Muusee Baqatido Gaasuwaa

MUUSEE Gibxxeppe woxxiiddi biyaagaa beꞌa. A yedettiya asata beꞌay? Eti Muusa woranau koyiyoy aybissakko eray? Ane nu hegaa erana danddayiyakkonne beꞌoos.

Muusee, Gibxxe biittaa haariya Paaroona son dicciis. I keehippe eranchchanne gita asa gidiis. Muusee, i Gibxxe biitta asa gidennaagaanne a yelidaageeti aylle gidida Israaꞌeeleta gidiyoogaa eriis.

Muusessi layttay 40 kumido wode, issi gallassi, ba asay waanidi deꞌiyaakko beꞌanau qofaa qachchiis. Harati, eta iita hanotan oyqqidosona. Issi Gibxxe bitanee, Israaꞌeela asa gidida issi aylliyaa wadhdhishin beꞌiis. Muusee yaa haa xeellidi, ooninne baynnaagaa beꞌinne Gibxxe bitaniyaa shocin, he Gibxxe bitanee hayqqi aggiis. Hegaappe Muusee bitaniyaa ahaa shafiyaa giddon qottiis.

Wonttetta gallassikka Muusee ba asaa beꞌanau simmidi biis. Eti aylletettaappe kiyanaadan i maaddana danddayiyaabadan qoppiis. SHin naaꞌꞌu Israaꞌeeleti warettiyaageeta Muusee beꞌidi, mooranchchaa: ‘Neeni ne ishaa ayssi dechchay?’ yaagiis.

Bitanee: ‘Nena nu bolli haariyaagaanne daanna ootti sunttiday oonee? Neeni he Gibxxe bitaniyaa woridoogaadan, tanakka worana qoppayiyye?’ yaagiis.

He wode Muusee yayyiis. I Gibxxe bitaniyaa bolli oottidobaa asay eridoogaa eriis. Ubba Paaroonikka hegaa siyidi, Muusa woranaadan asaa kiittiis. Muusee Gibxxeppe baqatana koshshidoy hegaassa.

Muusee Gibxxe biittaappe kiyidi, Midiyaama giyo haaho biitti biis. Yan Yatiro soo asaara gayttidi, a macca naatuppe Xippaaro geetettiya issinno ekkiis. Muusee dorssa henttanchcha gididi, Yatiro dorssata heemmiis. I Midiyaama biittan 40⁠u laytta deꞌiis. He wode assi 80⁠u laytta. Hegaappe issi gallassi Muusee Yatiro dorssata heemmishin, a deꞌuwaa muleera laammida issi garamissiyaabay haniis. Kaalliya sinttaa ne kessin, he garamissiyaabay aybakko ane beꞌoos.