Koyro Nagaray Aybee?

Geeshsha Maxaafay yootiyobaa

Nagaraa oottida koyro asati Addaamanne Hewaano. Eti “lo77uwaanne iitaa erissiya mittaa teeraappe” miyogan Xoossaayyo azazettennan ixxido wode, daro asay koyro nagaraaa giyobaa oottidosona. (Doomettaabaa 2:16, 17; 3:6; Roome 5:19) He mittay Xoossay asaayyo likkenne likke gidenna giyobaa maaciyo maataa bessiyaba gidiyo gishshawu, Addaameenne Hewaana hegaappe meennaadan etawu odettiis. Addaameenne Hewaana he mittaa teeraappe miyogan oottana bessennabaa oottidosona; likkenne likke gidenna giyobaa banttawu maacanawu koyidosona. Yaatiyogan, eti Xoossay likkenne likke gidenna giyo maataa eqettidosona.

• “Koyro nagaray” Addaamanne Hewaano waati qohidee?

• “Koyro nagaray” nuna waati qohidee?

• “Koyro nagaraa” gaasuwan yiidabaappe laꞌa kiyana danddayiyo?

• “Koyro nagaraa” xeelliyagan bala qofaa

“Koyro nagaray” Addaamanne Hewaano waati qohidee?

Addaameenne Hewaana nagaraa oottido gishshawu, ceeggidi wurssettan hayqqidosona. Eti Xoossaara dabbotido dabbotay duuxxiis, qassi polo payyatettan merinawu deꞌana hidootay etappe haliis.—Doomettaabaa 3:19.

“Koyro nagaray” nuna waati qohidee?

Addaameenne Hewaana bantta nagaraa bantta zeretta ubbawu laatissidosona. Hegee yelidaageeti bantta naatussi issi issi harggiya aattana danddayiyogaa mala. (Roome 5:12) Hegaa gishshawu, asay ubbay “nagaranchcha”b gididi yelettiis; hegee nuuni balabaa oottanawu zuubbaroos giyogaa.—Mazamure 51:5; Efisoona 2:3.

Nuuni laattido nagaraa gaasuwan harggoos, ceeggoosinne hayqqoos. (Roome 6:23) Qassi nuuninne harati oottido balabaa gaasuwan waayettoos.—Eranchchaa 8:9; Yaaqooba 3:2.

“Koyro nagaraa” gaasuwan yiidabaappe laꞌa kiyana danddayiyo?

Ee. Yesuusi “nu nagaraa kammana” mala nu nagaraassi hayqqidoogaa Geeshsha Maxaafay yootees. (1 Yohaannisa 4:10, tohossa qofaa) Yesuusa yarshshoy nuna laattido nagaraappe laꞌa kessana danddayees, qassi Addaameppenne Hewaanippe halida, polo payyatettan nuuni merinawu deꞌanaadan oottana danddayees.—Yohaannisa 3:16.c

“Koyro nagaraa” xeelliyagan bala qofaa

Bala qofaa: Koyro nagaraa gaasuwan Xoossaara mule dabbotana danddayokko.

Tumaa: Addaameenne Hewaana oottidoban Xoossay nuna mooranchcha kessenna. I nuuni nagaranchcha gidiyogaa akeekees, qassi nu abbiyappe aarobaa oottanaadan koyenna. (Mazamure 103:14) Laattido nagaraappe denddidaagan nuuni waayettikkonne, aara mata dabbo gidanaadan Xoossay nuna shoobbees.—Leemisota 3:32.

Bala qofaa: Haattan muukettiyogee koyro nagaraappe laꞌa kessiyo gishshawu, guutta naata haattan muukkana koshshees.

Tumaa: Nuuni attanawu oottana bessiyabaappe issoy haattan muukettiyogaa gidikkonne, nagaraappe issi asa geeshshana danddayiyay Yesuusa yarshshuwa xalla. (1 Pheexiroosa 3:21; 1 Yohaannisa 1:7) Tumu ammanoy eran beettiyo gishshawu, guutta naati ammananaadan oottana danddayettenna. Hegaa gishshawu, Geeshsha Maxaafay guutta naata haattan muukkanaadan yootenna. Beni Kiristtaaneti oottidobaykka hegaa bessees. Eti haattan muukkidoy guutta naata gidennan, ammaniya asata; hegeetikka, Xoossaa Qaalaa ammanida ‘attuma asatanne macca asata.’—Oosuwa 2:41; 8:12.

Bala qofaa: Mooppite giido mittaappe koyro miidaara Hewaano gidiyo gishshawu, Xoossay macca asaa qanggiis.

Tumaa: Xoossay qanggidoy macca asaa gidennan, Hewaano nagaraa ootissida, ‘Seexaanaanne Dabloosa giyo beni shooshsha’ qanggiis. (Ajjuutaa 12:9; Doomettaabaa 3:14) Hegaa bollikka, Xoossay koyro nagaraa oottiday A machchiyo gidennan, Addaama gidiyogaa yootiis.—Roome 5:12.

Addaamee ba machchiyo haaranaagaa Xoossay yootidoy aybissee? (Doomettaabaa 3:16) Xoossay hegaa giyo wode, O huqqunnanaadan anttiis giyogaa gidenna. Shin I nagaraa gaasuwan gakkana iitabaa yootiis. Issi asi ba machchiyo siiqanaadaaninne bonchchanaadan, hegaadankka ubba macca asaa xoqqu ootti xeellanaadan Xoossay koyees.—Efisoona 5:25; 1 Pheexiroosa 3:7.

Bala qofaa: Koyro nagaray inddan gayttiyogaa.

Tumaa: Koyro nagaray inddan gayttiyogaa gidenna; kaallidi deꞌiya gaasuwa beꞌa:

• Addaamee loꞌꞌuwanne iitaa erissiya mittaappe meennaadan Xoossay azazidoy machchiya baynnan, I barkka deꞌiyo wodiyana.—Doomettaabaa 2:17, 18.

• Xoossay Addaamanne Hewaano “Yelettite; corattite” yaagiis. Hegee naata yeliyogaa bessiyaba. (Doomettaabaa 1:28) Xoossay koyro azinaanne machchiyo oottite giidobaa eti oottido gishshawu qaxxayikko, hegee I meqettaa iita gidiyogaa bessees.

• Addaameenne Hewaana nagaraa issippe oottibookkona; Hewaana nagaraa kaseta oottin, I azinay ippe simmin oottiis.—Doomettaabaa 3:6.

• Geeshsha Maxaafay azinaynne machchiya inddan gayttiyogaa diggenna.—Leemisota 5:18, 19; 1 Qoronttoosa 7:3.