Xoossaa Kawotettan ‘Sarotettay Darana’

Daro wodiyawu naagido Xoossaa Kawotettay, hegeekka Xoossay essido kumetta alamiyaa ayssiya haaroy asay sarotettaaninne issippetettan deꞌanaadan oottana. Mazamure 72:7n odettidaagaadan, ‘sarotettay darana.’ SHin Xoossaa Kawotettay kumetta saꞌaa haariyoogaa doommiyoy awudee? I waatidi haaranee? Qassi neeni Kawotettaa haaruwan waata goꞌettana danddayay?

XOOSSAA KAWOTETTAY AWUDE YAANEE?

Xoossaa Kawotettay mata wode yaanaagawu ‘malaata’ gidana daro hanotata Geeshsha Maxaafay kasetidi yootiis. He ubba “malaatai” issippe kumetta saꞌan deꞌiya olaara, namisaara, harggiyara, darosan biittay qaxxiyoogaaranne yaa dari dari biida makkalaara gayttidaba.—Maatiyoosa 24:3, 7, 12; Luqaasa 21:11; Ajjuutaa 6:2-8.

Hara hiraagay hagaadan gees: “SHin wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, . . . banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, . . . otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.” (2 Ximootiyoosa 3:1-4) Hegaa mala eeshshati kaseesappekka ubbatoo amarida ogiyan qoncciiddi takkidosona. SHin, haꞌꞌi eti ubbasan meeze gididosona.

He hiraagati 1914ppe doommidi polettiyoogaa doommidosona. Taarikiyaa eranchchati, polotikaa asatinne xaafeti he layttaappe simmin alamee keehi laamettidoogaa yootidosona. Leemisuwawu, Denmarkke biittaa taarikiyaa eranchchay Piter Muuniki hagaadan giis: “Olay 1914n doommido wode asawu ooratta taarikee doommiis. Ufayssiya dichchaa wodiyaappe, . . . nuuni daafabay, metoy, ixoynne hirggay ubbasan deꞌiyo wodiyaa gakkida.”

Loꞌꞌobay, he ubbabay aadhdhi simmin sarotettay yaana. Xoossaa Kawotettay mata wode saꞌa ubbaa haaranaagaa hegeeti bessoosona. Yesuusi wurssetta wodiyaa malaata odido wode, ha loꞌꞌobaakka yootiis: “Asa ubbau markka gidana mala, kawotettaa wonggeliyaa mishiraachchoi sa7a ubban odettana; hegaappe guyyiyan, wurssettai gakkana.”—Maatiyoosa 24:14.

He mishiraachchoy Yihoowa Markkati yootiyo waannaba. Yihoowa Kawotettaa Erissiya Wochiyo Keelaa giyaagee eta waanna xuufiyawu huuphe yoho. Wochiyo Keelay Xoossaa Kawotettay asawunne saꞌawu oottana ufayssiyaabaa ubbatoo qonccissees.

XOOSSAA KAWOTETTAY SAꞌAA WAATI HAARANEE?

Zaaroy ha keehi koshshiya oyddubaara gayttidaba:

1. He Kawotettay deriyaa haariya oonanne goꞌettenna.

2. Deriyaa haariyaageeti bantta maataa yeddanawu koyokkona; qassi Xoossaa Kawotettaa eqettoosona.—Mazamure 2:2-9.

3. Asaa ubbatoo haaranawu koyiya polotikaa kawotettata Xoossaa Kawotettay xayssana koshshees. (Daaneela 2:44; Ajjuutaa 19:17-21) Kumetta saꞌan wurssettan denddiya ha olay Armmageedoona geetettees.—Ajjuutaa 16:14, 16.

4. Xoossaa Kawotettawu eeno giidi haarettiya ubbay Armmageedoona olaappe attidi sarotettay deꞌiyo ooratta alamiyaa gelana. Eti Geeshsha Maxaafay “zawai bainna daro asaa” giyoogeeta; eta qooday miilooniyan qoodettiyaagaa gidennan waayi aggana.—Ajjuutaa 7:9, 10, 13, 14.

KAWOTETTAA HAARUWAAPPE NEENI WAATA GOꞌETTANA DANDDAYAY?

Xoossaa Kawotettawu haarettanawu koshshiya koyrobay timirttiyaa. Yesuusi Xoossaa hagaadan woossiis: “Asai nena issi Xoossaa gididaagaa erana malanne, qassi neeni kiittido Yesuus Kiristtoosa erana mala, hagee merinaa de7o.”—Yohaannisa 17:3.

Asay Xoossaa Yihoowa eriyo wode, daro ogiyan goꞌettees. Ane naaꞌꞌubaa qoppa: Koyruwan, eti A mintti ammanoosona. Naqaashay deꞌiyo he ammanoy, Xoossaa Kawotettay beettiyaagaa keena qoncce gidiyoogaanne I haariyo wodee matidoogaa eti ammanettanaadan oottees. (Ibraawe 11:1) Naaꞌꞌanttuwan, eti Xoossaanne bantta shooruwaa kaseegaappe aaruwan siiqoosona. Eti Xoossaa siiqiyoogee ayyo wozanappe azazettanaadan denttettees. SHooruwaa siiqiyoogee eti Yesuusi yootido kaallidi deꞌiya qofaa oosuwan peeshshanaadan maaddees. I, “Asi intteyyo oottanau intte dosiyoogaadan; haraukka hegaadan oottite” yaagiis.—Luqaasa 6:31.

Siiqiya Aawaagaadan, nuna Medhdhidaagee nuussi keehi loꞌꞌobaa amottees. Geeshsha Maxaafay “tumu de7uwaa” giyoobaa nuuni demmanaadan I koyees. (1 Ximootiyoosa 6:19) Ha wodiyaa deꞌoy ‘tumu deꞌo’ gidenna. Miilooniyan qoodettiya asawu deꞌoy keehi deexo; qassi eti deꞌanawu baaxetoosona. Xoossaa Kawotettay assi haarettiyaageetussi oottana, he “tumu de7uwaa” qonccissiya ufayssiya amaridabata beꞌa.