Wachi Tawer Baybl end Trakt Sosayti Aybee?
Wachi Tawer Baybl end Trakt Sosayti of Penssliveniya giyo eqotay Amarkkaa, Penssliveniya Duretaa Yamiya higgiyan 1884n eqqida, woriyawu oottenna eqota. Yihoowa Markkati kumetta saꞌan ha eqotaa baggaara Geeshsha Maxaafaanne Geeshsha Maxaafaa qofaadan giigiya xuufeta attamoosonanne hara oosota oottoosona.
Halchchoy “haymaanootiyaba, timirttiyabanne maaduwaba,” ubba qassi “Kiristtoos Yesuusi haariyo Xoossaa Kawotettaa wonggeliya yootiyogaanne tamarissiyogaa” gidiyogaa he eqotay eqqido maaray qonccissees. Issi asi shoobettiyogaa xallan yame gideesippe attin, immiyo miishshaa likkiyana gidenna. Ha eqotaa yametinne kaalettiyageeti Yihoowa Markkatu Oosuwa Kaalettiya Citaa maaddoosona.
Higgiya Maaran Hashetiyabata
Yihoowa Markkati dumma dumma biittatun higgiya maaran eqqida, Wachi Tawer Baybl end Trakt Sosayti of Penssliveniyappe hara unddennabatu baggaara oottoosona. Hegeetuppe issotu issotu sunttan “Watch Tower,” “Watchtower,” woy hegeetuppe issuwa birshshettay deꞌees.
Higgiya maaran eqqida hegeeti eqqido wodiyappe doommidi nuuni darobaa oottanaadan maaddidosona; leemisuwawu kaallidi deꞌiyabawu maaddoosona:
Xaafuwanne attamuwa. Nuuni 253 miiloone gidiya Geeshsha Maxaafata attamida. Nu xuufeti 1,050ppe dariya doonatun deꞌoosona. Hegaa bolli, jw.org saytee 300ppe dariya doonatun asay miishshaa qanxxennan intternneetiyan Geeshsha Maxaafaa nabbabanaadan, qassi, “Xoossaa Kawotettay Aybee?” giyagaa mala oyshatuyyo Geeshsha Maxaafaappe zaaruwa demmanaadan maaddees.
Timirttiya. Nuuni dumma dumma timirtte keettatun Geeshsha Maxaafaa tamaarissoos. Leemisuwawu, 1943ppe doommidi, Giiliyade Geeshsha Maxaafaa Timirtte Keettay tamaarissiyo daroban 10,000 gidiya Yihoowa Markkati goꞌettidosona; hegee eti misoone gididi haggaazanaadan woy kumetta saꞌan oosettiya oosuwa minttanaadan maaddiis. Qassi saaminttan saaminttan, hara daro miiloone asati, Yihoowa Markka gidenna asatikka nu galchchatu ubbaa shiiquwan tamaaroosona. Hegaa bollikka, nuuni 136 doonatun tamaarissiyo maxaafaa giigissidi asay nabbabanaadaaninne xaafanaadan tamaarissoos.
Maaduwa. Ruwanddan asay denttettin 1994n dummatiya zariya buttidoogaa woy 2010n Heytin denddida biittaa qaattaa malan qohettidaageeta nuuni koshshiyaban maaddida.
Nuuni eqotatuuninne higgiya maaran eqqidabatun darobaa oottikkonne, nu oosoy hegeetuppe awugaanne ketenꞌꞌidi oottiyoba gidenna. Kiristtaaneti ubbay mishiraachchuwa yootanaadaaninne tamaarissanaadan Xoossay azazidobaa polana bessees. (Maatiyosa 24:14; 28:19, 20) Nuuni Xoossay nu oosuwa kaafiyogaanne hegaa awudekka ‘dichchanaagaa’ ammanoos.—1 Qoronttoosa 3:6, 7.