UBBABAY TAALLETTIYOGAA WAATI GENCCANEE?

Ne Miishshaa Eratettan Goꞌetta

Ubbabay taallettiyogee nuuni ubbay metootanaadan oottees. Shin neeni hidootaa qanxxana bessenna. Hanotaa giigissanawu neeni oottana danddayiyobati deꞌana danddayoosona.

YAATIYOGEE KEEHI KOSHSHIYOY AYBISSEE?

Neeyyo deꞌiyari keena miishshaa maara goꞌettana xayikko, miishshay nena yaa metana danddayees; hegee qassi ne unꞌꞌettanaadan oottees. Neeyyo deꞌiya miishshay daro gidana xayikkonne, ne miishshaa eratettan goꞌettanawu neeni oottana danddayiyo darobay deꞌees.

WAATANA DANDDAYAY?

Neeyyo deꞌiyagaappe aaro miishshaa kessoppa. Neeni hegaadan oottiyaba gidikko, woppu gaasanne qoppennan merettiyabawu qanxxiyo miishsha xayakka.

Neeyyo deꞌiya miishshaappe aaruwa kessennan agganawu, ne demmiyonne kessiyo miishshaa xaafada halchchuwa kessa. Hegaadan oottiyo wode, neeyyo tumuppe koshshiyabata shaakka era. Yaatada, neeni demmiyonne kessiyo miishshay laamettiyo wode, neeni halchchidobaakka laammada hegaa mintta kaallanawu neeyyo danddayettidabaa ootta. Neeni ekkidaba woy gelidaba gidikko, kuuyiyo wode ubban ne azinaara woy machcheera zoretta.

Hagaa mala: Issibaa oohiyan gidennan, danddayikko miishshaa qanxxada shamma. Issoti issoti hegaadan oottiyogan kaseegaappe aaruwan bantta miishshaa maara goꞌettidosonanne acotennan deꞌidosona. Neeni aginaa giddon bankkiyan ay keena miishshaa wottidaakko woy kessidaakko qonccissiya xuufiya zaarettada xeellanawu wodiya bazza. Neeyyo woysu miishshay deꞌiyakko eriyo wode, darin unꞌꞌettennan aggana danddayaasa.

Neeyyo deꞌiyagaappe aaro miishshaa mule kessennan deꞌiyogee metiyaba. Shin loytti qoppidi halchchuwa kessiyogee keehi maaddana danddayees. Qassi miishshaabawu keehi unꞌꞌettennan deꞌana danddayaasa.

‘Polanawu koshshiyabay deꞌiyogaa koyro uttada qoppa.’—Luqaasa 14:28.

Ne oosuwan takkanawu minnada ootta. Oosuwan takkanawu waatana danddayay? Amaridaageeti hageeta: Oosuwa pooꞌissennan gakka. Ne oosuwabaa ubbatoo loꞌꞌobaa qoppa. Maaddiyabaa oottanawu koyiyogaa bessa, qassi minnada ootta. Harata bonchcha, kaaletota kaalla, qassi oosuwan kaseegaappe aaruwan qara gidanawu baaxeta.

Koshshennabawu miishshaa kessoppa. “Darin koshshennabawu woy tana qohiyabawu miishshaa kessiyanaa?” gaada nena oychcha. Leemisuwawu, daro asay jallettiyabaa goꞌettanawu, ceeriya kaaꞌanawu, sijaaraa sarbbanawu woy ushshaa bessiyagaappe aaruwa uyanawu daro miishshaa kessees. Ha iita meezeti eta payyatettaa qohananne eti oosuwa xayanaadan oottana danddayoosona.

“Aadhdhida eratettaa demmiya urai . . . anjjettidaagaa. Aissi giikko, appe demmiyo go77ai biraappe demmiyo go77aappe aadhdhees”—Leemiso 3:13, 14.

Qoppennan merettiyabawu miishshaa minjja. Danddayettikko, qoppennan merettiyabawu amarida miishshaa minjja. Ha miishshay neeni woy ne soo asay sahettiyode, oosuwa xayiyode, woy hara qoppibeennabay merettiyo wode neeni daro unꞌꞌettennaadan maaddana danddayees.

‘Wodee oottiyobaynne qoppennan gayttiyabay nuna ubbaakka gakkees.’—Eranchchaa 9:11, NW.

