Zoꞌo Abbaa Pinniyoogaa

AYBI haniiddi deꞌiyakko xeella! Ba gatimaa Zoꞌo Abbaa bolli miccidaagee Muusa. Aara abbaappe issi baggan saruwan pinnidi eqqidaageeti Israaꞌeeleta. SHin Paarooninne a wotaaddarati ubbay abban muuhettiiddi deꞌoosona. Hegee waanidi hanidaakko ane beꞌoos.

Nuuni tamaaridoogaadan, Xoossay Gibxxetu bolli 10⁠tta boshaa yeddi simmin, Paarooni Israaꞌeeleti Gibxxeppe kiyidi baanaadan yootiis. Daro maccaasay, naatinne 600,000 gidiya attuma asay kiyiis. Qassikka, Yihoowan ammanida cora qooday deꞌiyo hara walaha asay, Israaꞌeeletuura kiyiis. Hegeeti ubbay bantta dorssaa, deeshshaanne mehiyaa ekkidi kiyidosona.

Israaꞌeeleti kiyanaappe kase, maayuwaanne birappenne worqqappe oosettidabaa banttau immanaadan Gibxxeta oychchidosona. Gebxxeti bantta bolli gakkida wurssetta boshaappe denddidaagan, keehippe yayyidosona. Hegaa gishshau, Israaꞌeeleti eta oychchidoba ubbaa immidosona.

Guutta gallassay aadhdhi simmin, Israaꞌeeleti Zoꞌo Abbaa gakkidosona. Yaa gakkidi shemppidosona. Paarooninne a asati Israaꞌeeleta yeddidi, gamꞌꞌennan yiillotiyoogaa doommidosona. Eti: ‘Nuuni nu aylleta yeddiichchida!’ yaagidosona.

Hegaa gishshau, Paarooni zaarettidikka ba qofaa laammiis. I eesuwaara ba ola para gaaretanne ba wotaaddarata shiishshiis. Hegaappe, 600⁠u dumma para gaaretanne Gibxxen deꞌiya hara gaareta ubbaa ekkidi, Israaꞌeeleta yedettiyoogaa doommiis.

Israaꞌeeleti Paarooninne a wotaaddarati bantta geeduwaa yiyaageeta beꞌido wode, keehippe yayyidosona. Baqatidi biyo sohoy baawa. Etappe sinttaara Zoꞌo Abbay deꞌees; qassi guyyeera Gibxxeti yiiddi deꞌoosona. SHin Yihooway ba asatuppenne Gibxxetuppe gidduwaa shaaraa mayssiis. Hegaa gishshau, Gibxxeti Israaꞌeeleta qohanau beꞌana danddayokkona.

Hegaappe Muusee ba gatimaa Zoꞌo Abbaa bolli miccanaadan Yihooway yootiis. Hegaadan i oottin, Yihooway away kiyiyo baggappe wolqqaama carkkuwaa carkkissiis. Abbaa haattay naaꞌꞌau shaahettidi naaꞌꞌu baggaarakka sitti giidi eqqi bayiis.

Hegaappe, Israaꞌeeleti abbaa giddon mela biittaara pinniyoogaa doommidosona. Miilooniyan qoodettiya asaynne eta meheti ubbay saruwan abbaa pinni kiyanau daro saatiyaa ekkiis. Wurssettan Gibxxeti Israaꞌeeleta zaarettidi beꞌana danddaydosona. Eta aylleti biichchoosona! Yaatiyo gishshau, eta kaallidi abbaa giddo eesoti gelidosona.

Eti gelin, Xoossay eta para gaaretu goomay kolettanaadan oottiis. Gibxxeti keehi yayyidi: ‘Yihooway Israaꞌeeleta maaddidi nuna oliiddi deꞌees. Haggaappe kiyoos’ yaagidi waassiyoogaa doommidosona. SHin hegau wodee aadhdhiichchiis.

Ne ha misiliyan beꞌidoogaadan, Muusee ba gatimaa Zoꞌo Abbaa bolli miccanaadan Yihooway yootidoy he wodiyaana. Muusee gatimaa miccin, godadan eqqida haattay guyye simmi goggidi, Gibxxetanne eta para gaareta ubbaa kammi bayiis. Olanchchati ubbay Israaꞌeeleta kaallidi zoꞌo abbaa giddo gelidosona. Yaatiyo gishshau, Gibxxetuppe issi asinne paxa attibeenna!

Xoossaa asati ubbay attidoogan ay keena ufayttidonaa! Attuma asay ubbay Yihoowa galatiiddi: ‘Yihooway wolqqaama xoonuwaa xooniis. Paraanne paraa toggidaageeta i abban oliis’ yaagidi yexxidosona. Muuse michchiya Miiriyaama ba karaabiyaa ekkin, maccaasati ubbay bantta karaabiyaa karaabiyaa ekkidi o kaallidosona. Eti ufaytti duriiddi: ‘Yihooway wolqqaama xoonuwaa xooniis. Paraanne paraa toggidaageeta i abban oliis’ yaagidi attumaasati yexxiyo yettaa yexxidosona.