“Hagee Tamaarissiyo Ooratta Oge!”

SU-JUNGO giyo Tohossa Kooriyan issi xoqqa timirtte keettan tamaareta zoriya maccaasiyaa tamaarissiyo wode jw.org weybsaytiyan deꞌiya biidota bessawusu. A hagaadan gaasu: “Tamaareti Tumu Lagge Giyoogee Aybee? giyo biiduwaa beꞌidi keehi ufayttidosona! Eti hegaa beꞌidi, ‘Taani laggetettaabaa hagaadan mule qoppa erikke. Hagee tamaarissiyo ooratta oge!’ yaagidosona. Issoti issoti zore koyiyo wode ha weybsaytiyaa xomoosanaagaa yootidosona.” Su-junga gujjada, “Taagaadan tamaarissiya hara daroti ha biiduwaa bessanaadan minttettays; qassi eti tamaarissanawu maaddiya ha loꞌꞌo miishshaa demmido gishshawu ufayttoosona” yaagaasu.

Yashissiya Ura Bubbuxennan Xoona giyo bootta saleedaa misiliyaa bessiya biidoykka Tohossa Kooriyan deꞌiya daro tamaareta keehi maaddiis. Naati makkalennaadan zoriya dirijjitiyaara maadettada oottiya issi asttamaariyaa he biiduwaa tamaareta bessaasu. A hagaadan gaasu: “Hegan deꞌiya muruta misileta naati ufayttidi beꞌidosona. Qassi ha biidoy makkalaa danddayiyoogaa xalla gidennan, hegee gakkennaadan waati teqqana danddayiyaakkokka bessiyo gishshawu keehi maaddees.” He dirijjitee koyro xekka timirtte keettatun darotun tamaarissiyo wode he biiduwaa bessanawu oychiis. Oychidi, eeno giyo zaaruwaa demmiis. Polisetikka jw.org weybsaytiyan deꞌiya biidota goꞌettoosona.

Ha weybsaytiyaa xomoosa erennaba gidikko, xomoosanaadan minttettoos. Hegee xomoosanawu wayssenna, qassi cenggurssan giigidabaa, biiduwaa, Geeshsha Maxaafaanne hara daro xuufeta dawunlode oottanawu miishsha qanxxakka.