Eexxiya Buuraa

MUUSEE ba dorssatussi maataa demmanau Korebe deriyaa gakkanaashin biis. He sohuwan issi eexxiya buuraa beꞌiis shin, tamay he buuraa meenna!

Muusee: ‘Hagee oorattaba; taani hagaa loytta beꞌanau a mati shiiqana’ yaagidi qoppiis. I shiiqin, buuraa giddoppe cenggurssay: ‘Haa shiiqoppa. Neeni eqqido biittay geeshsha gidiyo gishshau, ne tohuwan deꞌiya caammaa kessa’ yaagiis. Kiitanchchaa baggaara ayyo haasayiday Xoossaa gidiyo gishshau, Muusee ba somꞌꞌuwaa genttiis.

Hegaappe Xoossay yaagiis: ‘Taani Gibxxe biittan ta asay tuggatiyo tuggaa beꞌaas. Yaatiyo gishshau, ta eta he tuggaappe kessana; ta asaa Gibxxeppe kaalettada kessanaadan ta kiittiyoy nena’ yaagiis. Yihooway ba asaa loꞌꞌiya Kanaane biitti ehaana hanees.

SHin Muusee yaagiis: ‘Taani oonashin; hegaa ta waata oottana danddayiyanaa? Gido shin, taani bin Israaꞌeeleti, “Nena kiittiday oonee?” giikko taani woyganee?’ yaagiis.

Xoossay: ‘Neeni gaanay hagaadaana’ yaagiis. “‘YIHOOWAY Abrahaama Xoossay, Yisaaqa Xoossay, Yaaqooba Xoossay, i tana inttekko kiittiis.’” Qassikka Yihooway gujjidi: ‘Hagee merinau ta suntta’ yaagidi zaariis.

Muusee: ‘Tana kiittiday nena gidiyoogaa yootin, eti ammanennan ixxikko shin’ yaagidi zaariis.

Yaagin Xoossay: ‘Ne kushiyan deꞌiyaagee aybee?’ yaagidi oychchiis.

Muusee: ‘Xamꞌꞌaa’ yaagiis.

Xoossay: ‘Ane a saꞌan ola’ yaagiis. Muusee olin, xamꞌꞌay shooshsha kiyiis. Hegaappe Yihooway Muusa hara malaataa bessiis. ‘Ne kushiyaa ne maayuwaa giddo naaqqa’ yaagiis. Muusee hegaadan oottin, i kessiyo wode a kushee shachchadan booxxiis! A kushee baruwaa giyo iita harggiyan oyqettidaba milatiis. Kaallidi Yihooway Muusessi heezzantto malaataa oottanaadan wolqqaa immiis. Wurssettan Yihooway: ‘Ne ha malaatata oottiyo wode Israaꞌeeleti taani nena kiittidoogaa ammanana’ yaagiis.

Hegaappe guyyiyan, Muusee soo biidi Yatiroyyo: ‘Taani Gibxxe biittan deꞌiya ta dabboti waanidi deꞌiyaakko beꞌanaadan hayyana yeddarkkii’ yaagiis. Hegaa gishshau, Yatiroy saro ba yaagin, Muusee Gibxxe biitti guyye simmidi biyoogaa doommiis.