Xoossay asawunne saꞌawu sinttappe kehabaa ehaanawu qaalaa gelido gishshawu, Bashshaa Gallassaa Saatiyaa xeelliyaagan odettiyaabay polettenna
SINTTA HUUPHE YOHUWAA | ALAMEE GIIGANA DANDDAYENNEE?
Geeshsha Maxaafay Woygii?
HAꞌꞌI alamiyan deꞌiya metoy Geeshsha Maxaafan daro layttaappe kase odettiis. SHin sinttappe kehabay yaanaagaakka Geeshsha Maxaafay yootees. Geeshsha Maxaafay kasetidi odiyoobaappe dariya baggay maalaalissiya ogiyan polettiichido gishshawu, Geeshsha Maxaafay yootiyoobay keehi koshshennaba giidi eesuwan kuuyana bessenna.
Leemisuwawu, kaallidi deꞌiya Geeshsha Maxaafaa hiraagata qoppa:
“Issi biittaa asai hara biittaa asaara olettana; qassi issi kawotettai hara kawotettaara olettana; koshainne biittaa qaattai ubbasan de7ana.”—Maatiyoosa 24:7.
“Wurssetta gallassi waissiya wodee [yaana]. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.”—2 Ximootiyoosa 3:1-4.
Issi issi asay ha hiraagati alamee giigana danddayennaagaa keena yaa iitidoogaa qonccissiyaabadan qoppana danddayoosona. Ha alamiyaa asi giigissana danddayennaagee tuma. Geeshsha Maxaafay yootiyoogaadan, alamiyaa giigissanawu asawu eraykka wolqqaykka baawa. Hegee hagaappe kaallidi deꞌiya xiqisetun qoncciis:
“Asaassi likke milatiya ogee de7ees; shin bin, a wurssettai haiquwan kessi yeggees.”—Leemiso 14:12.
‘Issi asi bawu deꞌiya haariyo maataa hara asa qohanawu goꞌettees.’—Eranchchaa 8:9.
‘Asi ba hemetaa suurissanaagee aawu shene gidenna.’—Ermmaasa 10:23.
Asay ba koyiyo ubbabaa oottiyoogaa aggennaba gidikko, alamiyan ubbasan bashshay gakkana danddayees. SHin hegee hanenna! Aybissi? Geeshsha Maxaafay hagaadan gees:
Xoossay ‘saꞌaa a baasuwaa bolli essiis; i meri merinawukka qaaxxenna.’—Mazamure 104:5.
“Issi yeletai aadhdhiyo wode, hara yeletai sohuwaa oiqqees. SHin ha biittai merinaukka laamettennan de7ees.”—Eranchchaa 1:4.
“Xilloti biittaa laattananne yan merinau de7ana.”—Mazamure 37:29.
“Biittan daro kattai mokko; dereti kattan kamettona.”—Mazamure 72:16.
Geeshsha Maxaafay tamaarissiyo ha timirtteti qoncce zaaruwaa yootoosona. Issi issibay hambbalaashettiyoogan, qumaynne haattay qaxuhatiyoogan, woy kumetta saꞌan gakkiya bashshan asay xayenna. Alamee niyukileeriyaa olan xayenna. Ayssi? Xoossay saꞌaa hanotaa naagiyo gishshataassa. Xoossay asawu koyidobaa dooriyo maataa immiis. SHin eti bantta kuuyidobay kaalettiyoobaa cakkana. (Galaatiyaa 6:7) Alamee eqqana danddayennanne kunddanawu eesotiya baabure mala gidenna. Asay ay keena bana qohana danddayiyaakko Xoossay zawaa wottiis.—Mazamure 83:18; Ibraawe 4:13.
SHin Xoossay hegaappe harabaa oottana. I daro ‘sarotettay’ deꞌanaadan oottana. (Mazamure 37:11) Ha huuphe yohuwan qonccidabay miilooniyan qoodettiya Yihoowa Markkati sinttappe yaana kehabaa xeelliyaagan Geeshsha Maxaafaa xannaꞌiyo wode eridobaappe amaridaba xalla.
Yihoowa Markkati layttaaninne diccido wogan dumma dumma gidida, kumetta saꞌan deꞌiya asata. Eti Geeshsha Maxaafay a sunttay Yihoowa gidiyoogaa yootiyo, issi tumu Xoossawu goynnoosona. Geeshsha Maxaafay hagaadan giyo gishshawu eti sinttanaabaa yayyokkona: “Salota medhdhida GODAI, biittaakka giigissidi oottidaagee, qassi asi de7anaadaanappe attin, biittaa coo medhdhibeenna Xoossai hagaadan yaagees; ‘Taani GODAA; taappe hari baawa.’”—Isiyaasa 45:18.
Sinttappe saꞌaanne asaa gakkanabaa xeelliyaagan ha huuphe yohuwan Geeshsha Maxaafay tamaarissiyo amaridabay qoncciis. Gujo qofaa demmanawu, Yihoowa Markkati attamissido Xoossaappe Yiya Mishiraachuwaa! giyo brooshuriyaa timirtte 5 xeella; qassi hagee www.jw.org/wal saytiyankka deꞌees.
Qassi www.jw.org saytiyan deꞌiya Xoossay Saꞌaa Medhidoy Aybissee? giyo biiduwaa xeellana danddayaasa (XUUFETA > BIIDUWAA garssan xeella.)