“Ayfiya Gishshaa Ayfe” Giyogee Woygiyogee?

Geeshsha Maxaafay yootiyobaa

“Ayfiya gishshaa ayfe” giya higgee Xoossay Muuse baggaara immido Higgiya, qassi Yesuusi deriya bolli tamaarissiyo wode appe yootiis. (Maatiyosa 5:38; Kessaabaa 21:24, 25; Zaarettido Wogaa 19:21) Hegee moorida ura qaxxayiyo qixaatee mooruwara lagge gidana koshshees giyogaa bessees.a

Issi uri haraa eriiddi qohiyo wode he higgee polettees. Eriiddi haraa qohida uraa xeelliyagan Muuse Higgee, “Menttikko meqqo; aife gishshaa aife; achcha gishshaa achcha. Asa bollan qohuwaa gattida oonikka i gattido qohuwaa malai a bollankka gakko” yaagees.—Wogaabaa 24:20.

“Ayfiya gishshaa ayfe” giya higgee imettido gaasoy aybee?

“Ayfiya gishshaa ayfe” giya higgee haluwa kessiyo maataa immenna. Shin sunttettida daannati shuguwakka minuwakka darennan qaxxayanaadan maaddees.

He higgee issi asi harata eriiddi qohennaadan woy qohanawu malennaadan teqqees. Higgee, “Hara asai [Xoossaa suure pirdday polettiyogaa beꞌiyageeti] hegaa siyidi yayyana; hegaa mala iita oosuwaa naa77antto oottenna” yaagees.—Zaarettido Wogaa 19:20.

Kiristtaaneti “ayfiya gishshaa ayfe” giya higgiya kaallana koshshii?

Akkay, Kiristtaaneti ha wogaadan oottana koshshenna. He higgee Yesuusi yarshshettidi hayqqin kuuyettida Muuse Higgetuppe issuwa.—Roome 10:4.

Gidoppe attin, ha higgee Xoossaa qofaa loytti akeekanaadan maaddees. Leemisuwawu, Xoossay suure pirddaa dosiyogaa bessees. (Mazamure 89:14) I suure pirddawu kessido maraa, hegeekka, mooridaageeti “likke pirddan” qaxxayettana koshshiyogaakka qonccissees.—Ermmaasa 30:11.

“Ayfiya gishshaa ayfe” giya higgiyabaa asay qoppiyo bala qofaa

Bala qofaa: “Ayfiya gishshaa ayfe” giya higgee keehi qohiyaba.

Tumaa: He higgee meqettaa iitidi pirddiyo maataa immenna. Shin he wogaa maara kaalliyo wode, gooba daannati hanotaanne izaawu ay keenaa eriiddi mooridaakko yiggi xeelli simmidi, qaxxayanaadan oottees. (Kessaabaa 21:28-30; Qoodaabaa 35:22-25) Hegaa gishshawu, “Ayfiya gishshaa ayfe” giya higgee bessiyagaappe aaruwa qaxxayenna mala teqqees.

Bala qofaa: “Ayfiya gishshaa ayfe” giya higgee asay halo kessiiddi deꞌanaadan oottees.

Tumaa: Muuse Higgee, “Haluwaa kiyoppa; qassi ne asaappe issuwaayyoonne uluwan lancce oiqqoppa” yaagees. (Wogaabaa 19:18) He Higgee issi asi halo kessanaadan denttettiyaba gidennan, asay Xoossaaninne moorettidabaa giigissana mala I wottido higgiyan ammanettanaadan minttettees.—Zaarettido Wogaa 32:35.

Yesuusi bala qofaa giigissiis

Yesuusi “ayfiya gishshaa ayfe” giya wogaa issi issi asay maara akeekibeennaagaa eriis. I hagaadan giido wode eta qofaa giigissiis: “Kase, ‘Ayfiya gishshaa ayfe, achchaa gishshaa achcha’ giidoogaa siyideta. Shin taani intteyyo hagaa odays: Iita asa eqettoppite, shin intte ushachcha qinxxalliya baqqiya urawu haddirssa baggaa zaarite.”—Maatiyosa 5:38, 39.

Yesuusi “kase . . . giidoogaa siyideta” giidobaa akeeka. I yootidobay, Ayhuda haymaanootiya kaalettiya issoti issoti halo kessanaadan tamaarissiyobaa gidennan waayi aggana. Geeshsha Maxaafaa eranchchay Adam Kilarki hagaadan giis: “Ayhudati he higgiya [ayfiya gishshaa ayfe giyagaa] . . . issi uri lanccidinne haluwa kessanawu koyidi keehi danobaa oottana danddayissiyabadan xeellidaba milatees.” Haymaanootiya kaalettiya he asati haluwa kessiyogaa minttettiyogan, Xoossaa Higgiya asay suure akeekennaadan oottidosona.—Marqqoosa 7:13.

Shin Yesuusi Xoossaa Higgiyan qonccida waannabay siiquwa gidiyogaa yootiis. I hagaadan giis: “‘Neeni ne Xoossaa Yihoowa . . . siiqana bessees.’ Ubbaappe aadhdhiya koyro azazoy hagaa. Naaꞌꞌanttoogeekka A mala, ‘Ne shooruwa nena siiqiyogaadan siiqana bessees’ yaagees. Ha naaꞌꞌu azazoti kumetta [Higgiyawu] kane.” (Maatiyosa 22:37-40) Yesuusi tumuppe bana kaalliyageeta shaakkidi erissiyabay halo kesuwa gidennan, siiquwa gidiyogaa yootiis.—Yohaannisa 13:34, 35.

a Issi issitoo Laatine qaalan leks taliyonis giyo ha maaray beni issi issi biittatu higgiyankka deꞌees.