YELAGATI OYCHCHIYO OYSHAA
Taani Dooriyoy Ay Mala Maayoo?
Neeni ne maayuwaabaa qoppana bessiyoy aybissee? Neeni maayiyoobay ne oonatettaa qonccissiyo gishshataassa. Ne maayoy nebaa ay qonccissii?
Paashshiniyaa kaalliyoogawu heezzu gita balaanne he balaappe naagettiyo ogiya
Balaa #1: Neeni erissuwan beꞌiyoobaa maayaasa.
Tereeso giyo yelagiyaa hagaadan gaasu: “Taani issi maayuwaabaa keehi daro erissuwaa beꞌada, issi issitoo he maayuwaa dosays. Neeni issi qommo maayuwaa maayiya asaa darotoo beꞌikko, he maayuwaa maayanawu koyaasa.”
Erissuwan odettiyaabata kaalliyay macca naatu xalla gidenna. Ze Everiting Gayid tu Raysing Adolesent Boyis giyo maxaafay hagaadan gees: “Attumaageetikka erettida paashiniya kaallanawu koyoosona. Issibaa shammanaadan denttettiyaabaa ubbatoo beꞌiiddi diccoosona.”
Hagaadan oottanawu mala: Geeshsha Maxaafay hagaadan gees: “Eeyya asi ubbabaa ammanees; shin cinccai akeekidi tanggees.” (Leemiso 14:15) Ha maaraa kaalliyoogan neeni erissotun beꞌiyoobata akeekan doora. Leemisuwawu, issi maayuwaa erissoy pokkoba gidikko, nena hagaadan oychcha:
‘Taani ha maayuwaa doorikko goꞌettiyay oonee?’
‘Taani hegaa maayikko asay tana ay mala asa giidi qoppanee?’
‘Asay tabaa hegaadan qoppanaadan koyiyaanaa?’
Maaddiya zoriyaa: Issi saaminttawu, maayuwaabaa yootiya erissota beꞌiyo wode ubbatoo hagaadan qoppa: He erissoti ay mala maaraa tamaarissiyoonaa? He erissoti neeni issi qommo maayuwaa maayanaadan ammanttanawu giigidonaa? Kaareeno giyo yelagiyaa hagaadan gaasu: “Erissuwaa yootiyaageeti neeni loytta maayanaadan, loꞌꞌanaadan, qassi ne bollaa bessanaadan denttettoosona. Yelagatu qofay hegaa gidiyoogaa eti eriyo gishshawu, hegan cimmoosona.”
Balaa #2: Hara asaa milatanawu koyiyoogaa
Maanuꞌeela giyo yelagay hagaadan giis: “Issi maayoy wodee ehiidobaa gidikko, ooninne hegaa malaa maayees. Neeni hegaa malaa maayennaba gidikko nena boroosona.” Aano giyo yelagiyaakka he qofaa maayawusu. A, “Gitabay haratun nashettiyoogaa” yaagaasu.
Hagaadan oottanawu mala: Geeshsha Maxaafay hagaadan gees: “Ha sa7aa asaa milatoppite.” (Roome 12:2) Ha zoriyaa kaalliyoogan ne maayoy ay malakko qoppada, nena hagaadan oychcha:
‘Taani hagaadan maayiyoy aybissee?’
‘Erettida paabirkkan giigida maayuwaa haraappe xoqqu ootta xeelliyaanaa?’
‘Ta maayuwaa harati nashshanaadan koyiyaanaa?’
Maaddiya zoriyaa: Paashiya maayada haratun nashettiyoogaa woy hegaadan maayennan aggada nashettennaagaa qoppiyoogaappe, ne wozanan minna. Ne hanotaa neeni dosikko, harati ay giikkonne hirggakka.
Balaa #3: ‘Mattumaa denttettiyoogee loꞌꞌo giidi’ qoppiyoogaa
Jeenifero giyo yelagiyaa, “Tumaa yootanawu keehi qantta, baqqi oyqqiyaanne bollaa bessiya maayuwaa maayanawu issi issitoo paacettays” yaagaasu.
Hagaadan oottanawu mala: Geeshsha Maxaafay, intte alleeqettiyoobay ‘bolla baggaa loyttiyoogaappe, intte wozana giddon deꞌiya loꞌꞌotetta gido’ giidi zorees. (1 PHeexiroosa 3:3, 4) Ha zoriyaa kaalliyoogan, keehi koshshiyaabay aybakko qoppa: Loꞌꞌo maayo maayiyoogeeyye, loꞌꞌo asa gidiyoogee.
Maaddiya zoriyaa: Issi uraa keehi loꞌꞌo asa oottiyaabay ashkketettaa. Ha wodiyan daro asay hegaadan qoppennaagee tuma. SHin neeni hagaadan qoppa:
Biddidi simmenna uraara woy babaa xallaa haasayiya uraara haasaya eray? Izaawu asi bana dosanaadan koyikkonne, A hanotay asi A dosennaadan oottiyoogaa akeekenna.
Asay babaa xalla haasayiya ura dosennaagaadan bana bessanawu giidi maayiya urakka dosenna
Neeni giigenna maayuwaa maayikko, he ura mala gidaasa. Ne maayoy asay nena xeellanaadan koyiyoogaa bessees, hegee qassi neeni hirggiyoogaa woy nebaa xalla qoppiyoogaa asawu qonccissees. Yaatiyoogee, neeni harati nena xeellanaadan aybanne oottana giidi asi qoppanaadan oottiyo gishshawu, iita uraara laggetanaadankka oottana danddayees.
Hegaa mala asi nena xeellanaadan koyana xayikko, bessiyaagaadan maaya. Mooniko giyo yelagiyaa hagaadan gaasu: “Bessiyaagaadan maayiyoogee cima asaagaadan maayiyoogaa gidenna. Hegee neeni nenanne harata bonchchiyoogaa bessiyaaba.”