Miishshaa Qoraphphanawu Maaddiyabata

Darotoo qumaa son katta.

Darotoo quma keettaa biidi miyogee woy kaꞌida qumaanne uyiyobaa ubbatoo shammiyogee daro miishshaa kesissana danddayees. Qumaa son kattanawu daro wodiyanne wolqqaa koshshiyogee tuma gidikkonne, yaatiyogan daro miishshaa qoraphphana danddayaasa. Qassi loꞌꞌo qumaa doorada kattana danddayaasa.

Shammiyobaara gayttidaagan cincca gida.

Shammanabata xaafa oyqqa, qassi xaafidobaa kaalla. Halchchabeennabaa shammoppa.
Miishshay deꞌiyaba gidikko, hiraysiyo wodiyan daruwa shamma wotta. Gidikkonne, issibay moorettidi coo olettennaadan, wottanawu loꞌꞌo sohoy deꞌiyakkonne shaakkada era.
Muruta gidikko xeellada hiraysiyagaa shamma.
Hiraysiyagaa demmanawu, suuqiya baada qoppabeennabaa shaammennan agganawu, qassi neeni ay keena miishshaa kessiyakko eranawu intternneetiyan shamma. Ne deꞌiyo heeran intterneetiyan zalꞌꞌiyogee meeze gidikko, neenikka ayssi mala beꞌikkii?
Suuqeti gatiya menttidi hiraysuwan bayzziyo wodiya wochcha. Korinttiya, haattaanne hegaa mala harabata gujjin, ubbabaa gatiya issisaagaa harasaagaara geeddarissa.

Oorattabaa shammanaappe kase loytta qoppa.

Silkkiyanne hegaa malabaa medhdhiyageeti bantta woriya gujjanawu, medhdhiyobaa ubbatoo ooraxissoosona. Yaatiyo gishshawu, takki gaada hagaadan qoppa: ‘Ooraxissidoogaa shammiyogee tumuppe tana goꞌꞌiyabee? Taani oorattaa haꞌꞌi shammana koshshii? Oorattaa shammiyaba gidikko, tumuppe taani mata wode kiyidaagaa shammana koshshii?’

Moorettidabaa giigissa; qassi issibaa zaarettada goꞌetta.

Issibay daro wodiyawu takkanaadan loytta oyqqa, qassi miishshaa qoraphphanawu maaddikko, hegee moorettiyo wode giigissa. Kase hara asi goꞌettidobaa shammiyogankka miishshaa qoraphphana danddayaasa.

Shammiyogaappe zera woy tokka.

Miyobaa zeriyo woy tokkiyo sohuwa giigissana danddayay? Miyobaa zeriyaba woy tokkiyaba gidikko, so asawu qumaa shammanawu daro miishshaa kessennan aggana, bayzzana woy haratuyyo immana danddayaasa.

“Mino oosanchchaa halchchoi dureyees.”—Leemiso 21:5.

“Nuuni darotoo shammiyobatu gatiya ubbatoo zaarettidi xeelloos, qassi oohiya karddiya awude awude goꞌettanaakko akeekan qoppoos.”—Mayliza, Inglandde.

“Taaninne ta soo asay miyobaa shammanaappe kase nuuyyo koshshiyaabaa ubbatoo xaafoos.”—Jerema, Amarkkaa.

“Nuuni shammanawu qoppidobawu gidiya miishshay deꞌiyakkonne ubbatoo yiggi xeelloos, qassi qoppennan merettiyabawu miishshaa qoraphphoos.”—Yaaꞌeelo, Israaꞌeele.

“Nu naati oorattabaa shammiyogaappe meqqidabaa giigissanaadan tamaarissida. Hegeetu giddon, nu kaameenne son goꞌettiyobati deꞌoosona. Qassi, danddayettida keenan taaninne ta keettaayyiya mati kiyidabaa shammokko.”—Jefra, Amarkkaa.

“Ataakilttiya tokkiyogaaninne kuttuwa haariyogan miishshaa qoraphphaas. Ubba ta tokkido ataakilttiyappe amaridaagaa asawu immaas.”—Hona, Miyanmaare.

Darkkoppe dumma dumma ataakilttetta shiishshiya bitaniya.