettida qaalay asaara issippe wodiya aattiyogaa xallan gidennan biiduwa beꞌiyogan, biiduwa kaassata kaaꞌiyogaaninne yettaa siyiyogan allaxxiyogaakka xaaxi waaxees. Keneeza giyo 17 laytta naꞌay hagaadan giis: “Muuziqaa cenggurssay loꞌꞌido gishsha xallawu, yettan cashshay deꞌikkonne akeekennan aara issippe yexxana danddayaasa.”
Wozannaama asa gidiyogaa bessa. Issoti issoti cayiyogee banttana gastta asa milatissees giidi qoppoosona. Shin, hegee tuma gidenna. Wozannaama asati ‘iitaa kehaa deꞌuwa daruwan shaakkidaageeta’ gidiyogaa Geeshsha Maxaafay yootees. (Ibraawe 5:14) Eti harata ufayssanawu giidi iita qaalaa haasayokkona.
Cashshay carkkuwa mooriya gaaziya mala; he gaazee carkkuwa mooriyogaadan cashshaykka nu qofaa moorees. Ha alamiyan hegaa malabay kumiis! Qommoora odettida maxaafay hagaadan giis: “Woni ha alamiyan iitabay kumidoogaa bolli neeni yaa gujjoppa. Haratuura loꞌꞌobaa haasayanawu neeyyo danddayettida ubbabaa ootta. Yaatikko neeni ufayttana, qassi haratikka nebaa loꞌꞌobaa qoppana.”