UBBABAY TAALLETTIYOGAA WAATI GENCCANEE?

Hanotaa Ammana Ekka

Shammiyobaa gatee loddan loddan gujjiyo wode nuuni demmiyo miishshaykka gujjiyaba gidikko, hegaabaa daro akeekennan aggana danddayoos. Gidikkonne, shammiyobaa gatee issi kutti gujjin, nuuni demmiyo miishshay gujjennaba gidikko, keehi unꞌꞌettananne hirggana danddayoos; ubba nuuni koshshiyabaa kunttiyo so asay deꞌiyaba gidikko, hegee keehi hirggissiyaba.

Nuuni ubbabaa gatee gujjennaadan teqqana danddayokko. Shin he hanotaa ammani ekkiyogee nuna maaddana danddayees.

YAATIYOGEE KEEHI KOSHSHIYOY AYBISSEE?

Ubbabay taallettennaadan eti teqqana danddayennaagaa ammani ekkiya asati . . .

woppu giidi deꞌanawu metootokkona. Nuuni woppu giidi deꞌiyo wode, suurebaa qoppoosinne loꞌꞌobaa kuuyoos.
iita meeziya agganawu metootokkona. Leemisuwawu, qanxxana koshshiyabawu miishshaa qanxxennan takkiyogee, woy bessennabawu miishshaa kessiyogee loꞌꞌo meeze gidenna.
miishshaara gayttidaban so asaara ooyettennan deꞌanawu metootokkona.
kaseyana koshshiyabatanne shammana bessiyabata hanotaadan giigissiyogaa gujjin, genccanawu maaddiya ogeta shaakki eranawu metootokkona.

WAATANA DANDDAYAY?

Hanotaa meezeta. Ubbabay taallettiyo wode, danddayettida keenan darobawu miishshaa kessoppa. Issoti issoti bantta abbiyappe aaruwan deꞌanawu maloosona, hegee duge goggiya shaafaa haattaa pude wadhdhanawu maliyogaa mala! Hegaappe denddidaagan, eti daafura deꞌuwa deꞌoosona. Neeyyo so asay deꞌikko, etawu koshshiyabaa kunttiyogee nena qofissana danddayees, qassi hegee tumukka bessiyaba! Gidikkonne, hagaa dogoppa: Ne soo asay aybippenne aaruwan koyiyobay ne siiquwa, ne wodiyanne neeni etawu qoppiyogaa.

“Intte giddon hirggidi ba bariya guuttaa adussana danddayiyay oonee?”— Luqaasa 12:25.

“Hegaa gishshawu, wonttoyyo mule hirggoppite; ayssi giikko, wonttossi hirggissiya harabay deꞌana. Gallassa ubbawu awu awu gidiya metoy deꞌees.”—Maatiyosa 6:34.

Abbiyappe aaruwan deꞌanawu maliyogee duge goggiya shaafaa haattaa pude wadhdhanawu maliyogaa mala